Sokese’a Ti Sɛba N Kaali La Sɔkera
Yuumadaana David yuun ba’ɛ tɔɣɛ gaŋɛ mɛ la eŋa n gulesɛ ti a wan pɛ̃ɣɛ Naayinɛ ‘daarewoo’ ti la bɔna Yooma 61:8 la?
Aayi. Sɛla ti David yuun gulesɛ wa dela yelemɛŋɛrɛ.
Geele bisɛ eŋa n yuun gulesɛ sɛla kaalegɔ wa poan la zɛ’ɛsi sise’esi poan me: ‘Mam nyaa wan yuum pɛ̃ɣɛ ho yu’urɛ la daarewoo ge me tuna mam biŋe n nɔɔrɛ ti n eŋɛ sɛla la dabeserɛ woo.’ ‘O Yehowa Naayinɛ, mam wan pɛ̃ɣɛ hɔ la n suure za’a, mam wan na’asa ho yu’urɛ la daarewoo.’ ‘Mam wan pɛ̃ɣera ho yu’urɛ la saŋa woo.’—Ym. 61:8; 86:12; 145:1, 2.
Se’em ma’a ti David yuun gulesɛ yele ana wa la, a yuun ka ti’isɛ ti a kan makɛ ki. A yuun mi ti Yehowa bo nɔɔrɛ ti asaala be’em wan basɛ ti kum bɔna. David me yuun sakɛ ti eŋa dela be’emdaana. (Pin. 3:3, 17-19; Ym. 51:4, 5) A yuun mi ti nɛresɛba n tari sakerɛ dɛna wuu Abraham la Isaak la Yakob me yuun ki mɛ. David me yuun mi ti eŋa me wan ba’asum ki. (Ym. 37:25; 39:4) Ge a yelesum la n boi Yooma 61:8 la pa’alɛ ti a yuun lu a suure ti a pɛ̃ɣera la Naayinɛ daarewoo.—2 Sa. 7:12.
Saŋa ase’a, David yuun ni gulesɛ la amea vom yɛla wuu yelese’a n boi Yooma 18 la 51 la 52 la. Yooma 23 poan, David tɔɣɛ pa’alɛ ti Yehowa ani wuu dunkeena n pa’ali, buɣela ge me tɛ’ɛla a dusi se’em la. David yuun dela dunkeena. A yuun boti a dekɛ a vom za’a tum bo la Naayinɛ.’— Ym. 23:6.
Tɛ̃ra ti, la yuun dela Yehowa n basɛ ti David gulesɛ yele ana wa. Sɛla ti a yuun gulesɛ la, laɣum pa’asɛ la yetɔɣebiŋ’a se’a n wan ta tum pooren. Makerɛ, Yooma 110 poan, David pa’alɛ la sansɛka ti a Daana la wan ta ‘zi’ire Naayinɛ zuɔ nu’o’ saazuo sa ti a bo en kpe’eŋo. Ti a eŋɛ bem? A wan nyaŋɛ Naayinɛ dindoma ge ‘gãkɛ tisi.’ Mɛzaaya la ze’ele la David tuusum poan ge me wan ta bɔna la saazuo, dɛna ‘malemadaana ka tara ba’asegɔ.’ (Ym. 110:1-6) Yezu yuun yeti yetɔɣebiŋere la n boi Yooma 110 la tɔɣeri la eŋa yele ge me wan ta tum tuuma beere sa’am.—Mt. 22:41-45.
Sira, Naayinɛ vo’osum la n yuun basɛ ti David gulesɛ a saŋa la yɛla, la ban wan ta isige en kum poan ti a pɛ̃ɣera Yehowa daarewoo la yele. Bala la Yooma 37:10, 11, 29 tɔɣeri la daami la beere sa’am yɛla. Baabule gulesegɔ wa yuun tum tuuma la daami Israel tiŋa ge me wan ta tum tuuma beere sa’am.—Bisɛ kaalegɔ zɛ’an 8, zaseŋɔ yele la zuo n de ‘Ho Wan Bɔna La Mam Paradiisi Poan’ n boi gɔŋɔ wa poan la.
Yooma 61:8 la zɛ’ɛsi sise’esi pa’alɛ ti David yuun boti la a na’asa Yehowa, Israel tiŋa poan ta paɛ a kum. La me pa’alɛ la David n wan ta eŋɛ sɛla beere sa’am, Yehowa san ta isige en kum poan.
