1. Bem n de vo’osum paradiisi la ge la nari ti to lu suure ti to eŋɛ la bem?

 PARADIISI boi tingɔŋɔ wa zuo zina beere wa mɛ ti nɛreba n boi ka poan la kɔ’ɔn mɔ’ɛ nini tuna tuunsoma. Nɛreba zo’e zo’e n boi ka poan ge kɔ’ɔn tara suma’asum la taaba. Nɛresɛba n boi paradiisi wa poan la kɔ’ɔn lu ba suure ti ba kan makɛ yese bim. Ba me boti la nɛreba zo’e zo’e wa’ana naɛ la ba ti ba bɔna ka poan. Bem paradiisi n bala? La dela vo’osum paradiisi la! a

2. Bem n basɛ ti vo’osum paradiisi la dɛna yelepakerɛ?

² Yelepakerɛ la dela, hali la Sitaana tingɔŋɔ wa ti nɛreba yaɛ taaba la, Yehowa tigese la vo’osum paradiisi ti a nɛreba tara pupeelum la nɔyinɛ bɔna bim. (1 Yo. 5:19; Lil. 12:12) Naayinɛ nyɛti tingɔŋɔ wa n basɛ ti nɛreba suure sa’am se’em mɛ ge a basɛ ti la ana a nɛreba la mama ti ba ta’an pu’usa en la pupeelum. Baabule la pa’alɛ ti vo’osum paradiisi la dela ‘suka zɛ’an’ la ‘gaadin ti ba basera de ko’om soŋa.’ (Isa. 4:6; 58:11) Yehowa kã bo nɛresɛba n boi paradiisi wa poan mɛ ti ba tara pupeelum ti la ana ba mama biɣi biɣi ba’asegɔ dabesa wa poan.—Isa. 54:14; 2 Tim. 3:1.

3. Isaiah a zuo 65 yuun tum tuuma la wani diimi sa?

³ Yehowa yuun basɛ ti nɔdɛ’ɛsa Isaiah tɔɣɛ pa’alɛ vom n wan ana se’em bɔ’ɔra sɛba n wan bɔna vo’osum paradiisi la poan la. Ho wan ta’an nyɛ eŋa n tɔɣɛ yele wa se’em la ti la bɔna Isaiah a zuo 65 n yuun puɣum tum tuuma  yuun 537 G.Y.B poan. Sankaŋa la, ba yuun basɛ Yudadoma sɛba n yuun de yamesi bɔna Babilon ge eŋɛ teere la, ti ba le lebe ba tiŋa. Yehowa yuun kã bo a nɛreba mɛ ge soŋɛ ba ti ba malum mɛ Yerusalem tiŋa ti ba yuun sa’am ka la ti la ana soŋa. Ba me yuun le mɛ pu’usegɔ yire la mɛ ti la dɛna yelemɛŋɛrɛ pu’usegɔ zɛ’an Israel tiŋa.—Isa. 51:11; Zek. 8:3.

4. Isaiah a zuo 65 yetɔɣebiŋ’a la tum tuuma la wani zina beere wa?

⁴ Isaiah yetɔɣebiŋ’a la yuun le tum tuuma buyi poan la yuun 1919 Y.B. sansɛka ti Yehowa yamesi n boi zina beere wa ze’ele Babilon Kãtɛ la poan yese na la. Pooren ti vo’osum paradiisi la nyaa yeregera zɛ’an woo tingɔŋɔ wa poan. Mabiisi la yuun kɔ’ɔn tuulegera mɔɔla na’am yelesoma la mɛ. Ba me yuun eŋɛ pa’alɛ ti ba tari la zilam vo’osum la wɔla la ge me yuun yu’ɛ tansuga zo’e zo’e. Buraasi la pɔɣesi n yuun nɔŋɛ gbiregere tuuma nyaa ‘yɛ la halepaalega la ti ba naam ka doose Naayinɛ puti’irɛ n boti sɛla.’ (Ep. 4:24) Yelemɛŋɛrɛ, kãse’a ti Isaiah yuun tɔɣɛ de yele la wan ta tum tuuma la beere sa’am tinpaalega la poan. Hali nananawa, to nyɛti nyuurɔ mɛ la ton boi vo’osum paradiisi la poan la. Basɛ ya ti to sɔsɛ baŋɛ vo’osum paradiisi la n wan soŋɛ to se’em la sɛla n sɔi ti la ka nara ti to yese bim.

LAN ANI SƐBA N BOI VO’OSUM PARADIISI LA POAN SE’EM

5. Wuu Isaiah 65:13 n pa’alɛ se’em la, to nyɛti la bem nyuurɔ vo’osum paradiisi la poan?

⁵ Ba tari la imma’asum ge dita tiɣera vo’osum poan. Isaiah yetɔɣebiŋ’a la pa’alɛ la sɛba n boi vo’osum paradiisi la n boi ba tɔka se’em la sɛba n ka boi bim la. (Kaalɛ Isaiah 65:13.) Yehowa kɔ’ɔn diisa a yamesi vo’osum poan mɛ ti ba dita tiɣera. A dekɛ la a zilam vo’osum, la Baabule, la Baabule gɔnɔ bɔ’ɔra tɔ ti to ‘dita tiɣera ti to puurɛ pɛɛra.’ (Dekɛ makɛ Liligere 22:17.) Ge sɛba n ka boi vo’osum paradiisi la poan la, ‘kom la konyuuro n tari ba ti ba namesa.’ Ba ka mi Naayinɛ.—Am 8:11.

6. Yoel 2:​21-24 tɔɣɛ pa’alɛ bo’olum sebo ti Yehowa dekɛ bo to yele la wani ge la wan ta’an soŋɛ to la wani?

⁶ Nɔdɛ’ɛsa Yoel yetɔɣebiŋ’a la poan, a dekɛ la boom, kaam la daam tiisi pa’alɛ Yehowa n bo’ori yɛri yɛri se’em, basɛ ti A nɛreba dita tiɣera vo’osum poan. (Yoe 2:​21-24) A doli la Baabule la, to intanɛt tuuma zɛ’an, Baabule gɔnɔ, to zamesegɔ, laɣebibisi la laɣekara poan ita bala. Bala basɛ ti to nyɛta la vo’osum poan dia daarewoo ti to tara imma’asum ti la ana to buɣa buɣa.

7. Bem n basɛ ti to ‘suure ana mama’? (Isaiah 65:14)

⁷ Ba tari la pupeelum ti ban tari sɛla la me seke ba. Naayinɛ nɛreba kɔ’ɔn ‘vɔɔla la pupeelum’ se’ere n sɔi la ba suure sukɛ mɛ la sɛla ti a ita bɔ’ɔra ba la. (Kaalɛ Isaiah 65:14.) Yelemɛŋɛrɛ la, la Naayinɛ Yetɔɣum n buɣeli to suure la, la Krista lua bunɔ la n basɛ ti to tara beere sa’am puti’irɛ. Bala basɛ ti to ‘suure ana la mama.’ To san ni naɛ la to mabiisi sɔsera vo’osum poan yɛla wa, la basɛ ti to tara la pupeelum!—Ym. 34:8; 133:​1-3.

8. Bem hala ayi n boi vo’osum paradiisi la poan?

⁸ Hala ayi n niɛ peelumi pa’alɛ ti Yehowa nɛreba boi la vo’osum paradiisi la poan dela nɔŋerɛ la nɔyinɛ. ‘Nɔyinɛ n di mi’a’ wa basɛ ti to baŋɛ la vom n wan ta ana se’em tinpaalega la poan. Bilam ti  Yehowa yamesi wan ta tara nɔŋerɛ la nɔyinɛ ti la ka tara makerɛ. (Kol. 3:14) Mabipɔka ayima yele la wana eŋa n yuun ta seke Yehowa Sɛɛradoma la. A yeti: “Mam yuun ka mi mam n wan eŋɛ se’em tara pupeelum hali la n yire poan. Yehowa Sɛɛradoma zɛ’an ti mam nyɛ nɛreba n sirum tari nɔŋerɛ bɔ’ɔra taaba se’em.” Se’em n boti a sirum tara pupeelum nari ti a bɔna la vo’osum paradiisi la poan. La ka pakɛ la tingɔŋɔ wa n ti’iseri Yehowa yamesi yele se’em, to dela nɛresɛba n tari gilema la yusonɛ bɔna Yehowa yire la poan.—Isa. 65:15.

9. Isaiah 65:​16, 17 la tɔɣɛ la bem la yelese’a n basɛ ti la wuna tɔ nananawa la?

⁹ Ba ani la baalam ti ba suure gã’a ma’asumi. Isaiah 65:14 yeti nɛresɛba n ka boi vo’osum paradiisi la poan la, ‘la wuni ba mɛ ti ba kaasa ge kɛla ba susa’aŋɔ la zuo.’ Ge yelese’a n basɛ ti la wuna Naayinɛ nɛreba ti ba suure ni sa’am la me? La kan yue, ‘Naayinɛ wan tamɛ yele aŋa’ ti la kan le bɔna. (Kaalɛ Isaiah 65:​16, 17.) Yehowa wan yese to yeledaaŋɔ la ge ti to puɣum kan le tɛ̃ra yele aŋa n yuun basɛ ti la ana to se’em.

10. Beni n sɔi ti hon bisɛ ti la dela kã’a la hon naɛ la mabiisi bɔna la? (Bisɛ foote la.)

¹⁰ Hali la nananawa, to san ni bɔna tansugere zamesegɔ poan, la ni ana to la mama. To me ni soŋɛ to mabiisi la mɛ ti la ana ba mama la ton tari Naayinɛ vo’osum la wɔla la n de nɔŋerɛ, nyɛɛma, suma’asum, itisoŋɔ la sumama la. (Ga. 5:​22, 23) Bisɛ lan de kã’a se’em bɔ’ɔra tɔ la ton boi Yehowa tigere la poan la! Nɛresɛba n kelum bɔna vo’osum paradiisi la poan la wan nyɛ se’em ma’a ti Naayinɛ wan basɛ ti a pu’ulumbiŋ’a la n de ‘saazuo paalega la tingɔŋɔ paalega’ la tum tuuma.

11. Wuu Isaiah 65:​18, 19 n pa’alɛ se’em la, vo’osum paradiisi la soŋeri to la wani?

¹¹ Ba suure sukɛ mɛ ti ba puurɛ pee. Isaiah le tɔɣɛ pa’alɛ la sɛla n sɔi ti la nara ti to ‘tara pupeelum ge nyɛɛna’ vo’osum paradiisi la poan. Yehowa n basɛ ti vo’osum paradiisi la bɔna. (Kaalɛ Isaiah 65:​18, 19.) Bala la, nɔkpe’ene kai ti Yehowa doli la tomam poan soŋera nɛreba ti ba yɛsera tingɔŋɔ wa tiga n ka pa’ali nɛreba Naayinɛ yelesum la ge me soŋera ba ti ba wa’ana pa’asɛ vo’osum paradiisi n ani soŋa la poan! To puurɛ pee mɛ la ton boi  yelemɛŋɛrɛ la poan ge nyɛta kãsebo la. La me kpemeseri la to giila ti to basɛ ti nɛreba baŋɛ.—Yer. 31:12.

12. Pu’ulumbiŋere se’a n boi Isaiah 65:​20-24 la basɛ ti la ana hon la wani ge bem zuo?

¹² To suure sukɛ mɛ ti to puurɛ pee la ton tari beere sa’am puti’irɛ la, se’ere n sɔi la to tari la bɔnsoŋa la Yehowa. Yeen ti’isɛ bisɛ ton wan ta nyɛta ge ita yelese’a Naayinɛ tinpaalega la poan! Baabule la pu’ulum biŋe ti: ‘Bunbibisi kan le kiira, bii bunkutɛ kuregɛ paa ge ki.’ To wan ‘mɛ yɛa ge kɛ̃’ɛra a poan ge sele daam tiisi ge di si wɔla.’ To kan ‘tum kpe’eŋo kpe’eŋo basɛ yoo’ se’ere n sɔi la ‘Yehowa wan kã bo to.’ A pu’ulum biŋe ti to wan ta bɔna fai ti to vom ana lumta. ‘Ba san puɣum ta maasum ti ba yi,’ a wan mina sɛla n pakɛ ba ge ‘basɛ ti bunvɔa woo nyɛ eŋa n boti sɛla.’—Isa. 65:​20-24; Ym. 145:16.

13. Sodeni poan ti Isaiah 65:25 tɔɣɛ pa’alɛ nɛreba n ni eŋɛ teere se’em ba san pɔsɛ pu’usa Yehowa?

¹³ Suma’asum la fai bɔŋa. Naayinɛ vo’osum la yuun soŋɛ nɛresɛba n nɔŋɛ gbiregere, la kinkisum tuuma la mɛ ti ba tee. (Kaalɛ Isaiah 65:25.) Ba kɔ’ɔn tiregɛ mɛ basɛ halebe’ero wa. (Arom 12:2; Ep. 4:​22-24) La dela sira ti Naayinɛ nɛreba ka di mi’a ge wan kelum tuura. Ge Yehowa laɣesi la ‘nɛreba buuri buuri’ ti ba tara nɔŋerɛ bɔ’ɔra en ge me tara nɔŋerɛ bɔ’ɔra taaba ti suma’asum la nɔyinɛ bɔna. (Titus 2:11) Gaŋɛ za’a Naayinɛ la ma’a n wan ta’an basɛ ti yelekirega wa tum!

14. Sodeni poan ti Isaiah 65:25 sirum tum tuuma mabia ayima vom poan?

¹⁴ Nɛreba wan ta’an sirum tee ba hala? Geele zi’irego poan yele wa bisɛ. Bunbilipaalega ayima n yuun ta paara yuun 20 la ti ba paɣɛ en sarega la sugumnɔɔrɛ zo’e zo’e. A yuun nɔŋɛ la yalumtuuma la gbiregere tuuma. A yuun zu la loore ti ba paɣɛ en, vaɛ lɔɣɔrɔ ti ba paɣɛ en ge me tum tuunfɛ’ɛsa ase’a ti ba paɣɛ en. A yuun kɔ’ɔn maasum ti a zabɛ mɛ. Eŋa n yuun pɔsɛ zamesa Baabule la ge kena Yehowa Sɛɛradoma zamesegɔ la, a yuun baŋɛ ti a vom nyaa tari la vuurɛ la eŋa n tari yɔ’ɔ ti a pu’usa Yehowa vo’osum paradiisi la poan la. Eŋa n yuun ta muse ko’om dɛna Sɛɛradaana la, a ni ti’isa taɣesa la Isaiah 65:25 n tɔɣeri a yele se’em. Eŋa n yuun tãseri wuu gbeɣenɛ ge nɔŋɛ gbiregere la, a nyaa ani wuu pesego n nɔŋɛ suma’asum.

15. Beni n sɔi ti to bɔta ti to beem nɛreba ti ba naɛ la tɔ vo’osum paradiisi la poan ge to wan eŋɛ la wani ta’an eŋɛ bala?

¹⁵ Isaiah 65:13 pɔsɛ yeti: ‘Sɔ’ɔlum Za’adaana Yehowa n yele sɛla n wana.’ Kaalegɔ zɛ’an 25 la ki’ilum yeti ‘Yehowa n yele se’em n bala.’ Eŋa n tɔɣɛ sɛla la ni kɔ’ɔn tum tuuma mɛ. (Isa. 55:​10, 11) Vo’osum paradiisi la sirum kɔ’ɔn bɔna mɛ. Yehowa basɛ ti to tara la mabinɔɔrɛ n boi ba to’ore. A nɛreba wa poan to wan ta’an tara pupeelum la suma’asum tingɔŋɔ be’o wa poan. (Ym. 72:7) Bala zuo, to boti to soŋɛ nɛreba zo’e zo’e ti ba wa’ana naɛ la tɔ bɔna. To wan ta’an eŋɛ bala to san basɛ ti to puti’irɛ bɔna ton wan ɛɛra podɔleba la poan.—Mt. 28:​19, 20.

TON WAN EŊƐ SE’EM BASƐ TI VO’OSUM PARADIISI LA TARA NIMPIILUM BƆ’ƆRA NƐREBA

16. Bem n wan ta’an soŋɛ nɛreba ti ba bɔta ti ba pa’asɛ vo’osum paradiisi la poan?

¹⁶ La dela tomam ayima ayima woo zugbere yele ti to basɛ ti vo’osum paradiisi la tara nimpiilum bɔ’ɔra nɛreba. To wan  ta’an eŋɛ bala to san tɔɣesa Yehowa. A ka pɛ̃regeri nɛreba ti ba pa’asɛ a tigere la poan ge a iti la bãla bãla ‘vɛ’ɛra’ nɛreba kena a zɛ’an. (Yon 6:44; Yer. 31:3) Susonɛdoma n ni zamesɛ baŋɛ Yehowa nɔŋerɛ, la a halesoma la yele la ni vurege du en mɛ. To wan eŋɛ la wani basɛ ti to halesoma la to itisoŋɔ basɛ ti vo’osum paradiisi la tara nimpiilum bɔ’ɔra nɛreba?

17. To wan eŋɛ la wani ta’an basɛ ti vo’osum paradiisi la tara nimpiilum bɔ’ɔra nɛreba?

¹⁷ Sore deyima poan ti to wan ta’an basɛ ti vo’osum paradiisi la tara nimpiilum bɔ’ɔra nɛreba dela to tara nɔŋerɛ la itisoŋɔ bɔ’ɔra to mabiisi. Saama san ni wa’an to zamesegɔ na, to boti la ana ba wuu nɛresɛba n yuun ka tari sakerɛ n yuun keŋɛ zamesegɔ diimi Korint la. Ba yuun yeti: ‘Naayinɛ boi me la ya kalam.’ (1 Ko. 14:​24, 25; Zek. 8:23) Bala la, la nari ti to kɔ’ɔn dɔla ka’aŋɔ la n de ‘dɛna ya sɛba n wan tara suma’asum la taaba’ la.—1 Tes. 5:13.

18. Bem n wan basɛ ti vo’osum paradiisi la tara nimpiilum bɔ’ɔra nɛreba?

¹⁸ La nari ti to tiregɛ nyɛta to mabiisi la wuu Yehowa n biseri nyɛta ba se’em la. To san wan ta’an eŋɛ bala, la dela to bisera ba halesoma la ge daɣɛ ba tuure yɛla. To wan ta’an maalɛ yeledaaŋɔ se’a n boi tomam la mabiisi tiŋasuka to san ‘ita taaba soŋa, tara nimbɔzore ge yese to suure poan dita sugeri bɔ’ɔra taaba.’ (Ep. 4:32) To san ita bala, la wan basɛ ti nɛreba bɔta ti ba pa’asɛ vo’osum paradiisi la poan. b

 KƆ’ƆN BƆNA VO’OSUM PARADIISI LA POAN

19. (a) Wuu daka la zuo n de “Ba Yuun Yese Mɛ Ge Le Lebe Na” la n pa’alɛ se’em la, sɛba n lebe vo’osum paradiisi la poan la yeti bem? (b) La nari ti to lu to suure ti to eŋɛ la bem? (Bisɛ foote la.)

¹⁹ Bisɛ to puurɛ n pee se’em la to vo’osum paradiisi la! La kɔ’ɔn ana soŋa mɛ ti la ka tara makerɛ, ti nɛreba zo’e zo’e bɔna bim pu’usa Yehowa. Basɛ ya ti to kɔ’ɔn ita pa’ala ti to puurɛ pee mɛ la paradiisi la ti Yehowa dekɛ bo to la. Se’em woo n basɛ ti eŋa n tari sɛla la seke en, bɔna fai, ana baalam ge bɔta ti la ana en mama la, nari ti a wa’an vo’osum paradiisi la poan na ge kɔ’ɔn bɔna bim! Ge la nari ti to bisɛ tomea soŋa, se’ere n sɔi la Sitaana kɔ’ɔn tiregera mɛ ti a pã’asɛ tɔ ti to yese bim. (1 Pe. 5:8; Lil. 12:9) To da basɛ ti a nyaŋɛ tɔ. Basɛ ya ti to tiregɛ gu vo’osum paradiisi la ti la kɔ’ɔn ana soŋa, filam ge tara suma’asum.