ZASEŊƆ 43
Kristakɔma Nari Ti Ba Geele Daam Yele La Wani?
Tingɔŋɔ wa poan, nɛreba n geele daam yele se’em la boi la to’ore to’ore. Saŋa ase’a, nɛreba basɛba ni naɛ la ba zɔdoma nyu daam. Sɛba me ni loe ti ba kan makɛ nyu daam. Basɛba me ni kɔ’ɔn nyu mɛ ta buge. Baabule la pa’alɛ daam yele la wani?
1. Daam nyua dela be’em?
Baabule la ka tɔɣɛ zɛregɛ daam nyua. La tuɣum dɛna se’em dela, ho san bisɛ yelesoma se’a ti Naayinɛ dekɛ bo to la, daam laɣum pa’asɛ mɛ. Baabule la yeti “daam me basɛ ti a asaala suure nyɛɛna” mɛ. (Yooma 104:14, 15) Sakerɛ nɛreba basɛba ti Baabule la tɔɣɛ ba yele la yuun nyu daam mɛ.—1 Timoti 5:23.
2. Bem ka’aŋɔ ti Baabule la dekɛ bo sɛba n loe ti ba nyuura daam la?
Yehowa ka boti nɛra n nyuuri daam zɔ’ɔra bii bugera. (Galatia 5:21) A Yetɔɣum la yeti: “Da pa’asɛ sɛba n nyuuri daam zo’e zo’e la poan.” (Magaha 23:20) Bala la, to san bɔna la to ma’a nyuura daam bii to naɛ la nɛreba nyuura, la ka nari ti to nyu ta gaŋɛ ti la tee to ti’isegɔ, yetɔɣum, itigɔ bii daam to imma’asum. To san ka ta’an nyuura daam maɣesa, la wan ana soŋa ti to kɔ’ɔn tiregɛ basɛ ba nyua.
3. To wan eŋɛ la wani kan zɛregɛ nɛra n loe se’em, daam nyua poan?
Nɛra woo nari ti a loe ti a nyu daam bii a kan nyu. To ka nari ti to zɛregɛ nɛra n nyuuri daam maɣesa. La me ka nari ti to pɛregɛ nɛra n ka boti a nyu daam ti a nyu. (Arom 14:10) To ta’an loe ti to kan nyu se’ere n sɔi la, to ta’an nyu mɛ ti la daam nɛreba. (Kaalɛ Arom 14:21.) To eeri la “[to] tadaana n boti sɛla ge daɣɛ [tomesi] n boti sɛla.”—Kaalɛ 1 Korint 10:23, 24.
VIISƐ PA’ASƐ
Ti’isɛ bisɛ Baabule naresum yɛla n wan ta’an soŋɛ ho se’em ti ho loe ti ho nyu daam bii ho da nyu la hon wan nyu makɛ ma’a se’em. Leyɛ’ɛsa, ti’isɛ bisɛ hon wan eŋɛ se’em ho san nyuura daam ti la daana hɔ.
4. Ti’isɛ bisɛ ho nyu daam bii ho da nyu
Yezu yuun geele daam nyua la wani? Ho san ɛɛra ho nyɛ lebesego la, geele bisɛ eŋa n yuun tum yelekiriga sɛka yia la. Kaalɛ Yon 2:1-11 ge nyaa sɔsɛ sokere ana wa:
-
Yezu yelekiriga wa poan, tomam wan zamesɛ la bem la eŋa n geele daam yele se’em la sɛba n nyuuri daam la?
-
Yezu n yuun ka zɛregɛ daam nyua la zuo, Kristabia nari ti a geele nɛra n nyuuri daam la wani?
Ge Kristabia n nyuuri daam ka pa’alɛ ti yɛm boi bim ti a nyuura daam saŋa woo. Kaalɛ Magaha 22:3 ge nyaa geele bisɛ yele ana wa n wan ta’an soŋɛ ho se’em ti ho loe ti ho wan nyu daam bii ho da nyu:
-
Ho san yeti ho tuke bii ho dekɛ maɣazim tum tuuma.
-
Ho san dɛna pɔɣepuadaana.
-
Dɔgeta san yele ho ti ho da nyuura daam.
-
Ho san ka tana nyuura daam maɣesa.
-
Lɔɔ san ka bo ho sore ti ho nyu daam.
-
Ho san bɔna la nɛresɛka n ka nyuuri daam se’ere n sɔi la, a tabelɛ nyu la daam ti la daam en.
La wan ana soŋa ti ho tara daam tɔ̃ta nɛreba pɔɣedire poan bii nɛreba san laɣum taaba ti ba sɔsɛ? Ho san ɛɛra ho baŋɛ sɛla n wan ta’an soŋɛ hɔ ti ho kɔ’ɛ puti’irɛ soŋa, ŋmɛ VIDIYO la.
Kaalɛ Arom 13:13 la 1 Korint 10:31, 32. Ho san kaalɛ Baabule gulesegɔ wa woo ba’asɛ, sɔsɛ sokere wa:
-
Baabule naresum yele wa wan ta’an soŋɛ ho la wani ti ho ta’an kɔ’ɛ puti’irɛ ti Yehowa puurɛ pee?
Kristabia woo nari ti a geele bisɛ a nyu daam bii a da nyu. A san puɣum nyuura daam, saŋa ase’a boi mɛ ti a kan nyu
5. Loe hon wan nyu daam makɛ se’em
Ho san loe ti ho nyu daam, tɛra yele wa: La boi bim ti Yehowa ka zɛregɛ daam nyua ge a ka boti to nyuura daam zɔ’ɔra. Bem zuo? Kaalɛ Hosea 4:11, 18 ge nyaa sɔsɛ sokere wa:
-
Nɛra san nyu daam zo’e, bem n wan ta’an eŋɛ?
To wan eŋɛ la wani kan nyuura daam zɔ’ɔra? La nari ti to nyuura daam maɣesa bii to mina to tɔregɔ beene. Kaalɛ Magaha 11:2 ge nyaa sɔsɛ sokere wa:
-
Bem zuo ti la ana soŋa ti ho kɔ’ɔn mina hon wan nyu daam makɛ ma’a se’em?
6. Sɛla n wan ta’an soŋɛ nɛra ti a kan nyuura daam zɔ’ɔra
Bisɛ sɛla n soŋɛ buraa ayima ti a ka le nyuura daam zɔ’ɔra. Ŋmɛ VIDIYO la ge nyaa sɔsɛ sokere ana wa:
-
Vidiyo la poan la, daam nyua yuun sa’am Dmitry la wani?
-
A yuun basɛ daam nyua la buyina?
-
A yuun eŋɛ la wani basɛ a daam nyua la?
Kaalɛ 1 Korint 6:10, 11 ge nyaa sɔsɛ sokere ana wa:
-
Daambuka ka ani soŋa la wani?
-
Bem n pa’alɛ ti nɛra san nyuura daam zɔ’ɔra, a ta’an tee?
Kaalɛ Matu 5:30 ge nyaa sɔsɛ sokere wa:
-
Yezu n yuun makɛ ti nɛra nari ti a ŋmaɛ a nu’o basɛ la, pa’alɛ ti to nari ti to basɛ yɛla ase’a to san bɔta ti Yehowa puurɛ pee. Ho nari ti ho eŋɛ la wani ho san ziɣera ti ho basɛ daam zo’e zo’e nyua? a
Kaalɛ 1 Korint 15:33 ge nyaa sɔsɛ sokere wa:
-
Ho zɔdoma wan soŋɛ bii sa’am ho la wani daam nyua poan?
NƐRA TA’AN SOKE YETI: “Daam nyua dela be’em yoi?”
-
Hon wan lebese la wani?
YELEKPINE
Yehowa n bo to daam ti to nyɛɛna ge a ka boti daambuka bii nɛra n nyuuri daam zɔ’ɔra.
Tiisegɔ Sokere
-
Baabule la pa’alɛ daam yele la wani?
-
To san nyuura daam zɔ’ɔra, bem daaŋɔ n boi bim?
-
To wan eŋɛ la wani kan zɛregera nɛra n kɔ’ɛ a puti’irɛ se’em daam nyua poan?
Ɛ BISƐ
Bunbilipaalesi nari ti ba bisɛ la bem ge ta’an kɔ’ɛ ba puti’irɛ soŋa daam nyua poan?
Zamesɛ baŋɛ sarɔtɔ se’a ti ho wan ta’an doose basɛ daam zo’e zo’e nyua.
Kristabia nari ti a zɛkɛ daam nyuusum ge nyaa nyu?
“Sokese’a Ti Nɛreba Sɔkera” (The Watchtower, February 15, 2007)
Kaalɛ zi’iregɔ poan yele la n de “Mam Daa Nyuuri La Daam Ti La Ka Tana Ita” baŋɛ buraa ayima n yuun eŋɛ se’em basɛ daam zo’e zo’e nyua.
“Baabule La Teeri Nɛreba Vom Mɛ” (The Watchtower, May 1, 2012)
a Nɛresɛba n ba’ɛ nɔŋɛ daam nyua nari ti ba nyɛ dɔgetadoma ti ba soŋɛ ba. Dɔgetadoma zo’e zo’e yeti sɛba n tabelɛ nyuura daam zɔ’ɔra ka nari ti ba le nyuura daam.
Ho Me Ta'an Bɔta Yele Ana
SOKESE’A TI NƐREBA SƆKERA
Bem Baabule Zamesegɔ N Bala Ti Yehowa Sɛɛradoma Ita La Nɛreba?
Hon la Yehowa Sɛɛradoma san zamesa Baabule la, ho ta’an tara homea Baabule la kaala, zamesegɔ la poan. Ho ta’an yele ho yire nɛreba za’a la ho zɔdoma ti ba laɣum kelese zamesegɔ la.
