1. Beni n sɔi ti to za’a nɔŋɛ nɛresɛba n tari sugeri?

 TO ZA’A nɔŋɛ la nɛresɛba n tari sugeri. Beni n sɔi? Nɛresɛba n tã ma’ara bamea gura sɛla ge ka ita sunsɔa la, to bo’ori ba gilema mɛ. To puurɛ ni pee mɛ se’em ma’a ti to ni tue nɛra ti a di sugeri bo to la. To puurɛ pee mɛ la ton yuun pɔsɛ zamesa Baabule la ti to pa’alegɔdaana la di’ise suure la tɔ ti to ta’an dekɛ ton zamesɛ sɛla la tum tuuma la. Sɛla n gani za’a la, bisɛ to puurɛ n pee se’em la Yehowa Naayinɛ n di sugeri bo to la!​—Arom 2:4.

2. Bɔnkani poan ti la wan ta’an kpe’em bo to ti to tara sugeri?

² La boi bim ti to nɔŋɛ nɛresɛba n tari sugeri mɛ ge saŋa ase’a la ta’an kpe’em bo tomea ti to tara sugeri. Makerɛ, la ta’an kpe’em bo to ti to tara sugeri to san tukera loore, yele yele wuu to san kãbela. To sunsɔa me ta’an nyie nɛra san tue to. Saŋa ase’a me, la ta’an kpe’em bo to ti to gura tinpaalega la ti Yehowa pu’ulumbiŋe la. Hon wan bɔta ti ho tara sugeri? Zaseŋɔ wa poan, to wan geele ton wan eŋɛ se’em ta’an tara sugeri la sɛla n sɔi ti la yele pakɛ. To wan le bisɛ sɛla n wan ta’an soŋɛ tɔ ti to tara sugeri zo’e zo’e.

3. Nɛra n tari sugeri ni eŋɛ la wani a sunsɔa san nyie?

³ To geele sarɔtɔ tunaasi poan ti to wan ta’an eŋɛ pa’alɛ ti to tari sugeri. Yia, nɛra n tari sugeri sunsɔa ka isigeri  kalam kalam. Nɛra san nyie a sunsɔa a ni ana la baalam, a me ka leregeri. Ban yeti ‘sunsɔa ka isigeri kalam kalam’ la pɔsɛ bɔna Baabule la poan se’em ma’a ti ba tɔɣera Yehowa yele ti a dela ‘Naayinɛ n tari nimbɔzore la giile ti a sunsɔa ka isigera kalam kalam ge tara yelemɛŋɛrɛ nɔŋerɛ la yelemɛŋɛrɛ tuuma zo’e zo’e.’​—Yɛh. 34:6.

4. Nɛra n tari sugeri ni eŋɛ la wani la san nara ti a gura?

⁴ N yi’i, nɛra n tari sugeri ni ma’ɛ la amea gura. Sɛla san ba’ɛ yue gana eŋa n ti’iseri se’em la, a ka iti sunsɔa. (Mt. 18:26, 27) Yɛla zo’e zo’e poan la nari ti to ma’ɛ tomea gura. Makerɛ, nɛra san tɔɣera bɔ’ɔra tɔ, la nari ti to ma’ɛ tomea kɛlesa en ge da kɔɣesa en. (Yob 36:2) To me nari ti to ma’ɛ tomea to san pa’ala to Baabule zamesegɔdaana ti a bɔkɛ Baabule pa’alegɔ bii a basɛ a halebe’ero.

5. To wan le eŋɛ la bem pa’alɛ ti to tari sugeri?

⁵ N tã’a, nɛra n tari sugeri ka iti kãbi kãbi. La boi bim ti to ni nara ti to eŋɛ la kalam yɛla ase’a poan. Ge nɛra n tari sugeri san tara ninmɔ’ɔrɛ tuunɛ ti a tum, a ka iti kãbi kãbi ti a tum dɛ bii a ba’asɛ de kalam. Ge a ni bisɛ la eŋa n wan nyɛ saŋa se’em ta’an maasum tum tuunɛ la. A nyaa ni ma’ɛ la amea tum tuunɛ la sansɛka n nari poan.

6. Nɛra n tari sugeri ni eŋɛ la wani yɛla san paara en?

⁶ N naasi, nɛra n tari sugeri ni ŋmibera mɛ ge ka nyɔ̃na. Bala pa’alɛ ti sugeri la ŋmibega wɔ̃ni la taaba. La daɣɛ be’em ti to yele to zɔ la ani to se’em la yelese’a n paari to la. Nɛra n tari sugeri ni tiregera mɛ ŋmibera ge tara putɛsonɛ. (Kol. 1:11) Tomam n de Kristakɔma la nari ti to tara sugeri bɔŋa woo poan. Beni n sɔi? Basɛ ya ti to geele ya yɛla ase’a bisɛ.

7. Wuu Yames 5:7, 8 n pa’alɛ se’em la, beni n sɔi ti sugeri yele pakɛ? (Bisɛ foote la.)

⁷ To san wan nyɛ daarewoo nyɔvore la dela to tara sugeri. Wuu daami yamesi la n yuun eŋɛ se’em la, tomam me nari ti to ma’ɛ tomea gura ti Yehowa basɛ ti a pu’ulumbiŋ’a la tum tuuma. (Heb. 6:11, 12) Baabule la dekɛ ton wan tara sugeri makɛ la kaara. (Kaalɛ Yames 5:7, 8.) Kaara ni dɛna la a mu’ɛ nini tuna ge basera bumbula ko’om ge a ka mi ban wan bule se’em ma’a. Bala la, kaara la ni ma’ɛ la amea gura ge tara puti’irɛ ti a wan ta kɛ dia. Bala mea nɔɔ ti tomam me mu’ɛ nini la Naayinɛ tuuma, la boi bim ti to ‘ka mi ‘se’em ma’a ti to Daana la wan wa’ana.‘ (Mt. 24:42) To ni ma’ɛ la tomea gura ge tara puti’irɛ ti Yehowa saŋa san ta paɛ, a wan basɛ ti a pu’ulumbiŋ’a la za’a tum tuuma. To san ka ma’ara tomea gura, to giila ta’an ta kɔ’ɔsɛ mɛ ti to buregɛ yelemɛŋɛrɛ la poan. La me ta’an basɛ ti to ɛɛra yelese’a ti to ti’isa ti la wan basɛ ti to tara pupeelum nananawa. Ge to san ma’ɛ tomea gura, to wan ta’an ŋmibe ta paɛ ba’asegɔ ge nyɛ faarɛ.​—Mik. 7:7; Mt. 24:13.

8. Sugeri soŋeri to la wani ti to ta’an naɛ la nɛreba bɔna? (Kolose 3:12, 13)

⁸ To san tara sugeri, to wan ta’an naɛ la nɛreba bɔna. Sugeri soŋeri to mɛ ti to kɛlesa nɛreba soŋa. (Yam. 1:19) Sugeri me le basɛ ti suma’asum bɔna mɛ. To san tara sugeri, to kan tɔɣera yetɔɣepɔ̃’ɔsa to suure san sa’am. To san tara sugeri, to sunsɔa kan isigera kalam kalam nɛra san eŋɛ to sɛla ti la daam to. To kan lerege sanɛ ge to wan ‘kɔ’ɔn ŋmibera bɔna la taaba ge yese to suure poan dita sugeri bɔ’ɔra taaba.’​—Kaalɛ Kolose 3:12, 13.

9. Sugeri wan soŋɛ to la wani to san yeti to kɔ’ɛ to puti’irɛ? (Magaha 21:5)

⁹ Sugeri ni soŋɛ to mɛ ti to ta’an kɔ’ɛ to puti’irɛ soŋa. To kan ita kãbi kãbi ge to wan ma’ɛ tomea viisɛ yɛla la bisɛ soŋa. (Kaalɛ Magaha 21:5.) Makerɛ, to san ɛɛra tuunɛ, daanse’ere to ta’an bɔta ti to tum tuunse’ere ti to wan nyɛ yia la, hali la san wan giŋera tɔ ti to kan ta’an pu’usa Yehowa soŋa. Ge to san tara sugeri, to wan ti’isɛ bisɛ tuunɛ la n bo zɛ’an, ton wan dekɛ awa se’em tum tuunɛ la, la lan wan ana to deodoma, la tomam la Yehowa bɔŋa la se’em. To san tara sugeri, to wan ta’an kɔ’ɛ to puti’irɛ soŋa.

10. Kristabia wan eŋɛ la wani ta’an tara sugeri?

¹⁰ Zusa ɛɛra sugeri zo’e zo’e. Sugeri dela vo’osum wɔla la ayima. (Ga. 5:22, 23) Bala la, to ta’an zusɛ Yehowa ti a dekɛ a zilam vo’osum la soŋɛ tɔ ti to ta’an tara haledena wa. Yele san paɛ tɔ ti la kpe’em bo to ti to tara sugeri, to zusɛ Yehowa ti a dekɛ a zilam vo’osum la soŋɛ tɔ ti to ta’an tara sugeri. (Lu. 11:9, 13) To ta’an le zusɛ Yehowa ti a soŋɛ tɔ ti to geele yɛla wuu eŋa n geele yɛla se’em la. To nyaa san zusɛ ba’asɛ, la dela to me tiregera tara sugeri dabeserɛ woo poan. To san zusa ɛɛra sugeri ge tiregera ti to tara sugeri, Yehowa wan soŋɛ tɔ ti to tara sugeri zo’e zo’e hali to san puɣum ka tara haledena wa.

11-12. Yehowa eŋɛ la wani pa’alɛ ti a tari sugeri?

¹¹ Ti’isa taɣesa Baabule poan nɛreba  yɛla. Baabule la tɔɣɛ la nɛreba zo’e zo’e n yuun tari sugeri yɛla. To san ti’isa taɣesa nɛreba wa yɛla, to wan baŋɛ ton wan ta’an tara sugeri se’em. Ge ti to nyaa sɔsɛ nɛreba wa yɛla la, basɛ ya ti to bisɛ Yehowa n de sugeri za’adaana se’em.

¹² Eden gaadin la poan, Sitaana yuun sa’am Yehowa yu’urɛ mɛ ge zɛregɛ en ti a bisega la ka di mi’a. Yehowa n wan sa’am ni Saɣena la bilam bilam la, a di’ise la suure ge nyɔkera amea ge mina sansɛka ti a wan eŋɛ pa’alɛ ti eŋa bisega la n di mi’a. Eŋa n ma’ɛ amea gura la, a ŋmiberi mɛ la yelese’a woo ti ba tara sa’ana a yu’urɛ la. Leyɛ’ɛsa, Yehowa n ma’ɛ amea gura la, bo nɛreba zo’e zo’e la yɔ’ɔ ti ba ta vɔna wuusa. (2 Pe. 3:9, 15) Wana wa zuo, nɛreba zo’e zo’e nyaa zamesɛ mɛ baŋɛ en. To san ti’isa Yehowa n tari sugeri ti to nyɛta nyuurɔ se’em la, la wan dɛna naana bɔ’ɔra tɔ ti to ma’ɛ tomea gura ba’asegɔ la.

13. Yezu tɔɣesɛ a Sɔ sugeri la nima nima la wani? (Bisɛ foote la.)

¹³ Yezu tɔɣesɛ a Sɔ sugeri la mɛ nima nima ge eŋɛ pa’alɛ ti a tari haledena wa eŋa n yuun boi tingɔŋɔ wa zuo la. La yuun daɣɛ naana bɔ’ɔra en ti a tara sugeri yele yele wuu gɔnguleseba la Fariseedoma la n yuun de nigum nigumdoma la. (Yon 8:25-27) Ge Yezu yuun tɔɣesɛ la a Sɔ ti a sunsɔa yuun ka isigera kalam kalam. Ban yuun tuuri en la, a yuun ka lerege sanɛ bii a suure sa’am. (1 Pe. 2:23) Yezu yuun tari la sugeri ge ŋmibera ge ka nyɔ̃na. Bala zuo ti Baabule la yeti, ‘yelebe’eredoma n yuun tum en sɛla n ka ani soŋa la, a yuun ŋmibe de poan mɛ’! (Heb. 12: 2, 3) Yehowa wan soŋɛ ti to ta’an tara sugeri ge ŋmibera yelese’a woo n wan paɛ tɔ.

14. To wan ta’an zamesɛ la bem la Abraham n yuun tari sugeri la? (Hebru 6:15) (Bisɛ foote la.)

¹⁴ Ge ba’asegɔ la san ka wa’ana wuu ton ti’iseri se’em la? Daanse’ere to boti la ba’asegɔ la puɣum wa’an wunse’eren na. To ta’an zɔta dabeem ti daanse’ere to wan ki ge ti ba’asegɔ la nyaa wa’ana. Beni n wan soŋɛ tɔ ti to ta’an ma’ɛ tomea gura? Geele Abraham yele la bisɛ. Abraham n yuun de yuuma 75 ge ka dɔɣɛ la, Yehowa yuun yele en yeti: ‘N wan basɛ ti ho lebege tinkãtɛ.’ (Pin. 12:1-4) Abraham yuun nyɛ pu’ulumbiŋere wa ti la tum tuuma? Daɣɛ za’a. Abraham n yuun ta yakɛ Eufrates Kolaa ge gura yuuma 25 la ti a yuun dɔɣɛ a dayɔa ti la dɛna yelekirega bɔ’ɔra en. Yuuma 60 pooren, a yuun nyɛ ban dɔɣɛ a yaasi Esau la Yakob. (Kaalɛ Hebru 6:15.) Ge Abraham yuun ka nyɛ a yaasi ti ba lebege tinkãtɛ ta sɔna Pu’ulumbiŋere Tiŋa la. Ge buraa wa n tari sakerɛ la yuun tari la bɔnsoŋa la a Naaŋɔdaana la. (Yam. 2:23) Ba san ta isige Abraham, bisɛ a puurɛ n wan pee se’em ti a ta baŋɛ ti eŋa n yuun tari sakerɛ ge di’isa suure la basɛ ti tisi woo nyɛ la kã’a! (Pin. 22:18) To zamesɛ la bem? Daanse’ere tomea kan nyɛ Yehowa pu’ulumbiŋa la za’a n wan tum tuuma se’em nananawa. Ge to san tara sugeri wuu Abraham, to tari puti’irɛ ti Yehowa wan kã bo to nananawa hali, ti la ta gaŋɛ bala tinpaalega la poan.​—Mr. 10:29, 30.

15. To san ita tomea zamesegɔ, to wan ta’an geele la bem yɛla?

 ¹⁵ Baabule la tɔɣɛ la nɛreba zo’e zo’e n yuun tari sugeri yele. (Yam. 5:10) Ho ta’an bɔta ti ho maasum zamesɛ baŋɛ nɛrebana wa yɛla.  b Makerɛ, la boi bim ti ba yuun bobe David la a bunbilimen ti a ta dɛna Israel naba beere sa’am. Ge a yuun guri mɛ yuuma zo’e zo’e nyaa ta dɛna naba. Simeon la Anna yuun tari la sakerɛ pu’usa Yehowa ge gura Yehowa. (Lu. 2:25, 36-38) Ho san zamesa yele aŋa, ɛ soke ana wa lebesego: Bem n yuun soŋɛ nɛra wa ti a tara sugeri? A yuun nyɛ nyuurɔ la wani la eŋa n yuun tari sugeri la? Ho wan eŋɛ la wani ta’an tɔɣesa en? Ho me wan nyɛ nyuurɔ ho san zamesɛ baŋɛ sɛba n yuun ka tari sugeri la. (1 Sa. 13:8-14) Ho ta’an soke homea yeti: ‘Beni n yuun ta’asɛ ti ba ka tara sugeri? Bem yɛla n yuun paɛ ba?’

16. To san tara sugeri to nyɛti la bem nyuurɔ?

¹⁶ Geele bisɛ sugeri n tari nyuurɔ se’em. To san tara sugeri, to puurɛ ni pee mɛ ti la ana to mama. Wana pa’alɛ ti to san tara sugeri, to puti’irɛ ni ana la fai ti to tara imma’asum. To san tara sugeri la nɛreba, to wan tara bɔnsoŋa la ba. Nɔyinɛ wan bɔna tansugere la poan. Nɛra san eŋɛ to sɛla ti la daam tɔ, ti to di’isa suure, to wan ta’an basɛ ti la ba’asɛ. (Ym. 37:8; Mag. 14:29) Sɛla n gani bala dela, to san tara sugeri, to tɔɣeseri la to saazuo Sɔ la ge wan ana du’a du’a la en.

17. To lu to suure ti to eŋɛ la bem?

¹⁷ Sugeri dela halesonɛ ge tara nyuurɔ. La ta’an kpe’em bo to ti to tara sugeri ge Yehowa wan soŋɛ tɔ ti to tara haledena wa. Ton ma’ɛ tomea gura tinpaalega la, to wan ta’an tara suure lua ti ‘Yehowa nini kɔ’ɔn bɔna la sɛba n zoti en la zuo. Sɛba n guri a yelemɛŋɛrɛ nɔŋerɛ la, a biseri ba mɛ.’ (Ym. 33:18) Basɛ ya ti to za’a waabi lu to suure ti to wan kelum dekɛ sugeri fuo yɛ.