1. Yehowa ni lebese a yamesi zusega la wani?

 HON mi ti Yehowa wan ta’an doose ho poan lebese mabisɛka zusega? Ho de keema, keendoma soŋeredaana, sore ŋmɛ’adaana bii tansugere na’am mɔɔlegɔdaana woo, ho wan ta’an soŋɛ. Ho de bunbilipaalega, bunkɛka, pɔka bii buraa woo, ho wan ta’an soŋɛ. Nɛra n nɔŋɛ Yehowa san zusɛ en ɛɛra soŋerɛ, to Naayinɛ la ni doose la keendoma la, la mabiisi basɛba poan ‘buɣelɛ’ nɛrekaŋa suure. (Kol. 4:11) Bisɛ to puurɛ n pee se’em la ton pu’useri Yehowa ge soŋera to mabiisi la! To wan ta’an eŋɛ bala bã’a n wi’iri poan, yeledi’ire poan bii yaarɛ poan.

2. Beni n sɔi ti la wan ta’an kpe’em ti to soŋɛ nɛreba bã’a n wi’iri poan?

² La ta’an kpe’em bo to mɛ ti to soŋɛ taaba bã’a n wi’iri poan. Makerɛ, to ta’an bɔta ti to keŋɛ ta bisɛ to zɔdoma ge la wan dɛna dɛŋa bɔ’ɔra tɔ. To ta’an bɔta ti to beem sɛba n de nasedoma ti ba naɛ la to di ge bala me kan ta’an eŋɛ. To ta’an bɔta ti to soŋɛ nɛreba ge tomea yire nɛreba n nameseri la zuo, la wan kpe’em bo to. Ge to ni kelum tiregera mɛ ti to soŋɛ to mabiisi. Bala me n wan basɛ ti Yehowa puurɛ pee. (Mag. 3:27; 19:17) To wan eŋɛ la wani?

3. Desi tansugere keendoma makesonɛ la pa’alɛ to la bem? (Yeremia 23:4)

³ Keendoma n wan ta’an eŋɛ sɛla. Ho san dɛna keema, tiregɛ baŋɛ mabiisi la soŋa. (Kaalɛ Yeremia 23:4.) Mabipɔka Desi ti to tɔɣɛ a yele zaseŋɔ sɛka n tole la yeti, “Mam na’am mɔɔlegɔ tigesego keendoma yuun ni naɛ la mam mɛ la basɛba keŋɛ na’am mɔɔlegɔ ge me ni nyɛta  nɛŋa naara taaba sɔsa.” b Keendoma la n yuun iti bala la yuun basɛ ti la dɛna la naana bɔ’ɔra ba ti ba soŋɛ Desi, se’em ma’a ti COVID-19 bã’a la yuun wi’ira ti a yire nɛreba yuun ki bã’a la poan la.

4. Bem zuo ti keendoma la yuun ta’an soŋɛ Desi ge to zamesɛ la bem?

⁴ Desi yeti, “Mam yuun puɣum nyɔɣɛ keendoma la zɔtɔ la zuo, la yuun dela naana ti n yele ba la ani mam se’em la yelese’a n pakɛ mam.” Keendoma wan zamesɛ la bem? Kaara sɛba n boi ho tansugere la poan la ge ti yeleya’a nyaa paɛ. Nyɔɣɛ ba zɔtɔ. Bã’a san wi’ira ti ho kan ta’an keŋɛ ba zɛ’an, tiregɛ eŋɛ yɛla ase’a. Desi yeti, “tɛm busebo, daarɛ deyima poan, keendoma ni yi mam mɛ bii gulesɛ sɛla ɛlɛktrɔnik poan bo mam. Ban ni kaalɛ gulesegɔ se’a bo mam la, ni kalum mam suure mɛ, la boi bim ti mam mi gulesegɔ ana mɛ.”

5. Keendoma wan eŋɛ la wani ta’an baŋɛ mabiisi la n eeri sɛla ge soŋɛ ba?

⁵ Sore deyima poan ti to wan ta’an baŋɛ to mabiisi n eeri sɛla dela ton dekɛ sokere, doose guŋerɛ poan sɔsɛ la ba. (Mag. 20:5) Ba tari dia, tiim la yelese’a n pakɛ ba zo’e? Ba tuuma ta’an ta sa’am bii ba ka tari laɣehɔ zo’e n wan haɛ zɛ’an kɛ̃’ɛra? Ba wan ɛɛra ti to soŋɛ ba ti gɔmɛt ta’an soŋɛ ba? Mabiisi yuun soŋɛ Desi mɛ innaanɛ poan. Ge sɛla n yuun soŋɛ en paa ti a ta’an ŋmibe a daaŋɔ la poan dela keendoma la n yuun tari nɔŋerɛ ge me dekɛ Baabule kpemese a giila se’em la. A yeti: “Keendoma la yuun ni naɛ la mam zusɛ mɛ. La boi bim ti mam ka tɛ̃ri ba yuun yele sɛla wana mɔpi ge mam tɛ̃ri la yuun ani mam se’em mɛ. La ani wuu Yehowa yuun yeti mam ti, ‘Ho ka boi ho ma’a.’”​—Isa. 41:10, 13.

6. To zo’e zo’e wan ta’an eŋɛ la bem soŋɛ mabiisi? (Bisɛ foote la.)

⁶ Mabiisi n wan ta’an eŋɛ sɛla. To mi ti keendoma n bisera mabiisi la tansugere la poan. Ge Yehowa boti la to za’a waabi kpɛmesa ge soŋera taaba. (Ga. 6:10) Hali to san doose yele piɣisi poan eŋɛ pa’alɛ ti to tari nɔŋerɛ, la wan soŋɛ mina n bɛ̃’ɛri. Bia ta’an gulesɛ bii dɔreŋɛ sɛla kaatɛ poan kpemese mabia giila.  Bunbilipaalega ta’an basɛ ti mabipɔka tum en bii a tum tuunɛ bo en. Tansugere la poan, basɛba me ta’an duɣɛ dia tari ta bo mina n bɛ̃’ɛri la. Yelemɛŋɛrɛ, bã’a san wi’ira, nɛra woo n boi tansugere la poan eeri la giilekpeŋere. Daanse’ere, to san pɔŋɛ zamesegɔ, to ta’an yee fii naɛ la to mabiisi la sɔsera. Keendoma la me eeri la giilekpemesego. Mabiisi basɛba ni gulesɛ la gɔŋɔ pu’usɛ keendoma la n ni kɔ’ɔn mɔ’ɛ nini tuna ba tuuma se’em, bã’a n wi’iri poan la. Bisɛ la de yelesonɛ se’em ti to ‘kɔ’ɔn kpɛmesera taaba giila ge soŋera taaba’!​—1 Tes. 5:11.

7. Bem n wan ta’an kpe’em bo mabiisi yeledi’ima poan?

⁷ Yeledi’ire ta’an tee nɛra vom wana kalam. Yeledi’ima ta’an sa’am nɛreba lɔɣɔrɔ, ba yɛa, hali ku ba nɛreba. Yeledi’ima me paari to mabiisi mɛ. Bem ti to wan ta’an eŋɛ soŋɛ ba?

8. Keendoma la deo zuodoma wan ta’an eŋɛ la bem ge ti yeledi’ire nyaa paɛ?

⁸ Keendoma n wan ta’an eŋɛ sɛla. Keendoma, soŋɛ ya mabiisi la ti ba maasum ge ti yeledi’ima nyaa paɛ ba. Basɛ ti mabiisi la woo n boi tansugere la poan mina ba wan eŋɛ se’em ta’an te’ele bamea la ba wan eŋɛ se’em nyɛ keendoma la. Margaret ti to tɔɣɛ a yele zaseŋɔ sɛka n tole la yeti: “To keendoma la yuun tɔɣɛ la yelese’a n pakɛ tansugere la ge kaɣɛ to yeti goo bugum la n ni ta makɛ dita la, kelum bɔna mɛ. Ba yuun yeti kpɛ’ɛndoma la san ta bisɛ ti la dela dɛŋa ti ba yeti nɛra woo yese a yire, la nari ti to eŋɛ kalam.” Ka’aŋɔ wa yuun nari mɛ, sɛla n sɔi la, bakwai anuu pooren ti goo bugum yuun laŋɛ. Deodoma pu’usegɔ poan, deo zuodoma ta’an bisɛ sɛla ti nɛra woo wan ta’an eŋɛ yire la poan. Hon la ho kɔma san maasum soŋa, ya wan ta’an ana baalam, yeledi’ire san sige.

9. Keendoma ni maasum la wani gura yeledi’ire ge yeledi’ire san bɔna, ba ni tum la bem tuuma?

⁹ Ho san dɛna na’am mɔɔlegɔ tigesego bisegadaana, tiregɛ la ho tara sɛba woo n boi ho gurup la poan la fon nɔmbadoma ge mina ba kɛ̃’a zɛ’an ge ti yeledi’ire nyaa paɛ. Mabiisi wa san tee ba fon nɔmbadoma bii ba kɛ̃’a zɛ’an, ni tɛ̃ra la ho gulesɛ biŋe. Bala, yeledi’ire san ta bɔna, ho wan ta’an sɔsɛ la na’am mɔɔlegɔdaana woo ge baŋɛ yelese’a n pakɛ ba. Bala pooren, la nari ti ho eŋɛ kalam yele keendoma tigesego bisegadaana la, la ani mabiisi la se’em, ti eŋa me wan sɔsɛ la gingilega kaarɛ bisegadaana la. Mabiisi wa san laɣum tum ba tuuma, la wan basɛ ti yɛla ana soŋa. Bugum la n yuun di Margaret gingilega poan ba’asɛ la, kaarɛ bisegadaana la yuun ka nyaŋɛ gise dabesemuunɛ la girego. A yuun mɔ’ɛ la nini soŋera keendoma la ti ba ta’an soŋɛ mabiisi 450 n zɔ yese ba yɛa. (2 Ko. 11:27) Bala, ba yuun nyaŋɛ soŋɛ sɛba woo yɛa n sa’am la mɛ ti ba nyɛ zɛ’an kɛ̃’ɛra.

10. Beni n sɔi ti keendoma bisɛ ti la yele pakɛ mɛ ti ba kaara ba mabiisi bisera? (Yon 21:15)

¹⁰ Keendoma la n tari yɔ’ɔ ti ba dekɛ Baabule la kpemese mabiisi la giila ge soŋɛ sɛba suure n sa’am la. (1 Pe. 5:2) Yeledi’ire san bɔna, keendoma nari ti ba deŋɛ nɛŋa bisɛ ti mabiisi la ka boi dɛŋa poan ge me baŋɛ mabiisi la san tara dia, lɔɣeyɛɛtɔ la kɛ̃’a zɛ’an. Ge ŋmaresi zo’e zo’e pooren, mabisɛba n pĩɛ la ni kelum ɛɛra la vo’osum poan soŋerɛ la subuɣelegɔ. (Kaalɛ Yon 21:15.) Mabia Harold n  pa’asɛ tiŋa kayima Tigere Yile Bisegadoma la poan ge me sɔsɛ la mabiisi zo’e zo’e ti yeledi’ima paɛ ba la, yeti, “la ni yue mɛ ge ti la nyaa ana mabiisi wa buɣa buɣa. La ni ka ba’ɛ daana ba la ba lɔɣeseto n sa’am la ge yelese’a n ni kelum daana ba dela, ba nɛra n ki, ba tuulum lɔkɔ n sa’am bii ba san tiɛ ban yuun boi dɛŋa poan se’em. Ba ni san tiɛ yele ana wa, ba suure ni sa’am mɛ. Bala ka pa’alɛ ti ba ka tari sakerɛ, se’ere n sɔi la nɛresaaleba ani la bala.”

11. Bem yɛla n ta’an pakɛ deodoma?

¹¹ Baabule la ka’am tɔ ti to ‘kɛla la sɛba n keli.’ Keendoma tari ka’aŋɔ wa tuna tuuma mɛ. (Arom 12:15) Yeledi’ire san paɛ to mabiisi, keendoma nari ti ba buɣelɛ ba suure ti ba baŋɛ ti Yehowa la ba mabiisi kelum nɔŋɛ ba mɛ. Keendoma wan bɔta ti ba soŋɛ deodoma ti ba kelum tuna ba vo’osum poan tuuma n de wuu zusega, Baabule zamesegɔ, tansugere zamesegɔ kenɛ la na’am mɔɔlegɔ tuuma la. Keendoma me ta’an kpemese dɔɣereba giila ti ba soŋɛ ba kɔma ti ba ti’isera yelese’a ti yeledi’ima kan ta’an sa’am la. Dɔɣereba, pa’alɛ ya kɔma ti ba baŋɛ ti Yehowa kɔ’ɔn dɛna la ba Zɔ ge me wan soŋera ba daarewoo. Kelum pa’ala ya kɔma ti ba mina ti ba tari mabiisi n ani wuu ba deodoma n wan soŋera ba.​—1 Pe. 2:17.

12. Mabiisi wan eŋɛ la wani ta’an soŋɛ yeledi’ire saŋa poan? (Bisɛ foote la.)

¹² Mabiisi n wan ta’an eŋɛ sɛla. Yeledi’ire san eŋɛ zɛ’an n lɛm hɔ, soke keendoma la baŋɛ ho wan eŋɛ se’em ta’an soŋɛ ho mabiisi. Daanse’ere ho ta’an ee ga’aregɔ zɛ’an bo mabisɛba yɛa n sa’am bii sɛba n wa’ana ti ba soŋɛ yeledi’ire soŋerɛ tuuma la. Ho ta’an dekɛ dia la lɔɣɔrɔ toseto bo mabisɛba ti yeledi’ire paɛ ba la. Yeledi’ire san eŋɛ zɛ’an n zãɛ la hon boi zɛ’an la, ho ta’an kelum soŋɛ. Sodeni poan? Ho ta’an zusera bɔ’ɔra sɛba ti yeledi’ima paɛ ba la. (2 Ko. 1:8-11) Ho me ta’an laɣesɛ ligeri soŋɛ tingole wa za’a waabi na’am tuuma la ti ba dekɛ soŋɛ yeledi’ire soŋerɛ tuuma la. (2 Ko. 8:2-5) Ho san wan ta’an keŋɛ yeledi’ire la n eŋɛ zɛ’an la, sɔsɛ la keendoma la baŋɛ ho wan ta’an eŋɛ sɛla. Ho san nyɛ yɔ’ɔ ti ho laɣum soŋɛ, daanse’ere ba wan kumesɛ hɔ, la wan eŋɛ se’em ti ho ta’an tum zɛsɛka yele n pakɛ, sansɛka n nari poan.

13. Bem daaŋɔ n paari to mabiisi n boi tinse’esi poan ti ba gu to tuuma la?

¹³ Tinse’esi poan ti ba gu to tuuma la, la ni kpe’em bo to mabiisi la mɛ. To mabiisi n boi tisi wa poan la, ta’an ka tara laɣehɔ, ta’an bɛ̃’ɛra bii ba nɛreba n ki. Ba san gu to tuuma la, la ta’an ni kpe’em ti keendoma la kaara mabiisi la bisera bii kpɛmesa ba giila. Bala n yuun paɛ Andrei ti to sɔsɛ a yele zaseŋɔ sɛka n tole la poan la. Nɔŋɔ n yuun kɛ̃ mabipɔka ayima n boi ba na’am mɔɔlegɔ tigesego la poan. Mabipɔka wa yuun le nyɛ la loore accident. La yuun nari ti ba eŋɛ en la ɔperesa sugumnɔɔrɛ zo’e zo’e ge ti a me kan ta’an tum tuunɛ. La boi bim ti ba yuun gu to tuuma la mɛ ge ti bã’a me wi’ira ge mabiisi la yuun kelum tiregɛ la ba paŋa za’a mɛ soŋɛ mabipɔka wa. Yehowa yuun mi sɛla n wan soŋɛ mabipɔka wa mɛ.

14. Keendoma wan eŋɛ la bem ti la pa’alɛ ti ba dekɛ bamea delum la Yehowa?

¹⁴ Keendoma n wan ta’an eŋɛ sɛla. Andrei yuun zusɛ mɛ ge eŋɛ eŋa n wan ta’an eŋɛ sɛla. Yehowa yuun eŋɛ la wani? A yuun basɛ mɛ ti mabiisi soŋɛ mabipɔka la n bɛ̃’ɛri la. Basɛba me yuun ni tari en keŋɛ mɛ ti a nyɛ dɔgeta, ti basɛba me yuun bo en ligeri. Yehowa n yuun basɛ ti mabiisi la soŋɛ en. A yuun kã bo ba mɛ la ban dekɛ nɔyinɛ la sukpe’ene tum tuuma se’em la. (Heb. 13:16) Keendoma, ba san gu to tuuma la, ni yele mabiisi basɛba ti ba soŋɛ ya. (Yer. 36:5, 6) Sɛla n gaŋɛ za’a la, dekɛ yamea delum Yehowa. A wan soŋɛ ya ti ya ta’an bisera to mabiisi la.

15. Yaarɛ san paɛ tɔ, to wan eŋɛ la wani ta’an kelum tara nɔyinɛ la taaba?

¹⁵ Mabiisi n wan ta’an eŋɛ sɛla. Ba san gu to tuuma la, la ta’an dɛna ti to laɣesa taaba gurup piɣisi poan. Bala, la yele kɔ’ɔn pakɛ mɛ ti to tara suma’asum la taaba. Da zaberi ya la taaba ge tuɣum zabɛ ya giisɛ Sitaana. Da basɛ ti mabiisi la tuure daana hɔ ge ni tiregɛ ya maalɛ yele la kalam. (Mag. 19:11; Ep. 4:26) Kɔ’ɔn maasum ya ti ya soŋera taaba. (Titus 3:14) Mabiisi la n yuun soŋɛ mabipɔka la n bɛ̃’ɛri la yuun soŋɛ na’am mɔɔlegɔ tigesego la mɛ. La yuun basɛ ti ba ana la du’a du’a la taaba wuu deodoma la.​—Ym. 133:1.

16. Wuu Kolose 4:3, 18 n pa’alɛ se’em la, to wan eŋɛ la wani soŋɛ mabisɛba ti yaarɛ paara ba la?

 ¹⁶ To mabiisi zo’e zo’e kelum pu’usa Yehowa mɛ, hali la gɔmɛt n gu to tuuma la. Ba paɣɛ basɛba mɛ ba sakerɛ zuo. To ta’an zusera bɔ’ɔra bamam la ba deodoma. To me ta’an zusera bɔ’ɔra mabisɛba n tari sukpe’ene soŋera sɛba ti ba paɣɛ ba la. Ba soŋeri mabisɛba ti ba paɣɛ ba la mɛ ti ba dekɛ bamea delum Yehowa. Ba bo’ori ba la yelese’a n pakɛ ba ge me tɔɣera pɔ’ɔra ba kootin. c (Kaalɛ Kolose 4:3, 18.) Tɛ̃ra ti ho zusega wan ta’an soŋɛ mabisɛba ti ba paɣɛ ba la!​—2 Tes. 3:1, 2; 1 Tim. 2:1, 2.

17. Hon wan eŋɛ la wani maasum nananawa gura yaarɛ?

¹⁷ Hon la ho deodoma ta’an maasum nananawa gura yaarɛ. (Tm. 14:22) Da ti’isa daaŋɔ seto woo n wan paɛ ho yele. Tuɣum basɛ ti hon la Yehowa zɔtɔ nyɔka kpe’em ge me soŋɛ ho kɔma ti ba ana bala. Putɛyiila san ni tara hɔ saŋa ase’a, tɔɣɛ sɛla n boi ho suuren bo Naayinɛ. (Ym. 62:7, 8) Hon la ho deodoma naɛ taaba sɔsɛ sɛla n sɔi ti la nara ti ya dekɛ yamea delum Yehowa. d Dɔɣereba san maasum gura yeledi’ima, la ni soŋɛ kɔma la mɛ. Bala mea nɔɔ ti ba san maasum gura yaarɛ, la wan soŋɛ kɔma la ti ba dekɛ bamea delum Yehowa ge tara sukpe’ene.

18. To wan nyɛ la bem beere sa’am?

¹⁸ Naayinɛ suma’asum la wan basɛ ti to bɔna fai. (Flp. 4:6, 7) Yehowa ni doose la a suma’asum wa poan basɛ ti to suure ana mama la ka pakɛ la bã’asi, yeledi’ima la yaarɛ n paari to la. A ni basɛ mɛ ti keendoma kaara to bisera. A bo to za’a waabi yɔ’ɔ mɛ ti to soŋera taaba. Suma’asum sebo ti to tara nananawa la, wan soŋɛ tɔ ti to ta’an ŋmibe ze’ele daaŋɔ san paɛ tɔ, hali la ‘mɛlesekãtɛ’ la poan. (Mt. 24:21) Sankaŋa la, la wan nara ti to tara suma’asum la taaba ge me soŋɛ to mabiisi ti ba ita bala. Mɛlesekãtɛ la san tole, daaŋɔ kan le paɛ tɔ n wan basɛ ti to tara putɛyiila. To wan ta tara suma’asum n di mi’a wuu Yehowa n boti la ana to se’em la.​—Isa. 26:3, 4.