Beni n sɔi ti to puurɛ pee la to yuunɛ woo laɣesegɔ la? Wuu diimi Israeldoma la, zina beere wa me, laɣesegɔ dela yɔ’ɔ bo to ti to ni laɣum la to mabiisi zo’e zo’e pu’usa Yehowa. To ni nyɛ la vo’osum poan dia zo’e zo’e n bo’ori to pupeelum. To puurɛ ni pee mɛ la to ni naɛ la to zɔdoma la to deodoma sɔsa la. To puurɛ n ni pee la laɣesegɔ la zuo ti to ni bɔta ti to keŋɛ dabesa atã la za’a.

To ni san nyɛ yɔ’ɔ ti to laɣesɛ taaba, to ni ka ti’isa la tomea ma’a yele ge to ni ti’isa la to wan eŋɛ se’em pa’alɛ ti to tari nɔŋerɛ bɔ’ɔra nɛreba. (Ga 6:10; Heb 10:24, 25) To san deŋɛ zɛ’an bo tomea ma’a ge basɛ ti basɛba me nyɛ zi’irego zɛ’an, to ni eŋɛ pa’alɛ ti to ka ti’iseri la tomea ma’a yele. (Flp 2:3, 4) Laɣesegɔ ni bo to la yɔ’ɔ kãtɛ ti to nyɔɣera zɔtɔ. Ge ti laɣesegɔ la nyaa pɔsɛ bii vo’osego la laɣesegɔ la ba’asegɔ saŋa poan, to ta’an dekɛ sankaŋa sɔsɛ la nɛreba ti to ka mina. (2Ko 6:13) To wan nyɛ zɔdoma n wan bɔna bala wuusa! Sɛla n gani za’a la, nɛreba san nyɛ to tari nɔŋerɛ se’em bɔ’ɔra taaba la, ba me wan bɔta ti ba laɣum la tɔ ti to pu’usa Yehowa.​—Yon 13:35.

BISƐ VIDIYO LA ZUO N DE “NƆŊERƐ KƆ’ƆN BƆNA LA BALA WUUHA”! SATEŊA LAƔESEGƆ GE NYAA LEBESE SOKERE ANA WA:

• Sore kani poan ti mabiisi yuun eŋɛ pa’alɛ ti ba tari nɔŋerɛ la ba yuun to’e saama n yuun keŋɛ 2019 sateŋa laɣesegɔ la?

• Beni n sɔi ti nɔyinɛ la nɔŋerɛ n boi Yehowa nɛreba teŋasuka la ka tara makerɛ?

• Krista nɔŋerɛ la bɔba ani ti Tigere Zuo Bisegadoma la yuun tɔɣɛ de yele?

• Sore kani poan ti Krista nɔŋerɛ la basɛ ti nɔyinɛ bɔna mabiisi n boi Germany la South Korea teŋasuka?

• La nari ti to lu to suure eŋɛ la bem?