Daarɛ deyima, mabipɔka ayima n ze’ele New Zealand yuun bisɛ la vidiyo jw.org poan n tɔɣeri Yehowa n iti pa’ala ti a tari giile se’em. (Isa. 63:​7-9) A yuun kɔ’ɛ a puti’irɛ ti a soŋera nɛreba ti la pa’alɛ ti a dekɛ eŋa n bisɛ sɛla vidiyo la poan la tuna tuuma. De daarɛ nɔɔ ti a keŋɛ da’a ti a ta da lɔɣɔrɔ ge nyɛ pɔka n zi zusera ti a yele en yeti a boti a da la dia bo en. Ti pɔka la sakɛ. Mabipɔka la n tari dia la wa’ana bo en la, a dekɛ la gɔnpika la zuo n de Namesegɔ Wan Malum Tole? di sɛɛra bo en.

Pɔka la yuun pɔsɛ kaasa mɛ. A yuun yeti eŋa dɔɣereba dela Yehowa Sɛɛradoma ge yuuma zo’e zo’e n tole ti a basɛ yelemɛŋɛrɛ la. La ka yue ti a zusɛ Yehowa ti a soŋɛ en ti a le lebe a zɛ’an. Mabipɔka la yuun bo en la Baabule ge maasum ti a pɔsɛ zamesa en. a

Wuu Yehowa la, to wan ta’an tara giile bɔ’ɔra to yidoma, to mabiisi n boi tansugere la poan la nɛra woo. To san nyɛ yɔ’ɔ woo to mɔɔlɛ yelesoma la bo nɛreba, ti la pa’alɛ ti to tari giile.