1. Beni n sɔi ti to bɔ’ɔra lebesego zamesegɔ poan?

 BENI n sɔi ti to kena tansugere zamesegɔ? Sɛla n diŋɛ nɛŋa dela to pɛɣeri la Yehowa. (Ym. 26:12; 111:1) To me le kena zamesegɔ ti to kpɛmesa la taaba giila biɣi biɣi saŋa wa poan. (1 Tes. 5:11) To san zɛkɛ nu’o bo lebesego, to ni eŋɛ la yele ana ayi wa.

2. To tari yɔ’ɔ la wani ti to bo lebesego tansugere zamesegɔ poan?

² Bakwai woo poan, to tari yɔ’ɔ mɛ ti to bo lebesego to zamesegɔ woo poan. Makerɛ, bakwai la ba’asegɔ poan, to wan ta’an laɣum bo lebesego to tansugere Pigera Zontua Zamesegɔ poan. Bakwai la poan zamesegɔ, to wan ta’an bo lebesego Vo’osum Yɛla poan, Tansugere Baabule Zamesegɔ poan la zamesegɔ ase’a poan.

3. Beni n wan ta’an basɛ ti la kpe’em bo to ti to bo lebesego ge Hebru 10:24, 25 wan soŋɛ to la wani?

³ To za’a boti to pɛɣɛ Yehowa mɛ ge kpɛmesa to mabiisi la giila. Ge yɛla ta’an basɛ ti la kpe’em bo to ti to bo lebesego. Dabeem ta’an tara tɔ ti to bo lebesego bii to ta’an ni bɔta ti to bo lebesego ge ba ka yi’iri to wuu to ni bɔta se’em la. To wan nyɛ soŋerɛ la bɛ yele aŋa wa poan? To wan nyɛ lebesego la gɔnseko ti tuuntuna Paul yuun gulesɛ bo Hebrudoma la. Eŋa n yuun tɔɣeri la yele n pakɛ se’em ti to laɣesa taaba la, Paul yuun yeti to kɔ’ɔn ‘kpɛmesa taaba giila.’ (Kaalɛ Hebru 10:24, 25.) To  san mina ti sɛla ti to yeti to tɔɣɛ la wan kpemese to mabiisi giila hali la san puɣum dɛna sɛla fii, to kan zɔta dabeem ti to bo lebesego. Ba me san ka yi’ira to tabela, to basɛ ti to puurɛ pee la sɛba me n nyɛ yɔ’ɔ bɔ’ɔra lebesego la.​—1 Pe. 3:8.

4. To wan zamesɛ la bem yɛla atã zaseŋɔ wa poan?

⁴ Zaseŋɔ wa poan, yia la to wan sɔsɛ la to wan eŋɛ se’em kpɛmesa taaba giila tansugere pika poan ti nɛreba ka zo’e bɔ’ɔra lebesego la. Pooren, to nyaa wan sɔsɛ la to wan eŋɛ se’em kpɛmesa taaba giila tansugere kãtɛ poan ti nɛreba zo’e zo’e ni zɛkɛ nu’o bo lebesego la. Ba’asegɔ la, to wan sɔsɛ baŋɛ sarɔtɔ seto poan ti to lebesego la tara nyuurɔ ti la dɛna giilekpeŋere bɔ’ɔra nɛra woo.

5. To wan eŋɛ la wani ta’an kpɛmesa taaba giila to san ka zo’e tansugere zamesegɔ poan?

⁵ Tansugere pika bii gurup poan, mabiisi la ni ka zo’e bɔ’ɔra lebesego. Saŋa ase’a, mina n biseri zamesegɔ la ni gura mɛ ti nɛra nyaa ni zɛkɛ nu’o bo lebesego. Tɛm busebo zamesegɔ la ta’an ni yuura mɛ ti la dɛna insĩirɛ bɔ’ɔra mabiisi la. La san dɛna bala, ho wan ta’an eŋɛ la bem? Ni eŋɛ kalam zɛkɛ nu’o. Ho san ita bala, ho wan kpemese mabiisi la giila ti ba dekɛ bamea pa’asɛ zamesegɔ la poan.

6-7. To wan eŋɛ la wani ti dabeem kan tara tɔ to san yeti to bo lebesego?

⁶ Ge dabeem san tara hɔ ti ho bo lebesego? La ani nɛreba zo’e zo’e la bala. Ge hon boti ho kpɛmesa to mabiisi la giila la zuo, hon kan bɔta ti ho bisɛ sarɔtɔ seto ti ho wan ta’an bo lebesego ti dabeem kan tara hɔ? Ho wan eŋɛ la wani ta’an eŋɛ bala?

⁷ La wan ana soŋa ti ho malum bisɛ yelese’a ti ba tabelɛ gulesɛ Pigera Zontua poan. b Makerɛ, maasum soŋa. (Mag. 21:5) Ho san mina zaseŋɔ la soŋa, la wan dɛna naana bo ho ti ho bo lebesego. Leyɛ’ɛsa, basɛ ti ho lebesego la ana gi’a. (Mag. 15:23; 17:27) Ho lebesego la san ana gi’a, ho paleŋa kan ɛ̃ɣera. Ho lebesego la san ana gi’a ge tara yele ayina bii ayi la wan dɛna naana bɔ’ɔra mabiisi la ti ba tɛra gana lebesego woko n tari yɛla zo’e zo’e. Ho san bo lebesego la doose la hon bɔkɛ yele se’em, la pa’alɛ ti ho maasum soŋa mɛ.

8. Yehowa geele to ania itigɔ la wani?

⁸ Ge ho san dekɛ pa’alegɔ ana tum tuuma ge ti dabeem kelum tara hɔ ti ho bo lebesego buyina bii buyi? Tɛra ti Yehowa puurɛ wan pee mɛ la hon ta’an eŋɛ sɛla la. (Lu. 21:1-4) Yehowa ka eeri ti to eŋɛ zɔɛ to paŋa beene. (Flp. 4:5) Kɔ’ɛ ho puti’irɛ bisɛ hon wan ta’an eŋɛ sɛla ge zusɛ ti la ana ho mama. Pɔsega la, ho ta’an bɔta ti ho bo lebesego gi’a.

9. Beni n sɔi ti la ni kpe’em bo to ti to bo lebesego tansugere kãtɛ poan?

⁹ Tansugere san tara mabiisi zo’e zo’e bala me ta’an dɛna yele bɔ’ɔra hɔ. Daanse’ere hon la mabiisi zo’e zo’e ta’an ni zɛkɛ ya nu’usi mɛ ti ya bo lebesego ge ti ba ka yi’ira ho. Makerɛ, Danielle puurɛ ni pee mɛ ti a bo lebesego  zamesegɔ poan. c A mi ti la laɣum pa’asɛ la a pu’usegɔ poan, ti a wan ta’an kpemese mabiisi giila ge ti bala me wan basɛ ti Baabule yelemɛŋɛrɛ la bɔna a suuren. Ge eŋa n yuun loŋe tansugere kãtɛ la, ba yuun ka yi’iri en tabela​—hali tɛm busebo zamesegɔ la ta’an ta ba’asɛ ge ti ba ka yi en. A yeti, “Mam sunsɔa yuun nyie mɛ. La ani mam wuu sɛla n pĩɛ mam nu’usin la. La san ita bala saŋa woo, ho ni ti’isa ti la ani wuu ba mi mɛ ge ita.”

10. To wan eŋɛ la wani ta’an nyɛ yɔ’ɔ zo’e zo’e bɔ’ɔra lebesego?

¹⁰ La ani hon wuu la yuun ani Danielle se’em la? La san ana ho bala, ho ta’an ti’isa ti ho yi basɛ ge kɔ’ɔn zi’a kɛlesa zamesegɔ la. Ge da makɛ basɛ ti ho bo lebesego. Ho wan ta’an eŋɛ la bem? Sɛla n wan soŋɛ ho dela ho maasum lebesego zo’e zo’e zamesegɔ woo poan. Bala la, ba san ka te’ele yi ho ti ho bo lebesego zamesegɔ la pɔsega poan, ho wan kelum tara yɔ’ɔ ti ho bo lebesego zamesegɔ la poan. Ho san bɔna bim maasena Pigera Zontua Zamesegɔ, ti’isɛ bisɛ kaalegɔ la zɛ’ɛsi woo n makɛ la zaseŋɔ la zuo yele se’em. Ho san eŋɛ bala ho wan ta’an tara sɛla ti ho tɔɣɛ zamesegɔ la poan. Leyɛ’ɛsa, ho ta’an maasum kaalegɔ zɛse’esi n kpe’em la lebesego. (1 Ko. 2:10) Beni n sɔi? Sɛla n sɔi la nɛreba fii n wan zɛkɛ nu’o bo lebesego zɛ aŋa poan. Ge ho san dekɛ pa’alegɔ ana tum tuuma ge kelum ka nyɛ yɔ’ɔ n wan bo lebesego? Ho ta’an nyɛ mina n biseri zamesegɔ la ge yele en soke se’ere ti ho bɔta ti ho ta bo lebesego.

11. Sɛla n boi Filipi 2:4 la kpemese to giila ti to eŋɛ la bem?

¹¹ Kaalɛ Filipi 2:4. Zilam vo’osum la yuun basɛ ti tuuntuna Paul gulesɛ gɔŋɔ kpemese Kristakɔma giila ti to basɛ ti basɛba yele me pakɛ tɔ. To wan eŋɛ la wani ta’an dekɛ ka’aŋɔ wa tum tuuma zamesegɔ poan? Tɛ̃ra ti basɛba me ani wuu tomam la, bɔta ti ba laɣum bɔ’ɔra lebesego.

12. Sarɔkuni ti to wan ta’an kpemese to mabiisi giila zamesegɔ poan? (Bisɛ foote la.)

 ¹² Ti’isɛ dɛ wana bisɛ. Hon la ho zɔdoma san sɔsera, ho wan bɔta ti ho tɔɣera zɔ’ɔra ge ti bama puɣum ka tara yɔ’ɔ n wan tɔɣɛ? Yelemɛŋɛrɛ, ho kan bɔta bala! Ho wan bɔta ti ya laɣum sɔsera. La me ani la bala zamesegɔ poan, to wan bɔta ti sɛba me bo lebesego. Yelemɛŋɛrɛ, sarɔsɛka poan ti to me wan ta’an kpemese to mabiisi giila dela to me bo ba yɔ’ɔ ti ba bo lebesego. (1 Ko. 10:24) Basɛ ya ti to bisɛ ton wan eŋɛ se’em ta’an eŋɛ bala.

13. To wan eŋɛ la wani bo mabiisi yɔ’ɔ ti ba me bɔ’ɔra lebesego?

¹³ Yele ayima dela, to basɛ ti to lebesego la ana gi’a, ti basɛba me ta’an bo lebesego. Keendoma la mabisɛba n kumesɛ la ta’an eŋɛ makesonɛ. Hali ho san bo lebesego gi’a, da tɔɣɛ yɛla zo’e zo’e. Ho san tɔɣɛ sɛla woo kaalegɔ la poan, sɛla kan gee ti basɛba me wan bo lebesego. Makerɛ, kaalegɔ wa poan ba pa’alɛ la yɛla ayi​—ti to bo lebesego ti la ana gi’a ge me da tɔɣera zɔ’ɔra. Ho san dɛna mina ti ba yi ho yia ti ho bo lebesego kaalegɔ kuna wa poan, ho kan bɔta ti ho tɔɣɛ yele ana wa ayima?

14. Beni n wan soŋɛ tɔ ti to mina sansɛka n nari ti to zɛkɛ nu’o? (Bisɛ foote la.)

¹⁴ Ni dekɛ yɛm tum tuuma ta’an baŋɛ se’em ma’a ti la nara ti ho bo lebesego. To san zɛɣesa to nu’usi tabela, la wan dɛna pɛregeri bɔ’ɔra mina n biseri zamesegɔ la ti a yi to ge ti basɛba me nan ka nyɛ yɔ’ɔ bo lebesego. Bala me wan basɛ ti basɛba me giila kɔ’ɔsɛ ti ba kan zɛkɛ nu’o.​—Pa. 3:7.

15. (a) Hon wan eŋɛ la wani mina n biseri zamesegɔ la san ka yi ho ti ho bo lebesego? (b) Sɛba n biseri zamesegɔ la nari ti ba geele nɛra woo yele la wani? (Bisɛ daka la zuo n de “ Ho San Bisera Tansugere Zamesegɔ.”)

¹⁵ Mabiisi zo’e zo’e san zɛ̃kɛ nu’o zamesegɔ poan, daanse’ere to kan ta’an  nyɛ yɔ’ɔ bo lebesego wuu ton boti se’em la. Saŋa ase’a mina n biseri zamesegɔ la kan ta’an yi to za’a ti to bo lebesego. Bala ta’an dɛna giilekɔ’ɔsegɔ bɔ’ɔra tɔ ge la ka nari ti to basɛ ti la daana tɔ ba san ka yi to.​—Pa. 7:9.

16. To wan eŋɛ la wani ta’an kpemese sɛba n bo’ori lebesego la giila?

¹⁶ Ho san ka nyaŋɛ bo lebesego, hon kan bɔta ti ho ma’ɛ homea kɛlesa soŋa ge ti zamesegɔ la san ta ba’asɛ, ti ho pu’usɛ sɛba n nyɛ yɔ’ɔ bo lebesego la? Ho mabiisi la puurɛ wan pee la hon kpemese ba giila se’em la, ti la ana wuu hon wan bo ni lebesego se’em la. (Mag. 10:21) Pɛ̃ka dela sore deyima ti to wan ta’an doose kpɛmesa taaba giila.

17. (a) Dɔɣereba wan eŋɛ la wani ta’an soŋɛ ba kɔma ti ba maasum lebesego n makɛ ma’a? (b) Vidiyo la poan la, yele ani anaasi ti to wan ta’an doose maasum lebesego? (Bisɛ tiŋanɔɔrɛ yelesum la.)

¹⁷ To wan ta’an le eŋɛ la bem kpɛmesa taaba giila zamesegɔ poan? Ho san dɛna dɔɣera, soŋɛ ho kɔma ti ba te’ele maasum lebesego ti la makɛ la ba yuuma. (Mt. 21:16) Saŋa ase’a to ta’an ni zamesa ninmɔ’ɔrɛ yɛla n de wuu pɔɣedire bii sareŋɔ yɛla ge kaalegɔ zɛ’ɛsi sise’esi boi mɛ ti bia wan ta’an bo lebesego. Leyɛ’ɛsa,  soŋɛ ho kɔma la ti ba bɔkɛ ti daanse’ere mina n biseri zamesegɔ la kan ta’an yi’ira ba saŋa woo ti ba ni zɛkɛ nu’o. To san pa’alɛ ba bala, la wan soŋɛ ba ti ba giila kan kɔ’ɔsɛ ba san yi se’em.​—1 Tim. 6:18. d

18. To san bɔ’ɔra lebesego to wan eŋɛ la wani gu tomea ge kan tɔɣera tomea yɛla? (Magaha 27:2)

¹⁸ To za’a wan ta’an maasum lebesego ti la tara na’asegɔ bɔ’ɔra Yehowa ge me kpɛmesa to mabiisi la giila. (Mag. 25:11) La boi bim ti to ta’an ni tɔɣɛ tomea zi’irego poan yɛla fii ge la ka nari to tɔɣera tomea yɛla zɔ’ɔra. (Kaalɛ Magaha 27:2; 2 Ko. 10:18) La tuɣum nara ti, to basɛ ti to puti’irɛ bɔna Yehowa poan, a Yelesum la poan, la a nɛreba la poan. (Lil. 4:11) Ge sokere la san yeti to tɔɣɛ tomea zi’irego poan yɛla, la wan ana soŋa ti to eŋɛ bala ti la makɛ ma’a. Makerɛ dena wa boi la kaalegɔ sɛka n taɣelɛ la poan.

19. (a) To wan nyɛ la bem nyuurɔ to san tɛra nɛra woo n boi tansugere zamesegɔ la poan yele? (Arom 1:11, 12) (b) Bem n ni basɛ ti hon puurɛ pee ho san bɔ’ɔra lebesego tansugere zamesegɔ poan?

¹⁹ La boi bim ti to ka doli lɔɔ bɔ’ɔra lebesego ge to za’a wan ta’an tiregɛ bɔ’ɔra lebesego ti la kpɛmesa to mabiisi giila. Bala pa’alɛ ti to da ba’ɛ tabela bɔ’ɔra lebesego. Bii la ta’an pa’alɛ ti, ton ni nyɛ yɔ’ɔ bo lebesego se’em la makɛ mɛ ge ti puurɛ me ni pee la to mabiisi n ni nyɛ yɔ’ɔ bɔ’ɔra lebesego la. To san basɛ ti mabiisi yele pakɛ tɔ tansugere zamesegɔ poan, to za’a waabi puurɛ wan pee ti to ‘kpɛmesa taaba giila.’​—Kaalɛ Arom 1:11, 12.