Baabule zamesegɔdaana san wan basɛ ti Yehowa puurɛ pee, la nari ti a tara sakerɛ n kpe’em. (Heb 11:6) To san dekɛ Tara Vom Somɔ Daarewoo! gɔŋɔ la pa’ala ba, la wan kɛ̃ ba suure. Zamesegɔ gɔŋɔ wa tari la Baabule gulesegɔ, sokese’a n di mi’a, vidiyodoma n kɛ̃’ɛri suure la fɔɔra n som pa’ala yɛla ti la niɛ peelum. Ho san soŋɛ ho Baabule zamesegɔdoma ti ba tara Kristakɔma halisoma la bɔnsoŋa la Naayinɛ, bala wan basɛ ti ba zɛ’a kankaŋi.​—1Ko 3:12-15.

Nɛreba basɛba ti’isɛ ti ba ka nyɛti Naayinɛ la zuo ba kan ta’an dɛna a zɔ. La nari ti to soŋɛ ba ti ba sakerɛ kpe’em Yehowa n tari nɔŋerɛ se’em la poan.

BISƐ VIDIYO LA ZUO N DE DEKƐ “TARA VOM SOMƆ DAAREWOO!” GƆŊƆ LA SOŊƐ NƐREBA TI BA SAKERƐ KPE’EM YEHOWA POAN GE NYAA LEBESE SOKERE ANA WA:

• To eŋɛ la wani baŋɛ ti mabipɔka la maasum a zamesegɔ la mɛ soŋa soŋa?

• A eŋɛ la wani dekɛ sokere ase’a tum tuuma soŋɛ zamesegɔdaana la ti a ti’isɛ Isaiah 41:10, 13?

• Baabule gulesegɔ la Vidiyo la soŋɛ zamesegɔdaana la, la wani?

Nɛreba zo’e zo’e ka bɔkɛ lua bunɔ la bii ba ka ti’isɛ ti la dela bo’olum ti Naayinɛ bo ba. (Ga 2:20) Bala zuo la, la nari ti to soŋɛ ba ti ba sakerɛ kpe’em Yezu lua bunɔ la poan.

BISƐ VIDIYO LA ZUO N DE DEKƐ “TARA VOM SOMƆ DAAREWOO!” GƆŊƆ LA SOŊƐ NƐREBA TI BA SAKERƐ KPE’EM YEZU POAN GE NYAA LEBESE SOKERE ANA WA:

• To eŋɛ la wani baŋɛ ti mabia la maasum a zamesegɔ la mɛ soŋa soŋa?

• A eŋɛ la wani ta’an dekɛ sɛla n boi “Ɛ Bisɛ” bɔberɛ la poan la soŋɛ a zamesegɔdaana la?

• Beni n sɔi ti la dɛna ninmɔ’ɔrɛ ti to zusera bɔ’ɔra to Baabule zamesegɔdoma?