Hon nyaŋɛ kaalɛ yuunɛ wa Pigera Zontua zamesegɔ yɛla la? La san dɛna bala, bisɛ nyaa ho wan ta’an lebese soke ana wa:

Yehowa eŋɛ la bem makesonɛ la eŋa n iti pɔɣesi se’em la?

Yehowa ka gãseri, a iti buraasi la pɔɣesi la buyina. Naayinɛ keleseri pɔɣesi mɛ, mina lan ani ba se’em ge me fabela ba yele. A tari sakerɛ ti ba wan ta’an tum a tuuma soŋa.—w24.01, gɔn. 15-16.

Epesus 5:7 yeti: “Da tare ya yelese’ere te ya eŋɛ la nɛre bama taaba.” To wan ta’an dekɛ pa’alegɔ wa tum tuuma la wani?

Tuntuna Paul yuun kaɣeri tɔ ti to da nyɔɣɛ zɔtɔ la nɛresɛba n wan basɛ ti la kpe’em bo to ti to nana Naayinɛ. To san naɛ la ba sɔsera social media poan, la pa’alɛ ti to nyɔɣɛ ba la zɔtɔ.—w24.03, gɔn. 22-23.

Pumpɔreŋɔ yele ani ti la nara ti to zaɣesɛ?

La nari to to bisɛ tomea soŋa la to zɔdoma n tɔɣeri yelese’a n daɣɛ yelemɛŋɛrɛ, emails ti to ka mina ban ze’ele zɛ’an, la a yelege n meadoma yɛla.—w24.04, gɔn. 12.

Bem ti to mina ge bem ti to ka mina la Yehowa n wan gãkɛ Naba Solomon, la nɛresɛba n yuun ki Sodom la Gomora la Kokemɔ sa’aŋɔ la poan la?

To ka mi nyaa Yehowa gãkɛ ba mɛ ti ba kan le isige. Ge ton mi sɛla dela, Yehowa n mi sɛla woo ge me tara nimbɔzore.—w24.05, gɔn. 3-4.

Naayinɛ n de “Taŋa la” basɛ ti to tara suure lua la bem poan? (Tɛɛ. 32:4)

Yehowa dela to suka zɛ’an. A dela yelemɛŋɛrɛdaana, n wan basɛ ti a pu’ulumbiŋ’a la za’a tum tuuma. A ka teeri, a hala, la a puti’irɛ n boti se’em ka teeri.—w24.06, gɔn. 26-28.

Ho san tee tansugere, bem n wan soŋɛ hɔ ti ho kelum tara pupeelum?

Dekɛ homea delum Yehowa. A wan soŋɛ hɔ wuu eŋa n yuun soŋɛ diimi nɛreba se’em la. Da tara ho tansugere kɛka la makera la ho tansugere paalega la. Naɛ la mabiisi la n boi ho tansugere paalega la poan bɔna ge nyɔɣɛ ba zɔtɔ.—w24.07, gɔn. 26-28.

Maɣesa se’a n boi Matu a zuo 25 la pa’alɛ to la bem?

Piisi la buusi makerɛ la pa’alɛ ti to tara sakerɛ la yelemɛŋɛrɛ. Pɔɣesa’ara la n tari yɛm la sɛba n de geto makerɛ la pa’alɛ ti to kɔ’ɔn maasum ge pigera. Ligebɔɔresi makerɛ la me pa’alɛ ti to kɔ’ɔn tiregɛ tuna.—w24.09, gɔn. 20-24.

Solomon pu’usegɔ yire bɔpaka la yuun wɔɣɛ zuna la wani?

Diimi gulesegɔ ase’a tɔɣɛ 2 Yelebiŋ’a 3:4 ti la dela “santira 120.” Bala pa’alɛ ti bɔpaka la wɔɣɛ paɛ la 53 meters (bii 175 ft). Ge diimi gɔnɔ ase’a me ti to wan ta’an delum a yeti la dela “santira 20,” ti la pa’alɛ ti ku yuun wɔɣɛ paɛ la 9 meters (bii 30 ft). Pu’usegɔ yire la dangɔɔma la n yuun kãregɛ se’em la ta’an basɛ ti gɔntuna wa n yele sɛla la dɛna yelemɛŋɛrɛ.—w24.10, gɔn. 31.

Keendoma soŋeredaana “tara pɔgɔyeŋɔ ma’an” vuurɛ? (1 Tim. 3:12)

la pa’alɛ ti a tara pɔɣa ayina ge me da tuna yalumtuuma. Leyɛ’ɛsa, a da makɛ tara kunkoma’asum la pɔɣesi.—w24.11, gɔn. 19.

Beni n sɔi ti to wan ta’an yeti sɛla n boi Yon 6:53 la ka pa’alɛ ti to ita Daana Zaanɔɔrɛ Dia la bala?

Yon 6:53 yeti to obe Yezu inya ge nyu a ziim la. Yezu yuun boi la Galilee yuun 32 Y.B. tɔɣera bɔ’ɔra Yudadoma la, la yele n pakɛ se’em ti ba tara sakerɛ a poan. Ge yuunɛ pooren ti Yezu yuun bɔna Yerusalem ge eŋɛ Daana Zaanɔɔrɛ Dia la. Yezu yuun tɔɣeri bɔ’ɔra la a sɛba ti eŋa la bamam wan ta bɔna saazuo la.—w24.12, gɔn. 10-11.