La kan yue, Yehowa n tari sugeri se’em la tingɔŋɔ wa la wan wa’an de ba’asegɔ. Pumpɔreŋɔ pu’usegɔ wan nyɛ sa’aŋɔ, tisi wan laɣesɛ ti ba zabɛ la Naayinɛ nɛreba ti Yehowa me wan sa’am putɔpa la Armagedon poan. Kristakɔma kɔ’ɔn ana la lɛɛ gura sankana wa.

Yelemɛŋɛrɛ, to ka mi yelese’a za’a n wan ta eŋɛ mɛlesekãtɛ la poan. Makerɛ, to ka mi sansɛka wana mɔpi ti de wan pɔsɛ. To ka mi nalɛɣerɛdoma n wan ta pa’alɛ putɛse’a n sɔi ti ba sa’ana pu’usegɔdoma. To ka mi tisi la n wan daam Naayinɛ nɛreba ta paɛ sansɛka bii yelese’a ti ba wan ta eŋɛ pa’asɛ. To me ka mi Yehowa n wan doose sarɔsɛka wana mɔpi sa’am putɔpa la Armagedon poan.

Ge Baabule la pa’alɛ tɔ yelese’a woo n nari ti to mina ta’an tara suure lua la sukpe’ene gura yelese’a n wan ta eŋɛ beere sa’am la. Makerɛ, to mi ti to boi la “ba’asegɔ dabesa la” ki’ileŋɔ bɔba. (2Ti 3:1) To mi ti Naayinɛ wan “ŋmaɛ dabesa la basɛ” la wan eŋɛ se’em ti pumpɔreŋɔ pu’usegɔ sa’aŋɔ la kan basɛ ti yelemɛŋɛrɛ pu’usegɔ me sa’am. (Mt 24:22) To mi ti Yehowa wan faaɛ a nɛreba basɛ. (2Pe 2:9) To me le mina ti Se’em ti Yehowa loe en ti a sa’am putɔpa ge faaɛ nɛrekuuŋɔ la Armagedon poan la, tari paŋa mɛ ge me dɛna tontɔɔdaana.​—Lil 19:11, 15, 16.

Nɔkpe’ene kai ti yelese’a n wan ta eŋɛ beere sa’am la “dabeem . . . wan basɛ ti nɛreba lige.” Ge to san kaala ge me ti’isa taɣesa Yehowa n yuun faaɛ a nɛreba basɛ se’em diimi sa, la eŋa n basɛ ti to baŋɛ yelese’a n wan ta eŋɛ beere sa’am la, to wan ‘isige ze’ele ge gorege bisɛ saazuo,’ mina ti to faarɛ kɔ’ɔn pɔ̃ra mɛ.​—Lu 21:26, 28.