ATALATADAARƐ, January 18, 2023, ti ba daa bo lasebaarɛ jw.org poan ti to Mabia Gage Fleegle la Mabia Jeffrey Winder nyaa pa’asɛ la Tigere Zuo Bisegadoma la poan. Yuuma zo’e zo’e n wana ti to mabiisi wa tara sakerɛ pu’usa Yehowa.

Mabia Fleegle yuun zo’e la Pennsylvania, U.S.A. zaɣenɔrɛ bɔba. A dɔɣereba dela Sɛɛraadoma. Eŋa n yuun de bunbilipaalega la, a deodoma yuun keŋɛ la zɛ’an n eeri soŋerɛ ta soŋɛ. Saŋa fii pooren, November 20, 1988 poan ti a muse ko’om.

Mabia Fleegle dɔɣereba yuun ni kpɛmesa la a giila saŋa woo ti a tum tɛm woo na’am tuuma la. Kaarɛ bisegadoma la Betel deodoma basɛba yuun ni keŋɛ la ba yire ta gã’arɛ. Mabia Fleegle yuun nyɛ ban tari pupeelum se’em la ge bɔta ti a ana wuu bamam n ani se’em la. Eŋa n yuun muse ko’om saŋa fii pooren ti a yuun pɔsɛ tɛm woo sore ŋmɛ’a tuuma la September 1, 1989 poan. Yuuma ayi pooren ti a yuun keŋɛ ta tuna Betel wuu eŋa n yuun tari puti’irɛ se’em eŋa n yuun de yuun 12 la. October 1991 poan ti a pɔsɛ tuna Brooklyn Betel.

Betel poan, Mabia Fleegle yuun tum la Gɔnɔ gɔbega zɛ’an yuuma anii, pooren ti a yuun ta tuna la Na’am Tuuma Wele la. Sankaŋa la, a yuun soŋɛ la Russia yetɔɣum tansugere yuuma fii. Yuun 2006 poan ti a di a pɔɣa Nadia ti ba laɣum tuna Betel. Ba naɛ taaba mɛ tum gingilega n tɔɣeri Portuguese yetɔɣum poan ge me tum Spanish yetɔɣum gingilega poan gaŋɛ yuun pia. Mabia Fleegle n yuun tum la Na’am Tuuma Wele yuuma zo’e zo’e la, ba yuun nyaa yele en ti a keŋɛ ta tuna Pa’alegɔ Bisegadoma ɔfisi la poan ge ti pooren a yuun ta tum Na’am Tuuma Bisegadoma ɔfisi poan. March 2022 poan ti ba loe en pa’asɛ Na’am Tuuma Bisegadoma soŋereba la poan.

 Mabia Winder yuun zo’e la Murrieta, California, U.S.A tiŋa. A dɔɣereba yuun dela Sɛɛraadoma, a me yuun muse ko’om la March 29, 1986 poan. Ŋmaresɛka n taɣelɛ la, a yuun kɔ’ɛ a puti’irɛ ti a tum sore ŋmɛ’a soŋerɛ tuuma la. Eŋa n yuun nɔŋɛ tuuma la zuo ti a yuun tum ta paɛ ŋmaresɛka n taɣelɛ la. Eŋa n yuun tum sore ŋmɛ’a soŋerɛ tuuma ŋmaresi zo’e zo’e poan la, a yuun pɔsɛ tɛm woo sore ŋmɛ’a tuuma la mɛ October 1, 1986 poan.

Mabia Winder n yuun de yuun pia la sɛla la, a yuun ta kaɛ la a keendoma bayi n yuun tuni Betel sankaŋa la. Eŋa n yuun nyɛ bɔŋa la n ani se’em la, yuun kɛ̃ a suure mɛ ti a bɔta ti a ta tuna Betel a san ta zo’e kutɛ. May 1990 poan ti a yuun ta tuna Wallkill Betel poan.

Mabia Winder n yuun boi Betel, a yuun pɔsɛ tuna la bɛɣesegɔ tuuma. Pooren, a yuun ta tuna la Va’am Tuuma Wele, la Betel Ɔfisi poan. A yuun di a pɔɣa Angela la yuun 1997 poan ti ba laɣum tuna Betel poan ta paɛ zina. Yuun 2014 poan, ba yuun tari Mabia Winder keŋɛ la Warwick ti a ta soŋɛ ti ba mɛ tigere zuo la. Yuun 2016 poan ba yuun keŋɛ la Watchtower Educational Center n boi Patterson, ti Mabia Winder yuun tuna Kɔ̃a La Video Wele la poan. Yuuma anaasi pooren ba yuun lebe la Warwick, ti Mabia Winder yuun naɛ la Personnel Committee la tuna. March 2022 poan ti ba loe en pa’asɛ Personnel Committee la poan.

To zuseri ti Yehowa kã bo mabiisi wa n de ‘bo’olum’ ti a dekɛ bo to la, ti ba kelum tuna la ba paŋa za’a soŋera Na’am tuuma la.—Ep. 4:8.