1. Bo makerɛ pa’alɛ sɛla n sɔi ti to ɛɛra Yehowa pa’alegɔ.

 TI’ISƐ bisɛ ti ho bɔregɛ mɛ goo poan. Hon ŋmɛregeri zɛ’an woo dela kum nyuuŋo: goo dusi, bun-ɛɣedoma n tari bã’asi, tiisi la bunbula n de yabega, la tãsi ti bogero bɔna bim. Bisɛ ho puurɛ n wan pee se’em ho san nyɛ nɛra n mi goo la poan ti a soŋɛ hɔ ge tara ho bala lɔɣesa ta yese! Tingɔŋɔ wa ani woo goo kaŋa la. Dɛŋa n kɔ’ɔn bɔna ka poan n wan ta’an sa’am tomam la Yehowa bɔŋa la. Ge to tari la Yehowa n de to pa’alegɔdaana n di mi’a. A yeseri to mɛ dɛŋa poan ge tara to ye’a tinpaalega la poan ti to wan ta vɔna daarewoo.

2. Yehowa pa’ali to la wani?

² Yehowa pa’ali to la wani? Nɔkpe’ene kai ti a doli la a Yelesum n de Baabule la poan. Ge a me doli nɛreba poan mɛ pa’ala tɔ. Makerɛ, a doli la ‘sakerɛ la yɛm yameŋa la’ poan bɔ’ɔra to vo’osum poan dia ti la soŋera tɔ, ti to ni dekɛ yɛm kɔ’ɛ to puti’irɛ soŋa. (Mt. 24:45) Yehowa kelum tara la buraasi basɛba n kumesɛ ti ba pa’ala tɔ. Makerɛ, gingilega kaarɛ bisegadoma la tansugere keendoma kpemeseri to giila mɛ ge pa’ala tɔ ti to ta’an ŋmibera biɣi biɣi saŋa poan. Bisɛ to puurɛ n pee se’em la ton nyɛti pa’alegɔ biɣi biɣi dabesa wa poan la! Pa’alegɔ la soŋeri to mɛ ti to kelum tara bɔnsoŋa la Yehowa ge me bɔna nyɔvore sore la poan.

3. To wan sɔsɛ la bem zaseŋɔ wa poan?

³ Hali la bala za’a, la ta’an ni kpe’em bo to ti to dɔla Yehowa pa’alegɔ, yele yele wuu pa’alegɔ la san ze’ele la asaaleba zɛ’an na. Beni n sɔi? Daanse’ere ka’aŋɔ la ka makɛ la tomam n boti sɛla la. Bii daanse’ere to ta’an ti’isa ti yɛm ka boi ka’aŋɔ la poan ge me ka ze’ele Yehowa zɛ’an. La san ta ana to bala, la yele pakɛ mɛ ti to sakɛ ti Yehowa n pa’ali a nɛreba ge ti to me san nana a pa’alegɔ la, to wan nyɛ  kã’a zo’e zo’e. Zaseŋɔ wa poan to wan sɔsɛ yɛla atã n wan soŋɛ tɔ ti to ta’an tara sakerɛ Yehowa poan. (1) Yehowa n yuun pa’ali a nɛreba se’em diimi sa, (2) Yehowa n pa’ali a nɛreba se’em zina beere wa, la (3) ton nyɛti nyuurɔ se’em to san nana Yehowa pa’alegɔ.

YEHOWA N YUUN PA’ALI ISRAELDOMA LA SE’EM

4-5. Yehowa yuun eŋɛ la bem pa’alɛ ti a doli la Moses poan pa’ala Israeldoma la? (Bisɛ gɔŋɔ wa nɛŋa foote.)

⁴ Yehowa yuun loe la Moses ti a tari Israeldoma la yese Egypt tiŋa poan. A me yuun kɔ’ɔn basɛ ti Israeldoma la baŋɛ ti a doli la Moses poan pa’ala ba. Makerɛ, wuntɛɛɛŋa saŋa, a yuun ni dekɛ la sangbanɛ pĩ ba ti ba kena ge ti bugum me bɔna ba nɛŋa yu’uŋɔ. (Yɛh. 13:21) Moses la Israeldoma la za’a yuun doose sangbanɛ la, la bala ta paɛ Mɔɣɛ Mɔlega la poan. Ge ban yuun nyɛ ti Egyptdoma la pɔ̃ri ba la, dabeem n yuun tari ba ti ba yuun ti’isa ti Egyptdoma la wan ku ba. Israeldoma la yuun yeti, Moses tue mɛ la eŋa n tari ba wa’an Mɔɣɛ Mɔlega la poan la. Ge Moses yuun ka tue. Yehowa n yuun basɛ ti Moses tari nɛreba la keŋɛ Mɔɣɛ Mɔlega la poan. (Yɛh. 14:2) Naayinɛ yuun doose la yelekirega sore poan faaɛ a nɛreba.—Yɛh. 14:​26-28.

⁵ Yuun 40 pooren, Moses yuun kelum tara sakerɛ ti Yehowa yuun doose la sangbanɛ poan pa’alɛ a nɛreba pɔɣetia la poan. a Saŋa busebo, Yehowa yuun ni basɛ ti sangbanɛ la bɔna la Moses tɛnti la zuo ti Israeldoma la za’a nyɛta. (Yɛh. 33:​7, 9, 10) Yehowa yuun ni doose la sangbanɛ la poan tɔɣɛ bo Moses ti Moses me yele Israeldoma la Yehowa n yele sɛla. (Ym. 99:7) Israeldoma la yuun kɔ’ɔn mina ti Yehowa doli la Moses poan pa’ala ba.

6. Israeldoma la yuun eŋɛ la wani la Yehowa n yuun doli Moses poan pa’ala ba la? (Kanlɛ 14:​2, 10, 11)

⁶ Susa’aŋɔ yele la dela, Israeldoma la zo’e zo’e yuun ka sakɛ ti Yehowa doli la Moses poan pa’ala ba. (Kaalɛ Kanlɛ 14:​2, 10, 11.) Saŋa zo’e zo’e ti ba yuun ni kɔ’ɔn zaɣesɛ Moses pa’alegɔ. Bala zuo, Israeldoma la zo’e zo’e yuun ka nyaŋɛ kɛ̃ Pu’ulumbiŋere Tiŋa la poan.—Kan. 14:30.

7. Bo makerɛ pa’alɛ sɛba n yuun nani Yehowa pa’alegɔ. (Kanlɛ 14:24) (Bisɛ foote la.)

⁷ Ge Israeldoma la basɛba yuun kelum nana Yehowa pa’alegɔ mɛ. Makerɛ, Yehowa yuun yeti: ‘Kaleb doose mam mɛ la a suure za’a.’ (Kaalɛ Kanlɛ 14:24.) Naayinɛ yuun kã bo Kaleb mɛ hali basɛ ti a nyɛ samanɛ se’ere ti a bɔta Kanaan tiŋa poan. (Yos. 14:​12-14) Israeldoma sɛba n yuun kɛ̃ Pu’ulumbiŋere Tiŋa la yuun nani Yehowa pa’alegɔ mɛ. Se’em ma’a ti Yosua yuun soe Moses bisera Israeldoma la, ba yuun ‘na’asɛ en mɛ a vom dabesa za’a poan.’ (Yos. 4:14) Bala zuo, Yehowa yuun kã bo ba mɛ ge tari ba kɛ̃ tinsɛka ti a yuun pu’ulum biŋe ti a dekɛ bo ba la.—Yos. 21:​43, 44.

8. Tɔɣɛ pa’alɛ Yehowa n yuun pa’alɛ a nɛreba se’em nadoma la saŋa la. (Bisɛ foote la.)

⁸ Yuuma zo’e zo’e pooren, Yehowa yuun loe la gãkereba ti ba pa’ala a nɛreba. Bala pooren, Yehowa yuun loe la a nɔdɛ’ɛseba ti ba pa’ala a nɛreba nadoma la saŋa. Nadoma sɛba n yuun tari yelemɛŋɛrɛ la yuun kelese nɔdɛ’ɛseba la ka’aŋɔ la mɛ. Makerɛ, Naba David n yuun tue ti nɔdɛ’ɛsa Natan ka’am en la, a yuun  sirege amea mɛ sakɛ. (2 Sa. 12:​7, 13; 1 Yel. 17:​3, 4) Naba Yehosafat yuun nam nɔdɛ’ɛsa Yahaziel pa’alegɔ la mɛ ge kpemese Yudadoma la giila ti ba ‘dekɛ bamea delum nɔdɛ’ɛseba la.’ (2 Yel. 20:​14, 15, 20) Yele n yuun ta paɛ Naba Hezekia la, a yuun yele la nɔdɛ’ɛsa Isaiah ti a soŋɛ en. (Isa. 37:​1-6) Nadoma la yuun ni san nam Yehowa pa’alegɔ, Yehowa ni kã bo ba mɛ ge me gu’ura ba nɛreba la. (2 Yel. 20:​29, 30; 32:22) Tisi la za’a yuun nari ti ba baŋɛ ti Yehowa doli la a nɔdɛ’ɛseba la poan pa’ala a nɛreba. Ge hali la bala za’a, nadoma la zo’e zo’e yuun zaɣesɛ Yehowa nɔdɛ’ɛseba la mɛ.—Yer. 35:​12-15.

YEHOWA N YUUN PA’ALI DIIMI KRISTAKƆMA LA SE’EM

9. Yehowa yuun doli la bani poan pa’ala yuun kɔbesɛka n deŋɛ nɛŋa Kristakɔma la? (Bisɛ foote la.)

⁹ Yuun kɔbesɛka n deŋɛ nɛŋa Y.B. poan ti Yehowa yuun tigese Kristakɔma tansugere la. Sore kani poan ti Yehowa yuun pa’ala diimi Kristakɔma la? A yuun loe la Yezu ti a dɛna tansugere la zuodaana. (Ep. 5:23) Ge Yezu mea yuun ka pa’alɛ podɔleba la ayima ayima. A yuun tari la tuuntuneba la, la keendoma la n boi Yerusalem la pa’ala ba. (Tm. 15:​1, 2) Leyɛ’ɛsa, a yuun loe la keendoma tansuga la poan ti ba pa’ala a nɛreba la.—1 Tes. 5:12; Titus 1:5.

10. (a) Yuun kɔbesɛka n deŋɛ nɛŋa Kristakɔma la yuun eŋɛ la wani la pa’alegɔ ti ba yuun tara bɔ’ɔra ba la? (Tooma 15:​30, 31) (b) Diimi sa la, beni n sɔi ti nɛreba basɛba yuun ka nana sɛba ti Yehowa yuun loe ba ti ba pa’ala ba la? (Bisɛ daka la zuo n de “ Sɛla N Sɔi Ti Basɛba Ka Sakɛ Ti Yehowa Doli La Nɛreba Poan Pa’ala Tɔ.”)

¹⁰ Yuun kɔbesɛka n deŋɛ nɛŋa Kristakɔma la yuun nani pa’alegɔ la ti tuuntuneba la yuun tara bɔ’ɔra ba la yoi? Ba zo’e zo’e yuun pee la puurɛ dɔla pa’alegɔ la ti ba yuun tara bɔ’ɔra ba la. Yelemɛŋɛrɛ, ‘ba puurɛ yuun pee mɛ ti ba malum nyɛ paŋa pa’asɛ.’ (Kaalɛ Tooma 15:​30, 31.) Ge Yehowa pa’ali a nɛreba la wani zina beere wa?

YEHOWA N PA’ALI A NƐREBA SE’EM ZINA BEERE WA

11. Bo makerɛ pa’alɛ Yehowa n pa’ali a nɛreba se’em zina beere wa.

¹¹ Yehowa kelum pa’ala a nɛreba mɛ zina beere wa. A tari la Baabule la, la  a Dayɔa la n de tansugere la zuodaana la pa’ala tɔ. Yehowa kelum tara nɛreba pa’ala to mɛ zina beere wa? Ɛɛ. Geele yelese’a n yuun eŋɛ yuun 1800 bɔba. Charles Taze Russell la a taaba la n yuun viiseri Naayinɛ Na’am la yɛla la, ba yuun viisɛ baŋɛ ti yuun 1914 wan dɛna yuunɛ n boi de to’ore. (Da. 4:​25, 26) Ban yuun ma’ɛ bamea viisɛ Baabule la poan la n sɔi ti ba yuun sakɛ ti yetɔɣebiŋere wa wan sirum tum tuuma. Yehowa n yuun soŋɛ ba ti ba ta’an viisɛ nyɛ yele ana wa yoi? Ɛɛ. Yelese’a n yuun eŋɛ yuun 1914 la sirum pa’alɛ ti Naayinɛ Na’am la pɔsɛ bisega mɛ. Yuun denɛ poan ti Tingole Wa Za’a Waabi Zaberɛ I la yuun kɔ saii, ti bã’asi, tinmiiŋo, la dipɔ’ɔsegɔ me yuun bɔna. (Lu. 21:​10, 11) Yehowa n yuun sirum doli mabiisi wa poan soŋera a nɛreba.

12-13. Mabiisi la yuun maasum la wani Tingole Wa Za’a Waabi Zaberɛ II saŋa la, ti la soŋɛ tɔ ti to ta’an tuna na’am mɔɔlegɔ tuuma la soŋa soŋa?

¹² Le geele bisɛ yelese’a n yuun eŋɛ Tingole Wa Za’a Waabi Zaberɛ II la poan. Mabiisi la n boi tigere zuo la n yuun viisɛ Liligere 17:8 ba’asɛ la, ba yuun baŋɛ ti, zaberɛ kan ta’asɛ ti Armagedon zaberɛ la. Ge zaberɛ la pooren, suma’asum fii wan bɔna ti Yehowa Sɛɛradoma ta’an mɔɔlɛ bo nɛreba zo’e zo’e. La yuun ta’an ana wuu mabiisi la kabeli me la. Ge tigere zuo la n yuun pɔsɛ Watchtower Bible College (School) of Gilead la, la yuun soŋɛ mɛ ti ba kumesɛ satiŋa na’am yetɔɣum yalegeredoma ti ba tum Na’am mɔɔlegɔ tuuma la tingole wa zɛ’an woo. Hali satiŋa na’am yetɔɣum yalegerɛdoma wa yuun kelum mɔɔla mɛ zaberɛ la saŋa. Leyɛ’ɛsa, sakerɛ la yɛm yameŋa la yuun pɔsɛ ita la Tiokrasi Sukuu b tansuga la woo poan ti la soŋɛ mabiisi ti ba ta’an mɔɔla ge pa’ala soŋa soŋa. Kumesegɔ wa yuun soŋɛ Naayinɛ nɛreba mɛ ti ba ta’an maasum mɔɔla yelesoma la zɛ’an woo.

¹³ To san ti’isa yelese’a n yuun eŋɛ sankaŋa la, nɔkpe’ene kai ti Yehowa n yuun pa’ali a nɛreba biɣi biɣi sankaŋa la poan. Tingole Wa Za’a Waabi Zaberɛ II la  pooren, Yehowa nɛreba n boi tisi zo’e zo’e poan tari la suma’asum la yɔ’ɔ ti ba mɔɔla yelesoma la. Wana wa basɛ ti na’am mɔɔlegɔ tuuma la kɔ’ɔn yalegera mɛ.

14. Beni n sɔi ti la nara ti to sakɛ pa’alegɔ seto ti Yehowa tigere la, la keendoma la tara bɔ’ɔra to la? (Liligere 2:1) (Bisɛ foote la.)

¹⁴ Zina beere wa, Tigere Zuo Bisegadoma la kelum dekɛ bamea delum la Krista ti a pa’ala ba. Ba boti la ban pa’ali to sɛla la makɛ la Naayinɛ la Yezu puti’irɛ. Ba nyaa ni dekɛ pa’alegɔ wa bo la gingilega kaarɛ bisegadoma la keendoma ti ba dekɛ bo tansuga la. c Keendoma sɛba n de looredoma la boi la Krista ‘zuɔ nu’o.’ (Kaalɛ Liligere 2:1.) Yelemɛŋɛrɛ, keendoma wa ka di mi’a ge ni tue saŋa ase’a. Saŋa ase’a, Moses la Yosua yuun ni tue mɛ hali la tuuntuneba la me. (Kan. 20:12; Yos. 9:​14, 15; Arom 3:23) Ge la bala za’a, Krista kelum dɔla la sakerɛ la yɛm yameŋa la, la keendoma la poan pa’ala tɔ. A me wan kelum ita la bala ‘ta paɛ tingɔŋɔ wa ba’asegɔ.’ (Mt. 28:20) Bala la, la ka nari ti to tara puti’ira ayi ayi la Yehowa n doli sarɔtɔ se’a poan pa’ala to la.

TO WAN NYƐ NYUURƆ TO SAN NANA YEHOWA PA’ALEGƆ

15-16. Hon zamesɛ la bem la mabiisi basɛba n nam Yehowa pa’alegɔ la?

¹⁵ To san nana Yehowa pa’alegɔ, to nyɛti nyuurɔ mɛ nananawa. Makerɛ, Andy la Robyn yuun kelese kã’aŋɔ mɛ, basɛ ti ba vom ana naana. (Bisɛ zamesegɔ yele la n boi Matu 6:22.) Bala la, ba yuun nyaŋɛ soŋɛ ti ba mɛ Na’am Pu’usegɔ Deto la deto ase’a. Robyn yeti: “Ton kɛ̃’ɛri zɛ’an la ka ba’ɛ karegɛ, hali ti da’aŋa ka bɔna bim. Mam nɔŋɛ n ŋmata fɔɔra mɛ ge la yuun nari ti n koose lɔɣese’a ti n tara ŋmata fɔɔra la. Mam suure yuun sa’am mɛ. Ge wuu Abraham pɔɣa Sarah la, mam yuun kɔ’ɔn lu n suure ti mam kan viise lebe pooren.” (Heb. 11:15) Mabia wa la a pɔɣa la yuun nyɛ la bem nyuurɔ? Robyn yeti: “Tomam puurɛ pee mɛ la ton mi ti to dekɛ to sɛla woo bo la Yehowa la. Tomam ni bɔkɛ vom n wan ta ana se’em tinpaalega la poan.” Andy me yeti:  “Tomam puurɛ pee mɛ la ton dekɛ to vom za’a tuna Na’am tuuma la.”

¹⁶ To san nana Yehowa pa’alegɔ to wan le nyɛ la bem nyuurɔ? Marcia n yuun ba’asɛ high school la, a yuun loe ti a tuna la zo’e zo’e Yehowa pu’usegɔ poan. (Mt. 6:33; Arom 12:11) A yeti: “Ba yuun bo mam la yuuma anaasi scholarship ti n keŋɛ university. Ge mam yuun boti la n tum zo’e zo’e bo Yehowa. Bala la, mam yuun kɔ’ɛ n puti’irɛ ti n wan keŋɛ sukuu ta zamesɛ nu’o tuuma ta’an bisera n mea ge tuna na’am mɔɔlegɔ tuuma la. Mam kan yeti n daa san baŋɛ ni la mam n kɔ’ɛ n puti’irɛ se’em la. Mam nyaa tuni la tɛm woo sore ŋmɛ’a tuuma la. Mam n maasum n saŋa se’em la soŋeri mam mɛ ti n ta’an tuna Betel tuuma, la tuuma ase’a me bɔ’ɔra Yehowa.”

17. To wan le nyɛ la bem kã’a to san nana Yehowa pa’alegɔ? (Isaiah 48:​17, 18)

¹⁷ Saŋa ase’a, to ni nyɛ kã’aŋɔ n pa’alɛ tɔ lɔɣebɔrɛ la yelese’a n wan ta’an basɛ ti to tum be’em. To san dɔla pa’alegɔ yele ana wa poan, to ni nyɛta la kã’a. To wan tara putɛkeeŋa n ani fa’a ge ti daaŋɔ me kan paɛ tɔ. (1 Tim. 6:​9, 10) Bala wan basɛ ti to ta’an yese to suure za’a pu’usa Yehowa ge tara pupeelum la suma’asum zo’e zo’e.—Kaalɛ Isaiah 48:​17, 18.

18. Beni n sɔi ti hon kɔ’ɔn lu ho suure ti ho wan kelum nana Yehowa pa’alegɔ?

¹⁸ Yehowa wan kelum dɔla la nɛresaaleba poan pa’ala tɔ ta paɛ mɛlesekãtɛ la, la Yuun Tusere Na’am Bisega la poan. (Ym. 45:16) To wan kelum sakɛ dɔla pa’alega wa hali la san ka makɛ la tomam n boti sɛla la? To san wan ta’an ta eŋɛ bala, la nari ti to nana pa’alegɔ seto ti Yehowa tara bɔ’ɔra to nananawa la. Bala la, basɛ ya ti to za’a waabi nana Yehowa pa’alegɔ, la pa’alegɔ seto woo ti mabiisi sɛba ti ba loe la tara bɔ’ɔra to la. (Isa. 32:​1, 2; Heb. 13:17) To san ita bala, la pa’alɛ ti to tari la sakerɛ Yehowa poan, mina n Pa’ali tɔ ti to lɔɣesa tomea daaŋɔ yɛla poan ge wan tara to ta paɛ tinpaalega la poan ti to vɔna daarewoo la.