Kɔ’ɔn pɔsɛ January 2018 poan la, na’am mɔɔlegɔ sɔsega la puɣum bɔna la Tomam Kristakɔma Vom La To Na’am Tuuma​—Zamesegɔ Gɔŋɔ la nɛŋa. To wan ta’an dekɛ a tum tuuma la wani?

Ho San Tara Tuunɛ Sukuu Poan: Ho ta’an dekɛ sokere, gulesegɔ bii tɔ̃kɛ sokere la n boi na’am mɔɔlegɔ sɔsega la poan tum tuuma. Bala ka pa’alɛ ti ho kɔ’ɔn dekɛ yetɔɣesebo n boi na’am mɔɔlegɔ vidiyo la mea nɔɔ tum tuuma. Ho ta’an tee bɔŋa la yele la, ho pɔsega yetɔɣum la, hon wan sɔsɛ se’em la yelese’a n wan pa’asɛ. La san puɣum ka pa’asɛ pa’alegɔ la poan, ho ta’an kelum dekɛ gɔŋɔ n boi to Pa’alegɔ Lɔɣɔrɔ Daka la poan tum tuuma.

Hon San Bɔna Na’am Mɔɔlegɔ Poan: Na’am mɔɔlegɔ sɔsega la soŋeri to mɛ ti to mina sɔsega. Nɛra san eŋɛ pa’alɛ ti a boti sɔsega la mɛ, ho ta’an dekɛ lebe ta bisɛ sɔsega la tɔ̃kɛ. Ho ta’an malum ŋmɛresɛ na’am mɔɔlegɔ sɔsega la bii ho tee sɔsega la. Daanse’ere yelezure bii Baabule gulesegɔ boi ti nɛreba n boi to gingilega la poan wan bɔta ti ba kelese? Nɛresɛba n boi ho gingilega la poan nɔŋɛ ba kɛlesa lasebaarɛ yɛla bii yelese’a n iti ba gingilega la poan? Bala la, hon yeen loe na’am mɔɔlegɔ sɔsega sɛka, la dela ho ‘ita dena wa woo yelesoma la zuo ti ho ta’an laɣum mɔɔlɛ bo nɛreba.’​—1Ko 9:22, 23.