Yehowa n yuun bo nɛresaaleba nɔɔrɛ ti ba dɔɣɛ ‘pirɛ tingɔŋɔ la ge sɔna ka’ la, la yuun pa’alɛ ti tingɔŋɔ wa za’a wan ta lebege paradiisi. (Pin. 1:28) Nɛresɛba n wan sɔna tingɔŋɔ wa la n wan tum tuunɛ wa. Tingɔŋɔ wa kan pɔsɛ dɛna paradiisi, se’ere n sɔi la Eden gaadin la ka boi. Armagedon san tole, to wan tum tuuma zo’e zo’e ta’an basɛ ti tingɔŋɔ wa zɛ̃se’esi n sa’am la ana filam. Bala pa’alɛ ti to wan tum la tuunkãra!

Wana wa basɛ ti to tiɛ la Israeldoma n yuun tum tuunse’a, se’em ma’a ti ba yuun ze’ele Babilon lebe ba tiŋa la. Nɛnɛra yuun ka kɛ̃’ɛri tiŋa la poan ta paɛ yuun 70. Ge Isaiah yuun tɔɣɛ biŋe ti Yehowa wan soŋɛ ba ti ba le maalɛ ba tiŋa la ti la ana soŋa. A yeti: ‘A wan basɛ ti ka goo la ana wuu Eden la, ti ka pɔɣetia la ana wuu Yehowa gaadin la.’ (Isa. 51:3) Israeldoma la yuun nyaŋɛ maalɛ ba tiŋa la mɛ. Bala mea, Yehowa  wan soŋɛ sɛba n wan ta sɔna tingɔŋɔ la ti ba ta’an basɛ ti tingɔŋɔ la lebege paradiisi. Ho ta’an tum tuuma nananawa ti la pa’alɛ ti ho boti ho ta bɔna bim mɛ tuna.

Sore kayima poan ti to wan ta’an eŋɛ bala dela to basɛ ti to yire la to gingilega ana filam. Ho wan ta’an eŋɛ bala, ho yikpɛ’ɛsi san puɣum nɔŋɛ dɛɣerɔ. Ho me wan ta’an soŋɛ maalɛ Na’am Pu’usegɔ Deto la Laɣesegɔ Zɛ’ɛsi. Ho san wan nyaŋɛ, ho me ta’an gulesɛ gɔŋɔ bo ti ho boti ho soŋɛ la yeledi’ire soŋerɛ tuuma. Bala pa’alɛ ti ho maasum ti ho soŋɛ zɛsɛka n eeri soŋerɛ. Ho ta’an zamesɛ nu’o tuuma ti ho wan dekɛ soŋɛ, Yehowa san ta bo ho yɔ’ɔ ti ho vɔna tingɔŋɔ wa zuo.

Yezu n yuun isige Yairus bipugela kum poan la, a yuun yeti ba bo bia la dia ti a di. (Mr. 5:42, 43) La yuun ka kpe’em ti ba bo yuun 12 bia wa dia. Nyaa ti’isɛ bisɛ tuunkãra se’a taaba ti to wan tum, se’em ma’a ti Yezu pu’ulumbiŋere la tum tuuma. A yuun pu’ulumbiŋe ti, ‘sɛba woo n boi yɔɔrɔ poan la wan wum a kɔ̃a ge yese na.’ (Yon 5:28, 29) La boi bim ti Baabule la ka tɔɣɛ yele wa za’a nima nima ge to ta’an yeti, sɛba ti ba wan ta isige ba la, wan ta ɛɛra dia, ga’aregɔ zɛ’an la lɔɣeyɛɛtɔ. Hon wan ta’an eŋɛ pa’alɛ nananawa ti ho maasum ti ho ta soŋɛ sankaŋa? Geele soke ana wa bisɛ.

Ba san bo mɔɔlegɔ ti gingilega kaarɛ bisegadaana n ye ya tansugere na, hon ni beem en ti a wa’ana ti ya di? Betel san tum tɛm woo na’am mɔɔlegɔdoma n boi ba to’ore ti ba wa’an ya tansugere na tuna, hon wan soŋɛ ba ti ba nyɛ ga’aregɔ zɛ’an? Gingilega kaarɛ bisegadaana san ka le tuna kaarɛ tuuma la, ho wan ta’an soŋɛ en ti a nyɛ ga’aregɔ zɛ’an? Ba san maasum ti ba eŋɛ laɣesegɔ hon boi zɛ’an la, hon wan pee puurɛ tum laɣesegɔ la tuuma bii ho maasum to’e saama la soŋa?

Tooma 24:15 n yele sɛla la zuo, to mi ti ba wan isige nɛreba zo’e zo’e. Ba zo’e zo’e yuun ka mi Yehowa ge ki. Ge ba san ta isige kum poan, ba wan nyɛ yɔ’ɔ ti ba baŋɛ Yehowa. a Naayinɛ yamesi n kumesɛ ge tara sakerɛ la, wan ta pa’ala nɛreba wa. (Isa. 11:9) Charlotte n tum na’am mɔɔlegɔ tuuma la Europe, South America, la Africa tisi poan kɔ’ɔn ana la lɛɛ gura sankaŋa. A puurɛ n pee ti a tɔɣɛ yeti: “Mam kɔ’ɔn ana la lɛɛ ti n ta pa’ala nɛreba kum isigere saŋa la poan. Mam ni san kaalɛ diimi nɛra yele, mam ni ti’isa yeti: ‘Nɛra wa yuun san mina Yehowa, a vom yuun wan bɔna de to’ore.’ Mam kɔ’ɔn ana la lɛɛ ti n ta tɔɣɛ Yehowa yele bo sɛba n isige kum poan la ge pa’alɛ ba ti, ba yuun san pu’useri ni Yehowa, ba vom wan ana soŋa.”

Hali Yehowa yamesi n yuun vɔi ge ti Yezu nyaa wa’an tingɔŋɔ wa zuo na la, wan zamesɛ yɛla zo’e zo’e. Ti’isɛ bisɛ la wan dɛna pupeelum la yɔ’ɔ se’em ti to tɔɣɛ pa’alɛ Daniel ti a bɔkɛ ti yetɔɣebiŋ’a se’a ti a yuun gulesɛ ge ka bɔkɛ a la, sirum tum tuuma mɛ. (Da. 12:8) Bisɛ la wan ta ana soŋa se’em ti to pa’alɛ Arut la Naomi ti ba baŋɛ ti Mɛzaaya la yuun ze’ele la ba yizuo poan tuusum na. Bisɛ la wan ta dɛna pupeelum se’em ti to ta tuna pa’alegɔ tuuma tingole wa za’a waabi poan! Putɛyiila kan ta daana tɔ sankaŋa wuu la ani to se’em nananawa la.

Ho wan eŋɛ la bem nananawa ti la pa’alɛ ti ho maasum ti ho ta pa’alɛ sɛba ti ba wan isige ba kum poan la? Sore deyima dela ho tiregɛ kumesɛ homea ta’an pa’ala soŋa ge tuna na’am mɔɔlegɔ tuuma la saŋa woo. (Mt. 24:14) Kuregerɛ bii yɛla ase’a san gu’ura hɔ, ho ta’an tuna na’am mɔɔlegɔ tuuma la, la ho paŋa za’a nananawa ti la pa’alɛ ti ho maasum mɛ ti ho ta pa’alɛ sɛba ti ba wan isige kum poan la.

La ani soŋa ti to ti’isɛ ninmɔ’ɔrɛ soke ana wa yele, Hon maasum ti ho ta vɔna tingɔŋɔ wa zuo daarewoo? Hon puurɛ pee ya ti ho ta laɣum soŋɛ ti tingɔŋɔ wa lebege paradiisi, soŋɛ sɛba ti ba wan ta isige ba la ge pa’ala ba? Ho san tuna tuunse’a taaba ti ho wan ta tuna paradiisi la poan, la wan pa’alɛ ti ho maasum ti ho ta vɔna daarewoo tingɔŋɔ wa zuo!