NABA David sogɛpa la basɛba yuun daɣɛ Israeldoma. Makerɛ, Zelek n ze’ele Amon tiŋa, Uria n ze’ele Hiti tiŋa la Itma n ze’ele Moab tiŋa. a (1 Yel. 11:​39, 41, 46) David sogɛpa la basɛba yuun dela ‘Keretdoma, Peletdoma la Gatdoma.’ (2 Sa. 15:18) Nɛreba zo’e zo’e yuun ti’isɛ ti Keretdoma, Peletdoma la Filistidoma la dela suurɔ. (Eze. 25:16) Gatdoma la yuun ta’an ze’ele Gat n boi Filisti tiŋa.—Yos. 13:​2, 3; 1 Sa. 6:​17, 18.

Beni n sɔi ti David yuun basɛ ti nɛresɛba n daɣɛ Israeldoma pa’asɛ a sogɛpa la poan? A yuun mi ti ba tari la yelemɛŋɛrɛ bɔ’ɔra eŋa la Yehowa. Makerɛ, The New Interpreter’s Dictionary of the Bible la tɔɣɛ Keretdoma la Peletdoma yele ti: “Ba yuun kelum tara yelemɛŋɛrɛ bɔ’ɔra David mɛ a na’am bisega la poan.” Ba yuun eŋɛ la bem pa’alɛ ti ba tari yelemɛŋɛrɛ? Se’em ma’a ti ‘Israeldoma la za’a’ yuun zaɣesɛ David ge keŋɛ ta pa ‘Siba n de nɛreyaalega’ la pooren la, Keretdoma la Peletdoma la yuun kelum bɔna la David ge soŋɛ en ti a zabɛ nyaŋɛ Siba. (2 Sa. 20:​1, 2, 7) Saŋa kasɛka, Naba David dayɔa Adoniga yuun boti la a faaɛ na’am la Solomon nu’usin. Ge Keretdoma la Peletdoma la yuun kelum tara yelemɛŋɛrɛ bɔ’ɔra David mɛ ge soŋɛ ti ba bobe Solomon n de se’em ti Yehowa yuun loe en ti a di na’am la.—1 Na. 1:​24-27, 38, 39.

Nɛra ayima me n yuun daɣɛ Israel nɛra ge tara yelemɛŋɛrɛ bɔ’ɔra David dela Gat buraa yu’urɛ n de Itai. Itai la a zabezabereba 600 yuun soŋɛ Naba David mɛ se’em ma’a ti David dayɔa Absalom yuun pã’asɛ Israeldoma la, tiregera ti a to’e na’am la. Pɔsega la, David yuun yele Itai yeti eŋa n daɣɛ Israel nɛra la zuo a da laɣum pa’asɛ zaberɛ la poan. Ge Itai yuun yeti: ‘Naayinɛ wa n boi wa ge ti hon dɛna naba wa, mam pɔ mɛ ti zɛ’an woo ti hon n daana naba wa ye’a mam wan doose. Kum bii vom poan mam ho yameŋa wa wan bɔna bim la hɔ!’—2 Sa. 15:​6, 18-21.

La boi bim ti Keretdoma, Peletdoma la Gatdoma la yuun dayɛ Israeldoma ge ba yuun mi ti Yehowa n de yelemɛŋɛrɛ Naayinɛ la ge me loe David ti a dɛna naba. Bisɛ David puurɛ n wan pee se’em la eŋa n yuun tari nɛrebana wa ti ba bɔna a zɛ’an la!