1. Kristabia n de buraa wan eŋɛ la wani ta’an nyɛta nɛŋa tɔlega?

 NABA David yuun yele Solomon yeti: ‘Tara paŋa ge eŋɛ pa’alɛ ti ho dela buraa.’ (1 Na. 2:​1-3) Kristakɔma za’a n de buraasi zina beere wa nari ti ba dekɛ ka’aŋɔ wa tum tuuma. Ba san wan ta’an eŋɛ bala, la nari ti ba nana Naayinɛ lɔɔ ge tara Baabule naresum yɛla tuna tuuma ba vom poan. (Lu. 2:52) Beni n sɔi ti la yele pakɛ ti burasa’ara dɛna Kristakɔma n bĩ vo’osum poan?

2-3. Beni n sɔi ti la yele pakɛ ti burasa’arɛ dɛna Kristabia n bĩ vo’osum poan?

² Kristabia n de buraa tari la tuuma zo’e zo’e a yire la tansugere la poan. Burasa’ara wa, nɔkpe’ene kai ti ya ti’iseri la yan wan ta tara zugbere tuunse’a beere sa’am. Ho ta’an bɔta ti ho tum tɛm woo na’am tuuma la, ho dɛna keendoma soŋera ge nyaa ta dɛna keema tansugere la poan. Ho me ta’an bɔta ti ho di pɔɣa ge dɔɣɛ kɔma. (Ep. 6:4; 1 Tim. 3:1) Ho san wan ta’an eŋɛ yele ana wa soŋa, la dela ho dɛna Kristabia n bĩ vo’osum poan. b

³ Bem n wan ta’an soŋɛ hɔ ti ho dɛna Kristabia n bĩ vo’osum poan? Ninmɔ’ɔrɛ yɛla ase’a n boi ti la nara ti ho zamesɛ mina a. Nananawa, ho wan eŋɛ la wani maasum soŋa ta’an ta tum ho beere sa’am zugbere tuunɛ la?

4. Nɛrebani makesonɛ ti ho wan ta’an tɔɣesa? (Bisɛ foote la.)

⁴ Tɔɣesa nɛresɛba n tari makesonɛ. Baabule la puɣum tara burasɛba n tari makesonɛ ti burasa’ara wan ta’an  tɔɣesa ba. Diimi nɛreba wa yuun nɔŋɛ la Naayinɛ ge tuna ba zugbere tuuma soŋa. Homea yizuo la tansugere la poan, ho wan ta’an nyɛ Kristakɔma n tari makesonɛ ge bĩ vo’osum poan tɔɣesa ba. (Heb. 13:7) Ho me ta’an tɔɣesa Yezu Krista makerɛ la. (1 Pe. 2:21) Hon zameseri nɛrebana wa yɛla la, ti’isɛ bisɛ halese’a ti ba yuun tara. (Heb. 12:​1, 2) Nyaa bisɛ hon wan eŋɛ se’em ta’an tɔɣesa buraasi wa.

5. Ho wan eŋɛ la wani ta’an tara bɔkerɛ ge beni n sɔi ti la yele pakɛ? (Yooma 119:9)

⁵ Kɔ’ɔn ‘tara bɔkerɛ.’ (Mag. 3:21) Buraa n tari bɔkerɛ ni geele la yɛla ge nyaa tum tuunɛ. Bala la, kɔ’ɔn tiregɛ tara bɔkerɛ yɛla woo poan. Bem zuo? Burasa’ara zo’e zo’e n boi zina beere wa ni dekɛ la bamea puti’irɛ tum tuuma ge ni bisɛ lan ani ba se’em kɔ’ɛ ba puti’irɛ. (Mag. 7:7; 29:11) Social media me ta’an sa’am ho puti’irɛ. Ge ho wan eŋɛ la wani ta’an tara bɔkerɛ? Yia la, zamesɛ baŋɛ Baabule naresum yɛla ge bisɛ hon wan dekɛ tum tuuma se’em ta’an nyɛ nyuurɔ. Nyaa basɛ ti hon zamesɛ yelese’a la soŋɛ hɔ ti ho kɔ’ɛ puti’irɛ tum tuunɛ n wan basɛ ti Yehowa puurɛ pee. (Kaalɛ Yooma 119:9.) Ho san tara bɔkerɛ wana, la wan soŋɛ hɔ ti ho ta’an dɛna Kristabia n bĩ vo’osum poan. (Mag. 2:​11, 12; Heb. 5:14) Geele bisɛ bɔkerɛ n wan soŋɛ ho se’em yɛla ayi poan: (1) hon wan ana se’em la mabipɔɣesi, la (2) hon wan yɛɛra ho lɔɣɔrɔ ge maala homea se’em.

6. Bɔkerɛ wan ta’an soŋɛ burasa’arɛ la wani ti a bɔ’ɔra mabipɔɣesi gilema?

⁶ Ho san tara bɔkerɛ la wan soŋɛ hɔ ti ho tara gilema bɔ’ɔra pɔɣesi. Makerɛ, burasa’arɛ ta’an bɔta ti a baŋɛ mabipɔka soŋa, bala me daɣɛ be’em. Ge burasa’arɛ n tari bɔkerɛ kan yele sɛla, gulesɛ bii ita sɛla ti la ana wuu a lɛɣeri mabipɔka la mɛ ge me ka tara puti’irɛ ti a di en. (1 Tim. 5:​1, 2) A san lɛɣera mabipɔka a wan tara gilema bɔ’ɔra en ge kan naɛ la en ti ba bɔna zɛ’an ba ma’a.—1 Ko. 6:18.

7. Bɔkerɛ wan soŋɛ burasa’arɛ la wani ti a ta’an yɛɛra lɔɣɔrɔ ge maala amea soŋa?

⁷ Sore deyima ti burasa’arɛ wan eŋɛ  pa’alɛ ti a tari bɔkerɛ dela eŋa n yɛɛri a lɔɣɔrɔ ge maala amea se’em. Saŋa zo’e zo’e nɛresɛba n maali ge pɛ’ɛra lɔɣɔrɔ se’em la ka tari gilema bɔ’ɔra Yehowa ge me ka tara sarensoŋɔ. Sɛla n pa’alɛ ti ba ka tari sarensoŋɔ dela ba lɔɣɔrɔ la n ni mikera ba se’em ti la ana wuu ba dela pɔɣesi la. Burasa’arɛ n de Kristabia n bĩ vo’osum poan san yeti a da lɔkɔ, a wan basɛ ti Baabule naresum yɛla, la nɛresɛba n tari makesonɛ tansugere la poan la soŋɛ en. A ta’an soke amea yeti: ‘Mam n boti yelese’a la pa’alɛ ti n tari putɛsonɛ ge bɔ’ɔra nɛreba gilema? Mam n yɛɛri n lɔɣɔrɔ ge maala n mea se’em la basɛ ti nɛreba baŋɛ ti n sirum pu’useri la Naayinɛ? (1 Ko. 10:​31-33; Titus 2:6) Burasa’arɛ san tara bɔkerɛ, nɛreba wan bo en gilema ge ti a saazuo Sɔ la me puurɛ pee la en.

8. Burasa’arɛ wan eŋɛ la wani mɔ’ɛ nini a tuunɛ poan?

⁸ Mɔ’ɛ nini. Burasa’arɛ n mɔ’ɛ nini tuni a tuunɛ woo la soŋa soŋa. (Lu. 16:10) Geele Yezu makerɛ la bisɛ. A yuun ka tuni a tuuma yoo yoo. A yuun tum la tuunse’a woo ti Yehowa yuun yeti a tum la hali lan yuun kpe’em bo en la. A yuun nɔŋɛ la nɛreba yele yele wuu a podɔleba la ge sakɛ ki ba zuo. (Yon 13:1) Mɔ’ɛ nini tuna tuunse’a woo ti ba dekɛ bo ho ti la pa’alɛ ti ho tɔɣeseri la Yezu. Ho san ka mina hon wan tum de se’em, sirege homea ge soke burasɛba n bĩ vo’osum poan ti ba soŋɛ hɔ. Da pɔsɛ tuunɛ ge pisegɛ basɛ. (Arom 12:11) Ge tuɣum tuna tuunɛ la wuu ho tuni ‘bɔ’ɔra la Yehowa ge daɣɛ nɛreba.’ Bala wan basɛ ti ho tum de soŋa ba’asɛ. (Kol. 3:23) Yelemɛŋɛrɛ la dela, to ka di mi’a, bala ho san tue sirege homea ge sakɛ.—Mag. 11:2.

9. Bem zuo ti la nara ti burasa’arɛ kumesɛ amea yelese’a n wan soŋɛ en poan?

⁹ Ho san wan dɛna Kristabia n bĩ vo’osum poan, la nari ti ho kumesɛ homea yelese’a poan n wan soŋɛ hɔ. Wana wan soŋɛ hɔ ti ho ta’an tum ho zugbere tuunɛ tansugere la poan, ta’an nyɛ tuunɛ diisa homea bii ho deodoma ge me tara bɔnsoŋa la nɛreba. To geele yelese’a n wan soŋɛ hɔ la ase’a bisɛ.

10-11. Burasa’arɛ san mina kaalegɔ la gulesegɔ soŋa soŋa, la wan soŋɛ amea la tansugere la, la wani? (Yooma 1:​1-3) (Bisɛ foote la.)

¹⁰ Zamesɛ mina kaalegɔ la gulesegɔ. Baabule la yeti burasɛka n tari pupeelum dela se’em n nyɛti saŋa daarewoo kaala Naayinɛ yelesum la ge ti’isa bu taɣesa. (Kaalɛ Yooma 1:​1-3.) A san kaala Baabule la daarewoo la wan soŋɛ en ti a baŋɛ Yehowa puti’irɛ n de se’em yɛla poan, bɔkera yɛla soŋa soŋa ge tara Baabule naresum yɛla tuna tuuma. (Mag. 1:​3, 4)  Burasina taaba ti to ɛɛra tansugere la poan. Bem zuo?

¹¹ To mabiisi la boti la burasɛba n tã pa’ala ge tara Baabule la kã’ana ti ba pa’ala ba. (Titus 1:9) Ho san mina kaalegɔ la gulesegɔ soŋa soŋa, ho wan ta’an maasum yetɔɣum la lebesego n wan soŋɛ nɛreba ge kpemese ba giila. Ho me wan ta’an gulesɛ homea zamesegɔ yɛla la hon wan wum yelese’a tansugere zamesegɔ poan, gingilega la tinkãra laɣesegɔ poan. Hon wan gulesɛ yelese’a la wan soŋɛ hɔ ti ho sakerɛ kpe’em ge me kpemese mabiisi giila.

12. Bem n wan soŋɛ hɔ ti ho ta’an naɛ la nɛreba sɔsa soŋa?

¹² Mina sɔsega. Buraa n de Kristabia nari ti a mina la sɔsega. Burasɛka n mi sɔsega nari ti a kɛlesa ge bɔkera lan ani nɛreba se’em. (Mag. 20:5) Ho wan ta’an baŋɛ lan ani nɛra se’em doose la a kɔ̃a yetɔɣum, a nɛŋa n ani se’em la eŋa n iti amea se’em. Ho san naɛ la nɛra bɔna ti ho wan baŋɛ bala. Ho san tara eletrɔnik lɔɣɔrɔ n de wuu email tuna ge me tɛɣesera saŋa woo, bala ta’an basɛ ti ho san ta seke nɛra ho kan ta’an naɛ la en sɔsɛ soŋa. Bala la, tiregɛ bisɛ hon wan eŋɛ se’em ta’an naɛ la nɛreba sɔsa. —2 Yo. 12.

13. Bem ti burasa’ara wan ta’an le zamesɛ? (1 Timoti 5:8) (Bisɛ foote la.)

¹³ Tiregɛ bisa homea. Buraa n bĩ vo’osum poan dela a tiregɛ bisa amea la a deodoma. (Kaalɛ 1 Timoti 5:8.) Tisi sise’esi poan, budibila ta’an zamesɛ tuunɛ a sɔ bii a yire nɛra zɛ’an. Tisi sise’esi poan me, budibila ta’an zamesɛ nu’o tuunɛ a san bɔna high school poan. Lan yeen dɛna se’em, la ani soŋa ti ho zamesɛ sɛla n wan soŋɛ hɔ ti ho nyɛ tuunɛ tuna. (Tm. 18:​2, 3; 20:34; Ep. 4:28) Mɔ’ɛ nini tuna ge ni tum de ba’asɛ soŋa. Nɛreba wan nyɛ hon tuni se’em la ge pɛɣɛ hɔ. Ho san ita bala ho wan nyɛ tuunɛ ti la dɛna ho denɛ. Buraa n de Kristabia nari ti a tara hala ana wa ge me kumesɛ amea lan wan eŋɛ se’em ti a ta’an tum a zugbere tuunɛ beere sa’am. Basɛ ya ti to geele ya zugbere tuuma la ase’a.

14. Burasa’arɛ wan eŋɛ la wani ta’an maasum ta tum tɛm woo na’am tuuma la?

¹⁴ Tɛm woo na’am tuuma. Burasɛba n bĩ vo’osum poan la zo’e zo’e yuun pɔsɛ tɛm woo na’am tuum la ba bunbilemen. Sore  ŋmɛ’a tuuma la soŋeri burasa’ara mɛ ti ba mina ban wan ta’an naɛ la nɛreba tuna se’em. La me soŋeri ba ti ba mina ban wan ta’an tara ligeri tuna soŋa se’em. (Flp. 4:​11-13) Sore ŋmɛ’a soŋerɛ tuuma la wan ta’an soŋɛ mabia ti a ta kɛ̃ tɛm woo na’am tuuma la poan. Mabiisi zo’e zo’e ni tum la sore ŋmɛ’a soŋerɛ tuuma la saŋa fii ti la soŋɛ ba ti ba ta’an maasum tum daarewoo sore ŋmɛ’a tuuma la. Sore ŋmɛ’a tuuma wan ta’an bo mabia yɔ’ɔ ti a tum tɛm woo na’am tuuma la n de wuu mɛa tuuma bii Betel tuuma.

15-16. Burasa’arɛ wan eŋɛ la wani ta dɛna keendoma soŋeredaana bii keema tansugere la poan?

¹⁵ Keendoma soŋera bii keema. Buraasi n de Kristakɔma za’a dela ba tiregɛ ta’an tara halese’a n wan basɛ ti ba ta dɛna tansugere keendoma. Baabule la yeti buraasi san tiregera ti ba tum tuunɛ wa ba ‘boti la tuunsonɛ.’ (1 Tim. 3:1) Buraa san wan ta’an dɛna keema la nari ti a tiregɛ ta’an dɛna keendoma soŋera yia. Keendoma soŋeredoma soŋeri keendoma la sarɔtɔ zo’e zo’e poan. Keendoma la keendoma soŋeredoma siregeri la bamea bisa mabiisi la ge me mɔ’ɛ nini la na’am mɔɔlegɔ tuuma la. Burasa’ara ta’an ta dɛna keendoma soŋeredoma ba san ta pɔ̃ra yuun 20. Keendoma soŋeredaana n kumesɛ paa n de yuun 20 la dɔɣelega ta’an ta dɛna keema.

¹⁶ Ho wan eŋɛ la wani ta’an dɛna keendoma soŋeredaana bii keema? Baabule la pa’alɛ lan nari ti ho tara halese’a. Ge tɛ̃ra ti hala ana za’a boi la Baabule la poan n pa’alɛ ti ho tara nɔŋerɛ bɔ’ɔra Yehowa, ho deodoma la tansugere la. (1 Tim. 3:​1-13; Titus 1:​6-9; 1 Pe. 5:​2, 3) Tiregɛ bɔkɛ hala ana wa soŋa. Zusɛ Yehowa ti a soŋɛ hɔ ti ho ta’an tara hala ana wa. c

17. Burasa’arɛ wan eŋɛ la wani maasum ta dɛna sira la deo zuodaana? (Bisɛ foote la.)

¹⁷ Sira la deo zuodaana. Wuu Yezu n pa’alɛ se’em la, buraasi basɛba bĩ vo’osum poan mɛ ge nan ka di pɔɣa. (Mt. 19:12) Ge ho san bɔta ti ho di pɔɣa, mina ti ho wan ta dɛna sira la deo zuodaana. (1 Ko. 11:3) Yehowa boti la sira nɔŋɛ a pɔɣa ge bisera a inganɛ yɛla, a suure poan yɛla la a vo’osum poan yɛla. (Ep. 5:​28, 29) Hala ana la yelese’a ti ho wan kumesɛ homea a poan ti to puɣum sɔsɛ ba yele zamesegɔ wa poan maɣesɛ wuu bɔkerɛ, hon wan tara gilema bɔ’ɔra pɔɣesi  la hon wan mɔ’ɛ nini tuna la, wan soŋɛ hɔ ti ho ta’an dɛna siresonkɔ. Bala wan maasum hɔ ti hon de sira, la deo zuodaana la, ho ta’an tum ho zugbere tuunse’a n nari.

18. Burasa’arɛ wan eŋɛ la wani maasum ta dɛna sɔ?

¹⁸ Sɔ. Ho san di pɔɣa ba’asɛ, ho ta’an ta dɛna sɔ. Ho wan ta’an zamesɛ la bem Yehowa zɛ’an ta’an ta dɛna sɔsonkɔ? Yɛla zo’e zo’e. (Ep. 6:4) Yehowa yuun yele a Dayɔa Yezu nɛreba nɛŋan ti eŋa nɔŋɛ en mɛ ge bɔta a yele. (Mt. 3:17) Ho san dɛna sɔ, kɔ’ɔn basɛ ti ho kɔma baŋɛ daarewoo ti ho nɔŋɛ ba mɛ. Kɔ’ɔn pɛɣera ba saŋa woo la ba tuunsoma la. Sɔdoma sɛba n tɔɣeseri Yehowa makerɛ la soŋeri ba kɔma ti ba ta dɛna Kristakɔma n bĩ vo’osum poan. Ho ta’an maasum dɛna sɔsonkɔ ho san tara nɔŋerɛ bɔ’ɔra ho deodoma la mabiisi n boi tansugere la poan. Ni yele ba ti ho nɔŋɛ ba mɛ ti ba yele me pakɛ hɔ. (Yon 15:9) Wana wan soŋɛ hɔ ti ho dɛna siresonkɔ la sɔsonkɔ beere sa’am. Ge sankaŋa n nan ka paɛ la, ho dela tuulum nɛra bɔ’ɔra Yehowa ge soŋera ho deodoma la tansugere la.

19-20. Bem n wan soŋɛ burasa’ara ti ba ta’an bĩ vo’osum poan? (Bisɛ gɔŋɔ wa nɛŋa foote.)

¹⁹ Burasa’ara wa, la dela ya eŋɛ ania ta’an ta dɛna Kristakɔma n bĩ vo’osum poan. La dela ya bisɛ sɛba n tari makesonɛ la tɔɣesa ba, tara bɔkerɛ, mɔ’ɛ nini tuna ge kumesɛ yamea yɛla ase’a poan ta’an maasum gura beere sa’am.

²⁰ Ho san ti’isa yelese’a woo n nari ti ho tum la, ho ta’an ti’isa ti la ba’ɛ kpe’em mɛ bo ho. Ge ho wan ta’an tum. Tɛ̃ra ti Yehowa kɔ’ɔn bɔta la a soŋɛ hɔ. (Isa. 41:​10, 13) Ho mabiisi n boi tansugere la poan me wan soŋɛ hɔ. Ho san ta dɛna burasɛka n bĩ vo’osum poan, ho wan tara pupeelum ho vom poan. Burasa’ara wa, to nɔŋɛ ya mɛ! Yehowa wan kã bo ya nananawa la yan tiregeri ti ya ta dɛna burasɛba n bĩ vo’osum poan la.—Mag. 22:4.