Ba dɔɣɛ mam la yuun 1955, mam n yuun de nu’usikaarɛ mam ma budibito batã la poan. Mam yuun kɛ̃’ɛri lɛm la Finland tiŋanɔɔrɛ bɔba, tinsɛka ti ba yi’ira ti Vantaa la.

Mam ma n yuun muse ko’om dɛna Yehowa Sɛɛradaana la, la yuun ka yue ti a dɔɣɛ mam. Ge mam sɔ yuun ka boti yelemɛŋɛrɛ la, bala la a yuun ka bo mam ma yɔ’ɔ ti a zamesa tɔ bii a tara tɔ kena tansugere zamesegɔ. Mam sɔ san ka bɔna, mam ma ni pa’alɛ to la Baabule poan yelepiɣesi la.

Mam bunbilimen ti mam yuun tiregɛ zamesɛ baŋɛ Yehowa. Makerɛ, mam n yuun de yuuma ayopɔi la, mam sukuu tikiya sunsɔa yuun yie mɛ la mam yuun ka boti n di verilättyjä (Finland sɛ̃lɛ pancake). Makerɛ, a yuun makɛ la mam nɔɔrɛ ge tiregɛ dekɛ desunkɔ eŋɛ sɛ̃lɛ la ti a eŋɛ mam nɔɔren ti mam ŋmɛ desunkɔ la basɛ tiŋa.

Mam n yuun de yuun 12 la, ti mam sɔ ki. Pooren, mam yuun nyaa ta’an kena tansugere zamesegɔ mɛ. Mabiisi la n boi tansugere la poan la yuun nɔŋɛ mam mɛ paa, bala n yuun basɛ ti mam tiregɛ nyɛta nɛŋa tɔlega vo’osum poan. Mam yuun kaali Baabule la mɛ daarewoo ge zamesa tigere la gɔnɔ la soŋa soŋa. Mam n yuun ta’an ita n mea zamesegɔ soŋa soŋa la n yuun basɛ  ti mam yuun ta’an muse ko’om August 8, 1969 mam n yuun de yuun 14 la.

Mam n yuun ba’asɛ sukuu la, la yuun ka yue ti mam pɔsɛ tɛm woo sore ŋmɛ’a tuuma la. Bakwai fii pooren, ti mam keŋɛ zɛsɛka n eeri soŋerɛ n de Pielavesi n boi Finland tiŋasuka.

Mam n yuun boi Pielavesi la ti mam seke mam pɔɣa Sirkka. Mam yuun nɔŋɛ en mɛ, se’ere n sɔi la a yuun siregeri la amea ge me nɔŋɛ Yehowa paa. A yuun ka eeri a nyɛ yu’urɛ bii a vɔna lumta. To yuun boti la to pu’usa Yehowa la to paŋa za’a ge me keŋɛ zɛsɛka woo ti ba wan tum tɔ. Mam yuun di en la March 23, 1974. To yuun ka nyɛ nɛŋa bo tomea ti to vo’ose ge to yuun tuɣum keŋɛ la Karttula, bilam ti ba yuun ɛɛra na’am mɔɔlegɔdoma zo’e zo’e.

To pɔɣedire la poan, Yehowa yuun biseri to mɛ inganɛ poan, ton yuun basɛ ti a Na’am la dɛna yia to vom poan la. (Mt. 6:33) Makerɛ, ton yuun boi Karttula la, to yuun ka tari loore. Yia la, to yuun bã’ari la keekee. Ge ɔɔrɔ n yuun boi bim ti la ka tara makerɛ. La yuun dela to tara loore ta’an ɛ tansugere la sɔ’ɔlum la za’a ge to yuun ka tari laɣehɔ n wan da loore.

Mam keema n yuun wa’ana kaɛ to bisɛ ge dekɛ a loore bo to. A yuun puɣum eŋɛ loore la insurance mɛ. Tomam yeen dɛna la to da kaam eŋɛ bim ge nyaa tara tuna tuuma.

Yehowa yuun eŋɛ pa’alɛ ti la yele pakɛ en mɛ ti a bisera tɔ inganɛ poan. Tomam tuunɛ yeen dɛna la to basɛ ti Na’am la dɛna yia.

Yuun 1978 ti to yuun keŋɛ Sore Ŋmɛ’adoma Sukuu. Raimo Kuokkanen a, n de to pa’alegɔdaana la ayima yuun yele to yeti to gulesɛ gɔŋɔ tisɛ ti to boti to keŋɛ la Gilead Sukuu. To yuun pɔsɛ zamesa la Solemiine yetɔɣum ti to ta’an keŋɛ Sukuu la. Ge yuun 1980 ti ba yuun beem to ti to wa’ana tuna Finland tigere yile la poan. Ton yuun tuni Betel la zuo, to yuun kan ta’an gulesɛ gɔŋɔ tisɛ ti to boti la to keŋɛ Gilead. To yuun boti to tuna la zɛ’an ti Yehowa bɔta ge daɣɛ zɛsɛka ti tomam bɔta. Bala la, to yuun sakɛ keŋɛ mɛ. Ge to yuun kelum zamesa  Solemiine mɛ ti daanse’ere to wan ta nyɛ yɔ’ɔ keŋɛ Gilead Sukuu.

Yuuma fii pooren, ti Tigere Zuo Bisegadoma la yuun bo yɔ’ɔ ti Beteldoma me ta’an gulesɛ gɔŋɔ ti ba boti ba keŋɛ la Gilead Sukuu. To yuun eŋɛ la kalam gulesɛ gɔŋɔ tisɛ, la boi bim ti la yuun daɣɛ la to puurɛ n ka pee la Betel tuuma. To yuun boti la to tum zɛsɛka n nari ti to tum, la san ta nara. Ba yuun beem to ti to keŋɛ Gilead Sukuu la mɛ. To me yuun ba’asɛ la kilaasi sɛka n pa’asɛ piyopɔi la bawɛi September 1985 poan. Ba yuun basɛ ti to keŋɛ la Colombia.

Ton yuun keŋɛ Colombia la, ba yuun basɛ ti to ta tuna la tigere yile la poan. Mam yuun tiregɛ mɛ ti n ta’an tuna n tuuma la soŋa ge yuunɛ pooren, mam yuun bisɛ ti la nari ti ba tee tuunɛ bo to. Sankaŋa wa n yuun de yia ti mam yeti ba tee n tuunɛ bo mam. Ba yuun nyaa basɛ ti to tuna la satiŋa na’am yetɔɣum yalegerɛ tuuma Neiva tiŋa, n boi Huila.

Mam nɔŋɛ na’am mɔɔlegɔ tuuma la mɛ. Mam n yuun de nɛreyone tuna sore ŋmɛ’a tuuma Finland la, mam yuun ni kɔ’ɔn mɔɔla la bulika ta paɛ zaanɔɔrɛ. Mam n yuun di n pɔɣa Sirkka la, to yuun ni kɔ’ɔn dekɛ la dabeserɛ la za’a mɔɔla. To san ni keŋɛ zɛ’an n zaaɛ ta mɔɔla, saŋa ase’a to ni gã’arɛ la to loore la poan. Wana yuun basɛ ti to ka kena ge lɛbera ge ni ta’an pɔsɛ kalam dabeserɛ la poan mɔɔla.

Tomam n de satiŋa na’am yetɔɣum yalegerɛdoma la, to puurɛ ni kɔ’ɔn pee mɛ ti to pɔsɛ na’am mɔɔlegɔ la atɔtɔ. To tansugere la yuun nyaa zo’e mɛ. Colombia mabiisi la yuun bo’ori la gilema, tara nɔŋerɛ ge ti ba puurɛ me pee la ton iti sɛla la.

Tisi sise’esi yuun lɛm la Neiva ti Sɛɛradoma ka bɔna bim. Mam yuun ni ti’isa la mam wan eŋɛ se’em ta’an basɛ ti yelesoma la paɛ zɛ̃ ana wa ge zaberɛ n yuun boi zɛ̃ ana wa poan la zuo, la ka ani soŋa ti saama keŋɛ bim. Mam yuun zusɛ mɛ ti nɛra ayima lebege Sɛɛradaana zɛ̃ ana wa poan. Mam yuun ti’isɛ ti se’em n wan baŋɛ yelemɛŋɛrɛ la nari ti a dɛna Neiva tiŋa nɛra. Mam me yuun zusɛ ti a san muse ko’om ba’asɛ, a nyɛta nɛŋa tɔlega ta’an lebe a tiŋa la ta mɔɔlɛ. Ge mam yuun ka mi ti Yehowa wan eŋɛ sɛla n boi de to’ore.

Pooren ti mam pɔsɛ zamesa la bunbilipaalega ayima yu’urɛ n de Fernando González. A yuun kɛ̃’ɛri la Algeciras, tinse’a poan ti Sɛɛradoma yuun ka bɔna bim la ayima. Fernando yuun ni keŋɛ la kilomita n gaŋɛ 50 (bii mɛɛla 30) paɛ Neiva ta tum. A yuun ni kɔ’ɔn maasum a Baabule zamesegɔ la mɛ ge me yuun eŋɛ kalam pɔsɛ zamesegɔ kenɛ. A yia zamesegɔ bakwai la poan la, Fernando yuun laɣesɛ la a tiŋa nɛreba nyaa pa’ala ba sɛla ti a zamesɛ Baabule la poan.

Fernando yuun dekɛ la ŋmaresi siyoobe zamesɛ ge nyaa muse ko’om January 1990. Pooren ti a yuun dɛna tɛm woo sore ŋmɛ’adaana. Eŋa n nyaa de Sɛɛradaana Algeciras la, la yuun nyaa dela naana ti tigere yile  la tum sore ŋmɛ’adoma n boi ba to’ore ti ba keŋɛ bim. February 1992, ti ba yuun yu’ɛ tansugere tiŋa wa poan.

Fernando yuun kɔ’ɔn mɔɔla la a tiŋa la poan ma’a? Aayi! Eŋa n yuun di pɔɣa la, eŋa la a pɔɣa yuun keŋɛ la San Vicente del Caguán, zɛsɛka me ti Sɛɛradoma ka bɔna bim. Ba yuun soŋɛ mɛ yu’ɛ tansugere bim. Yuun 2002 ti ba loe Fernando ti a dɛna gingilega kaarɛ bisegadaana. Eŋa la a pɔɣa Olga kelum bɔna la kaarɛ tuuma la poan ta paɛ zina.

Yele wa basɛ ti mam baŋɛ la yele n pakɛ se’em ti n ni zusɛ sɛla wana mɔpi n tiokrasi tuuma la poan. Yehowa iti la sɛla ti to kan ta’an eŋɛ la se’ere n sɔi la, la dela eŋa tuunɛ, daɣɛ tomam.—Mt. 9:38.

Yuun 1990 poan, ba yuun basɛ ti to ta tuna la kaarɛ tuuma. To yuun pɔsɛ to kaarɛ tuuma la Colombia tinkãtɛ la poan n de Bogotá la. To paleŋa n yuun ɛ̃ɣeri la tuunɛ la. Mam la mam pɔɣa yuun ka mi sɛla wana mɔpi itigɔ. To yuun ka malum tinkãtɛ poan kɛ̃’a ge Yehowa pu’ulumbiŋere la n boi Filipi 2:13 la, yuun tum tuuma to poan mɛ: La yeti: ‘Naayinɛ n de se’em n boti la zuo ti a bɔ’ɔra ya paŋa la kunkoma’asum ti ya tuna.’

Pooren, ba yuun tee to kaarɛ tuuma keŋɛ la Medellín, zɛsɛka ti mam puɣum tɔɣɛ de yele la. Nɛreba la n yuun boi tiŋa la poan la kɔ’ɔn malum gbire gbire tuuma mɛ. Makerɛ, mam yuun zameseri la nɛra ti ba pɔsɛ ŋmɛ’ɛra bugundɔɔ yire la yiŋa. Mam yuun maasum ti n lui gã’arɛ la tiŋa ge Baabule zamesegɔdaana la yuun kelum zi’a mɛ kaala ti dabeem ka tara en. Eŋa n yuun kaalɛ ba’asɛ la ti a yese yiŋa. Eŋa n yuun yese la, la eŋɛ la fii ti a tari kɔma bayi lebe na ge yele mam baalam yeti, “Gaafara la dela n tari n kɔma la kɛ̃ na.”

Saŋa busebo, dɛŋa n yuun paɛ tɔ. Daarɛ deyima to yuun boi la yire la yire na’am mɔɔlegɔ poan ti mam pɔɣa zɔta tu’usa mam ge vɔ’ɔsa nyɔsa. A yeti nɛra n dekɛ bugundɔɔ tɔɣelɛ eŋa. Mam paleŋa n yuun ɛ̃kɛ ge pooren, to yuun baŋɛ ti buraa n dekɛ bugundɔɔ tɛɛra nɛra n doli Sirkka zɛ’an tɔla ge daɣɛ eŋa.

Pooren, dabeem yuun ka le ba’ɛ tara tɔ la gbire gbire la. Yelese’a n yuun paari mabiisi la n boi tiŋa la poan ti ba kelum ŋmibera se’em la, yuun kpemese to giila mɛ. To yuun sakɛ to suuren ti Yehowa san soŋera ba, a me wan soŋɛ tomam me. To yuun kelese keendoma la ka’aŋɔ mɛ, lɔɣesa tomea ge dekɛ sɛla woo basɛ Yehowa.

Yelemɛŋɛrɛ, dɛŋa yuun ka boi yɛla ase’a poan wuu tomam n yuun ti’iseri se’em la. Daarɛ deyima ti mam wum sɛla n ani wuu pɔɣesi bayi n zaberi la taaba yisɛka ti mam paɛ bim la yiŋa. Mam yuun ka boti n biseri nɛreba n ŋmɛ’ɛri nɔkpe’ene la taaba. Bala zuo, yidaana la yuun yele mam ti n wa’an eŋa zɛ’an na. Ge yele la n yuun tuɣum dɛna se’em la dela kĩisi bayi n yuun “tɔɣeseri” yire la nɛreba n tɔɣeri se’em la.

Yuun 1997 ti ba yuun loe mam ti n dɛna pa’alegɔdaana Ministerial Training School poan. b Mam puurɛ yuun pee mɛ la mam n keni tiokrasi sukuu la. Ge mam yuun ka ti’isɛ ti mam wan nyɛ yɔ’ɔ ta pa’ala ba.

Pooren, mam yuun nyaa ta dɛna la tinkãtɛ bisegadaana. Bala n yuun ka le bɔna la, mam yuun lebe la kaarɛ tuuma la poan. Bala la, la gaŋɛ yuun 30 ti mam pa’ala ge tuna kaarɛ tuuma la. Tuun ana wa basɛ ti mam nyɛ la kã’a zo’e zo’e. Ge la daɣɛ naana bala sa. Basɛ ti n tɔɣɛ pa’alɛ.

Mam tari la sukpe’ene. Bala n soŋɛ mam ti mam ta’an ŋmibe biɣi biɣi saŋa poan. Ge saŋa ase’a, mam inya n ni kɔ’ɔn kita ti n demese yɛla kalam tansuga la poan. Daarɛ deyima, mam yuun yele mabiisi la ti ba tara nɔŋerɛ la putɛsonɛ. Ge yelemɛŋɛrɛ la dela, mam mea yuun ka tari halɛ ana wa.—Arom 7:​21-23.

Mam n pɔ’ɛ tɔregɔ la zuo, saŋa ase’a mam giila n ni kɔ’ɔsɛ. (Arom 7:24) Tɛm busebo, mam yuun zusɛ Yehowa ti la ani soŋa ti n basɛ satiŋa na’am yetɔɣum yalegerɛ tuuma la ge lebe Finland tiŋa. Yu’unkuŋɔ, mam yuun keŋɛ la tansugere zamesegɔ. Mam n yuun wum yelese’a la yuun kpemese mam giila mɛ ti mam baŋɛ ti, la nari ti n kelum tuna n tuuma la ge me tɛɛra n hala la. Ta paɛ zina, mam baŋɛ Yehowa n lebeseri mam zusega se’em mɛ. Leyɛ’ɛsa, mam suure sukɛ mɛ la eŋa n soŋɛ mam ti mam ta’an basɛ n halebe’ero la.

Mam la Sirkka puurɛ pee mɛ la Yehowa n bo to yɔ’ɔ ti to ta’an tum tɛm woo na’am tuuma la. Mam me suure sukɛ mɛ la Yehowa n basɛ ti mam di pɔɣesɛka n tari nɔŋerɛ la sakerɛ la.

Mam gee fii la n paɛ yuun 70 ti la pa’alɛ ti la kan yue n wan dekɛ pa’alegɔ la kaarɛ tuuma la basɛ. Ge bala ka kɔ’ɔsɛ mam giila. Beni n sɔi? Sɛla n sɔi la, mam mi ti sɛla n na’aseri Yehowa paa dela ton siregeri tomea na’asa en ge pɛɣera en la. (Mik. 6:8; Mr. 12:​32-34) La daɣɛ ti to tara yɔ’ɔ tuna tuuma ta’an na’asa Yehowa.

Mam san bisɛ tuunse’a ti mam ta’an tum la, la daɣɛ la mam gani la basɛba bii mam tã ita la sɛla n sɔi ti mam nyɛ yɔ’ɔ tum tuun ana. Lan tuɣum dɛna se’em dela Yehowa zu’usegɔ la zuo ti mam nyɛ yɔ’ɔ tum tuun ana wa. Hali la mam tɔregɔ la za’a, a kelum bo mam yɔ’ɔ ana wa mɛ. Mam mi ti Yehowa n soŋɛ mam ti mam ta’an tum n tuuma wa soŋa, bala pa’alɛ ti mam dekɛ n tɔregɔ la na’asɛ la Yehowa.—2 Ko. 12:9.