1-2. Dɔɣereba nari ti ba eŋɛ la bem ba kɔma san soke ba Baabule, la Naayinɛ yɛla?

 NƐREBA zo’e zo’e mi ti kɔma uka daɣɛ naana. Ho san dɛna dɔɣera n tari kɔma, to pɛ̃ɣɛ hɔ la hon tiregeri ti ho soŋɛ ho kɔma ti ba sakerɛ kpe’em la. (Tɛɛ. 6:​6, 7) Ho bia san zɔ’ɔra, a ta’an soke ti a baŋɛ sɛla n sɔi ti Baabule la pa’alɛ ti to da ita yɛla ase’a.

² Ho bia san pɔsɛ sɔkera ho soke ana wa, la ta’an bo ho putɛyiila. La ta’an basɛ ti ho ti’isa ti ho bia la sakerɛ ka le kpe’em. Ge yelemɛŋɛrɛ la dela, kɔma san zɔ’ɔra, la nari ti ba sɔkera yɛla ti ba sakerɛ kpe’em. (1 Ko. 13:11) Bala la, da basɛ ti dabeem tara hɔ. Ho bia san soke ho sɛla, kɔ’ɔn dekɛ yɔ’ɔ la soŋɛ en ti a ti’isa taɣesa Yehowa, la Baabule yɛla ti a sakerɛ kpe’em.

3. To wan sɔsɛ la bem zaseŋɔ wa poan?

³ Zaseŋɔ wa poan, to wan sɔsɛ dɔɣereba n wan soŋɛ ba kɔma se’em ti ba (1) tara sakerɛ n kpe’em Naayinɛ, la Baabule la poan, (2) nana Naayinɛ Lɔɔ, ge (3) zamesɛ ban wan ta’an tɔɣera ba sakerɛ yɛla bɔ’ɔra nɛreba se’em. To wan le sɔsɛ la yele n pakɛ se’em ti kɔma sɔkera yɛla. Leyɛ’ɛsa, to me wan sɔsɛ yɛla ase’a ti dɔɣereba wan naɛ la ba kɔma ita ti la bo ba yɔ’ɔ ti ba ta’an sɔsera to sakerɛ yɛla.

SOŊƐ HO KƆMA TI BA TARA SAKERƐ BƆ’ƆRA NAAYINƐ LA BAABULE LA

4. Kɔma ni sɔkera la bem yɛla ge beni n sɔi?

⁴ Ho san tara sakerɛ, la ka pa’alɛ ti ho kɔma wan tara sakerɛ. Ba ka dɔɣɛ tɔ ti to kɔ’ɔn tara sakerɛ bɔ’ɔra Yehowa. Bala mea nɔɔ ti to kɔma me ana. Bala la, ho kɔma ta’an pɔsɛ sɔkera ho yɛla n de wuu: ‘Mam wan eŋɛ la wani baŋɛ ti Naayinɛ boi? Mam wan ta’an sakɛ bo Baabule la n yele  sɛla la?’ Baabule la kpemese to giila ti ‘to ti’isa bɔkera yɛla’ ge ni “magahɛ ya de behɛ dene ane se’em.” (Arom 12:1; 1 Tes. 5:21) Ho wan eŋɛ la wani ta’an soŋɛ ho kɔma ti ba tara sakerɛ n kpe’em?

5. Dɔɣereba wan eŋɛ la wani soŋɛ ba kɔma ti ba tara sakerɛ Baabule la poan? (Arom 12:2)

⁵ Kpemese ho kɔma giila ti ba viisɛ baŋɛ ti Baabule la dela yelemɛŋɛrɛ. (Kaalɛ Arom 12:2.) Ho kɔma san soke ho sɛla, dekɛ yɔ’ɔ la pa’alɛ ba, ban wan ta’an dekɛ Watch Tower Publications Index, la Research Guide for Jehovah’s Witnesses la eŋɛ viisegɔ se’em. Ho ta’an soŋɛ ho kɔma ti ba viisɛ to tansugere gɔnɔ bii bisɛ vidiyodoma n basɛ ti la niɛ peelumi ti Baabule la daɣɛ nɛresaaleba gɔŋɔ ge la dela “Yenɛ yelehom.” (1 Tes. 2:13) Makerɛ, ba ta’an eŋɛ viisegɔ to gɔnɔ la poan baŋɛ diimi Nineveh tiŋa la n boi Asiria la yele. Yia la, gɔnmi’ileba basɛba yuun yeti Nineveh daɣɛ tiŋa n yuun sirum boi. Ge yuun 1850 bɔba, ba yuun tũ la tiŋa ta nyɛ diimi Nineveh tiŋa ti la pa’alɛ ti Baabule la n yele se’em la dela yelemɛŋɛrɛ. (Zep. 2:​13-15) Nineveh tiŋa la n yuun sa’am se’em la dela Baabule pu’ulumbiŋere n yuun tum tuuma. Ho kɔma san bɔta ti ba baŋɛ yɛla pa’asɛ, ba ta’an bisɛ zaseŋɔ yele la zuo n de “Did You Know?” (Hon Mi?) n boi November 2021 The Watchtower la poan. Kpemese ho kɔma giila ti ba dekɛ to gɔnɔ la n yele sɛla la makɛ la gɔnse’a ti nɛreba sakɛ bo la. Bala wan soŋɛ ba ti ba sakɛ ti Baabule la n yele sɛla la dela yelemɛŋɛrɛ.

6. Dɔɣereba wan eŋɛ la wani soŋɛ ba kɔma ti ba baŋɛ ti Baabule la n yele sɛla la dela yelemɛŋɛrɛ? Bo makerɛ. (Bisɛ foote la.)

⁶ Soŋɛ ho kɔma ti ba baŋɛ ti Baabule la n yele sɛla la dela yelemɛŋɛrɛ. Dɔɣereba tari la yɔ’ɔ zo’e zo’e ti ba pa’alɛ ba kɔma ti ba tara sakerɛ bɔ’ɔra Naayinɛ, la Baabule la. Ho ta’an tari kɔma la keŋɛ Yehowa Sɛɛradoma tigere yile bii museum. Makerɛ, ho ta’an dekɛ lɔkɔ bii yelese’ere n eŋɛ kurum pa’alɛ ho kɔma ti ba baŋɛ ti Baabule la n yele sɛla la dela yelemɛŋɛrɛ. Ho ta’an tɔɣɛ Moab Kugere la yele bo ho kɔma la. Kugere wa dela yuun 3,000 ti ba gulesɛ Yehowa yu’urɛ eŋɛ ku zuo. Moab Kugere la boi la France Museum la poan. Moab Kugere wa taaba me boi la “The Bible and the Divine Name” zɛ’an la n boi Yehowa Sɛɛradoma Tigere Zuo n boi Warwick, New York la. Moab Kugere la basɛ ti la niɛ peelumi ti Moab Naba Mesa yuun eŋɛ la kpenkpasi la Israeldoma. Yele wa kɔ’ɔn makɛ mɛ la Baabule la n yele sɛla la. (2 Na. 3:​4, 5) Ho kɔma san nyɛ yɛla n  pa’alɛ ti Baabule la n yele sɛla la sirum dela yelemɛŋɛrɛ, ba sakerɛ wan malum kpe’em.—Dekɛ makɛ 2 Yelebiŋ’a 9:6.

7-8. (a) To wan ta’an zamesɛ la bem la naaŋɔ lɔɣɔrɔ n ani soŋa se’em la? Bo makerɛ. (Bisɛ foote la.) (b) Soke deni n wan ta’an soŋɛ ho bia ti a sakɛ ti Naaŋɔdaana boi mɛ?

⁷ Kpemese ho kɔma giila ti ba ti’isa Yehowa naaŋɔ lɔɣɔrɔ yɛla. Hon la ho kɔma san bɔna va’amen bii gaadin poan, soŋɛ ba ti ba nyɛ naaŋɔ lɔɣɔrɔ naanɛ n wɔ̃ni taaba se’em. Soŋɛ ba ti ba baŋɛ ti se’emdaana n naam lɔɣɔrɔ wa tari la yɛm. Makerɛ, naaŋɔ lɔɣɔrɔ zo’e zo’e naanɛ ani la kilega. Naaŋɔ lɔɣɔrɔ zamesegɔdoma zamesɛ lɔɣe-ana wa yele mɛ. Naaŋɔ lɔɣɔrɔ zamesegɔdaana ayima yu’urɛ n de Nicola Fameli yeti ho san kɛkɛ naaŋɔ lɔkɔ n vileŋe ana kilega se’em la, ho wan nyɛ ti lɔkɔ la n vileŋe sugumnɔɔrɛ se’em la kãlɛ dela buyina. Ba yi’iri de la Fibonacci kãlɛ. Naaŋɔ lɔɣɔrɔ zo’e zo’e vileŋe mɛ ana kilega, maɣesɛ wuu ŋmarebɛa tuɣurɔ, kanzi’iŋa, tiisi vuurɔ, la sunflower puo. a

⁸ Ho kɔma san zamesɛ naaŋɔ lɔɣɔrɔ sukuu poan, ba wan baŋɛ ti naaŋɔ lɔɣɔrɔ ase’a boi mɛ ti ba naanɛ bɔna to’ore to’ore. Makerɛ, tiisi zo’e zo’e tari la naanɛ n wɔ̃ni taaba. Tia tile ni zo’e ta yaɣum la yila, ti yila la me tara puuro n wɔni ba poan. Ba yi’iri bala Solemiine poan la fractal. Naaŋɔ lɔɣɔrɔ ase’a me tari fractal naanɛ la mɛ. Ani n naam naaŋɔ lɔɣɔrɔ ti ba som bala? Ho kɔma san ti’isa taɣesa naaŋɔ lɔɣɔrɔ n de nyalema se’em la, la wan basɛ ti ba sakerɛ kpe’em. (Heb. 3:4) Ho kɔma san zɔ’ɔra, la nari ti ho soŋɛ ba ti ba baŋɛ sɛla n sɔi ti la nara ti ba dɔla Yehowa lɔɔ. Ho san bɔta ti ho soŋɛ ba, soke ba yeti, “Naayinɛ san naam tɔ, hon ka ti’isɛ ti a mi sɛla n wan soŋɛ tɔ ti to tara pupeelum?” Ho nyaa ta’an basɛ ti ba bɔkɛ ti Naayinɛ dekɛ Baabule la bo to mɛ ti la soŋɛ tɔ ti to tara pupeelum.

SOŊƐ HO KƆMA TI BA BAŊƐ SƐLA N SƆI TI LA NARA TI BA DƆLA BAABULE PA’ALEGƆ

9. Bem n wan ta’an basɛ ti ho kɔma soke ho Baabule sareŋɔ pa’alegɔ ase’a yɛla?

⁹ Ho kɔma san soke ho sɛla n sɔi ti Baabule la yeti yɛla ase’a dela be’em, tiregɛ baŋɛ sɛla n sɔi ti ba soke bala. Ba ka sakɛ la Baabule sareŋɔ pa’alegɔ, bii ba ka mi la bamam n wan tɔɣɛ de yele se’em bo nɛreba? Ho nyaa ta’an soŋɛ ba ti ba bɔkɛ sɛla n sɔi ti la nara ti to nana Yehowa pa’alegɔ. Ho ta’an naɛ la ba ti ya zamesɛ yelese’a  n boi Tara Vom Somɔ Daarewoo! gɔŋɔ la poan. b

10. Ho wan eŋɛ la wani soŋɛ ho kɔma ti ba ti’isa bamam n wan eŋɛ se’em tara bɔnsoŋa la Yehowa?

¹⁰ Soŋɛ ho kɔma ti ba tara bɔnsoŋa la Yehowa. Sɔsɛ ya sokese’a, la maɣesa la n boi Tara Vom Somɔ Daarewoo! gɔŋɔ la poan. Bala wan soŋɛ hɔ ti ho bɔkɛ lan ani ba se’em. (Mag. 20:5) Makerɛ, zaseŋɔ 8 dekɛ Yehowa makɛ mɛ la zɔ n fabeli to yele ge bɔ’ɔra to pa’alegɔ ti la soŋera ge tɛ’ɛla tɔ. Ya san sɔsɛ 1 Yon 5:3 ba’asɛ, ho ta’an soke ba yeti, “Ton mi ti Yehowa dela to zɔsonkɔ la zuo, a san yele to ti to eŋɛ sɛla, to nari ti to geele de la wani?” Daanse’ere ho ta’an ti’isa ti sokere wa lebesego ka tɔi ge la wan soŋɛ ho kɔma la ti ba bɔkɛ ti Yehowa n nɔŋɛ to la n sɔi ti a bo to a lɔɔ la.—Isa. 48:​17, 18.

11. Ho wan eŋɛ la wani ta’an soŋɛ ho kɔma ti ba bɔkɛ ti la ani soŋa ti ba tara Baabule naresum yɛla tuna tuuma? (Magaha 2:​10, 11)

¹¹ Pa’alɛ ho kɔma ti ba baŋɛ ti to san tara Baabule naresum yɛla tuna tuuma, la soŋeri to mɛ. Ya san kaala Baabule la bii ya iti la daily text, pa’alɛ ho kɔma Baabule naresum yɛla n soŋeri ya se’em. Makerɛ, ho ta’an soŋɛ ho kɔma ti ba bɔkɛ ti la ani soŋa ti to tuna soŋa soŋa ge me tɔɣera yelemɛŋɛrɛ. (Heb. 13:18) Ba san tara Baabule naresum yɛla tuna tuuma, ba wan tara imma’asum la pupeelum. (Mag. 14:​29, 30) Ho kɔma san bɔkɛ ti la ani soŋa ti ba dɔla Baabule pa’alegɔ, la wan soŋɛ ba ti ba dɔla dɛ.—Kaalɛ Magaha 2:​10, 11.

12. Steve ni eŋɛ la wani soŋɛ a bia ti a baŋɛ ti Baabule pa’alegɔ tari nyuurɔ?

¹² Steve la a pɔɣa tari la ba bia ti a yu’urɛ dɛna Ethan. Steve tɔɣɛ pa’alɛ eŋa la a pɔɣa n ni soŋɛ ba bia la se’em ti a baŋɛ ti Yehowa n nɔŋɛ to la n sɔi ti a bɔ’ɔra to lɔɔ. Steve yeti: “To ta’an ni soke to bia la yeti, ‘Beni n sɔi ti Yehowa bɔta ti to dɔla a nɔya? A nɔya la pa’alɛ ti a nɔŋɛ to la wani? To san ka doose a pa’alegɔ, bem n wan paɛ tɔ?’” Soke ana ni soŋɛ Ethan mɛ ti a sakɛ ti Yehowa n boti to ita sɛla la ani soŋa mɛ. Steve le yeti: “To puti’irɛ dela to soŋɛ Ethan ti a baŋɛ ti yɛmsebo n boi Baabule la poan la gani asaala yɛm.”

13. Dɔɣereba wan ta’an soŋɛ ba kɔma la wani ti ba tara Baabule naresum yɛla tuna tuuma? Bo makerɛ.

¹³ Soŋɛ ho kɔma ti ba tara Baabule naresum yɛla tuna tuuma. Ho kɔma tikiya ta’an bo ba gɔŋɔ ti la nara ti ba kaalɛ. Ho ta’an dekɛ yɔ’ɔ wa soŋɛ ho kɔma ti ba bɔkɛ Baabule naresum yɛla. Gɔŋɔ la ta’an tɔɣera nɛreba n tuni yalumtuuma bii nɛreba n tari sunsɔa yele. Gɔŋɔ la ta’an basɛ ti la ana wuu nɛreba san tɔɣesa nɛrebana, la daɣɛ be’em. Soke ho kɔma la yeti, Yehowa geele nɛreba n tari halɛ ana taaba la wani? (Mag. 22:​24, 25; 1 Ko. 15:33; Flp. 4:8) Wana wa wan soŋɛ ba ti ba baŋɛ ti yɛm boi bim ti to nana Yehowa. Ba tikiya bii ba sukuu kɔma san soke ba yɛla gɔŋɔ la poan, ba ta’an di sɛɛra bo ba.

PA’ALƐ HO KƆMA TI BA TA’AN DITA SƐƐRA

14. Bem yele n wan ta’an kpe’em bo bunbilipaalesi ti ba tɔɣɛ pa’alɛ nɛreba ge bem zuo?

¹⁴ La ta’an kpe’em bo bunbilipaalesi ti ba tɔɣɛ ba sakerɛ yɛla bo nɛreba. Dabeem ta’an tara ba ti ba tɔɣɛ pa’alɛ sɛla n sɔi ti bamam ka sakɛ bo lebege lebege pa’alegɔ. Beni n sɔi? Ba tikiyadoma pa’alɛ ti la ana wuu lebege lebege pa’alegɔ sirum dela  yelemɛŋɛrɛ. Ho san dɛna dɔɣera, ho wan eŋɛ la wani soŋɛ ho kɔma ti ba tara sakerɛ ti bamam n sakɛ bo yelese’a la sirum dela yelemɛŋɛrɛ?

15. Bem n wan ta’an soŋɛ Kristabia n de bunbilipaalega ti a tara sakerɛ ti eŋa n sakɛ bo yelese’a la sirum dela yelemɛŋɛrɛ?

¹⁵ Soŋɛ ho kɔma ti ba tara sakerɛ ti bamam n sakɛ bo yelese’a la sirum dela yelemɛŋɛrɛ. La ka nari ti vi tara ho kɔma, la bamam n sakɛ ti Naaŋɔdaana boi la. (2 Tim. 1:8) Bem zuo? Naaŋɔ lɔɣɔrɔ zamesegɔdoma zo’e zo’e bɔkɛ ti vom ka di’e me na bɔna. Ba nyɛ la yɛla n pa’alɛ ti Naaŋɔdaana n naam lɔɣɔrɔ. Bala zuo la, ba ka sakɛ bo lebege lebege pa’alegɔ la ti bamam mea pa’ala nɛreba sukuu poan la. Sɛla n wan ta’an soŋɛ ho kɔma ti ba tara sakerɛ la sukpe’ene dela ba viisɛ baŋɛ yelese’a n soŋɛ mabiisi basɛba ti ba sakɛ ti Naaŋɔdaana boi. c

16. Dɔɣereba wan eŋɛ la wani ta’an soŋɛ ba kɔma ti ba ta’an pa’alɛ ti Naaŋɔdaana boi? (1 Peter 3:​15, 16) (Bisɛ foote la.)

¹⁶ Soŋɛ ho kɔma ti ba ta’an pa’alɛ sɛla n sɔi ti ba sakɛ ti Naaŋɔdaana boi. (Kaalɛ 1 Peter 3:​15, 16.) Hon la ho kɔma ta’an sɔsɛ zaseŋɔ yɛla n boi jw.org n tɔɣeri naaŋɔ, la lebege lebege yɛla. Ho kɔma la ta’an loe pa’alegɔ seko n boi bim ti bamam ti’isa ti la wan soŋɛ nɛreba ti ba sakɛ ti Naaŋɔdaana boi. Soŋɛ ho kɔma ti ba baŋɛ bamam n wan ta’an tɔɣɛ se’em. Basɛ ti ba baŋɛ ti la ka nari ti ba ŋmɛ̃’ɛra nɔkpe’ene la ba sukuu kɔma. Soŋɛ ba ti ba baŋɛ ti nɛra san bɔta ti a sɔsɛ lebege lebege yɛla, ba pa’alɛ en yɛla n ani naana ge ti yɛm bɔna bim. Makerɛ, ba sukuu kɔma ta’an yeti: “Mam ka tabelɛ nyɛ Naayinɛ. Mam sakɛ bo la yelese’a ti mam nini nyɛta ma’a.” Mabia n de bunbilipaalega ta’an lebese yeti: “Makɛ bisɛ ti ho keŋɛ la goo ti nɛra bii yire ka lɛm bim, ti ho ta nyɛ lua ti ba tũ soŋa. Hon wan ti’isa la bem? Ho wan ti’isa ti nɛra n tũ lua la. Bala mea nɔɔ ti to sakɛ ti Naaŋɔdaana n naam tingɔŋɔ wa la sɛla woo n boi.”

17. Dɔɣereba wan eŋɛ la wani ta’an soŋɛ ba kɔma ti ba ni dekɛ yɔ’ɔ seko ti ba nyɛ tɔɣɛ Naayinɛ yɛla bo nɛreba? Bo makerɛ.

 ¹⁷ Soŋɛ ho kɔma ti ba dekɛ yɔ’ɔ seko ti ba nyɛ pa’alɛ nɛreba Baabule yɛla. (Arom 10:10) Ho ta’an dekɛ ho kɔma n tiregeri ti ba tɔɣɛ ba sakerɛ yɛla bo nɛreba la makɛ la nɛra n zameseri kɔ̃legɔ ŋmɛ̃’a. Pɔsega la, se’em n zameseri la ni pɔsɛ ŋmɛ̃’ɛra la yuunse’a n ka tɔi. Pooren, la nyaa ni dɛna la naana bɔ’ɔra en ti a ŋmɛ̃’ɛra kɔ̃legɔ la soŋa. Bala mea, mabia n de bunbilipaalega san tɔɣera a sakerɛ yɛla bɔ’ɔra nɛreba, a ta’an pɔsɛ tɔɣera yelese’a n ka kpe’em. Makerɛ, a ta’an soke a sukuu bia yeti: “Hon mi ti naaŋɔ lɔɣɔrɔ zamesegɔdoma ni bisɛ la naaŋɔ lɔɣɔrɔ n ani se’em dekɛ maalɛ lɔɣɔrɔ? Basɛ ti n pa’alɛ ho vidiyo wa.” A san ŋmɛ vidiyo ayima n boi Ba Naam Ku Mɛ? bɔberɛ la ba’asɛ, a ta’an nyaa yeti: “Nɛreba san pɛ̃ɣera naaŋɔ lɔɣɔrɔ zamesegɔdoma n nyaŋɛ maalɛ sɛla la, hon ka ti’isɛ ti la nari ti to pɛ̃ɣɛ se’emdaana n pɔsɛ naam naaŋɔ lɔɣɔrɔ wa?” Daanse’ere soke ana ta’an soŋɛ a sukuu bia la ti a bɔta ti a zamesɛ Yehowa yɛla.

KƆ’ƆN SOŊERA HO KƆMA TI BA SAKERƐ KPE’EM

18. Dɔɣereba wan eŋɛ la wani kɔ’ɔn soŋera ba kɔma ti ba sakerɛ kpe’em Yehowa poan?

¹⁸ Zina beere wa, nɛreba zo’e zo’e ka tari sakerɛ bɔ’ɔra Yehowa. (2 Pe. 3:3) Bala la, dɔɣereba, ya san pa’ala ya kɔma, ya basɛ ti ba tara sakerɛ bɔ’ɔra Naayinɛ Yelesum la ge dɔla a pa’alegɔ. Hon la ho kɔma ni sɔsera Yehowa naaŋɔ lɔɣɔrɔ yɛla. Bala wan soŋɛ ba ti ba bɔkera yɛla soŋa ge basɛ ti ba sakerɛ kpe’em Yehowa poan. Soŋɛ ba ti ba bɔkɛ Baabule yetɔɣebiŋ’a se’a n puɣum tum tuuma. Sɛla n gani bala dela, naɛ la ba zusa ge me zusa bɔ’ɔra ba. Ho san ita bala, ho wan ta’an tara suure lua ti Yehowa wan kã bo ho la hon tiregeri ti ho soŋɛ ho kɔma ti ba sakerɛ kpe’em la.—2 Yel. 15:7.