ZASEŊƆ 31
YUUNƐ 12 Great God, Jehovah (Paŋa Za’adaana, Yehowa Naayinɛ)
Yehowa N Eŋɛ Sɛla Ti A Faaɛ Nɛresaaleba Be’em La Kum Poan Basɛ
“Na’ayenɛ daa nɔŋɛ teŋa wa zuo nɛreba mɛ. Bala n sɔe, te a dekɛ mam a dayua ma’an tehɛ.”—YON 3:16.
YELEKPINE
To wan sɔsɛ baŋɛ Yehowa n kɔ’ɔn soŋera tɔ ti to nana ge pu’usa en se’em hali la ton ka di mi’a la. To wan le baŋɛ Yehowa n basɛ ti to tara beere sa’am puti’irɛ ti to wan ta vɔna daarewoo ge kan le tuna be’em se’em.
1-2. (a) Be’em dela bem ge to wan ta’an zabɛ nyaŋɛ ku la wani? (Le bisɛ “Yelesum Vuurɛ.”) (b) To wan zamesɛ la bem zaseŋɔ wa, la zaseŋɔ ase’a n boi Pigera Zontua wa poan la? (Bisɛ sɛla n boi gɔnlaka 32 zuo n de “Hon Se’em N Kaali Wa.” Le bisɛ “Se’em N Kaali La Mina” n boi Pigera Zontua wa poan la.)
HON wan bɔta ti ho baŋɛ Yehowa n nɔŋɛ ho se’em? Ho san bɔta ti ho nyɛ lebesego la, la nari ti ho zamesɛ baŋɛ eŋa n eŋɛ se’em ta’an faaɛ hɔ, be’em la kum poan basɛ. Be’em a dela to dima. Homea kan ta’an zabɛ nyaŋɛ ku. To tuni be’em mɛ daarewoo. Bala me n ta’asɛ ti to kiira. (Arom 5:12) Ge yelesonɛ n boi. Yehowa basɛ ti to tara suure lua ti a wan faaɛ tɔ be’em, la kum poan basɛ!
2 La paɛ wuu yuun 6,000 n tole ti Yehowa Naayinɛ soŋera nɛresaaleba ti ba ta’an pu’usa en, la ka pakɛ la ban de be’emdoma la. Beni n sɔi? Se’ere n sɔi la a nɔŋɛ to mɛ. Kɔ’ɔn ze’ele pi’ileŋo poan ti Yehowa nɔŋɛ nɛresaaleba. Eŋa n nɔŋɛ ba la zuo, ba san tum be’em, a ni bɔta la a soŋɛ ba. Naayinɛ mi ti be’em n ta’asɛ ti to kiira. A me ka boti to kiira. A boti la to vɔna wuusa. (Arom 6:23) Zaseŋɔ wa poan, to wan sɔsɛ sokere atã: (1) Yehowa bo nɛresaaleba la bem beere sa’am puti’irɛ? (2) Diimi sa la, nɛresaaleba yuun eŋɛ la bem basɛ ti Yehowa puurɛ pee? (3) Yezu yuun eŋɛ la bem ta’an faaɛ nɛresaaleba be’em, la kum poan basɛ?
YEHOWA BO NƐRESAALEBA LA BEM BEERE SA’AM PUTI’IRƐ?
3. Bem n yuun eŋɛ Eden Gaadin la poan?
3 Yehowa n yuun naam Adam la Hawa la, a yuun boti la ba tara pupeelum. A yuun bo ba la zɛsoŋa ti ba kɛ̃’ɛra, basɛ ti ba pɔɣedire la ana soŋa ge me bo ba tuunɛ n tari pupeelum. A yuun boti la ba dɔɣɛ pirɛ tingɔŋɔ la za’a. Bala wan basɛ ti zɛ’an woo ana wuu Eden Gaadin la n ani se’em la. A yuun bo ba la nɔɔrɛ deyina ti ba doose. A me yuun yele ba ti ba san zaɣesɛ eŋa nɔɔrɛ la, ba wan ki. To mi sɛla n yuun eŋɛ. Maleka ayima n yuun ka nɔŋɛ Naayinɛ, la nɛresaleba n yuun pã’asɛ Adam la Hawa ti ba zaɣesɛ Naayinɛ nɔɔrɛ. Adam la Hawa yuun basɛ ti Kolekpabɛ’a wa pã’asɛ ba mɛ. Ba yuun ka dekɛ bamea delum ba Sɔ la n nɔŋɛ ba la. Ba yuun zaɣesɛ en mɛ ge tum be’em. Wuu ton puɣum mina se’em la, Yehowa n yuun yele sɛla la yuun sirum tum mɛ. Adam la Hawa yuun kuregɛ mɛ ge nyaa ta ki.—Pin. 1:28, 29; 2:8, 9, 16-18; 3:1-6, 17-19, 24; 5:5.
4. Beni n sɔi ti Yehowa yaɛ be’em ge soŋera tɔ ti to ta’an pu’usa en? (Arom 8:20, 21)
4 Yehowa basɛ ti ba gulesɛ yeledena eŋɛ Baabule la poan mɛ ti la soŋɛ tɔ ti to bɔkɛ ninmu’urɛ yele deyima. La soŋɛ tɔ ti to bɔkɛ sɛla n sɔi ti Yehowa yaɛ be’em. Be’em n basɛ ti to ka tara bɔnsoŋa la Yehowa ge me ta’asɛ kum. (Isa. 59:2) Sitaana yaɛ Yehowa la nɛresaaleba mɛ. Bala n sɔi ti a yuun pã’asɛ Adam la Hawa ti ba tum be’em. A me kelum pã’asa nɛreba mɛ. A yuun ta’an ti’isa ti Naayinɛ n tari putɛse’ere bɔ’ɔra nɛresaaleba la kan tum. Ge a yuun ka mi Yehowa n tari nɔŋerɛ se’em. Yehowa n tari putɛse’ere bɔ’ɔra Adam la Hawa yaasi la ka tee. Eŋa n nɔŋɛ nɛresaaleba la zuo, bilam bilam ti a yuun bo ba beere sa’am puti’irɛ. (Kaalɛ Arom 8:20, 21.) Yehowa yuun mi ti nɛreba basɛba wan nɔŋɛ ge nana en. Yehowa bo nɛrebana la yɔ’ɔ ti ba vurege du en, ti a faaɛ ba be’em, la kum poan basɛ. Yehowa wan eŋɛ la bem ti yele ana wa ta’an tum?
5. Sankani ti Yehowa basɛ ti nɛresaaleba tara beere sa’am puti’irɛ? Tɔɣɛ pa’alɛ. (Pin’ileŋɔ 3:15)
5 Kaalɛ Pin’ileŋɔ 3:15. Yehowa yuun yeti eŋa n wan sa’am Sitaana ge basɛ ti nɛresaaleba za’a tara beere sa’am puti’irɛ. Naayinɛ yuun yeti “yaaŋa” la n wan faaɛ nɛresaaleba basɛ. Yaaŋa wa wan sa’am Sitaana ge maalɛ yelese’a woo ti Sitaana ta’asɛ la. (1 Yo. 3:8) Ge ti wana wa ta’an tum la, Sitaana wan deŋɛ nɛŋa “gɛsegɛ” a kalenka’arɛ bii basɛ ti ba ku en. Wana wa yuun wan daam Yehowa paa. Yehowa yuun sakɛ ti “yaaŋa” la me namesɛ, lan wan eŋɛ se’em ti nɛresaaleba ta’an nyɛ faarɛ be’em, la kum poan!
DIIMI SA LA, NƐRESAALEBA YUUN EŊƐ LA BEM BASƐ TI YEHOWA PUURƐ PEE?
6. Abel, Noah, la sakerɛ nɛreba basɛba yuun eŋɛ la bem ta’an ana du’a du’a la Yehowa?
6 Yuuma zo’e zo’e n wana ti Yehowa basɛ ti yɛla niɛra peelumi, lan wan eŋɛ se’em ti nɛresaaleba ta’an ana du’a du’a la en. Adam la Hawa n yuun zaɣesɛ Yehowa nɔɔrɛ la, Abel n de nɛresɛka n deŋɛ nɛŋa tara sakerɛ bɔ’ɔra Yehowa. Abel n yuun nɔŋɛ Yehowa ge bɔta ti a vurege lɛm en la zuo, a yuun dekɛ la sɛla kaabɛ bo en. Abel yuun dela dunkeena. Bala zuo a yuun loe la a piisi la basɛba kaabɛ bo Yehowa. La yuun ani Yehowa la wani? A “nini tegɛ la Abel bo’olom la.” (Pin. 4:4) Yehowa puurɛ yuun pee mɛ la nɛresɛba n yuun nɔŋɛ en ge ita kaabegɔ bɔ’ɔra en la, maɣesɛ wuu Noah. (Pin. 8:20, 21) Yehowa san ni to’e kaabegɔ wa, la pa’alɛ ti a puurɛ pee mɛ la nɛresaaleba ge ti ba me wan ta’an ana du’a du’a la en. b
7. To zamesɛ la bem la Abraham n yuun sakɛ ti a dekɛ a dayua la kaabɛ la?
7 Abraham yuun dela buraa n tari sakerɛ ti la ka tara makerɛ. Yehowa yuun bo en la tuunɛ n kpe’em, ti a dekɛ a dayua Isaak kaabɛ. Tuunɛ wa yuun ba’ɛ kpe’em mɛ bo Abraham ti a tum ge a yuun nam Yehowa mɛ. Abraham n yuun yeti a ku a dayua la, ti Naayinɛ gu en. Yele wa basɛ ti to baŋɛ la Yehowa n wan eŋɛ sɛla beere sa’am. Yehowa yuun wan dekɛ la a Dayɔba’arɛ la kaabɛ. Yehowa sirum nɔŋɛ nɛresaaleba mɛ paa.—Pin. 22:1-18.
8. To zamesɛ la bem la Israeldoma la n yuun tari dusi kaabera la? (Malema 4:27-29; 17:11)
8 Yehowa yuun bo Israeldoma la nɔɔrɛ ti ba tara dusi kaabera, lan wan eŋɛ se’em ti a di sugeri bo ba. (Kaalɛ Malema 4:27-29; 17:11.) Ban yuun iti kaabegɔ se’a la pa’alɛ ti Yehowa wan ta eŋɛ kaabegɔ n gani bala. Naayinɛ nɔdɛ’ɛseba yuun yeti la wan nara ti yaaŋa la ti ba pu’ulum a yele biŋe la, n de Naayinɛ Dayua la, namesɛ ta ki. A yuun wan ana wuu pesego ti ba kɔregɛ kaabɛ se’em la. (Isa. 53:1-12) Bala la, Yehowa yuun pu’ulum biŋe ti a wan dekɛ a Dayɔba’arɛ kaabɛ, lan wan eŋɛ se’em ti a ta’an faaɛ nɛresaaleba be’em la kum poan basɛ. Yehowa n yuun eŋɛ sɛla wa ka tari makerɛ. A me yuun eŋɛ bala bo la hon!
YEZU EŊƐ LA BEM TA’AN FAAƐ NƐRESAALEBA?
9. Yon Ko’om Musegadaana la yuun tɔɣɛ Yezu yele la wani? (Hebru 9:22; 10:1-4, 12)
9 Yuun 29 Y.B. poan ti Yon Ko’om Musegadaana la yuun nyɛ Yezu n ze’ele Nazaret la ge yeti: “Behɛ ya, Yenɛ Pebila la wa’ana te a dekɛ teŋa wa zuo be’em bahɛ.” (Yon 1:29) Eŋa n yuun tɔɣɛ sɛla wa pa’alɛ ti Yezu n de yaaŋa n boi a to’ore ti Yehowa yuun tɔɣɛ a yele biŋe la. Yezu yuun wan dekɛ a vom tisɛ. Bala la, Yehowa yaaŋa wa yuun wa’ana ti a faaɛ la nɛresaaleba za’a be’em poan ge basɛ ti ba tara beere sa’am puti’irɛ.—Kaalɛ Hebru 9:22; 10:1-4, 12.
10. Sodeni poan ti Yezu yuun wa’ana ti a “yi” be’emdoma?
10 Yezu yuun wa’ana ti a soŋɛ la nɛresɛba suure n sa’am, la ban tuni be’em la. A yuun yele ba ti ba dɛna a podɔleba. A yuun mi ti la dela be’em zuo ti nɛresaaleba namesa. Bala la, a yuun soŋeri la nɛresɛba n nameseri ba be’em la zuo la. A yuun bo la makerɛ ge yeti: “Nɛresɛba n ka bɛn’ɛre, ka sontii ba nyɛ tebedoma ge sɛba n bɛn’ɛnre ma’an n sontii ba nyɛ tebedoma.” A yuun le yeti: “La dagɛ tontɔɔ nɛreba te mam wa’ana te n yi la ge be’emdoma.” (Mt. 9:12, 13) Yezu yuun eŋɛ la bala. Se’em ma’a ti pɔka ayima yuun kɛla a be’em la zuo la, Yezu yuun tɔɣɛ la bãla bãla buɣelɛ a suure ge di sugeri bo en. (Lu. 7:37-50) La boi bim ti Samaria tiŋa pɔka la yuun kɛ̃’ɛri mɛ la buraa n daɣɛ a sira ge Yezu yuun kelum pa’alɛ en la ninmu’urɛ yɛla. (Yon 4:7, 17-19, 25, 26) Be’em n basɛ ti nɛreba kiira ge Naayinɛ yuun bo Yezu la paŋa ti a isige nɛreba kum poan.—Mt. 11:5.
11. Beni n sɔi ti be’emdoma yuun bɔta ti ba lɛna Yezu?
11 Yele wa basɛ ti to bɔkɛ sɛla n sɔi ti hali be’emdoma yuun ni naɛ la Yezu bɔna ge ti dabeem ka tara ba. A yuun bɔkɛ lan ani ba se’em mɛ ge me ita ba soŋa. Ba yuun ni kɔ’ɔn bɔta la ba naɛ la Yezu bɔna. (Lu. 15:1, 2) Yezu me yuun pɛ̃ɣɛ ba mɛ ge kã bo ba, la ban tari sakerɛ bɔ’ɔra en la. (Lu. 19:1-10) Yezu yuun zɔ la ba nimbu’ɔ wuu a Sɔ la. (Yon 14:9) Yezu n yuun iti nɛreba se’em la pa’alɛ ti Yehowa zoti la nɛreba nimbu’ɔ. A nɔŋɛ be’emdoma mɛ ge bɔta ti a soŋɛ ba. Yezu yuun soŋɛ be’emdoma mɛ ti ba tee ta’an dɔla en.—Lu. 5:27, 28.
12. Yezu yuun tɔɣɛ amea kum yele la wani?
12 Yezu yuun mi ti a wan dekɛ a vom tisɛ. Sugumnɔɔrɛ zo’e zo’e ti a yuun yele a podɔleba la ti, ba wan dɔ̃rɛ en ge kpa en dɔɔ zuo. (Mt. 17:22; 20:18, 19) A yuun mi ti a kum la wan duuse tingɔŋɔ wa be’em basɛ wuu Yon la nɔdɛ’ɛseba basɛba n yuun yele se’em la. A me yuun yele ba yeti eŋa kum pooren, a wan “tare nɛra woo wa’an” a zɛ’an na. (Yon 12:32) Nɛreba san tara sakerɛ Yezu poan, nana a pa’alegɔ ge tɔɣesa en, ba wan ta’an basɛ ti Yehowa puurɛ pee. Ba san ita bala, Naayinɛ wan faaɛ ba be’em poan basɛ. (Arom 6:14, 18, 22; Yon 8:32) Yezu yuun tari la sukpe’ene ge sakɛ ti a namesɛ ta ki, ti to nyɛ faarɛ.—Yon 10:17, 18.
13. Ba yuun mɛlesɛ Yezu la wani ge nyaa ku en ge a kum la pa’alɛ tɔ Yehowa yele la wani? (Bisɛ foote la.)
13 Yezu zɔdoma la ayima n yuun dɔ̃rɛ en ti a dindoma nyɔkɛ en. Ba yuun tu en mɛ ge parum yɛla bo en. Ba yuun mɛlesɛ en mɛ, gãkɛ en ge nyaa ku en. Sogɛpa la yuun tari en keŋɛ la zɛsɛka ti ba wan ku en ge nyaa kpa en dɔɔ zuo. Yezu yuun ŋmibe mɛ wuŋerɛ wa woo poan. Ge la yuun ba’ɛ wuŋɛ Yehowa mɛ la eŋa n yuun nyɛ ti a Dayua la namesa se’em la. Yehowa yuun tari pansɛka n wan gu ti a Dayua la da namesɛ ge a yuun ka eŋɛ bala. Yehowa yuun nɔŋɛ a Dayua wa mɛ paa ge beni n sɔi ti a yuun bo yɔ’ɔ ti a namesɛ ta ki? Se’ere n sɔi la Yehowa nɔŋɛ to mɛ. Yezu yuun yeti: “Na’ayenɛ daa nɔŋɛ teŋa wa zuo nɛreba mɛ. Bala n sɔe, te a dekɛ mam a dayua ma’an tehɛ te se’em woo n nam mam, kan sagom, ge a wan tara la vom n ka tare ba’ahegɔ.”—Yon 3:16.
La yuun ba’ɛ wuŋɛ Yehowa mɛ la eŋa n yuun nyɛ ti a Dayua la namesa ti a ta’an faaɛ tɔ be’em, la kum poan basɛ la (Bisɛ kaalegɔ zɛ’an 13)
14. Yezu lua bunɔ la pa’alɛ to la bem?
14 Yezu lua bunɔ la dela sɛla n gani za’a n pa’alɛ ti Yehowa nɔŋɛ Adam la Hawa yaasi mɛ. La pa’alɛ la Yehowa n nɔŋɛ ho se’em ti la ka tara makerɛ. Yehowa yuun basɛ ti a Dayɔba’arɛ wa’ana ki bo to ti to ta’an nyɛ faarɛ be’em la kum poan. (1 Yo. 4:9, 10) A boti la a soŋɛ to za’a waabi ti to ta’an pu’usa en nananawa, hali la ton de be’emdoma la. A me wan ta yese be’em la kum beere sa’am.
15. La nari ti to eŋɛ la bem ta’an nyɛ nyuurɔ Yezu lua bunɔ la poan?
15 Naayinɛ bo’olum n de a Dayɔba’arɛ lua bunɔ la n basɛ ti a dita sugeri bɔ’ɔra tɔ. La nari ti to eŋɛ sɛla ge ti Naayinɛ di sugeri bo to. La dela bem? Yon Ko’om Musegadaana la, la Yezu mea yuun yeti: “Tee ya ya potɛn’ɛra. Se’ere n sɔe la saazuo sɔ’ɔlom pɔnre kene na.” (Mt. 3:1, 2; 4:17) Ton de be’emdoma la zuo, la nari ti to basɛ to be’em, ta’an kelum pu’usa Yehowa ge ana du’a du’a la en. To basɛ to be’em vuurɛ? Ge la wan soŋɛ to la wani ti to ta’an pu’usa Yehowa, hali la ton de be’emdoma la? To wan nyɛ soke ana wa lebesego zaseŋɔ seko n taɣelɛ la poan.
YUUNƐ 18 Grateful for the Ransom (To Puurɛ Pee Mɛ La Lua Bunɔ La)
a YELESUM VUURƐ: Baabule la poan, yelebire la n de “be’em” la pa’alɛ la nɛra n eŋɛ sɛla n ka ani soŋa bii ka vɔi a vom ti la makɛ la Yehowa sareŋɔ pa’alegɔ la. “Be’em” ta’an le pa’alɛ ton ka di mi’a, dɛna be’emdoma la. Adam la Hawa be’em la n basɛ ti to za’a kiira.
