Tuntuna Paul yuun yele Tesalonika mabiisi la ti: “Daanse’ere nɛra se’em boe ya poan kan nana yetɔgom sebo te to golehɛ eŋɛ gɔŋɔ poan bo ya na wa. La han de’a bala, de ya sɛba n wan tara ya mɛhe soŋa soŋa la en.” (2 Tes. 3:14) To yuun yeti keendoma la n nari ti ba eŋɛ bala. Mabia yuun san bɔna tansugere la poan ge zaɣesɛ ti a kan tara Baabule pa’alegɔ tuna tuuma, keendoma la wan bo yetɔɣum tansugere la poan ka’am mabiisi la. Bala pooren, mabiisi la kan le naɛ la en ita sɛsɛla.

To nyaa baŋɛ ti Paul n yuun yele sɛla wa dela mabiisi la mea n wan kɔ’ɛ ba puti’irɛ. Bala la, la ka nari ti keendoma bo yetɔɣum ka’am mabiisi la. Beni n sɔi ti to nyaa tee ton yuun bɔkɛ yele wa se’em la? To geele ya sɛla n sɔi ti Paul yuun bo ka’aŋɔ wa.

Paul yuun yeti mabiisi la basɛba yuun ka boti “ba dɔla sɛla te to yele ba la.” Ba yuun zaɣesɛ la Naayinɛ pa’alegɔ. A yuun puɣum bo ba nɔɔrɛ ti: “Nɛra se’em n ka bote tooma a dagɛ ba bo en dia.” Hali la bala za’a, basɛba yuun kɔ’ɔn tara paŋa mɛ ge zaɣesɛ ti ba kan tum soŋɛ bamea. Ba me yuun tari ba nɛsi kɛ̃’ɛsa la nɛreba yɛla poan. Mabiisi la yuun nari ti ba ita nɛrebana wa la wani?—2 Tes. 3:​6, 10-12.

Paul yuun yeti: “Tara ya mɛhe soŋa soŋa la en.” Greek yelebire la pa’alɛ ti ho baŋɛ nɛrekana taaba ge bisa homea soŋa la en. Paul yuun tɔɣeri bɔ’ɔra la mabiisi la za’a, daɣɛ keendoma la ma’a. (2 Tes. 1:1; 3:6) Bala la, mabiisi la mea n wan baŋɛ mabia sɛka n zaɣesɛ Baabule pa’alegɔ ge nyaa loe ti ba “da tara se’ere ti ba eŋɛ la en.”

Wana pa’alɛ ti ba ita en wuu mabia ti ba yese en tansugere la poan? Aayi. Paul yuun yeti: “Kan’an ya en.” Bala la, mabiisi wan kelum naɛ la mabia kaŋa sɔsera zamesegɔ, la na’am mɔɔlegɔ poan ge ba ta’an kɔ’ɛ ba puti’irɛ ti ba kan naɛ la en dita bii dɛ’ɛna. Beni n sɔi? Paul yuun yeti: “Bala te valom wan nyɔkɛ en la n ete se’em la.” Mabiisi san ka le naɛ la en dita bii dɛ’ɛna, bala wan basɛ ti valum nyɔkɛ en ti a tee a itigɔ la n ka nɛ nini la.—2 Tes. 3:​14, 15.

Kristakɔma wan eŋɛ la wani ta’an dekɛ ka’aŋɔ wa tum tuuma zina beere wa? Yia, wuu Paul n yuun pa’alɛ se’em la, la nari ti to sirum sakɛ ti mabia la itigɔ ka ani soŋa. Paul yuun ka tɔɣeri la sɛba n iti yelese’a ti tomam putɛkeeŋa ka bo to yɔ’ɔ ti to ita ge ti la me daɣɛ be’em la. A me yuun ka tɔɣeri la sɛba n boti sɛla ti tomam ka bɔta yele. Leyɛ’ɛsa, a yuun ka tɔɣeri la sɛba n tue to yele. Paul yuun tuɣum tɔɣera la sɛba n kɔ’ɔn mina fii ge zaɣesɛ Naayinɛ pa’alegɔ.

Zina beere wa, to san mina mabia n kɔ’ɔn mina fii ge zaɣesɛ Naayinɛ pa’alegɔ, a tomea n wan loe nyaa to naɛ la en dita ge dɛ’ɛna bii to lɔkera en. Mabia woo n wan kɔ’ɛ a puti’irɛ yele wa poan la zuo, la ka nari ti to yɛta mabiisi n daɣɛ to deodoma ton kɔ’ɛ to puti’irɛ se’em. To wan kelum naɛ la en sɔsera zamesegɔ, la na’am mɔɔlegɔ poan. A san tee a itigɔ la, to nyaa wan ta’an naɛ la en dita ge dɛ’ɛna.