Tuntuna Paul yuun yele Timoti ti: “Mam ze la Yenɛ la Krista Yesu la Yenɛ soŋoreba sɛba te a loe la nɛŋan yɛta hɔ te ho eta sɛla te n yɛta la ge da bɔgɔha eta sɛla bɔ’ɔra.”—1 Tim. 5:21.

Yia, la niɛ peelumi ti ba daɣɛ nɛreba 144,000 la. Se’em ma’a ti Paul yuun gulesɛ bo Timoti la, loore Kristakɔma la se’em sa’am nan ka keŋɛ saazuo. Tuntuneba la, la loore Kristakɔma sɛba n gee la yuun nan ka tari vo’osum inya. Bala la, ba kan ta’an dɛna “soŋoreba sɛba te a loe la.”—1 Ko. 15:​50-54; 1 Tes. 4:​13-17; 1 Yo. 3:2.

Leyɛ’ɛsa, “soŋoreba sɛba te a loe la” kan ta’an dɛna malesi sɛba n yuun eŋɛ kpenkpasi Kokemɔ saŋa la. Malesi bamam yuun doose la Sitaana nyaa ta dɛna kolekpabɛ’ɛsi. Bala yuun basɛ ti ba nyaa dɛna la Yezu dindoma. (Pin. 6:2; Lu. 8:​30, 31; 2 Pe. 2:4) Beere sa’am, Yezu wan ta bobe ba basɛ boko kãtɛ poan yuun 1,000. Bala pooren, a nyaa wan sa’am bamam la Sitaana za’a.—Yude 6; Lil. 20:​1-3, 10.

“Soŋoreba sɛba te a loe la” ti Paul tɔɣɛ ba yele la ta’an dɛna malesi sɛba n boi saazuo ge tara yelemɛŋɛrɛ bɔ’ɔra “Yenɛ la Krista Yesu” la.

Malesi tusa tusa n tari yelemɛŋɛrɛ bɔ’ɔra Yehowa. (Heb. 12:​22, 23) La ta’an dɛna ti Yehowa ni dekɛ la tuuma to’ore to’ore bo malesi la ti ba tuna. (Lil. 14:​17, 18) Makerɛ, Yehowa yuun tum la maleka ayina ma’a ti a ta ku Asiriadoma soogɛpa 185,000. (2 Na. 19:35) Daanse’ere malesi basɛba me tuuma dela ba “lagahɛ sɛba woo n bahɛ te be’em kɛn’ɛra [Yezu] sɔ’ɔlom la poan la, la sɛba n de yalomdoma la.” (Mt. 13:​39-41) Basɛba me tuuma ta’an dɛna ti ba “lagaha sɛba te a loe la” zom saazuo. (Mt. 24:31) Malesi basɛba me ‘gu’uri to, to sarɔtɔ woo poan.’—Ym. 91:11; Mt. 18:10; dekɛ makɛ Matu 4:11; Luke 22:43.

Daanse’ere “soŋoreba sɛba te a loe la” ti 1 Timoti 5:21 tɔɣɛ ba yele la tuuma dela ba soŋera tansuga la. Gulesegɔ wa poan, Paul ka’am keendoma ban nari ti ba tuna ba tuuma se’em tansugere la poan. A le pa’alɛ mabiisi me n nari ti ba bɔ’ɔra keendoma gilema se’em. Paul yuun ka’am keendoma ti ba “da bɔgɔha eta sɛla bɔ’ɔra” ge me ni ti’isɛ soŋa soŋa ge nyaa kɔ’ɛ ba puti’irɛ tum tuunɛ. Paul yuun pa’alɛ ba la yele n pakɛ se’em ti ba dɔla ka’aŋɔ wa. A yuun yeti, “Yenɛ la Krista Yesu la Yenɛ soŋoreba sɛba te a loe la” nyɛti keendoma n biseri tansuga la se’em mɛ. Bala la, malesi la basɛba soŋeri la tansuga la. Makerɛ, ba gu’uri Naayinɛ yamesi mɛ, soŋera ba na’am mɔɔlegɔ tuuma la poan ge nyaa ni lebe ta yele Yehowa sɛla n eŋɛ.—Mt. 18:10; Lil. 14:6.