1. Bia ayima yuun eŋɛ la bem pa’alɛ ti a tari la sakerɛ n kpe’em kum isigere la poan?

 BIA ayima yu’urɛ n de Matthew yuun bɛ̃’ɛri mɛ paa ti ba eŋɛ en ɔperesa zo’e zo’e. Eŋa n yuun de yuuma ayopɔi la, eŋa la a deodoma yuun biseri la JW Broadcasting^® ŋmarega woo yetɔɣum la. Yetɔɣum la ki’ileŋɔ bɔba la, ba yuun nyɛ la vidiyo yuuma n tɔɣeri kum isigere yele. b Ba yuun ba’asɛ la, Matthew yuun paɛ la a dɔɣereba zɛ’an, gurɛ ba nu’usi ge yele ba yeti: “N Ma la n Sɔ, ya nyɛ ya? Hali mam san puɣum ki, Naayinɛ wan isige mam. Ya wan ta gura mam. Bala la, da basɛ ya ti la ba’ɛ daana ya.” Bisɛ dɔɣereba wa puurɛ n wan pee ni se’em la ban baŋɛ ti ba bia wa tari la sakerɛ n kpe’em kum isigere poan la.

2-3. Beni n sɔi ti la ana soŋa ti to ni ti’isa beere sa’am kum isigere la yele?

² Saŋa ase’a la wan ana soŋa ti to ni ti’isa Baabule la n pu’ulum biŋe ti kum isigere wan bɔna la yele. (Yon 5:28, 29) Beni n sɔi? Se’ere n sɔi la, to ka mi se’em ma’a ti bãyaalega wan nyɔkɛ tɔ bii to nɛra wan ki. (Pa. 9:11; Yam. 4:13, 14) To beere sa’am kum isigere puti’irɛ la wan soŋɛ tɔ ti to ta’an ŋmibe yele ana wa poan. (1 Tes. 4:13) Baabule la pa’alɛ tɔ ti, to saazuo Sɔ la mi to mɛ paa ge me nɔŋɛ tɔ. (Lu. 12:7) Yehowa Naayinɛ san wan ta’an isige to, ti to le tara halese’a ti to yuun puɣum tara la, la nari ti a mina to soŋa soŋa. Yehowa nɔŋɛ to mɛ paa ge me yeti to wan ta’an ta vɔna daarewoo. Hali to san puɣum ki a wan isige to!

³ Zaseŋɔ wa poan to wan sɔsɛ baŋɛ sɛla n sɔi ti la nara ti to sakɛ kum isigere yetɔɣebiŋere wa. To wan le bisɛ Baabule  poan yele n kpemeseri giila. La me kɔ’ɔn makɛ mɛ la to zaseŋɔ wa zuo n yeti: ‘Ho tã la wan isige.’ (Yon 11:23) Ba’asegɔ la, to wan zamesɛ baŋɛ to wan eŋɛ se’em pa’alɛ ti to tari sakerɛ kum isigere la poan.

4. To san wan ta’an sakɛ nɛra n yele sɛla, la nari ti to sakɛ la bem to suuren? Bo makerɛ.

⁴ To san wan ta’an sakɛ nɛra n yele sɛla, la dela to sakɛ to suuren ti nɛra la sirum boti ge me tara pansɛka n wan ta’an tum dɛ. Makerɛ, ti’isɛ bisɛ ti kusebego kãtɛ n sa’am ho yire ti ho zɔ wa’ana yele ho yeti, ‘mam wan soŋɛ hɔ ti ho malum mɛ ho yire la.’ A tɔɣɛ la yelemɛŋɛrɛ ti ho me sirum sakɛ ti a boti la a soŋɛ hɔ. A san mina mɛa ge me tara mɛa lɔɣɔrɔ la, ho mi ti a wan ta’an soŋɛ hɔ. Bala la, ho sakɛ eŋa n yele sɛla la mɛ. Ge Naayinɛ n pu’ulum biŋe ti kum isigere wan bɔna la? Hon ti’isɛ ti a sirum boti ge me tara pansɛka n wan ta’an tum dɛ?

5-6. Beni n sɔi ti to wan ta’an yeti Yehowa kɔ’ɔn bɔta a isige sɛba n ki la mɛ?

⁵ Yehowa sirum boti a isige sɛba n ki la? Ɛ̃ɛ, a sirum boti! A yuun basɛ ti nɛreba gulesɛ beere sa’am kum isigere wa yele mɛ ti la bɔna Baabule la poan. (Isa. 26:19; Ho. 13:14; Lil. 20:11-13) Yehowa san ni tɔɣɛ yele, la ni sirum tum mɛ. (Yos. 23:14) Yehowa kɔ’ɔn ana la lɛɛ ti a isige sɛba n ki la. Beni n sɔi ti to wan ta’an yele bala?

⁶ Ti’isɛ Yob n yuun yele sɛla la bisɛ. A yuun tari suure lua ti eŋa san puɣum ki, Yehowa wan isige en. (Yob 14:14, 15.) La me ani Yehowa la bala mea nɔɔ la a yamesi sɛba n ki la. A inya n kiti ti a isige ba ti ba tara imma’asum la pupeelum. La ani Yehowa la wani la sɛba n yuun ka baŋɛ yelemɛŋɛrɛ la ge ki la? To nɔŋerɛ Naayinɛ la kɔ’ɔn bɔta la a isige bama me. (Tm. 24:15) A boti bama me nyɛ yɔ’ɔ mɛ dɛna a zɔdoma ge me vɔna daarewoo tingɔŋɔ wa zuo. (Yon 3:16) La niɛ peelumi ti Yehowa kɔ’ɔn bɔta a isige sɛba n ki la mɛ.

7-8. Beni n sɔi ti to sakɛ ti Yehowa tari pansɛka n wan ta’an isige sɛba n ki la?

⁷ Yehowa tari pansɛka n wan ta’an isige sɛba n ki la? Ɛ̃ɛ! Eŋa n de ‘Gaŋɛ Za’adaana.’ (Lil. 1:8) A tari pansɛka n wan nyaŋɛ a dindoma woo, hali la kum me. (1 Ko. 15:26) La ani to la buɣa buɣa la ton mi wana wa la. Geele Mabipɔka Emma Arnold zirego poan yele la bisɛ. Tingɔŋɔ Wa Za’a Waabi Zaberɛ N Pa’asɛ Buyi la poan, yeledaaŋɔ zo’e zo’e n yuun paɛ eŋa la a deodoma, ba sakerɛ la zuo. Emma yuun buɣelɛ a bia la suure mɛ se’ere n sɔi la, ba nɛreba zo’e zo’e yuun ki mɛ Nazi sarega deo la poan. Emma yuun yele en yeti: “Nɛresɛba n ki la san kan ta’an le isige, bala pa’alɛ ti kum n de to dima la tari paŋa gana Naayinɛ mɛ. Bala me kan ta’an dɛna yelemɛŋɛrɛ!” Sira, sɛsɛla ka tari paŋa gana Yehowa! Gaŋɛ Za’a Naayinɛ la n naam vom la tari pansɛka n wan le isige nɛreba.

⁸ Sɛla n sɔi ti to le mina ti Naayinɛ tari pansɛka n wan isige nɛreba dela, a tɛ̃ri la yɛla ti la ka tara makerɛ. A mi ŋmarebibisi la woo yu’ura mɛ. A me tɛ̃ri to nɛresɛba n ki la mɛ. (Yob 14:13; Lu. 20:37, 38) La wan dɛna naana bo en ti a tɛ̃ra sɛba n ki la yɛla woo, la ban yuun tɛ̃ri yelese’a.

9. Beni n sɔi ti hon sakɛ Yehowa n yeti a beere wan isige sɛba n ki la?

 ⁹ Sira, to wan ta’an sakɛ Yehowa n pu’ulum biŋe ti a wan ta isige nɛresɛba n ki la. Se’ere n sɔi la, to mi ti a sirum boti mɛ ge tara pansɛka n wan ta’an tum dɛ. Geele bisɛ yele deyima me n basɛ ti to sakɛ Naayinɛ pu’ulumbiŋere wa: Yehowa tabelɛ isige nɛreba mɛ. Diimi sa la, a yuun basɛ ti Yezu la a nɛreba basɛba isige sɛba n ki la mɛ. Basɛ ya ti to bisɛ nɛra ayima ti Yezu yuun isige en ti la bɔna Yon a zuo 11.

10. Beni n yuun eŋɛ se’em ma’a ti Yezu yuun ze’ele Betani yakɛ Yordan bɔba ta mɔɔla la ge a yuun eŋɛ la bem? (Yon 11:1-3)

¹⁰ Kaalɛ Yon 11:1-3. Makɛ bisɛ Betani tiŋa n yuun ani se’em yuun 32 Y.B. ba’asegɔ poan. Yezu yuun tari la zɔdoma tinkpɛŋa wa poan. Lazarus la a tãpa bayi​—Mary la Marta. (Lu. 10:38-42) Ge Lazarus n yuun bɛ̃’ɛri la, a tãpa la yuun fabeli mɛ. Yezu yuun boi la Yordan yakenɛ bɔba ti ba dekɛ sɔɔleŋa ta bo en. La yuun de wuu a dekɛ dabesa ayi keŋɛ ta paɛ Betani tiŋa. (Yon 10:40) Nimbaalega la dela, Lazarus yuun ki mɛ ge ti sɔɔleŋa la nyaa paɛ Yezu. La boi bim ti Yezu mi ti a zɔ la ki mɛ ge a yuun kelum bɔna la bilam ta paɛ dabesa ayi ge nyaa keŋɛ Betani. Se’em ma’a ti Yezu yuun ta paɛ bim la ti Lazarus puɣum ki mɛ ti la paɛ dabesa anaasi. Yezu yuun maasum ti a eŋɛ la sɛla soŋɛ a zɔdoma la ge ti la me dɛna na’asegɔ bɔ’ɔra Naayinɛ.​—Yon 11:4, 6, 11, 17.

11. To zamesɛ zɔtɔ nyɔka yele la wani yele wa poan?

¹¹ To zamesɛ la zɔtɔ nyɔka yele wa poan. Geele bisɛ: Mary la Marta n yuun dekɛ sɔɔleŋa bo Yezu la, ba yuun ka yele en ti a wa’an Betani tiŋa na. Ba yeen yele en mɛ ti a zɔ la bɛ̃’ɛri mɛ. (Yon 11:3) Lazarus n yuun ki la Yezu yuun ta’an kɔ’ɔn ze’ele ni eŋa n boi zɛ’an la ge isige en. Ge hali la bala za’a, Yezu yuun keŋɛ Betani mɛ ti a ta bisɛ Mary la Marta. Hon tari zɔ ti yele ni paɛ hɔ ti a ni eŋɛ kalam wa’ana soŋɛ hɔ? La san dɛna bala, mina ti ho wan ta’an dekɛ homea delum en ‘yele san paɛ hɔ.’ (Mag. 17:17) Wuu Yezu n yuun ani se’em la, basɛ ya ti to dɛna zɔdoma n ani bala! Nananawa, basɛ ya ti to le lebe ya Gulesegɔ la poan ge bisɛ sɛla n le eŋɛ.

12. Yezu yuun yele Marta la bem ge beni n sɔi ti la yeen daɣɛ nɔɔrɛ yetɔɣum? (Yon 11:23-26)

¹² Kaalɛ Yon 11:23-26. Marta n yuun baŋɛ ti Yezu pɔ̃ri la Betani na la, a yuun eŋɛ la kalam zɔ tu’usɛ en ge nyaa yɛta en yeti: ‘N Daana, ho san boi ni kalam, mam tã wa kan ki ni.’ (Yon 11:21) Yelemɛŋɛrɛ, a yuun wan ta’an tibɛ ni Lazarus. Ge Yezu yuun tuɣum bɔta ti a eŋɛ la sɛla n ka tari makerɛ. A yuun yeti: ‘Ho tã la wan isige.’ A yuun le yele Marta la sɛla n sɔi ti la nara ti a tara sakerɛ la sɛla ti a yele la ti: ‘Mam n de kum isigere la vom la.’ Sira, Naayinɛ bo en la paŋa ti a wan ta’an isige nɛra ti a le vɔna. Pooren, pugela n yuun ki ti a isige en ge me le isige bunbilipaalega  ayima dabese’ere daarɛ ti a ki la. (Lu. 7:11-15; 8:49-55) Ge a wan ta’an isige nɛra n ki dabesa anaasi poan ti a inya la pɔ̃’ɛ?

13. Wuu Yon 11:32-35 n pa’alɛ se’em la, Yezu n yuun nyɛ Mary la nɛreba basɛba n kaaseri la, a yuun eŋɛ la bem? (Bisɛ foote la.)

¹³ Kaalɛ Yon 11:32-35. Ti’isɛ bisɛ sɛla n yuun le eŋɛ. Lazarus tãpa la ayima Mary, zɔ yese mɛ ta tu’usɛ Yezu. Eŋa me kɔ’ɔn tɔɣɛ la a suɔ la n yele se’em la nɔɔ ti: ‘N daana ho san boi ni kalam, mam tã wa kan ki ni.’ Eŋa la nɛresɛba n boi la en la suure sa’am mɛ. Yezu n yuun nyɛ ti ba kaasera se’em la, bala yuun basɛ ti a suure sa’am mɛ. Eŋa n yuun tari giile bɔ’ɔra a zɔdoma wa zuo ti a yuun ŋmɛkɛ nintam. A bɔkɛ nɛra suɔ n ni ki ti la wuna en se’em mɛ. Yelemɛŋɛrɛ, a yuun kɔ’ɔn bɔta ti a duusi ba nintam mɛ!

14. Yezu n yuun nyɛ Mary n kaaseri ti la ana en se’em la pa’alɛ to Yehowa yele la wani?

¹⁴ Yezu n yuun nyɛ Mary n kaaseri ti la ana en se’em la pa’alɛ tɔ ti Yehowa dela Naayinɛ n tari giile. Beni n sɔi ti to wan ta’an yele bala? Zaseŋɔ seko n tole la poan to zamesɛ baŋɛ ti Yezu yuun tɔɣeseri a Sɔ la mɛ, mina a puti’irɛ n de se’em. (Yon 12:45) Yezu n yuun tari giile bɔ’ɔra a zɔdoma wa suure n sa’am la n sɔi ti a yuun ŋmɛkɛ nintam. Wana wa pa’alɛ tɔ ti Yehowa ni tara giile mɛ bɔ’ɔra tɔ, a san ni baŋɛ ti to suure n sa’am. (Ym. 56:8) Sira, bala n sɔi ti ho bɔta ti ho ana du’a du’a la to Naayinɛ la n tari giile la.

15. Wuu Yon 11:41-44 n pa’alɛ se’em la, bem n yuun eŋɛ Lazarus yɔɔ la poan? (Bisɛ foote la.)

¹⁵ Kaalɛ Yon 11:41-44. Yezu n yuun ta paɛ Lazarus yɔɔ zɛ’an ge yeti ba bilige kugere la, Marta ka sakɛ ge yeti wana ma’a a pɔ̃’ɛ mɛ. Ge Yezu yele en yeti: ‘N ka yele ho ti ho san sakɛ ho wan nyɛ Naayinɛ nyalema la?’ (Yon 11:39, 40) Ti Yezu nyaa gorege saazuo pu’usɛ nɛrekuuŋɔ la nɛŋan. A boti a dekɛ pɛ̃ka la za’a bo la Yehowa la sɛla n wan eŋɛ la. Ti Yezu nyaa yi kpe’eŋo kpe’eŋo yeti: ‘Lazarus, yese na!’  Ti Lazarus isige yɔɔ la poan yɛsera na. Yezu kɔ’ɔn eŋɛ la sɛla ti nɛreba ti’isa ti la kan ta’an eŋɛ.​—Bisɛ Yon 11:17 zaseŋɔ yele la.

16. Sore deni poan ti yelese’a n boi Yon a zuo 11 la basɛ ti to sakerɛ kpe’em kum isigere la poan?

¹⁶ Yelese’a n boi Yon a zuo 11 la basɛ ti to sakerɛ kpe’em mɛ kum isigere la poan. Wani wani? Tɛ̃ra ti Yezu yuun yele Marta ti: ‘Ho tã la wan isige.’ (Yon 11:23 ) Wuu a Sɔ la, Yezu me kɔ’ɔn bɔta mɛ ge me tara pansɛka n wan ta’an tum dɛ. Eŋa n yuun ŋmɛkɛ nintam la pa’alɛ ti a kɔ’ɔn bɔta mɛ ti a yese kum la susa’aŋɔ yɛla basɛ. Lazarus n yuun yese yɔɔ la poan la pa’alɛ ti Yezu tari pansɛka n wan isige sɛba n ki la. Leyɛ’ɛsa, tɛ̃ra Yezu n yuun yele Marta sɛla la: ‘N ka yele ho ti ho san sakɛ ho wan nyɛ Naayinɛ nyalema la?’ (Yon 11:40) Yelese’a n eŋɛ la basɛ ti to sakɛ ti Naayinɛ wan sirum isige sɛba n ki la. To wan eŋɛ la wani ta’an basɛ ti to beere sa’am puti’irɛ wa kɔ’ɔn kpe’em?

17. La nari ti to tɛ̃ra la bem to san kaala kum isigere yɛla Baabule la poan?

¹⁷ Kaalɛ nɛresɛba ti ba tabelɛ isige ba kum poan la ge ti’isɛ ba yele taɣesɛ. Baabule la tɔɣɛ la nɛreba banii ti ba isige ba tinparɛ wa zuo yele. c Ho kan bɔta ti ho viisɛ ba ayima ayima woo yele bisɛ? Ho san eŋɛ bala, ho wan baŋɛ ti ba yuun dela nɛreba n tabelɛ bɔna​—buraasi, pɔɣesi la kɔma. Bisɛ hon wan ta’an zamesɛ yelese’a. Ti’isɛ ba poan woo yele bisɛ soŋa ta’an baŋɛ Naayinɛ n boti ge me tara paŋa ti a isige nɛreba se’em. Sɛla n gani bala dela ti’isɛ bisɛ kum isigere se’ere n gani za’a la​—Yezu kum isigere la. Tɛ̃ra ti nɛreba zo’e zo’e n yuun nyɛ a kum isigere la ti la dɛna sɛla n basɛ ti to tara sakerɛ.​—1 Ko. 15:3-6, 20-22.

18. To wan ta’an basɛ ti to yuuma la soŋɛ to la wani la ton tari kum isigere puti’irɛ la? (Bisɛ tiŋanɔɔrɛ yelesum la.)

 ¹⁸ Kɛlesa ge me yuuna yuunse’a n tɔɣeri kum isigere la yele. d (Ep. 5:19) Yuuma wa ni basɛ ti to sakerɛ malum kpe’em mɛ kum isigere puti’irɛ la poan. Ŋmɛ’ɛra ya yuuma wa kɛlesa. Ya deodoma pu’usegɔ poan, ni yuuni ya yuuma wa ge me sɔsɛ de vuurɛ n de sɛla. Kɔ’ɔn tɛ̃ra yuuma wa ti la bɔna ho suuren. Bãyaalega san ta nyɔkɛ hɔ bii ho nɛra n ki, Yehowa vo’osum la wan soŋɛ hɔ ti ho tɛ̃ra yuun ana wa ti la buɣelɛ ho suure ti ho nyaŋɛ nyɛ paŋa.

19. To wan ta’an ti’isɛ nyɛ la bem kum isigere la poan? (Bisɛ daka la zuo n de “ Hon Wan Ta Soke Ba La Bem?”)

¹⁹ Ti’isɛ bisɛ nyɛ homea. Yehowa bo to la puti’irɛ ti to ta’an bisa nyɛta tomea tinpaalega la poan. Mabipɔka ayima yeti: “Mam ni dekɛ la saŋa zo’e zo’e ti’isa nyɛta n mea tinpaalega la poan ti la ana wuu mam nyɛti la mɔpuuro zo’e zo’e paradiisi tiŋa la poan.” Makɛ bisɛ ti ho ta seke la Baabule poan saŋa nɛreba. Hon wan bɔta ti to ta seke la ani? Bem sokere ti hon wan bɔta ti ho ta soke en? Le ti’isɛ bisɛ ti ho yidoma sɛba n ki la ti ho ta seke ba. Ti’isɛ bisɛ yan wan le naɛ taaba ti la ana se’em. Yan tɔɣeri ge kɔkɛ taaba se’em la basɛ ti ya puurɛ pee mɛ ti nintam sigera.

20. La dela to lu suure eŋɛ bem?

²⁰ To puurɛ pee mɛ la Yehowa n yeti a wan ta isige nɛreba kum poan la! To tari sakerɛ ti pu’ulumbiŋere wa wan sirum tum tuuma se’ere n sɔi la, Yehowa kɔ’ɔn bɔta mɛ ge me tara paŋa n wan ta’an tum dɛ. Basɛ ti to lu suure ti to wan basɛ ti to sakerɛ kpe’em beere sa’am puti’irɛ wa poan. To san ita bala, to wan ana du’a du’a la to Naayinɛ la n yele tomam ayima ayima woo yeti, ‘Ho nɛreba la wan isige!’