Zaseŋɔ kaŋa poan to baŋɛ ti yele yinɛ n pakɛ asaaleba la malesi. La dela, Yehowa yu’urɛ n nari ti la ana zilam se’em. Yehowa sɔ’ɔlum la n pa’alɛ eŋa n biseri se’em la dela yelekãtɛ n gani za’a. Bala mea nɔɔ, nɛra san tara birikinte bɔ’ɔra Naayinɛ, la dela ninmɔ’ɔrɛ yele n wan basɛ ti a yu’urɛ Yehowa la ana zilam.

Beni n sɔi ti to yeti Yehowa yu’urɛ la dela ninmɔ’ɔrɛ yele, la ton wan basɛ ti de ana zilam la? Basɛ ya ti to geele ya yɛla atã.

Yia, Eden gaadin la poan, Sitaana yuun zɛregɛ Yehowa yu’urɛ mɛ. Sitaana n yuun soke Hawa sokese’a la yuun pa’alɛ ti Yehowa ka bo’ori yɛri yɛri ge me mɔbegera A nɛreba. Sitaana yuun tɔɣɛ tulege la Yehowa yelesum la ge yeti Naayinɛ dela pumpɔrema. Bala la, a yuun sa’am Yehowa yu’urɛ mɛ. A yuun lebege la ‘Kolekpabɛ’a’ ti la vuurɛ dɛna ‘pumpɔrema.’ (Yon 8:44) Hawa yuun kelese Sitaana pumpɔreŋɔ la mɛ ge ka nam Naayinɛ ti la pa’alɛ ti a ka boti Naayinɛ sɔna en bisera. (Pin. 3:1-6) Ta paɛ zina beere wa, Sitaana kɔ’ɔn parena bɔ’ɔra la Yehowa ge sa’ana A yu’urɛ. La wan kpe’em bo sɛba n sakɛ pumpɔreŋɔ yele wa ti ba nana Yehowa. Bala la, Naayinɛ nɛreba mi ti eŋa n sa’am Yehowa zilam yu’urɛ la dela be’em n ka tari makerɛ. Bala n ta’asɛ ti yelegaasa la namesegɔ bɔna tingɔŋɔ wa zuo la.

N yi’i, Yehowa lu la suure ti a basɛ ti a yu’urɛ la ana zilam kan tara dɛɣerɔ la wan eŋɛ se’em ti naaŋɔ woo nyɛ nyuurɔ. Yelese’ere n pakɛ en paa n bala. Bala n sɔi ti a yeti: ‘N wan pa’alɛ mam fa’a yu’urɛ la.’ (Eze. 36:23) Yezu yuun basɛ ti la niɛ peelumi sɛla n nari ti la dɛna yia yele Yehowa yamesi zusega poan. A yuun yeti: ‘Basɛ ti ho yu’urɛ la ana zilam.’ (Mt. 6:9) Baabule la le tɔɣɛ taɣesɛ la yele n pakɛ se’em ti to na’asa Yehowa yu’urɛ la. Geele gulesegɔ ase’a bisɛ: ‘Dekɛ ya na’asegɔ bo Yehowa.’ (1 Yel. 16:29; Ym. 96:8) ‘Yuum ya a yusonɛ la yuuma.’ (Ym. 66:2) ‘Mam wan na’asa ho yu’urɛ la daarewoo.’ (Ym. 86:12) Saŋa kayima ti Yehowa mea yuun tɔɣɛ basɛ na dela sansɛka ti Yezu yuun bɔna Yerusalem pu’usegɔ deon la. Yezu yuun yeti: ‘N sɔ, basɛ ti ho yu’urɛ la nyɛ pɛka.’ Yehowa me yuun lebese yeti: ‘Mam puɣum basɛ ti de nyɛ pɛka, n me wan basɛ ti de nyɛ pɛka leyɛ’ɛsa.’​—Yon 12:28. a

N ta’a, Yehowa puti’irɛ n de sɛla la kɔ’ɔn makɛ mɛ la a yu’urɛ la. Krista Yuun Tusere Bisega la san ba’asɛ, ki’i gurebisɛ la  wan pɔsɛ. Bilam pooren ti to wan baŋɛ Yehowa yu’urɛ la n pakɛ se’em. Yehowa yu’urɛ la wan basɛ ti la ana malesi la nɛresaaleba la wani sankaŋa? Sankaŋa la, la yele kan ta pakɛ ti asaaleba eŋɛ pa’alɛ ti ba tari yelemɛŋɛrɛ, ba wan ana kasi ge me bi’isɛ soŋa. Ba wan ta tara daarewoo nyɔvore. Leyɛ’ɛsa, la yele kan ta pakɛ ti to eŋɛ pa’alɛ ti Yehowa bisega la n ani soŋa. Sankaŋa la, malesi la nɛresaaleba wan tara nɔyinɛ ge sakɛ ti Yehowa bisega la n di mi’a. Ge Yehowa yu’urɛ la me?

Sankaŋa la, Yehowa yu’urɛ la wan ana fa’a ge kan tara dɛɣerɔ. Ge Yehowa yu’urɛ la wan kelum pakɛ a yelemɛŋɛrɛ yamesi za’a. Beni n sɔi? Se’ere n sɔi la, ba wan nyɛ ti Yehowa kelum tuna a yelekirisi tuuma. Geele bisɛ, Yezu san ta dekɛ na’am la bo Yehowa, Naayinɛ wan ‘dɛna sɛla woo bo nɛra woo.’ (1 Ko. 15:28) Bala pooren, asaaleba puurɛ wan pee ti ba dɛna ‘Naayinɛ kɔma ti ba nyaa nyɛ vo’osego.’ (Arom 8:21) Yehowa wan ta basɛ ti a puti’irɛ n de se’em za’a tum ti malesi la nɛresaaleba tara nɔyinɛ.​—Ep. 1:10.

Yelese’a n wan ta eŋɛ la wan basɛ ti malesi la nɛresaaleba ana la wani? Yelemɛŋɛrɛ, to wan kelum bɔta ti to kɔ’ɔn pɛɣera Yehowa zilam yu’urɛ la. Vo’osum la yuun basɛ ti yoomadaana David gulesɛ yeti: ‘Basɛ ti pɛka dɛna Yehowa Naayinɛ denɛ, basɛ ti a yu’urɛ la nyɛ pɛka wuusa.’ (Ym. 72:18, 19) To wan kelum nyɛ yelepaala n wan basɛ ti to pɛɣera en to vom poan wuusa.

Yelemɛŋɛrɛ, Yehowa yu’urɛ la basɛ ti to baŋɛ la eŋa n de mina. A yu’urɛ la basɛ ti to baŋɛ ti a tari la nɔŋerɛ. (1 Yo. 4:8) To wan kelum tɛ̃ra ti Yehowa nɔŋɛ to mɛ n sɔi ti a naam tɔ. A nɔŋɛ to mɛ n sɔi ti a bo to lua bunɔ la ge le tɛ̃ra ti eŋa n biseri to se’em la dela nɔŋerɛ la tontɔɔ. Ge to wan kelum nyɛ Yehowa n tari nɔŋerɛ bɔ’ɔra to se’em wuusa. To vom dabesa za’a poan to wan kelum ana du’a du’a la en ti a dɛna to Sɔ ti to pɛɣera en.​—Ym. 73:28.