1. To tari puti’irɛ la bem poan?

 TOMAM n de Yehowa nɛreba la, to mi ti a nɔŋɛ to mɛ ge me bɔta ti to tara vom somɔ. (Arom 8:35-39) To me mi soŋa soŋa ti to san tara Baabule naresum yɛla tuna tuuma la soŋeri to mɛ. (Isa. 48:17, 18) Ge la nari ti to eŋɛ la bem yɛla san ta di’e to?

2. Bem yɛla n wan ta’an paɛ tɔ ge bala ta’an basɛ ti to ti’isa la bem?

² Yɛla paari Yehowa yamesi woo mɛ. Makerɛ, to yire nɛra ta’an eŋɛ sɛla ti la daana tɔ. Bã’a me ta’an tara tɔ ti to kan ta’an tum zo’e zo’e Yehowa pu’usegɔ poan. Yeledi’ima ta’an paɛ tɔ ti la wuna to paa. Bii ba ta’an yaɛ tɔ to sakerɛ la zuo. Yele ana wa san paara tɔ, to ta’an ti’isa ti: ‘Beni n sɔi ti yele ana wa paara mam? Mam tum la be’em? Bala pa’alɛ ti Yehowa ka kã’ari bɔ’ɔra mam?’ La tabelɛ ana hon bala? La san dɛna bala, da basɛ ti ho giila kɔ’ɔsɛ. La ani Yehowa yamesi zo’e zo’e me la bala.​—Ym. 22:1, 2; Hab. 1:2, 3.

3. To wan ta’an zamesɛ la bem Yooma 34:19 poan?

³ Kaalɛ Yooma 34:19. Tɛ̃ra yelekpina ayi kaalegɔ wa poan. (1) Daaŋɔ paari tontɔɔdoma mɛ. (2) Yehowa faari to daaŋɔ poan basa mɛ. Yehowa iti la wani faara to basa? Sore deyima ti a ita bala dela a soŋeri to mɛ ti to tara putɛsonɛ. La boi bim ti Yehowa yeti to wan tara pupeelum to san pu’usa en ge bala ka pa’alɛ ti to wan bɔna fai nananawa. (Isa. 66:14) A kpemese to giila ti to ni ti’isa  beere sa’am yele​—sansɛka ti to wan ta tara vom somɔ daarewoo. (2 Ko. 4:16-18) Sankaŋa n nan ka paɛ la, a soŋeri to mɛ ti to ta’an ŋmibera daarewoo.​—Fab. 3:22-24.

4. To wan zamesɛ la bem zaseŋɔ wa poan?

⁴ Basɛ ya ti to sɔsɛ ya ton wan ta’an zamesɛ sɛla Yehowa yamesi zɛ’an, Baabule saŋa la, la zina beere wa. Wuu to wan zamesɛ sɛla la, yeledi’ima ta’an paɛ tɔ. Ge to san dekɛ tomea delum Yehowa, a wan soŋɛ tɔ. (Ym. 55:22) To san sɔsa nɛrebana wa yele, soke homea yeti: ‘La san deni mam, mam wan eŋɛ ni la wani bɔŋa wa poan? Nɛreba wa makesonɛ la basɛ ti mam sakerɛ kpe’em Yehowa poan la wani? Bem yɛla ti n wan ta’an dekɛ tum tuuma n vom poan?’

5. Laban yuun basɛ ti yeledaaŋɔ ani n paɛ Yakob? (Bisɛ gɔŋɔ wa nɛŋa foote.)

⁵ Baabule saŋa la, yeledaaŋɔ zo’e zo’e yuun paɛ Yehowa yamesi mɛ. To sɔsɛ Yakob yele. A sɔ yuun yele en yeti a keŋɛ ta di Laban n de ba suɔ la poyɔa. A me yuun basɛ ti a baŋɛ ti Yehowa me wan kã bo en. (Pin. 28:1-4) Yakob me yuun eŋɛ la bala. A yuun ze’ele la Kanan keŋɛ Laban yire. Laban yuun tari la bipugeto toyi​—Leah la Arakel. Yakob yuun boti la Arakel ge nyaa sakɛ ti a tum yuuma ayopɔi ge nyaa di en. (Pin. 29:18) Ge yɛla yuun ka keŋɛ soŋa wuu Yakob n yuun ti’iseri se’em la. Laban yuun pã’asɛ en mɛ ti a di a bipugela keema, Leah. Bakwai pooren, Laban yuun yele Yakob ti a san sakɛ tum yuuma ayopɔi pa’asɛ, a wan dekɛ Arakel pa’asɛ en. (Pin. 29:25-27) Laban yuun kisum Yakob mɛ. Yele ana wa za’a poan la, Laban yuun kisum Yakob ta paɛ la yuun 20!​— Pin. 31:41, 42.

6. Yakob yuun le ŋmibe la bem yɛla ase’a poan?

⁶ Yakob yuun ŋmibe mɛ yɛla ase’a poan. A deodoma la yuun zo’e mɛ ge a dayɔɔsi la yuun ka naɛ nɔɔrɛ laɣum bɔna. Hali ba yuun koose la bamea suɔ Yosef ti a ta dɛna yameŋa. Yakob dayɔɔsi siyi, Simeon la Levi, yuun basɛ ti nyanɛ n paɛ ba yire la ge me le sa’am Yehowa yu’urɛ. Leyɛ’ɛsa, Yakob pɔɣa Arakel, yuun viregeri mɛ ti a dɔɣɛ Benyamin ta ki. Kom biɣilega n yuun sige tiŋa la poan la zuo, la yuun dela pɛ̃regerɛ ti Yakob nɔɣɛ keŋɛ Egypt tiŋa a kuregerɛ la poan.​—Pin. 34:30; 35:16-19; 37:28; 45:9-11, 28.

7. Yehowa yuun eŋɛ la bem pa’alɛ ti A nɔŋɛ Yakob yele mɛ?

⁷ Yele ana wa za’a la, Yakob yuun kɔ’ɔn tara la sakerɛ bɔ’ɔra Yehowa la A pu’ulumbiŋ’a la. Yehowa me yuun basɛ ti Yakob baŋɛ ti a boti a yele mɛ. Makerɛ, hali la Laban kinkisum la za’a, Yehowa yuun kelum kã bo Yakob mɛ ti a dɛna buntata. Yeen ti’isɛ bisɛ Yakob puurɛ n yuun pee la Yehowa se’em eŋa n yuun nyɛ a dayɔa Yosef ti a yuun ti’isɛ ti a ki mɛ la! Yakob n yuun tari bɔnsoŋa la Yehowa la zuo ti a yuun ta’an ŋmibe daaŋɔ la woo poan. (Pin. 30:43; 32:9, 10; 46:28-30) Tomam me san tara bɔnsoŋa la Yehowa, to wan ta’an ŋmibe yeledaaŋɔ woo n paari to.

8. Naba David yuun boti a eŋɛ la bem?

⁸ Naba David yuun ka ta’an tum sɛla woo ti a bɔta ti a tum bo Yehowa la. Makerɛ, David yuun kɔ’ɔn bɔta la a mɛ pu’usegɔ deo bo Naayinɛ. A yuun tɔɣɛ  yele wa bo la nɔdɛ’ɛsa Natan. Ti Natan lebese en yeti: ‘Eŋɛ sɛla n boi ho suuren ge yelemɛŋɛrɛ Naayinɛ la boi mɛ la hɔ.’ (1 Yel. 17:1, 2) Makɛ bisɛ a yetɔɣum wa n yuun kɛ̃ David suure se’em. Daanse’ere a yuun kɔ’ɔn eŋɛ la kalam maasena ti a mɛ.

9. David yuun eŋɛ la bem la eŋa n yuun wum susa’aŋɔ yele la?

⁹ Pooren, Yehowa nɔdɛ’ɛsa yuun lebe ta tɔɣɛ la susa’aŋɔ yele bo David. ‘Yu’unkɔŋɔ mea nɔɔ,’ ti Yehowa yele Natan ti la daɣɛ David n wan mɛ pu’usegɔ deo la ge la wan dɛna la a dayɔɔsi la ayima n wan mɛ. (1 Yel. 17:3, 4, 11, 12) La yuun ani David la wani, eŋa n yuun wum wana la? A yuun tee a puti’irɛ mɛ. A yuun pɔsɛ laɣesa la ligeri la lɔɣɔseto ti a dayɔa Solomon wan dekɛ mɛ pu’usegɔ deo la.​—1 Yel. 29:1-5.

10. Yehowa yuun kã bo David la wani?

¹⁰ Yehowa n yuun yeti David kan mɛ pu’usegɔ deo la, a yuun eŋɛ la kalam biŋe nɔɔrɛ la en. Yehowa yuun pu’ulumbiŋe ti David yaaŋa ayima wan ta dɛna Naba bisera daarewoo. (2 Sa. 7:16) Tinpaalega la poan, makɛ bisɛ David puurɛ n wan pee se’em a san ta baŋɛ ti Yezu Yuun Tusere Bisega la poan ze’ele la eŋa tuusum la poan na! Yele wa soŋɛ tɔ ti to baŋɛ ti to san bɔta ti to tum bo Yehowa ge ka nyɛ yɔ’ɔ tum, to Naayinɛ la ta’an doose sarɔtɔ toseto poan kã bo to ti la ka tara makerɛ.

11. Hali la Naayinɛ Na’am la n yuun ka pɔsɛ sansɛka ti ba ti’isa la, yuun kɔbesɛka n diŋɛ nɛŋa Kristakɔma la yuun nyɛ kã’a la wani? (Tooma 6:7)

¹¹ Yuun kɔbesɛka n diŋɛ nɛŋa Kristakɔma la yuun ŋmibe mɛ yɛla ase’a poan. Makerɛ, ba yuun kɔ’ɔn bɔta la Naayinɛ Na’am la wa’ana ge ba yuun ka mi sansɛka ti la wan wa’ana. (Tm. 1:6, 7) Bala la, ba yuun eŋɛ la bem? Ba yuun kɔ’ɔn mu’ɛ la nini la na’am mɔɔlegɔ tuuma la. Ban yuun mɔɔli zɛ’ɛsi zo’e zo’e poan la, ba yuun nyɛ Yehowa n kã’ari bɔ’ɔra ba se’em mɛ.​—Kaalɛ Tooma 6:7.

12. Kom n yuun boi la, yuun kɔbesɛka n diŋɛ nɛŋa Kristakɔma la yuun eŋɛ la bem?

¹² Saŋa kasɛka, kom n yuun sige ‘tinparɛ wa za’a poan.’ (Tm. 11:28) Kom wa yuun paɛ yuun kɔbesɛka n diŋɛ nɛŋa Kristakɔma la mɛ. Yeen ti’isɛ bisɛ dipɔ’ɔsegɔ la n yuun wan basɛ ti la ana ba se’em! Nɔkpe’ene kai ti deo zuodoma yuun ti’iseri la ban wan eŋɛ se’em ta’an diisa ba deodoma. Ge bunbilipaalesi sɛba n yuun maaseni ti ba yalegɛ ba na’am tuuma la me? Ba yuun ta’an ti’isa ti ba yi nan gu’use fii? Bɔŋa la n yuun yeen ana se’em, Kristakɔma la yuun ŋmiberi mɛ. Ba yuun kelum mɔɔla mɛ la ba paŋa tɛka beene, ti ba puurɛ me pee ti ba tɔ̃ta lɔɣɔseto ti ba tara la bɔ’ɔra ba mabiisi n boi Yuda tiŋa.​—Tm. 11:29, 30.

13. Kristakɔma la yuun nyɛ la bem kã’a, kom saŋa la?

¹³ Kristakɔma la yuun nyɛ la bem kã’a, kom saŋa la? Sɛba ti ba yuun dekɛ lɔɣɔrɔ tɔ̃rɛ ba la, yuun baŋɛ ti Yehowa soŋeri ba mɛ. (Mt. 6:31-33) Ba me yuun nyaa ani la du’a du’a la ba mabiisi la n soŋɛ ba la. Sɛba me n yuun dekɛ ba lɔɣɔrɔ soŋɛ, la sɛba n yuun soŋɛ tuuma wa la puurɛ me yuun pee mɛ. (Tm. 20:35) Yehowa yuun kã bo ba za’a waabi mɛ la ban yuun nyaŋɛ ŋmibe bɔnkaŋa poan la.

14. Bem n yuun paɛ Barnabas la tuuntuna Paul ge ba yuun nyɛ kã’a la wani? (Tm. 14:21, 22)

¹⁴ Yaarɛ yuun paɛ yuun kɔbesɛka n  diŋɛ nɛŋa Kristakɔma la mɛ ge ti ba me yuun ka ti’isa de yele. Geele bisɛ sɛla n yuun paɛ Barnabas la tuuntuna Paul ban yuun boi Listra mɔɔla Na’am yelesoma la. Pɔsega la, nɛreba la puurɛ yuun pee mɛ ti ba to’e ba soŋa ge kɛlesa ba. Ge pooren, sɛba n ka nam bo ba la ‘pã’asɛ nɛrekuuŋɔ la’ mɛ ti basɛba lobe Paul la kuga ti a gã’a wuu ki me la. (Tm. 14:19) Ge Barnabas la Paul yuun tee la zɛ’an keŋɛ ta mɔɔla. Ba yuun nyɛ kã’a la wani? Ba yuun nyɛ ‘podɔleba zo’e zo’e,’ ti ba yetɔɣum la ba makesonɛ la kpemese mabiisi la giila. (Kaalɛ Tooma 14:21, 22.) Yaarɛ n yuun paɛ Barnabas la Paul la, nɛreba zo’e zo’e yuun nyɛ soŋerɛ mɛ la ban yuun ka pisegɛ basɛ la. Tomam me san ka dekɛ tuunse’a ti Yehowa yeti to tum la basɛ, a wan kã bo to.

15. Hon zamesɛ la bem Mabia A. H. Macmillan yele la poan?

¹⁵ Ge ti yuun 1914 paɛ la, Yehowa nɛreba yuun kɔ’ɔn ti’isa la yelese’a n wan eŋɛ. Geele Mabia A. H. Macmillan yele la bisɛ. Wuu mabiisi zo’e zo’e n yuun ti’iseri se’em la, Mabia Macmillan me yuun ti’isɛ ti la kan yue a wan keŋɛ saazuo. A yetɔɣesebo ti a yuun bo September 1914 la, a yuun yeti: “Daanse’ere mam ki’i yetɔɣum n wana ti mam tɔɣera bɔ’ɔra ya wa.” Ge yelemɛŋɛrɛ la dela, la yuun daɣɛ a ki’i yetɔɣum n bala. Pooren, Mabia Macmillan yuun gulesɛ yeti: “Daanse’ere to zo’e zo’e kabeli mɛ ti’isa ti to wan keŋɛ saazuo.” A le yeti: “Lan tuɣum nara ti to eŋɛ sɛla dela to mu’ɛ nini tuna Daana la tuuma.” Mabia Macmillan me yuun kɔ’ɔn mu’ɛ la nini tuna. A yuun kɔ’ɔn tuulegera mɛ na’am mɔɔlegɔ tuuma la poan. Mabisɛba ti ba yuun paɣɛ ba sarega ba sakerɛ la zuo la, a yuun nyɛ yɔ’ɔ mɛ kpemese ba zo’e zo’e giila. A yuun kɔ’ɔn kena tansugere zamesegɔ mɛ hali la a kuregerɛ poan. Mabia Macmillan yuun nyɛ nyuurɔ la wani la eŋa n yuun mu’ɛ nini tuna Yehowa tuuma ge gura a beere sa’am puti’irɛ la? Ge ti a nyaa ki yuun 1966 la, a yuun gulesɛ yeti: “Mam sakerɛ kelum kpe’em mɛ zina wuu lan yuun kpe’em se’em la.” Bisɛ lan de yelesonɛ se’em bɔ’ɔra tɔ ti to tɔɣesa en​—yele yele wuu to san ŋmibera yeledaaŋɔ poan!​—Heb. 13:7.

16. Bem yele n yuun paɛ Herbert Jennings la a pɔɣa? (Yames 4:14)

¹⁶ Yehowa yamesi zo’e zo’e ŋmiberi mɛ bã’asi poan. Makerɛ, Mabia Herbert Jennings b vom yɛla poan, a yuun tɔɣɛ pa’alɛ eŋa la a pɔɣa puurɛ n yuun pee se’em la ban yuun boi Ghana dɛna satiŋa na’am yetɔɣum yalegerɛdoma la. Yuuma pooren, a yuun bɛ̃’ɛri mɛ ti a puti’irɛ ka bɔna bɔbeyinɛ. Mabia Jennings yuun dekɛ yelese’a n boi Yames 4:14 tɔɣɛ yeti eŋa ka mi ti “beere sa’am, yele ana wa wan paɛ en.” (Kaalɛ.) A yuun gulesɛ yeti: “Bɔŋa la n yuun ani se’em la zuo, to yuun maasum mɛ basɛ Ghana la to zɔdoma zo’e zo’e ge lebe Canada tiŋa [ta tibɛ tomea].” Yehowa yuun soŋɛ Mabia Jennings la a pɔɣa ti ba kelum pu’usa en hali la yelese’a n paɛ ba la.

17. Mabia Jennings yele la soŋɛ mabiisi la wani?

 ¹⁷ Mabia Jennings n tɔɣɛ a vom poan yɛla se’em la soŋɛ mabiisi zo’e zo’e mɛ. Mabipɔka ayima yeti: “Mam ka tabelɛ kaalɛ sɛla ti la kɛ̃ mam suure wuu yele dena wa. . . . Mam kaalɛ baŋɛ ti Mabia Jennings yuun dekɛ la satiŋa na’am yetɔɣum yalegerɛ tuuma la basɛ ta’an keŋɛ ta tibɛ amea la, basɛ ti mam nyaa gɛɛla la yɛla ma’a ma’a.” Mabia ayima me yeti: “Mam yuun dela tansugere keema yuuma pia, ti la yuun nara ti n dekɛ n kenɔ tuuma wa basɛ la mam tari puti’irɛ bã’a la. La yuun ani wuu mam dela bunbasela la, ti la ni dɛna suure bɔ’ɔra mam ti mam ka bɔta ti n kaala mabiisi vom poan yɛla. . . . Ge Mabia Jennings yele la yuun kɛ̃ mam suure mɛ.” Wana wa basɛ ti to baŋɛ ti yele san paɛ tɔ ti to ŋmibera, la wan kpemese mabiisi giila. Hali yɛla san puɣum ka kena soŋa wuu tomam n ti’isɛ se’em la, to wan ta’an kelum tara makesonɛ to sakerɛ la to ŋmibega poan.​—1 Pe. 5:9.

18. Wuu fɔɔra la n pa’alɛ se’em la, hon zamesɛ la bem mabipɔka la n de pɔkuurɛ bɔna Nigeria la yele la poan?

¹⁸ Yeledi’ima n de wuu COVID-19 bã’a la yuun daam Yehowa nɛreba zo’e zo’e mɛ. Makerɛ, mabipɔka kayima n de pɔkuurɛ bɔna Nigeria dia n yuun pɔ’ɛ. Daarɛ deyima bulika, a bipugela yuun soke en yeti, ba wan nyɛ la bem di la ban duɣɛ mui wa ba’asɛ la. To mabipɔka wa yuun yele a bipugela wa yeti, ba ka le tara dia bii ligeri ge la nari ti ba tɔɣesa Zarefat tiŋa pɔkuurɛ la. Ba duɣɛ mui la n gee la di ge dekɛ bamea delum Yehowa. (1 Na. 17:8-16) Wuntɛɛŋa dia saŋa puɣum ka paɛ ge ti mabiisi tari dia ta bo ba. Ba yuun bo ba la dia ti ba wan ta’an di ti la paɛ bakwai ayi. Mabipɔka la yeti, eŋa puɣum ka mina ti Yehowa kɔ’ɔn kɛlesa eŋa n yele a bipugela la sɛla la mɛ. Yelemɛŋɛrɛ, to san dekɛ tomea delum  Yehowa, yelese’a n paari to la ta’an basɛ ti to ana du’a du’a la en.​—1 Pe. 5:6, 7.

19. Bem yaarɛ n yuun paɛ Aleksey Yershov ti a nyaŋɛ ŋmibe?

¹⁹ Yuuma ana wa poan, to mabiisi zo’e zo’e nyaŋɛ ŋmibe mɛ yaarɛ poan ti daanse’ere ba ka ti’isɛ ni de yele. To geele Mabia Aleksey Yershov, n boi Russia tiŋa yele bisɛ. Mabia Yershov yuun muse ko’om la yuun 1994. Sankaŋa la Yehowa Sɛɛradoma n boi tinkaŋa poan la yuun boi la fai. Yuuma fii pooren, bɔŋa la yuun tee mɛ Russia tiŋa poan. Yuun 2020 poan, ba yuun pɛ̃regɛ mɛ kɛ̃ Mabia Yershov yire, ta fã a lɔɣɔrɔ zo’e zo’e. Ŋmaresi pooren, gɔmɛt la yuun parum la yɛla dɔɣelɛ a zuo. Sɛla n yuun basɛ ti yele la gaŋɛ nu’usi dela, nɛra n yuun parum ti eŋa boti la Baabule zamesegɔ ti ba zamesa en ta paɛ yuunɛ, ti a rekɔɔdɛ yɛla la vidiyo poan. Bisɛ eŋa n yuun dɔ̃rɛ to se’em!

20. Mabia Yershov yuun eŋɛ la wani ti eŋa la Yehowa zɔtɔ nyɔka la kpe’em?

²⁰ Yaarɛ se’ere n paɛ Mabia Yershov la basɛ ti a nyɛ yelesonɛ me yoi? Ɛ̃ɛ. Eŋa la Yehowa zɔtɔ nyɔka la nyaa kɔ’ɔn kpe’em mɛ. A yeti: “Mam la n pɔɣa yuun ni kɔ’ɔn zusera mɛ saŋa woo. Mam baŋɛ ti mam kan ta’an ŋmibe ni bɔnkana wa poan Yehowa san ka soŋɛ ni mam.” A le yeti: “Mam mea zamesegɔ n soŋɛ mam ti mam giila ka kɔ’ɔsɛ. Mam ni ti’isɛ taɣesɛ la diimi nɛresɛba n yuun tari sakerɛ la yele. Nɛreba zo’e zo’e yɛla boi Baabule la poan pa’ala lan nari ti to ana baalam se’em ge dekɛ tomea delum Yehowa.”

21. To zamesɛ la bem zaseŋɔ wa poan?

²¹ To zamesɛ la bem zaseŋɔ wa poan? Tingɔŋɔ be’o wa poan, yele ta’an paɛ tɔ. Hali la bala poan, Yehowa ni soŋɛ a yamesi mɛ ba san dekɛ bamea delum en. Wuu to zamesegɔ la zuo gulesegɔ la n yele se’em la, ‘daaŋɔ zo’e zo’e paari tontɔɔdaana mɛ ge Naayinɛ ni faaɛ en basɛ mɛ.’ (Ym. 34:19) Basɛ ya ti to da ti’isa wuŋerɛ se’a n paari to la yele ge to tuɣum ti’isa Yehowa n tari a paŋa la soŋera to se’em la. Wuu tuuntuna Paul la, tomam me wan ta’an yeti: ‘Sɛla woo poan mam tari paŋa mɛ doose la se’emdaana n bo’ori mam paŋa la zuo.’​—Flp. 4:13.