1. To san ti’isa Abraham sakerɛ la yele, bem sokere ti to wan ta’an soke tomea?

 LA BOI bim ti nɛreba zo’e zo’e wum Abraham yele mɛ ge ba ka mi a yɛla zo’e zo’e. Ge san dɛna hon, ho mi Abraham yɛla zo’e mɛ. Makerɛ, ho mi Baabule la n yeti, Abraham dela ‘sɛba woo n tari sakerɛ la sɔ.’ (Arom 4:11) Ge ho ta’an ti’isa ti, ‘Mam wan nyaŋɛ ana wuu Abraham, tara sakerɛ n kpe’em wuu eŋa n yuun tari sakerɛ n kpe’em se’em la?’ Ɛɛ ho wan nyaŋɛ.

2. Bem zuo ti la dɛna ninmɔ’ɔrɛ ti to zamesɛ Abraham yele? (Yames 2:​22, 23)

² Sore deyima ti to wan ta’an tara sakerɛ wuu Abraham dela to zamesa a yele. Saŋa woo Abraham yuun ni tum la Yehowa n yele sɛla la. A yuun basɛ la a kɛ̃’a zɛ’an ge keŋɛ zɛ’an n zaaɛ ta kɛ̃’ɛra tɛnti poan yuuma zo’e zo’e ge yuun sakɛ ti a dekɛ a dayɔba’arɛ Isaak kaabɛ. A itigɔ la yuun pa’alɛ ti a tari la sakerɛ n kpe’em. Abraham sakerɛ la a itisoŋɔ la yuun basɛ ti Naayinɛ n bɔta a yele ti a dɛna Naayinɛ zɔ. (Kaalɛ Yames 2:​22, 23.) Yehowa boti la to za’a waabi hali la hon me, nyɛ a kã’a ge dɛna a zɔ. Bala zuo, Yehowa yuun basɛ ti Paul la Yames gulesɛ la Abraham makesonɛ la yele. To wan geele Arom a zuo 4 la Yames a zuo 2 n tɔɣɛ Abraham yele se’em. Paul la Yames tɔɣɛ la Abraham yele ti la dɛna ninmɔ’ɔrɛ.

3. Gulesegɔ kuni ti Paul la Yames yuun tɔɣɛ de yele?

³ Paul la Yames dekɛ la yelese’a n boi Pin’ileŋɔ 15:6 tɔɣɛ. La yeti: ‘Ti Abraham tara sakerɛ bɔ’ɔra Yehowa ti Naayinɛ geele en ti a dela tontɔɔ nɛra.’ Yehowa san geele nɛra ti a dela tontɔɔdaana, la pa’alɛ ti a ka tari taalɛ ge ti  a puurɛ me pee la en. Bisɛ lan de yelepakerɛ se’em ti Naayinɛ geele nɛra n ka di mi’a ti a ka tari taalɛ! Ho ta’an bɔta ti Naayinɛ geele ho ti ho dela tontɔɔdaana, la me wan ta’an eŋɛ. To wan zamesɛ baŋɛ sɛla n sɔi ti Yehowa yuun geele Abraham ti a dela tontɔɔdaana la tomam me n wan eŋɛ se’em ti a geele to ti to dela tontɔɔdoma.

4. Bem n basɛ ti nɛresaaleba ka ta’an dɛna tontɔɔdoma?

⁴ Gɔnseko ti Paul yuun gulesɛ bo Aromdoma la, a yuun pa’alɛ ti nɛresaaleba za’a dela be’emdoma. (Arom 3:23) To wan eŋɛ la wani ti Naayinɛ puurɛ pee la tɔ ge geele tɔ ti to dela tontɔɔdoma? Paul n yuun tɔɣɛ Abraham yele se’em la wan soŋɛ yelemɛŋɛrɛ Kristakɔma za’a ti ba nyɛ sokere wa lebesego.

5. Bem zuo ti Naayinɛ yuun yeti, Abraham dela tontɔɔdaana? (Arom 4:​2-4)

⁵ Yehowa yuun yeti Abraham dela tontɔɔdaana se’em ma’a ti a yuun kɛ̃’ɛra Kanaan tiŋa la. Bem zuo ti Yehowa yuun yeti Abraham dela tontɔɔdaana? La dela Abraham n yuun nani Moses Lɔɔ la zuo yoi? La daɣɛ bala. (Arom 4:13) Naayinɛ n yuun yeti Abraham dela tontɔɔdaana la, yuun kɔbesinaasi pooren ti a nyaa dekɛ Lɔɔ la bo Israeldoma la. Bala la, bem zuo ti Naayinɛ yuun yeti, Abraham dela tontɔɔdaana? Abraham sakerɛ la zuo ti Naayinɛ yuun zu’usɛ en ge yeti a dela tontɔɔdaana.—Kaalɛ Arom 4:​2-4.

6. Bem n basɛ ti Yehowa yeti be’emdaana ta’an dɛna tontɔɔ nɛra?

⁶ Paul yuun le tɔɣɛ pa’asɛ ti nɛra san tara sakerɛ bɔ’ɔra Naayinɛ, ‘a sakerɛ la zuo, ti a wan dɛna tontɔɔdaana.’ (Arom 4:5) Paul yuun le yeti: ‘David yuun tɔɣɛ la yele ana mea ti, pupeelum boi mɛ la sɛba ti Naayinɛ yeti ba dela tontɔɔdoma ge daɣɛ la ba tuuma zuo. Pupeelum boi mɛ la sɛba ti Naayinɛ basɛ ba be’em woo bo ba, sɛba ti ba pĩ ba be’em basɛ la.’ (Arom 4:​6-8; Ym. 32:​1, 2) Naayinɛ ni di la sugeri bii pĩ sɛba woo n tari sakerɛ bɔ’ɔra en la be’em. A ni ka le tɛ̃ra ba be’em la. A ni geele nɛrebama ti ba ka tari taalɛ ge dɛna tontɔɔdoma ba sakerɛ la zuo.

7. Bem zuo ti Naayinɛ yamesi yuun dɛna tontɔɔdoma?

⁷ La boi bim ti Abraham, David la Naayinɛ yelemɛŋɛrɛ yamesi yuun ka di mi’a ge Naayinɛ yuun kelum geele ba ti ba dela tontɔɔdoma. Ba sakerɛ la zuo ti Naayinɛ yuun geele ba ti ba ka tari taalɛ yele yele wuu eŋa n yuun dekɛ ba makɛ la nɛresɛba n ka pu’useri en la. (Ep. 2:12) Paul yuun basɛ ti la niɛ peelumi a gɔŋɔ la poan yeti, sakerɛ n wan basɛ ti to tara bɔnsoŋa la Naayinɛ. Abraham la David yuun dela Naayinɛ zɔdoma ba sakerɛ la zuo. Tomam me ta’an dɛna Naayinɛ zɔdoma to san tara sakerɛ.

8-9. Nɛreba basɛba tɔɣɛ tue la wani la Paul la Yames gulesegɔ la ge beni n sɔi?

⁸ Yuuma zo’e zo’e n wana ti pu’usegɔ nɛŋadoma ŋmɛ’ɛra nɔkpɛ’ɛma ti ba baŋɛ sakerɛ la itigɔ yele n pakɛ se’em. Pu’usegɔ nɛŋadoma basɛba pa’alɛ ti ho san wan nyɛ faarɛ, la dela ho sakɛ bo to Daana Yezu Krista. Daanse’ere ho tabelɛ wum ti ba yɛta ti, “Sakɛ bo to Daana Yezu Krista ge ho wan nyɛ faarɛ.” Hali basɛba ni tɔɣɛ Paul yele wa ti: ‘Naayinɛ boti la tontɔɔdoma daɣɛ la ba tuuma zuo.’ (Arom 4:6) Ge basɛba me yeti “ho wan ta’an  nyɛ faarɛ” ho san kena zɛ’an ti pu’usegɔ la yeti la dela zilam la ge me ita som. Bala zuo, ba ta’an ni tɔɣɛ yelese’a n boi Yames 2:24 la yeti: ‘Nɛra itisoŋɔ n ni basɛ ti Naayinɛ yeti a dela tontɔɔ nɛra ge la daɣɛ la eŋa n sakɛ bo Naayinɛ se’em la ma’a.’

⁹ Wana wa zuo, gɔnmi’ileba basɛba ti’isɛ ti Paul la Yames puti’irɛ yuun ka makɛ taaba la nɛra n nari ti a eŋɛ sɛla ti Naayinɛ bɔta a yele. Pu’usegɔ nɛŋadoma basɛba pa’alɛ ti Paul yeti, nɛra nari ti a tara la sakerɛ ma’a ti Naayinɛ ta’an bɔta a yele ge ti Yames me yuun pa’alɛ ti nɛra nari ti a ita som ti Naayinɛ ta’an bɔta a yele. Nɛra n zamesɛ mina pu’usegɔ yɛla yuun yeti: “Yames yuun ka bɔkɛ sɛla n sɔi ti Paul tɔɣɛ yeti nɛra nari ti a tara la sakerɛ ma’a [ta’an dɛna tontɔɔdaana la.”] Ge Yehowa n yuun basɛ ti Paul la Yames gulesɛ sɛla ti ba tɔɣɛ la. (2 Tim. 3:16) Bala la, to wan eŋɛ la wani ta’an bɔkɛ ba puti’irɛ la n makɛ taaba se’em? To wan ta’an bɔkɛ ban yuun pa’alɛ sɛla la, to san geele yelese’a ti ba yuun gulesɛ la.

10. ‘Itikuni’ ti Paul yuun tɔɣɛ de yele la? (Arom 3:​21, 28) (Bisɛ foote la.)

¹⁰ ‘Itikuni’ ti Paul yuun tɔɣɛ de yele Arom a zuo 3 la 4 la? Nɔkpe’ene kai ti a yuun tɔɣɛ la ba wan nam ‘Moses Lɔɔ la’ ti Yehowa yuun dekɛ bo Israeldoma Sinai Zoore zuo la. (Kaalɛ Arom 3:​21, 28.) La boi bim ti Moses Lɔɔ la yuun ka le tuna ge la ani wuu Paul saŋa la, Yuda Kristakɔma la yuun ti’isɛ ti la dela pɛregerɛ ti ba nana ge dɔla Moses Lɔɔ la. Bala n sɔi ti Paul yuun dekɛ Abraham yele la soŋɛ ba ti ba baŋɛ ti nɛra ka nari ti a dɔla ‘lɔɔ la’ ge ti Naayinɛ ta’an geele en ti  a dela tontɔɔdaana. La tuɣum dɛna la a tara sakerɛ. Ton mi wana wa la kpemese la to giila ge basɛ ti to tara suure lua ti, la kan kpe’em bo to ti to tara bɔnsoŋa la Naayinɛ. Bala pa’alɛ ti Naayinɛ wan bɔta to yele to san tara sakerɛ bɔ’ɔra Eŋa la Krista.

11. ‘Itikuni’ ti Yames yuun tɔɣɛ de yele la?

¹¹ Ge ‘itiseko’ n boi Yames a zuo 2 la daɣɛ itiseko n boi Moses Lɔɔ la poan, ti Paul yuun tɔɣɛ de yele la. Yames yuun tɔɣɛ la Kristakɔma n iti yelese’a ba vom poan. Yele aŋa n wan pa’alɛ nyaa Kristabia tari sakerɛ Naayinɛ poan bii a ka tari. To bisɛ yɛla ayi ti Yames yuun tɔɣɛ de yele.

12. Yames yuun tɔɣɛ pa’alɛ sakerɛ la itigɔ n makɛ taaba se’em la wani? (Bisɛ foote la.)

¹² Yia la, Yames yuun tɔɣɛ la Kristakɔma n ka nari ti ba yɛlesa nɛreba se’em. A yuun bo la makerɛ pa’alɛ buraa ayima n yuun bisɛ nam buntata ge zɛregɛ nasa se’em. Yames basɛ ti la niɛ peelumi ti buraa wa ta’an ti’isa ti eŋa tari sakerɛ ge a ka eŋɛ pa’alɛ a itigɔ poan ti a tari sakerɛ. (Yam. 2:​1-5, 9) N yi’i, Yames yuun tɔɣɛ la nɛra n baŋɛ ti a mabia ka tari dia bii lɔɣɔrɔ ge me ka soŋɛ en. Nɛra la san puɣum ti’isa ti eŋa tari sakerɛ, eŋa n ka soŋɛ a mabia la pa’alɛ ti a ka tari sakerɛ. La pa’alɛ ti a sakerɛ la dela yoo. Wuu Yames n yuun yele se’em la, ‘sakerɛ ti tuuma ka pa’asɛ bim ki mɛ.’—Yam. 2:​14-17.

13. Yames yuun bo la bem makerɛ pa’alɛ ti nɛra nari ti a eŋɛ pa’alɛ ti a tari sakerɛ? (Yames 2:​25, 26)

¹³ Yames yuun tɔɣɛ Arahab yele ti, a dela se’em n eŋɛ pa’alɛ a itigɔ poan ti a tari sakerɛ. (Kaalɛ Yames 2:​25, 26.)  A yuun wum Yehowa n eŋɛ yelese’a la ge me baŋɛ ti eŋa n sirum soŋeri Israeldoma la. (Yos. 2:​9-11) A yuun eŋɛ la sɛla pa’alɛ ti a tari sakerɛ. A sakerɛ la zuo, a yuun te’ele Israel vɛɛsereba bayi la mɛ ti dɛŋa ka paɛ ba. La boi bim ti Arahab yuun daɣɛ Israel nɛra ge me ka di mi’a wuu Abraham la. Ge la bala za’a, Naayinɛ yuun yeti eŋa me dela tontɔɔdaana. Arahab yele la pa’alɛ ti, la yele pakɛ ti to eŋɛ pa’alɛ to itigɔ poan ti to tari sakerɛ.

14. Paul la Yames n yuun tɔɣɛ sɛla la makɛ taaba la wani?

¹⁴ Paul la Yames yuun tɔɣeri sakerɛ la itigɔ yele la sarɔtɔ toyi poan. Paul yuun pa’alɛ Yuda Kristakɔma la ti la daɣɛ ban nani Moses Lɔɔ la zuo ti Yehowa wan bɔta ba yele. Yames me yuun tɔɣeri la, la yele n pakɛ se’em ti Kristakɔma za’a ita som bɔ’ɔra nɛreba ti la pa’alɛ ti ba tari sakerɛ.

15. Sarɔtuni poan ti to wan ta’an eŋɛ pa’alɛ ti to tari sakerɛ to itigɔ poan? (Bisɛ foote la.)

¹⁵ Yehowa ka yeti to san wan dɛna tontɔɔdoma la nari ti to eŋɛ sɛla ti Abraham yuun eŋɛ la. Ge sarɔtɔ zo’e zo’e boi ti to wan nyaŋɛ eŋɛ pa’alɛ ti to tari sakerɛ. To ta’an tɔ’ɔsa saama to tansuga poan, soŋera to mabiisi yeledaaŋɔ poan ge ita som bɔ’ɔra to yidoma, bala n wan basɛ ti Yehowa bɔta to yele ge kã bo to. (Arom 15:7; 1 Tim. 5:​4, 8; 1 Yo. 3:18) Sore deyima me poan ti to wan eŋɛ pa’alɛ ti to tari sakerɛ dela to mɔ’ɛ nini mɔɔla yelesoma la bɔ’ɔra nɛreba. (1 Tim. 4:16) To za’a waabi wan ta’an eŋɛ sɛla pa’alɛ ti to tari sakerɛ ti Yehowa pu’ulumbiŋ’a la za’a wan tum tuuma ge sakɛ ti a sarɔtɔ kɔ’ɔn ana la soŋa. To san ita bala, to tari suure  lua ti Yehowa wan geele to ti to dela tontɔɔdoma ge yeti to dela a zɔdoma.

16. Abraham yuun tari sakerɛ, la beere sa’am puti’irɛ la bem poan?

¹⁶ Arom a zuo 4 pa’alɛ la ton wan ta’an le zamesɛ sɛla Abraham yele la poan. La basɛ ti to baŋɛ ti to beere sa’am puti’irɛ la yele n pakɛ. Yehowa yuun pu’ulum biŋe ti a wan doose Abraham poan basɛ ti ‘tisi zo’e zo’e’ nyɛ kã’a. Yeen ti’isɛ bisɛ pu’ulumbiŋere wa n yuun de yelesonɛ se’em bɔ’ɔra Abraham! (Pin. 12:3; 15:5; 17:4; Arom 4:17) Ge se’em ma’a ti Abraham dɛna yuun 100 ti Sarah me dɛna yuun 90 la, ba yuun kelum ka tara bia. Asaala puti’irɛ poan, Abraham la Sarah n yuun kuregɛ se’em la zuo, ba yuun kan ta’an dɔɣɛ. Bala yuun ta’an kpe’em bo Abraham ti a sakɛ. ‘Ge doose la beere sa’am puti’irɛ la zuo, a yuun tari sakerɛ ti a wan ta dɛna tisi zo’e zo’e sɔyaaba.’ (Arom 4:​18, 19) La me yuun ka yue ti eŋa n yuun guri sɛla la sirum tum. A yuun dɔɣɛ la Isaak wuu Naayinɛ n yuun pu’ulum biŋe se’em la.—Arom 4:​20-22.

17. To eŋɛ la wani baŋɛ ti Naayinɛ wan ta’an geele to ti to dela tontɔɔdoma la a zɔdoma?

¹⁷ Naayinɛ wan ta’an geele to ti to dela tontɔɔdoma la a zɔdoma wuu eŋa n yuun geele Abraham se’em la. Paul yuun tɔɣɛ la yele denɛ mea nɔɔ ti: ‘Yelesum la n de ‘ba geele en’ la ka gulesɛ bo la [Abraham] ma’a ge la gulesɛ bo la tomam sɛba ti ba to’e to ti to dɛna tontɔɔdoma, tomam sɛba n nam Naayinɛ se’em n isige to Daana Yezu kum poan la.’ (Arom 4:​23, 24) Wuu Abraham la, la nari ti to tara sakerɛ Yehowa poan, ita som ge tara puti’irɛ ti Yehowa pu’ulumbiŋ’a la wan sirum tum. Zaseŋɔ seko n taɣelɛ la poan, to wan sɔsɛ Paul n yuun le tɔɣɛ to beere sa’am puti’irɛ la yele se’em ti la bɔna Arom a zuo 5 la.