1. To san wan ta’an bĩ vo’osum poan, la nari ti to eŋɛ la bem?

 TO PUURƐ n ni pee to san nyɛ bia n zo’e kalam kalam ta dɛna bunkutɛ. La ani wuu kɔma ka yuuri ge zɔ’ɔra kalam kalam. Ge to san bɔta ti to bĩ vo’osum poan, la nari ti to tiregɛ eŋɛ sɛla. b (1 Ko. 13:11; Heb. 6:1) To san wan ta’an bĩ vo’osum poan, la nari ti to tiregɛ tara bɔnsoŋa la Yehowa. A zilam vo’osum la me wan soŋɛ tɔ ti to tara halesoma, ta’an tuna soŋa soŋa ge maasum gura beere sa’am.—Mag. 1:5.

2. Pin’ileŋɔ 1:27 pa’alɛ to la bem ge to wan sɔsɛ la bem zaseŋɔ wa poan?

² Yehowa yuun naam la buraa la pɔka. (Kaalɛ Pin’ileŋɔ 1:27.) Yelemɛŋɛrɛ, buraasi la pɔɣesi innaanɛ boi la to’ore to’ore ge ba le bɔna to’ore to’ore la yɛla ase’a me poan. Makerɛ, Yehowa bo buraasi la tuunɛ ge bo pɔɣesi me tuunɛ. Ge ba za’a nari ti ba tara hala ase’a ta’an tum ba tuuma la soŋa soŋa. (Pin. 2:18) Zaseŋɔ wa poan, to wan zamesɛ baŋɛ pɔɣesa’ara n nari ti ba eŋɛ sɛla ta’an bĩ vo’osum poan ti la pa’alɛ ti ba tɔɣeseri la Krista. Zaseŋɔ sɛka n taɣelɛ la poan, to me wan zamesɛ baŋɛ burasa’ara n nari ti ba eŋɛ sɛla.

3-4. Pɔɣesa’ara wan ta’an nyɛ makesonɛ la bɛ tɔɣesɛ? (Bisɛ foote la.)

³ Baabule la tɔɣɛ la pɔɣesi zo’e zo’e n yuun nɔŋɛ Yehowa ge pu’usa en yele. (Bisɛ jw.org zaseŋɔ yele la zuo n de  “Women in the Bible—What Can We Learn From Them?”) (To Wan Ta’an Zamesɛ La Bem Baabule Poan Pɔɣesi La Zɛ’an?) Wuu zaseŋɔ wa zuo gulesegɔ la n yele se’em la, pɔɣesi wa yuun ‘tari la halesoma’ la ‘yelemɛŋɛrɛ sɛla woo poan.’ Leyɛ’ɛsa, to tari mabipɔɣesi zo’e zo’e n bĩ vo’osum poan ti pɔɣesa’ara wan ta’an tɔɣesa ba.

⁴ Pɔɣesa’ara wa, la wan ana soŋa ti ya tɔɣesa mabipɔɣesi sɛba n bĩ vo’osum poan bɔna ya tansuga la poan la. Bisɛ ban tari halesoma se’a la yan wan ta’an tɔɣesɛ ba se’em. To nyaa yeti to sɔsɛ la hala atã n nari ti mabipɔɣesi n bĩ vo’osum poan tara.

5. Sirege n mea wan soŋɛ pɔka la wani ti a ta’an bĩ vo’osum poan?

⁵ Kristakɔma san wan ta’an bĩ vo’osum poan, la nari ti ba siregera bamea. Pɔka san siregera amea, a wan tara bɔnsoŋa la Yehowa la nɛreba. (Yam. 4:6) Makerɛ, pɔka n nɔŋɛ Yehowa ni sirege la amea nana a saazuo Sɔ la n pa’alɛ zuodaana yele se’em ti la bɔna 1 Korint 11:3 la. Bilam la, Yehowa pa’alɛ sɛba n nari ti ba bisera tansugere la, la se’em n sɔi deodoma la bisa. c

6. Pɔɣesa’ara wan ta’an zamesɛ sirege n mea yele la wani Arebeka zɛ’an?

⁶ Geele Arebeka yele la bisɛ. A vom dabesa za’a, a yuun kɔ’ɛ a puti’irɛ la yɛm sore poan ge me yuun mina sansɛka n nari ti a eŋɛ sɛla. (Pin. 24:58; 27:​5-17) Ge la bala za’a, a yuun bo’ori la nɛreba gilema ge siregera amea. (Pin. 24:​17, 18, 65) Wuu Arebeka la, ho san sirege homea dɔla Yehowa n tigese yɛla se’em la, ho yidoma la mabiisi n boi ho tansugere la poan la wan tɔɣesa hɔ.

7. Pɔɣesa’ara wan eŋɛ la wani mina ba tɔregɔ beene wuu Ester la?

⁷ Kristakɔma za’a nari ti ba mina ba  tɔregɔ beene. Baabule la yeti ‘yɛm boi la sɛba n mi ba tɔregɔ beene la zɛ’an.’ (Mag. 11:2) Ester yuun tari la sakerɛ bɔ’ɔra Naayinɛ ge mina a tɔregɔ beene. Eŋa n yuun mi a tɔregɔ beene la zuo, eŋa n yuun ta dɛna pɔɣenaba la a yuun ka zɛ̃kɛ amea. A yuun kelese a suɔ Mordekai ka’aŋɔ la mɛ ge dekɛ tum tuuma. (Es. 2:​10, 20, 22) Ho san basɛ ti ba ka’am hɔ ge dekɛ ka’aŋɔ la tum tuuma, la wan pa’alɛ ti ho mi ho tɔregɔ beene.—Titus 2:​3-5.

8. Wuu 1 Timoti 2:​9, 10 n pa’alɛ se’em la, Mabipɔka san mina a tɔregɔ beene, la wan soŋɛ en la wani a lɔɣɔrɔ yɛa poan?

⁸ Ester yuun le eŋɛ la sɛla pa’alɛ ti a mi a tɔregɔ beene. A yuun ‘som mɛ ti la ka tara makerɛ’ ge a yuun ka pa’ali amea. (Es. 2:​7, 15) Pɔɣesa’ara wan ta’an tɔɣesa Ester makesonɛ wa la wani? Sore deyima ti ba wan ta’an eŋɛ bala boi la 1 Timoti 2:​9, 10. (Kaalɛ.) Tuuntuna Paul yuun ka’am pɔɣesi ti ba yɛɛra lɔɣɔrɔ ti la nara, tara sirege n mea la putɛsonɛ. Greek yelebɛ’a se’a ti ba dekɛ tum tuuma gulesegɔ wa poan la pa’alɛ ti, pɔka nari ti a yɛɛra a lɔɣɔrɔ ti gilema bɔna bim ge me ti’isa lan wan ana nɛreba se’em ba san nyɛ a lɔɣɔrɔ yɛa la. Bisɛ to puurɛ n pee se’em la to mabipɔɣesi sɛba n bĩ vo’osum poan n yɛɛri ba lɔɣɔrɔ ti la makera ma’a se’em la!

9. To wan ta’an zamesɛ la bem Abigail yele la poan?

⁹ Kristakɔma n de pɔɣesi n bĩ vo’osum poan za’a nari ti ba ti’isa nyɔkera yɛla. Ti’isɛ nyɔkɛ vuurɛ? La dela hon wan ta’an kɔ’ɛ ho puti’irɛ soŋa se’em yɛla poan, ho mina som la be’em n boi to’ore to’ore se’em ge ta’an loe sɛla n ani soŋa la. To bisɛ ya Abigail yele la. A sira yuun eŋɛ la sɛla n wan tari daaŋɔ paɛ a yizuo la za’a. Ge Abigail yuun eŋɛ la kalam yele la poan. Eŋa n yuun kɔ’ɛ a puti’irɛ soŋa se’em la n yuun faaɛ nɛreba zo’e zo’e vom basɛ. (1 Sa. 25:​14-23, 32-35) To san ti’isa nyɔkera yɛla, la le soŋera tɔ ti to mina la sansɛka n nari ti to tɔɣɛ, la sansɛka n nari ti to sina. La me wan soŋɛ tɔ ti to mina ton wan tara nɔŋerɛ se’em bɔ’ɔra nɛreba ge kan kɛ̃’ɛra ba yɛla poan.—1 Tes. 4:11.

10-11. Ho san zamesɛ mina kaalegɔ la gulesegɔ soŋa, la wan soŋɛ homea la nɛreba la wani?

¹⁰ Mabipɔɣesi nari ti ba tana yɛla ase’a ita. Puɣela n zamesɛ yelese’a a bunbilimen la wan kelum soŋɛ en a vom dabesa za’a. Geele yele aŋa wa bisɛ.

¹¹ Zamesɛ mina kaalegɔ la gulesegɔ. Tisi sise’esi poan, ho san dɛna pɔka la yele ka pakɛ ti ho mina kaalegɔ la gulesegɔ. Ge  Kristakɔma woo nari ti ba mina la kaalegɔ la gulesegɔ. d (1 Tim. 4:13) Bala la, da basɛ ti sɛla gu ho ti ho kan zamesɛ kaalegɔ la gulesegɔ soŋa soŋa. Ho wan nyɛ nyuurɔ la wani? Ho san mina kaalegɔ la gulesegɔ la ta’an soŋɛ hɔ ti ho nyɛ tuunɛ. Ho me ta’an tara Naayinɛ Yelesum la pa’ala nɛreba soŋa. Sɛla n gani za’a dela, hon kaali ge ti’isa taɣesa Naayinɛ Yelesum la wan basɛ ti ho ana du’a du’a la en.—Yos. 1:8; 1 Tim. 4:15.

12. Magaha 31:26 wan soŋɛ ho la wani ti ho mina sɔsega?

¹² Mina sɔsega. La yele pakɛ mɛ ti Kristakɔma mina sɔsega soŋa soŋa. Bala n sɔi ti Yames ka’am to yeti: ‘Nɛra woo nari ti a kɛlesa yetɔɣum kalam ge da zɛɛra yetɔɣum ge me da ita sunsɔa kalam.’ (Yam. 1:19) Ho san ma’ɛ homea kɛlesa nɛra n tɔɣeri, la pa’alɛ ti ho tari la giile bɔ’ɔra en. (1 Pe. 3:8) Ho san bisɛ ti ho ka bɔkɛ nɛra la n tɔɣeri sɛla la, malum soke en. Nyaa ti’isɛ ge nyaa tɔɣɛ. (Mag. 15:28) Soke homea yeti: ‘Mam n yeti n yele sɛla wa dela yelemɛŋɛrɛ ge kpɛmesa giila? Gilema boi mam n yeti n yele sɛla wa poan?’ Tɔɣesa mabipɔɣesi sɛba n kumesɛ ge mina sɔsega. (Kaalɛ Magaha 31:26.) Ni kɛlesa ban tɔɣeri se’em la. Ho san mina sɔsega, hon la nɛreba tiŋasuka wan ana soŋa paa.

13. Ho wan eŋɛ la wani ta’an mina ban biseri yire se’em? (Bisɛ foote la.)

¹³ Mina ban biseri yire se’em. Tisi zo’e zo’e poan pɔɣesi n biseri yire. Ho ma bii ho keema ta’an soŋɛ hɔ ti ho mina yɛla ase’a itigɔ. Mabipɔka ayima yu’urɛ n de Cindy yeti: “Yele ayima ti mam ma pa’alɛ mam dela tuunkpe’eŋo tari nyuurɔ mɛ. Eŋa n pa’alɛ mam ti n mina duka, bɛɣesegɔ, tana pɛ’ɛra lɔɣɔrɔ ge mina mam wan dita da’a se’em la, soŋɛ mam ti n ta’an bisa n mea ge pu’usa Yehowa. Mam ma yuun le pa’alɛ mam la ban to’oseri saama soŋa se’em. Wana wa soŋɛ mam ti n mina mabiisi zo’e zo’e n tari halesoma ti n wan ta’an tɔɣesa ba.” (Mag. 31:​15, 21, 22) Pɔka n tuni tuunkpe’eŋo, tɔ’ɔsa saama soŋa ge me mina ban biseri yire se’em soŋeri la a deodoma la tansugere la.—Mag. 31:​13, 17, 27; Tm. 16:15.

14. Hon zamesɛ la bem Crystal yele la poan ge la nari ti ho puti’irɛ bɔna la bem poan?

¹⁴ Tiregɛ bisa homea. Kristakɔma n bĩ vo’osum poan za’a nari ti ba bisɛ ban wan eŋɛ se’em ta’an bisa bamea. (2 Tes. 3:​7, 8) Mabipɔka ayima yu’urɛ n de Crystal yeti: “Mam dɔɣereba n yuun  pa’alɛ mam n nari ti n keŋɛ high school ta zamesɛ sɛla lan wan eŋɛ se’em ti n ta’an nyɛ nu’o tuunɛ. Mam sɔ yuun yeti n zamesɛ ligeri yɛla, wana wa yuun soŋɛ mam mɛ paa.” Ho san zamesɛ nu’o tuunɛ, la yele kelum pakɛ mɛ ti ho mina hon wan zãla ligeri se’em. (Mag. 31:​16, 18) Basɛ ti ho puti’irɛ bɔna vo’osum yɛla poan. Da dita sama yoo yoo ge tuɣum basɛ ti hon tari sɛla la seke ho.—1 Tim. 6:8.

15-16. Mabipɔɣesi n nan ka ele soŋeri nɛreba la wani? (Mark 10:​29, 30)

¹⁵ Ho san tara halesoma ge mina yɛla ase’a itigɔ, la wan ta’an soŋɛ hɔ beere sa’am. To bisɛ yɛla ase’a ti ho wan ta’an eŋɛ.

¹⁶ Ho ta’an nan dɛna mabipɔka n nan ka ele. Wuu Yezu n yuun yele se’em la, pɔɣesi basɛba loe ti ba kan ele hali ba tiŋa nɛreba san tɔɣera giisa wana. (Mt. 19:​10-12) Yɛla ase’a me ta’an basɛ ti pɔɣesa’arɛ nan kan ele. Tara suure lua ti Yehowa la Yezu ka zeeni Kristakɔma sɛba n nan ka ele la. Tingole wa za’a poan, mabipɔɣesi sɛba n nan ka ele la soŋeri la tansuga zo’e zo’e. Ban tari nɔŋerɛ ge ti’isa nɛreba yele se’em la basɛ ti ba bĩ la vo’osum poan ge me soŋera nɛreba zo’e zo’e.—Kaalɛ Mark 10:​29, 30; 1 Tim. 5:2.

17. Pɔɣesa’arɛ wan maasum nananawa la wani ta’an ta tum tɛm woo na’am tuuma la?

¹⁷ Ho wan ta’an tum tɛm woo na’am tuuma la. Mabipɔɣesi zo’e zo’e n kɔ’ɔn soŋera tingole wa za’a na’am tuuma la. (Ym. 68:11) Hon me wan ta’an maasum nananawa tum tɛm woo na’am tuuma la? Ho wan ta’an dɛna sore ŋmɛ’adaana, soŋera mɛa tuuma bii ho ta tuna Betel. Yele Yehowa hon boti ho eŋɛ sɛla. Sɔsɛ la mabisɛba n puɣum tuna tuunɛ wa ti ba soŋɛ hɔ ti ho baŋɛ hon nari ti ho eŋɛ sɛla ta’an tum dɛ. Nyaa ti‘isɛ bisɛ hon wan eŋɛ se’em ta’an tum tuunɛ wa. Ho san nyaŋɛ tum tɛm woo na’am tuuma la, ho wan nyɛ yɔ’ɔ zo’e zo’e tum Yehowa pu’usegɔ poan.

18. Beni n sɔi ti la nara ti pɔɣesa’arɛ bisɛ soŋa ge nyaa loe se’em ti a wan ele? (Bisɛ foote la.)

¹⁸ Ho ta’an ele. Halese’a la yelese’a n nari ti ho mina ba itigɔ ti to puɣum sɔsɛ ba yele la wan soŋɛ hɔ ti ho dɛna pɔɣɔsonkɔ. Yelemɛŋɛrɛ, ho san ti’isa ti ho ele,  ho nari ti ho bisɛ soŋa ge ta’an loe burasɛka ti ho bɔta. Yele wa dela ninmɔ’ɔrɛ ti la nara ti ho kɔ’ɛ ho puti’irɛ soŋa. Tɛ̃ra ti ho san ele, buraa la n nyaa de zuodaana deo la poan. (Arom 7:2; Ep. 5:​23, 33) Bala soke homea yeti: ‘A dela mabia n bĩ vo’osum poan? A basɛ ti vo’osum poan yɛla deŋɛ nɛŋa a vom poan? A ni kɔ’ɛ a puti’irɛ soŋa yɛla poan? A ni sakɛ a tuure? A bo’ori pɔɣesi gilema? A wan ta’an soŋɛ hɔ vo’osum poan, innaanɛ poan la suure poan yɛla? A tuni a tansugere tuuma soŋa? Makerɛ, tansugere la poan a tari la bem tuunɛ ge a tuni dɛ la wani?’ (Lu. 16:10; 1 Tim. 5:8) Yelemɛŋɛrɛ, ho san ɛɛra siresonkɔ la nari ti ho me maasum dɛna pɔɣɔsonkɔ.

19. Beni n sɔi ti pɔka n de ‘soŋera’ la dɛna yɔ’ɔkãtɛ?

¹⁹ Baabule la yeti pɔɣɔsonkɔ dela a ‘soŋera’ a sira ge me dɛna a ‘luɣerɛ kpɛ’a.’ (Pin. 2:18) Bala pa’alɛ ti pɔɣesi ka tari vuurɛ yoi? Aayi! La dela yɔ’ɔkãtɛ bɔ’ɔra pɔka ti a dɛna soŋera. Hali Baabule la yeti Yehowa dela ‘soŋera.’ (Ym. 54:4; Heb. 13:6) Pɔka san soŋɛ a sira ti a kɔ’ɛ a puti’irɛ deo la poan, la sirum pa’alɛ ti a dela soŋera. Eŋa me n nɔŋɛ Yehowa la zuo a ni eŋɛ la yelese’a n wan basɛ ti nɛreba bɔ’ɔra a sira la gilema. (Mag. 31:​11, 12; 1 Tim. 3:11) Ho san wan ta’an maasum ta dɛna pɔɣɔsonkɔ la dela ho nɔŋɛ Yehowa paa ge me soŋera ho deodoma la mabiisi n boi tansugere la poan la.

20. Ma wan ta’an eŋɛ la bem?

²⁰ Ho wan ta’an dɛna ma. Ho san ele, hon la ho sira la ta’an pɔsɛ dɔɣera. (Ym. 127:3) Bala la, la dela ho ti’isɛ de yele soŋa. Halese’a la yelese’a n nari ti ho tana ita ti to puɣum sɔsɛ ba yɛla zaseŋɔ wa poan la wan soŋɛ hɔ ti ho dɛna pɔɣɔsonkɔ la masoŋa. Ho san tara nɔŋerɛ, ita som ge me di’isa suure, la wan basɛ ti suma’asum bɔna yire la poan. Wana wan basɛ ti ho kɔma la bɔna fai ge nyɛta nɛŋa tɔlega.—Mag. 24:3.

21. La ani to la wani la ton tari pɔɣesa’ara la ge beni n sɔi? (Bisɛ gɔŋɔ wa nɛŋa foote.)

²¹ Pɔɣesa’ara wa, yamam n iti yelese’a bɔ’ɔra Yehowa la mabiisi la basɛ ti to nɔŋɛ ya mɛ paa. (Heb. 6:10) Ya tiregeri mɛ tara halesoma, kumesa yamea yɛla ase’a poan ti la soŋera yamam la nɛreba ge me maasena yamea gura beere sa’am. Ya sirum tari la tuulum paa Yehowa tigere la poan!