1. Yezu yuun yele a podɔleba la bem doose la ba’asegɔ la ge a yuun kaɣɛ ba la wani?

 LAN yuun ta gee dabesa fii la Yezu ki la, a podɔleba banaasi yuun soke n yeti: ‘Bem n wan daalɛ pa’alɛ ho saŋa la, la tingɔŋɔ wa ba’asegɔ yɛla?’ (Mt. 24:3) Podɔleba la yuun ti’iseri la ba wan eŋɛ se’em ta’an pa’alɛ Yudadoma tiŋa la n wan sa’am se’em ma’a. Yezu yuun ka yeen pa’alɛ ba la Yudadoma tiŋa la n wan sa’am se’em ge a me pa’alɛ ba la tomam tingɔŋɔ wa n wan ba’asɛ se’em. Yezu tɔɣɛ sansɛka ti tingɔŋɔ wa wan ba’asɛ la yeti: ‘Nɛra ka mi dabese’ere bii awa sɛka ti la wan eŋɛ. Malesi la bii Dayɔa la ka mi. Sɔ la ma’a n mi.’ A yuun nyaa kaɣɛ a podɔleba la ti ba ‘kɔ’ɔn bisera’ ge ‘pigera.’​—Mr. 13:32-37.

2. Beni n sɔi ti la yele yuun pakɛ ti sɛba n yuun boi Yudadoma saŋa la kɔ’ɔn pigera?

² Yuun kɔbesɛka n deŋɛ nɛŋa Yuda Kristakɔma la yuun dela ba pigera, sɛla n sɔi la bala n wan basɛ ti ba nyɛ nyɔvore. Yezu yuun yele a podɔleba la yelese’a n wan eŋɛ pa’alɛ ti Yudadoma tiŋa la sa’aŋɔ pɔ̃ri mɛ. A yeti: ‘Ya san ta nyɛ ti pɛɛntɛɛreba kaɛ Yerusalem tiŋa basɛ tiŋasuka, mina ya ti la kan yue ge ti sa’aŋɔ paɛ ka.’ Sankaŋa la, la yuun nari ti ba dekɛ Yezu kaka la tum tuuma ge ‘zɔ keŋɛ zɔya la bɔba sa.’ (Lu. 21:20, 21) Sɛba n yuun kelese kaka  wa la yuun nyɛ la faarɛ se’em ma’a ti Aromdoma yuun sa’am Yerusalem la.

3. To wan sɔsɛ la bem zaseŋɔ wa poan?

³ Zina beere wa, tomam me kɔ’ɔn bɔna la tingɔŋɔ be’o wa ba’asegɔ saŋa poan. Tomam me nari ti to kɔ’ɔn maasum mɛ ge pigera. Zaseŋɔ wa poan, to wan sɔsɛ baŋɛ ton wan bisa tomea soŋa se’em ge kɔ’ɔn pigera yelese’a n iti tingɔŋɔ wa poan la ton wan tara tomea soŋa se’em ge ta’an tara to saŋa la tuna tuuma soŋa.

4. Beni n sɔi ti la nara ti to mina ti yelese’a n iti tingɔŋɔ wa poan la, n basɛ ti Baabule yetɔɣebiŋ’a tuna tuuma?

⁴ La dela yelesonɛ la ton nyɛti yelese’a n iti tingɔŋɔ wa poan ti la pa’alɛ ti Baabule yetɔɣebiŋ’a tuni tuuma la. Makerɛ, Yezu yuun pa’alɛ la yelese’a n wan ta ita ti to ta’an baŋɛ ti Sitaana tingɔŋɔ wa ba’asegɔ kɔ’ɔn pɔ̃ra mɛ. (Mt. 24:3-14) Tuuntuna Peter kpemese to giila ti to bisɛ yetɔɣebiŋ’a n tum tuuma se’em, la wan eŋɛ se’em ti to sakerɛ la kpe’em. (2 Pe. 1:19-21) Baabule ki’i gɔŋɔ la pɔsɛ a yelesum la yeti: ‘Gɔnkuna wa lilige la Yezu Krista yɛla. Naayinɛ n bo en yɛla la ti a dekɛ pa’alɛ a yamesi yelese’a n kan yue ge tum.’ (Lil. 1:1) To puti’irɛ kɔ’ɔn bɔna yelese’a n iti tingɔŋɔ wa poan mɛ ge me mina ti yele ana ta’an dɛna Baabule yetɔɣebiŋ’a la n tuni tuuma. To puurɛ me ni pee mɛ ti to naɛ taaba sɔsɛ yele aŋa.

5. La ka nari ti to ita la bem ge bem n nari? (Le bisɛ foote la.)

⁵ To san sɔsera Baabule yetɔɣebiŋ’a yɛla, la ka nari ti to tara tomea puti’irɛ tuna tuuma. Bem zuo? Sɛla n sɔi la, to kan bɔta ti to yele sɛla n wan sa’am nɔyinɛ la ti to tara tansugere la poan la. Makerɛ, to ta’an ni wum tingɔŋɔ wa nɛŋadoma n tɔɣeri ba wan eŋɛ se’em maalɛ zaberɛ yɛla ti suma’asum la fai bɔna. Ton wan tuɣum ti’isɛ ti yele ana basɛ ti yetɔɣebiŋere la n boi 1 Tesalonika 5:3 tum la tuuma la, to wan bɔta ti to tɛ̃ra ban pa’alɛ yele wa se’em ta paɛ zina. To san sɔsera ge basɛ ti to puti’irɛ bɔna yelese’a ti Yehowa tigere la gulesɛ la poan, la wan soŋɛ tansugere la ti nɔyinɛ bɔna, ti to za’a ‘tara putɛyinɛ.’​—1 Ko. 1:10; 4:6.

6. To zamesɛ la bem, yelese’a n boi 2 Peter 3:11-13 poan la?

⁶ Kaalɛ 2 Peter 3:11-13. Tuuntuna Peter soŋɛ tɔ ti to baŋɛ sɛla n sɔi ti la nara ti to zamesa Baabule yetɔɣebiŋ’a. A yele to yeti to ‘kɔ’ɔn tɛ̃ra Yehowa dabeserɛ la.’ Bem zuo? Daɣɛ la to boti to baŋɛ la ‘dabeserɛ la awa’ sɛka ti Yehowa wan basɛ ti Armagedon wa’ana ge to boti to dekɛ la sansɛka n gee wa tum tuuma ta’an ‘tara vom somɔ ge me tara pu’usegɔ n di mi’a bɔ’ɔra Naayinɛ.’ (Mt. 24:36; Lu. 12:40) Bala pa’alɛ ti to boti to kelum tara halisoma ge me ãregera tomea tuna Yehowa tuuma ti la niɛ peelumi pa’alɛ ti to tari nɔŋerɛ zo’e zo’e bɔ’ɔra en. To san bɔta ti to ana bala, la nari ti to kɔ’ɔn tara tomea soŋa soŋa.

7. To wan eŋɛ la wani pa’alɛ ti to kɔ’ɔn tara tomea soŋa soŋa mɛ? (Luke 21:34)

⁷ Yezu yuun yele a podɔleba ti ba bisa bamea soŋa soŋa la yelese’a n iti tingɔŋɔ  la poan la. A kaka wa kɔ’ɔn niɛ peelumi mɛ ti la bɔna Luke 21:34. (Kaalɛ.) Bisɛ Yezu n yele se’em: ‘Tari ya yamea soŋa soŋa.’ Nɛra san tara amea soŋa soŋa, a wan mina dɛŋa yelese’a n wan sa’am eŋa la Yehowa bɔŋa la ge bisɛ eŋa n wan eŋɛ se’em ta’an gu ba. A san ita bala, a kɔ’ɔn bɔna la Naayinɛ nɔŋerɛ la poan.​—Mag. 22:3; Yude 20, 21.

8. Tuuntuna Paul yuun ka’am Kristakɔma la wani?

⁸ Tuuntuna Paul ka’am Kristakɔma ti ba tara bamea soŋa soŋa. Makerɛ, a yele Epesus Kristakɔma la ti: ‘Kɔ’ɔn bisera yamea soŋa ti ya da kena wuu gbeto la ge ya kena wuu yɛmdoma la.’ (Ep. 5:15, 16) Sitaana kɔ’ɔn tiregera mɛ ti a sa’am tomam la Yehowa bɔnsoŋa la. Bala n sɔi ti Baabule la ka’am tɔ ti, to ‘kɔ’ɔn bɔkera Yehowa puti’irɛ n de sɛla,’ la wan eŋɛ se’em ti to ta’an zabɛ la Sitaana.​—Ep. 5:17.

9. To wan eŋɛ la wani ta’an bɔkɛ Yehowa puti’irɛ n de sɛla?

⁹ Daɣɛ dɛŋa woo ti Baabule la pa’alɛ la wan sa’am tomam la Yehowa bɔnsoŋa la se’em. La nari ti to ni kɔ’ɛ to puti’irɛ soŋa la yelese’a ti Baabule ka tɔɣɛ de yele la. To san bɔta ti to dekɛ yɛm tum tuunɛ, la nari ti to bɔkɛ yele la soŋa ge baŋɛ ‘Yehowa puti’irɛ n de sɛla.’ To wan ta’an eŋɛ bala to san kaala Naayinɛ Yelesum la daarewoo ge ti’isa taɣesa. To san bɔkɛ Yehowa puti’irɛ n de sɛla ge me tara ‘Krista puti’irɛ,’ bala wan basɛ ti to dɛna ‘yɛmdoma,’ hali Baabule la san puɣum ka pa’alɛ yele la wana mɔpi. (1 Ko. 2:14-16) Saŋa kasɛka, la ta’an ta dɛna naana bɔ’ɔra tɔ ti to baŋɛ dɛŋa la ta’an gu tomea ge saŋa kasɛka me, la ni daɣena naana bɔ’ɔra tɔ.

10. Bem yɛla ase’a ti la nara ti to gu tomea a poan?

¹⁰ Yɛla ase’a n de dɛŋa ti la nara ti to gu tomea a poan dela daam nyua zo’e zo’e, punya’anɛ, yetɔɣepɔ̃’ɔsa, gbiri gbiri de’eŋo, yalumfɔɔra bisega, sarena la yelese’a n ani bala. (Ym. 101:3) Kolekpabɛ’a la n de to dataa la kɔ’ɔn bisera la eŋa n wan eŋɛ se’em ta’an sa’am tomam la Yehowa bɔnsoŋa la. (1 Pe. 5:8) To san ka bisɛ tomea soŋa, Sitaana ta’an basɛ ti to suure la kɔ’ɔn pirɛ la nintɛ̃rega, kinkisum, nyika, diŋo, zɛkɛ n mea la ton ugeri yɛla. (Ga. 5:19-21) Pɔsega la, to ta’an ti’isa ti yele ana ka ba’ɛ dɛna dɛŋa bala ge to san ka eŋɛ kalam yese yele ana basɛ, ba ta’an ta soe to suure ana wuu yabega la ti yele paɛ tɔ.​—Yam. 1:14, 15.

11. Bem dɛŋa n ka ba’ɛ lilige soŋa ti la nara ti to gu tomea de poan ge bem zuo?

¹¹ Dɛŋa kayima n ka ba’ɛ lilige soŋa dela zɔtɔ be’ero nyɔka. Geele yele wa bisɛ. Hon la nɛra n daɣɛ Yehowa Sɛɛradaana n laɣum bɔna tuuma zɛ’an tuna. Hon boti ho tuuntuna tadaana wa tara putɛsonɛ la Yehowa Sɛɛradoma la zuo, ho iti en la soŋa. Saŋa ase’a, ho ni naɛ la en mɛ ti ya di. Pooren, ho nyaa ni kɔ’ɔn naɛ la en mɛ dita saŋa woo. Saŋa ase’a, a ni tɔɣera la yalum yetɔɣum. Pɔsega la, ho ka boti yetɔɣum aŋa ge pooren yetɔɣum aŋa nyaa malum ho mɛ ti la ka le daana hɔ. Daarɛ deyima ti ya pɔŋɛ tuuma ti a yeti ya keŋɛ ta nyu daam ti ho sakɛ. Fii fii ti ho pɔsɛ ti’isa wuu ho tuuntuna tadaana wa. La kan yue, ho wan pɔsɛ tɔɣesa en. Yelemɛŋɛrɛ, to tari gilema bɔ’ɔra nɛra woo mɛ ge me ita ba som ge la nari ti to tɛ̃ra ti ton naɛ la sɛba bɔna la ta’an sa’am to puti’irɛ. (1 Ko. 15:33)  To san bisa tomea soŋa wuu Yezu n yuun ka’am to se’em la, to kan nyɔɣɛ sɛba n ka doli Yehowa pa’alegɔ zɔtɔ. (2 Ko. 6:15) To wan nyɛ dɛŋa la ge gu tomea.

12. Yezu podɔleba yuun dela ba eŋɛ bem ge gura tingɔŋɔ la ba’asegɔ?

¹² Yezu podɔleba la yuun daɣɛ ba yeen zĩ’a ge gura tingɔŋɔ la ba’asegɔ la. Yezu yuun dekɛ la tuunɛ bo ba. A yuun yele ba ti ba mɔɔlɛ yelesoma la ‘Yerusalem la Yudea la Samaria tiŋa woo poan ta paɛ tingɔŋɔ wa zɛ̃se’esi n zãɛ la poan.’ (Tm. 1:6-8) Bisɛ la yuun de tuunkãtɛ se’em! Ban yuun mɔ’ɛ nini tuna tuuma wa la pa’alɛ ti, ba yuun dekɛ ba saŋa la tum soŋa mɛ.

13. Beni n sɔi ti la nara ti to dekɛ to saŋa la tum soŋa? (Kolose 4:5)

¹³ Kaalɛ Kolose 4:5. To san bɔta ti to bisa tomea soŋa, la dela to mina ton tari to saŋa la tuna tuuma se’em. ‘Yeledi’ima’ ta’an paɛ to se’em woo. (Pa. 9:11) Sɛla ta’an eŋɛ tɔ ti to koŋe to vom.

14-15. To wan eŋɛ la wani ta’an dekɛ to saŋa la tum soŋa? (Hebru 6:11, 12) (Le bisɛ foote la.)

¹⁴ To wan ta’an dekɛ to saŋa la tum soŋa, to san ita sɛla ti Yehowa bɔta ge basɛ ti tomam la eŋa zɔtɔ nyɔka la  kpe’em. (Yon 14:21) La nari ti to ‘zɛ’a kankaŋi, da miina ge kɔ’ɔn tuna to Daana tuuma la zo’e zoe.’ (1 Ko. 15:58) To san ta ki bii tingɔŋɔ wa ba’asegɔ n paɛ, to kan yeti to daa san baŋɛ ni.​—Mt. 24:13; Arom 14:8.

¹⁵ Zina beere wa, Yezu kelum pa’ala a podɔleba mɛ ti ba mɔɔla Naayinɛ Na’am la tinparɛ wa zɛ’an woo. A eŋɛ a denɛ mɛ. Yezu doli la Yehowa tigere la poan kumesa tɔ ge bɔ’ɔra tɔ lɔɣeseto ti to wan tara mɔɔla yelesoma la. (Mt. 28:18-20) To me ni eŋɛ to denɛ mɛ la ton mɔɔri mɔɔla, pa’ala ge kɔ’ɔn pigera gura se’em ma’a ti Yehowa wan ta sa’am tingɔŋɔ wa. To san tara ka’aŋɔ la n boi Hebru 6:11, 12 la tuna tuuma, to wan gurɛ to beere sa’am puti’irɛ la kankaŋi ‘ta paɛ ba’asegɔ.’​—Kaalɛ.

16. To lu to suure ti to eŋɛ la bem?

¹⁶ Yehowa loe la dabeserɛ la awa ze’ele ti a sa’am Sitaana tingɔŋɔ wa. Dabeserɛ la san paɛ, Yehowa wan basɛ ti a yetɔɣebiŋ’a la woo n boi Baabule la poan la tum tuuma. Ge saŋa ase’a, la ta’an ana to wuu tingɔŋɔ wa ba’asegɔ gu’uni me la ge Yehowa dabeserɛ la ‘kan yue!’ (Hab. 2:3) Bala la, basɛ ya ti to lu ya to suure ‘bisera Yehowa’ ge ‘gura to Naayinɛ la n de to fãara la.’​—Mik. 7:7.