• “La yuun ani mam wuu mam sira tum la yalumtuuma.”

• “Valum n yuun tari mam, ti la ana mam wuu mam ka som mɛ ge me ka tara vuurɛ.”

• “Mam yuun ka ta’an tɔɣɛ de bo nɛra. La yuun wuni mam mɛ.”

• “La yuun ani mam wuu Yehowa ka ti’iseri mam yele.”

Yɛla wa pa’alɛ la, lan ni wuna pɔka se’em a sira san bisera yalumfɔɔra. Ge a san suɣera bisera yalumfɔɔra wa ta paɛ ŋmaresi bii yuuma, pɔka la ta’an ti’isa ti a kan le ta’an dekɛ amea delum en. Pɔka ayima yeti, “La yuun ani mam wuu mam ka mi n sira soŋa soŋa ge ti’isa ti, ‘a tari la yɛla suɣera mam.’”

Zaseŋɔ yele wa wan soŋɛ pɔka ti a sira bisera yalumfɔɔra.  a Ku tari la Baabule naresum yɛla n wan buɣelɛ a suure ge basɛ ti a baŋɛ ti Yehowa nɔŋɛ en mɛ ge bɔta ti a soŋɛ en ti a ta’an tara suma’asum ge ana du’a du’a la en. b

La boi bim ti ho kan ta’an baŋɛ yelese’a woo ti ho sira ita ge yɛla ase’a boi mɛ ti ho wan ta’an eŋɛ ge tara suma’asum. Geele yɛla wa bisɛ.

Da nyɔ̃na homea. Pɔka ta’an ti’isa ti eŋa n ta’asɛ ti a sira bisera yalumfɔɔra. Alice c yuun ti’isɛ ti a ka som a sira nɛŋa. A yuun ni ti’isa ti, ‘Beni n sɔi ti mam sira nɔŋɛ a bisera pɔɣesi basɛba gana mam?’ Pɔɣesi basɛba zɛregeri la bamea la bamam n iti se’em la zuo, nyaa ni ti’isa ti bamam itigɔ la n basɛ ti yele la gaŋɛ nu’usi. Danielle yeti, “Mam sunsɔa n yuun nyie ti la ana mam bura. Wana yuun basɛ ti la ana mam wuu mam n ta’asɛ ti yele la gaŋɛ nu’usi.”

La me san ana ho bala, tɛ̃ra ti Yehowa mi ti la daɣɛ ho n ta’asɛ ti ho sira la ita bala. Yames 1:14 yeti: ‘La dela nɛra mea kunkoma’asum n ni tara en yɛ’ɛsa be’em poan.’ (Arom 14:12; Flp. 2:12) Yehowa kan zɛregɛ  ho ge a puurɛ tuɣum pee mɛ la hon tari yelemɛŋɛrɛ bɔ’ɔra en la.​—2 Yel. 16:9.

La wan ana soŋa ti pɔka la mina ti daɣɛ la a ka som mɛ n sɔi ti a sira bisera yalumfɔɔra. Gɔnmi’ileba n mi yele wa pa’alɛ ti sɛba n biseri yalumfɔɔra la tari la kunkoma’asum sebo ti pɔka ka bɔna n wan basɛ ti la seke ba.

Da ba’ɛ fabela. Catherine yeti eŋa n yuun ti’iseri a sira n biseri yalumfɔɔra yele la yuun basɛ ti a ka ta’an gisa. Frances yeti: “Mam san ka mina mam sira n boi zɛ’an, la ni dɛna la putɛyiila bɔ’ɔra mam. Dabeserɛ la woo poan mam paleŋa ni kɔ’ɔn ɛɣera mɛ.” Pɔɣesi basɛba tɔɣɛ pa’alɛ vi n ni tara ba se’em ba san naɛ la mabiisi n mi ba sireba la yele bɔna. Ge pɔɣesi basɛba yeti la ni ana ba wuu ba boi la ba ma’a la, se’ere n sɔi la ba ti’isɛ ti nɛnɛra ka bɔkeri lan ani ba se’em.

La daɣɛ be’em ti la ana ho bala. Ge ho san dekɛ ho saŋa za’a ti’isa yele ana yele, la wan basɛ ti ho putɛyiila la malum pa’asɛ. Tiregɛ ti’isa hon la Yehowa bɔŋa la yele. Ho san ita bala, la wan basɛ ti ho nyɛ paŋa ta’an ŋmibera.​—Ym. 62:2; Ep. 6:10.

Sɛla n wan ta’an soŋɛ ho dela, ho kaala ge ti’isa taɣesa Baabule poan pɔɣesi suure n yuun sa’am ti ba zusɛ Yehowa ti a buɣelɛ ba suure la yele. A yuun ka yese ba yele la basɛ ge a yuun bo ba la suma’asum ti ba ta’an ŋmibe. Makerɛ, Hana suure n yuun ‘ba’ɛ sa’am’ la yelese’a n yuun paari en la. Ge eŋa n yuun ‘zusɛ Yehowa ti la yue’ gaŋɛ la, a yuun tari la la suma’asum la boi bim ti a yuun ka mi la wan ta ana en se’em.​—1 Sa. 1:10, 12, 18; 2 Ko. 1:3, 4.

Basɛ ti tansugere keendoma soŋɛ hɔ. Ba ta’an dɛna ‘suka zɛ’an ti kusebego ka daana, dɛna suka zɛ’an ti sabeo ka fɔ̃bera paara.’ (Isa. 32:2) Ba ta’an puɣum pa’alɛ hɔ mabipɔka ayima ti ho paɛ a zɛ’an ta’an nyɛ subuɣelegɔ.​—Mag. 17:17.

Ho wan ta’an soŋɛ ho sira ti a basɛ yalumfɔɔra bisega? Daanse’ere. Baabule la yeti, to san wan ta’an maalɛ yele bii zabɛ nyaŋɛ to dima, nɛreba ‘bayi nyani ayima.’  (Pa. 4:9-12) Ba viisɛ baŋɛ ti sira la bii pɔɣa la san bisera yalumfɔɔra ti bayi la naɛ taaba laɣum soŋɛ, se’em n biseri yalumfɔɔra la ni ta’an basɛ mɛ ge ti ba suure me kɛ̃ taaba.

Yele la dela, ho luɣerɛ kpɛ’a la san mu’ɛ nini ge kɔ’ɛ a puti’irɛ ti a basɛ yalumfɔɔra bisega, a wan ta’an basɛ. A zusɛ Yehowa ti a bo en paŋa ge basɛ ti keendoma la soŋɛ en (2 Ko. 4:7; Yam. 5:14, 15) A dãalɛ yelese’a n wan basɛ ti gurebisɛ paɛ en maɣesɛ wuu, eŋa n wan nyɔkera amea la eletrɔnik lɔɣɔrɔ se’em ge me kan kena zɛse’esi n tari yele aŋa? (Mag. 27:12) A wan bɔta ti hon de a luɣerɛ kpɛ’a la soŋera en ge ti a tɔɣera yelemɛŋɛrɛ bɔ’ɔra hɔ? La san dɛna bala, ho wan ta’an soŋɛ en.

Wani wani? Geele makerɛ wa bisɛ. Felicia yuun ele la Ethan n de mina n yuun nɔŋɛ yalumfɔɔra bisega a bunbilimen sa. Felicia basɛ ti la dɛna naana bɔ’ɔra en ti la san ta ita en wuu a bisɛ yalumfɔɔra a tɔɣɛ bo en. Ethan yeti: “Mam ni kɔ’ɔn tɔɣɛ la yelemɛŋɛrɛ bo n pɔɣa. A ni doose la nɔŋerɛ poan soŋera mam ti n mina mam wan gu’ura n mea se’em ge me sɔkera mam, lan ani mam se’em. A me ni soŋera mam mɛ ti n ka kɛ̃’ɛra intanɛt poan yoo yoo.” La boi bim ti la daani Felicia mɛ la Ethan n nɔŋɛ yalumfɔɔra bisega la. Ge a yeti, “mam sunsɔyiisum la kan ta’an soŋɛ en ti a basɛ yelebe’o wa. Ton daa sɔsɛ a yele la ba’asɛ la, a sakɛ ti a wan dekɛ tum tuuma ti la ana mam mama.”

Sɔsega wa kan yeen soŋɛ sira la mɛ ti a basɛ yalumfɔɔra bisega ge la wan soŋɛ pɔka la me ti a le dekɛ amea delum a sira la. Sira san yese a suuren tɔɣɛ a yeledaaŋɔ bo a pɔɣa, pa’alɛ en eŋa n ye zɛ’an la eŋa n iti sɛla, la wan pa’alɛ ti a ka suɣɛ sɛsɛla ge me wan basɛ ti a pɔɣa dekɛ amea delum en.

Hon ti’isɛ ti hon me wan ta’an soŋɛ ho sira? La san dɛna bala, naɛ la ho sira ti ya kaalɛ ge sɔsɛ zaseŋɔ yele wa. A wan bɔta ti a basɛ yalumfɔɔra bisega ge eŋɛ pa’alɛ ti ho wan ta’an dekɛ homea delum en. Sira la ka nari ti a sunsɔa nyie la yan wan sɔsɛ yele la ge la nari ti a tiregɛ bɔkɛ yele la n basɛ ti la ana hon se’em. La dela ho soŋɛ en ti a basɛ yelebe’o wa ge soŋɛ en ti a eŋɛ sɛla n wan basɛ ti ho dekɛ homea delum en. La dela ya baŋɛ sɛla n ta’asɛ ti nɛreba bisera yalumfɔɔra ge me bisɛ ya wan eŋɛ se’em ti yele la maalɛ. d

 Ho san ti’isa ti sɔsega la wan ta dɛna nɔkpe’ene, ho ta’an yele keema ti ya za’a malum en ti a naɛ la ya ti ya sɔsɛ. Mina soŋa soŋa ti ho luɣerɛ kpɛ’a san basɛ yalumfɔɔra bisega, la wan dekɛ la saŋa ti ho ta’an le dekɛ homea delum en. Da gɛ̃ basɛ. Bisɛ yelepiɣisi se’a ti a ta’an ita. Mina soŋa soŋa ti la dela ho di’isa suure, la me wan yue mɛ ti ya pɔɣɔdire la ta’an le ze’ele soŋa soŋa.​—Pa. 7:8; 1 Ko. 13:4.

Ge ho sira san le bisera yalumfɔɔra, bala pa’alɛ ti a kan ta’an basɛ yelebe’o wa? La daɣɛ bala. Yele yele wuu a san malum yalumfɔɔra bisega, la wan yue mɛ ti a ta’an basɛ. A san malum yalumfɔɔra bisega ge basɛ, a ta’an le ta makɛ bisɛ mɛ. A san ka le bisera yalumfɔɔra, la nari ti a tiregɛ gu amea yelese’a n wan basɛ ti a lebe ta bisɛ. Daanse’ere la dela a dɔla maaseŋɔ la hali la san ta ana wuu a basɛ mɛ la. (Mag. 28:14; Mt. 5:29; 1 Ko. 10:12) La dela a tiregɛ tara ‘halepaalega’ la ge ‘yaɛ be’em.’ La nari ti a yaɛ yalumfɔɔra bisega la halebe’o n de wuu nɛra n waaseni amea ti a nyɛ gã’aregɔ kunkoma’asum. (Ep. 4:23; Ym. 97:10; Arom 12:9) A tiregeri ti a eŋɛ teere ana wa? La san dɛna bala, a yi wan ta’an basɛ yalumfɔɔra bisega. e

Ge ho luɣerɛ kpɛ’a san ka tiregera ti a maalɛ a yele la? Bɔkerɛ boi bim ti ho suure ta’an sa’am, ti ho sunsɔa nyie, ti la ana ho wuu a kaɛ la ho poore la. Dekɛ yele la bo Yehowa. A wan soŋɛ hɔ ti ho tara suma’asum. (1 Pe. 5:7) Kɔ’ɔn ana du’a du’a la Yehowa zamesegɔ la zusega poan ge me ti’isa taɣesa hon zameseri sɛla la. Ho san ita bala, tara puti’irɛ ti eŋa me ani du’a du’a la ho mɛ. Wuu Isaiah 57:15 n yele se’em la, a boi mɛ la sɛba ‘suure n sa’am’ ti ba bɔna ba ma’a la ge soŋera ba ti ba tara pupeelum. Tiregɛ dɛna Kristabia n mɔɔri. Basɛ ti keendoma la soŋɛ hɔ. Tara puti’irɛ ti beere sa’am ho sira la ta’an eŋɛ teere n ani soŋa.​—Arom 2:4; 2 Pe. 3:9.