1. Wani ma’a ti ba wan tari looredoma sɛba n gee la keŋɛ saazuo?

 YUUMA zo’e zo’e n wana ti Yehowa nɛreba ni ti’isa ti, ‘Wani ma’a ti ba wan tari looredoma sɛba n gee la keŋɛ saazuo?’ To yuun ti’isɛ ti looredoma la basɛba wan bɔna Paradiisi tinparɛ wa zuo, Armagedon pooren. Ge July 15, 2013, The Watchtower la yuun basɛ ti to baŋɛ ti looredoma sɛba n gee bɔna tinparɛ wa zuo la wan keŋɛ saazuo ge ti Armagedon zaberɛ la nyaa pɔsɛ.—Mt. 24:31.

2. Tosɛba ta’an soke la bem ge to wan sɔsɛ la bem zaseŋɔ wa poan?

² Ge tosɛba ta’an soke yeti: Beni n wan paɛ ‘piisi sise’esi’ la n wan kelum pu’usa Yehowa tinparɛ wa zuo ‘mɛlesekãtɛ’ la poan la? (Yon 10:16; Mt. 24:21) Mabiisi basɛba ta’an fabela ti, ba kan mina ban wan eŋɛ se’em looredoma la san ta keŋɛ saazuo. Basɛ ya ti to bisɛ Baabule yɛla ayi n ta’an basɛ ti ba ti’isa bala. To nyaa wan bisɛ sɛla n sɔi ti la ka nara ti to fabela.

BEM N KAN PAƐ PIISI SISE’ESE LA?

3-4. Nɛreba basɛba ta’an ti’isa la bem ge bem zuo?

³ Mabiisi basɛba ta’an ti’isa ti looredoma la san ka bɔna, to kan le nyɛta pa’alegɔ Tigere Zuo Bisegadoma la zɛ’an. Bala me ta’an basɛ ti piisi sise’ese la buregɛ yelemɛŋɛrɛ la poan. Daanse’ere ba ti’isɛ la Baabule gulesegɔ ase’a yele. Basɛ ya ti to geele ya yɛla ayi. Yia la dela Malema Nɛŋadaana Yehoiada. A yuun tari la sakerɛ paa pu’usa Naayinɛ. Eŋa la a pɔɣa Yehoseba yuun te’ele Yehoas n yuun de bia la ge yuun soŋɛ en ti a ta dɛna nasoŋa. Yehoiada n yuun vɔi la, Yehoas yuun mɔɔri mɛ ge Yehoiada n yuun ki la Yehoas yuun tum la be’em. A yuun kelese la  nabiisi sɛba n de putɔpa la nyaa zaɣesɛ Yehowa.—2 Yel. 24:​2, 15-19.

⁴ Sɛla n taɣelɛ la dela yuun kɔbesɛka n pa’asɛ buyi Kristakɔma la. Tuuntuna mina n yuun ki pooren dela Yon. Eŋa n yuun vɔi la, a yuun soŋɛ Kristakɔma zo’e zo’e mɛ ti ba tara sakerɛ pu’usa Yehowa. (3 Yo. 4) Yon yuun tiregɛ mɛ tɛ’ɛla tansuga la, pumpɔreŋɔ pa’alegɔ poan wuu Yezu tuuntuneba basɛba n yuun eŋɛ se’em la. (1 Yo. 2:18; bisɛ zamesegɔ yele n boi 2 Tes. 2:7.) Ge Yon n yuun ta ki la, nɛreba zo’e zo’e n boi tansuga la poan yuun lebege la a yelege n meadoma. Yuuma fii pooren, pumpɔreŋɔ pa’alegɔ la sarum be’ero yuun kɔ’ɔn pirɛ tansuga la poan mɛ.

5. La ka nari ti to ti’isa la bem la Baabule poan yɛla ayi la n pa’alɛ se’em la?

⁵ Baabule yɛla ayi wa pa’alɛ ti, se’em ma’a ti looredoma sɛba n gee la ta keŋɛ saazuo la, piisi sise’esi la wan pɔsɛ tuna sɛla n ka ani soŋa wuu Yehoas n yuun eŋɛ se’em la yoi? Bii ba wan lebege a yelege n meadoma wuu nɛreba zo’e zo’e n yuun eŋɛ se’em tuuntuneba la n yuun ki la? Daɣɛ bala la fii me! To tari puti’irɛ ti looredoma sɛba n gee la san keŋɛ saazuo, piisi sise’esi la wan kelum pu’usa Yehowa sose’ere n ani soŋa poan ge ti a me wan bisera ba. Beni n sɔi ti to tara puti’irɛ bala?

YELEMƐŊƐRƐ PU’USEGƆ KAN SA’AM

6. Saŋa sugumnɔɔrɛ butã ani ti to wan geele ba yɛla?

⁶ Beni n sɔi ti to tara puti’irɛ ti yelemɛŋɛrɛ pu’usegɔ kan sa’am hali biɣi biɣi saŋa la san paɛ? Sɛla n sɔi la Baabule la pa’alɛ ti tomam saŋa wa boi la de to’ore la diimi Israeldoma saŋa, la tuuntuneba la n yuun ki la saŋa. Bala la, basɛ ya ti to bisɛ ya saŋa sugumnɔɔrɛ buta wa n boi to’ore to’ore se’em: (1) Diimi Israeldoma saŋa, (2) tuuntuneba la n yuun ki la saŋa, la (3) tomam saŋa wa, ‘sansɛka ti sɛla woo wan malum ana soŋa.’—Tm. 3:21.

7. Diimi Israel saŋa la, beni n sɔi ti nɛresɛba n yuun tari sakerɛ la suure yuun ka sa’am la nɛreba, la nadoma la n yuun tuni be’em la?

⁷ Diimi Israeldoma saŋa. Moses n yuun ta pɔ̃ra a kum la, a yuun yele Israeldoma la yeti: ‘Mam mi ti mam san puɣum ki ba’asɛ, ya yeti ya galum mɛ ge ŋmɛregɛ yamesi yese sose’ere ti mam bo ya nɔɔrɛ ti ya dɔla la poan.’ (Tɛɛ. 31:29) Moses yuun le kaɣɛ Israeldoma la ti ba san kpere tuba, Naayinɛ wan basɛ ti ba keŋɛ yamenɛ poan. (Tɛɛ. 28:​35, 36) Yele ana wa yuun sirum tum mɛ? Ɛɛ. Yuun kɔbesi zo’e zo’e poan, nadoma la zo’e zo’e yuun tum la be’em basɛ ti Naayinɛ nɛreba la buregɛ. Bala zuo, Yehowa yuun dɔlegɛ Israeldoma la tuba mɛ ge yuun ka le bo yɔ’ɔ ti Israel nadoma la bisera a nɛreba la. (Eze. 21:​25-27) Ge Israeldoma sɛba n yuun tari sakerɛ la n baŋɛ ti Naayinɛ yelesum la tum mɛ la, la yuun kpemese ba giila mɛ ti ba kɔ’ɔn pu’usa Yehowa.—Isa. 55:​10, 11.

8. La nari ti la eŋɛ to pakerɛ la yuun kɔbesɛka n pa’asɛ buyi Kristakɔma tansugere la n yuun sa’am la? Tɔɣɛ pa’alɛ.

⁸ Tuuntuneba la n yuun ki la saŋa. La nari ti la eŋɛ to pakerɛ la yuun kɔbesɛka n pa’asɛ buyi Kristakɔma tansugere la n yuun sa’am la yoi? Aayi. Yezu yuun tɔɣɛ biŋe ti, a yelege n meadoma wan ta bɔna tansuga la poan. (Mt. 7:​21-23; 13:​24-30, 36-43) Tuuntuna Paul, Peter la Yon yuun pa’alɛ ti Yezu yetɔɣebiŋere  wa pɔsɛ tuna tuuma la bamam saŋa la. (2 Tes. 2:​3, 7; 2 Pe. 2:1; 1 Yo. 2:18) Tuuntuneba la n yuun ki ba’asɛ la, a yelege n meadoma la yuun nyaa pa’asɛ la Babilon Kãtɛ La n de tingɔŋɔ wa za’a waabi pumpɔreŋɔ pu’usegɔ la poan. Yezu n yuun tɔɣɛ sɛla biŋe la yuun tum tuuma mɛ.

9. Tomam saŋa wa boi de to’ore la wani la diimi Israeldoma saŋa la, la yuun kɔbesɛka n pa’asɛ buyi saŋa la?

⁹ ‘Sansɛka ti sɛla woo wan malum ana soŋa.’ Tomam saŋa wa boi la de to’ore la diimi Israeldoma saŋa, la sansɛka ti a yelege n meadoma yuun kɛ̃ yuun kɔbesɛka n pa’asɛ buyi tansuga la poan la. Tomam saŋa wa dela bem saŋa? To ni yeti la dela tingɔŋɔ be’o wa ‘ba’asegɔ dabesa’ la. (2 Tim. 3:1) Ge Baabule la pa’alɛ ti saŋa sugumnɔɔrɛ buyi n wan yue, wan pɔsɛ. La wan kɔ’ɔn bɔna ta paɛ se’em ma’a ti Mɛzaaya Na’am la wan basɛ ti nɛresaaleba woo ana kasi ge basɛ ti tinparɛ wa lebege paradiisi. Saŋa wa dela ‘sansɛka ti sɛla woo wan malum ana soŋa.’ (Tm. 3:21) La yuun pɔsɛ la yuun 1914 poan. Bem n yuun le malum ana soŋa? Naayinɛ yuun bobe la Yezu ti a dɛna Naba saazuo sa. Bala la, Yehowa yuun le tara la bisegadaana n ze’ele A na’arɛ bɔna Naba David tũusum poan. Ge daɣɛ nabumɔ ma’a ti Yehowa yuun le basɛ ti la bɔna. La yuun ka yue ti yelemɛŋɛrɛ pu’usegɔ le malum bɔna! (Isa. 2:​2-4; Eze. 11:​17-20) La wan le sa’am yoi?

10. (a) Baaabule la tɔɣɛ yelemɛŋɛrɛ pu’usegɔ yele la wani tomam saŋa wa? (Isaiah 54:17) (b) Beni n sɔi ti yetɔɣebiŋ’a wa kɛ̃’ɛra suure?

¹⁰ Kaalɛ Isaiah 54:17. Ti’isɛ yetɔɣebiŋere wa yele bisɛ: ‘Zaberɛ lɔɣeseko woo ti ba maalɛ ti ba dekɛ zabɛ la hɔ, kan ta’an ze’ele la hɔ’! Yetɔɣebiŋere wa sirum tum tuuma mɛ zina beere wa. Subuɣelegɔ yele wa me tum tuuma la zina beere wa: ‘Yehowa wan pa’alɛ ho dayɔɔsi, ti suma’asum n ka tari ba’asegɔ bɔna ho kɔma la zuo. Ho wan sɛ ze’ele tontɔɔ tuuma poan. Ho kan zɔta dabeem la sɛsɛla, sɛla n sɔi la yele ana kan lɛm hɔ.’ (Isa. 54:​13, 14) Hali ‘tingɔŋɔ wa yinɛ’ n de Sitaana ka tari paŋa n wa’an ta’an gu Yehowa nɛreba ti ba kan mɔɔlɛ Na’am la yelesoma la. (2 Ko. 4:4) Yelemɛŋɛrɛ pu’usegɔ le malum bɔna mɛ. Sɛla ka boi n wan sa’am ka leyɛ’ɛsa. La wan kɔ’ɔn bɔna la bala ka tara ba’asegɔ. Zaberɛ lɔkɔ ka boi n wan ta’an ze’ele la tɔ!

 BEM N WAN EŊƐ?

11. Bem n basɛ ti to tara puti’irɛ ti looredoma la san keŋɛ saazuo, nɛrekuuŋɔ la kan ana saii?

¹¹ Bem n wan eŋɛ, looredoma la san keŋɛ saazuo? Tɛ̃ra ti Yezu n de to Dunkeena. Eŋa n de Kristakɔma tansugere la nɛŋadaana. Yezu mea yuun yeti: ‘Ya nɛŋadaana dela ayina, Krista la.’ (Mt. 23:10) To Naba wa wan kelum bisera a nɛreba mɛ saŋa woo. Krista n wan bisera ba la zuo, a podɔleba n boi tinparɛ wa zuo ka nari ti ba zɔ dabeem la sɛsɛla. Yelemɛŋɛrɛ, to ka mi sankaŋa la, Krista n wan ta bisera a nɛreba se’em. Bala, basɛ ya ti to bisɛ Baabule yɛla ase’a n wan ta’an buɣelɛ to suure.

12. Yehowa yuun bisɛ a nɛreba la wani (a) Moses n yuun ta ki la? (b) se’em ma’a ti a tee tuunɛ bo Eliya la? (Bisɛ foote la.)

¹² Moses yuun ki mɛ ge ti Israeldoma la ta kɛ̃ Pu’ulumbiŋere Tiŋa la. Bem n yuun paɛ Naayinɛ nɛreba? Moses n yuun ki la, Yehowa yuun ka le soŋera Israel nɛreba yoi? A yuun soŋeri ba mɛ. Ban yuun tari sakerɛ la zuo Yehowa yuun bo ba sɛla woo n pakɛ ba. Ge ti Moses yuun ta ki la, Yehowa yuun yele en yeti a loe Yosua ti a bɔna a nɛreba la nɛŋa. Moses yuun kumesɛ Yosua mɛ yuuma zo’e zo’e poan. (Yɛh. 33:11; Tɛɛ. 34:9) Leyɛ’ɛsa, buraasi zo’e zo’e n yuun boi nɛreba la nɛŋa. Nɛŋadoma la basɛba yuun biseri la tusa, ti basɛba bisera kɔbesi, ti basɛba bisera pinuu, ti basɛba me bisera pia. (Tɛɛ. 1:15) Ba yuun bisɛ Naayinɛ nɛreba la soŋa. Eliya me yuun eŋɛ la bala mea nɔɔ. A yuun eŋɛ la ania yuuma zo’e zo’e poan soŋɛ Israeldoma la ti ba pu’usa Yehowa soŋa. Ge pooren, Yehowa yuun tari en keŋɛ la Yuda ti a ta tum tuunɛ. (2 Na. 2:1; 2 Yel. 21:12) Eliya n yuun ka boi la, Israel buuri pia la yuun ka le nyɛta soŋerɛ yoi? Ba yuun nyɛti. Eliya yuun puɣum kumesɛ Elisa mɛ yuuma zo’e zo’e ge nyaa keŋɛ. Leyɛ’ɛsa, ba me yuun kumesɛ ‘nɔdɛ’ɛseba dayɔɔsi’ n yuun tigese bamea bɔna. (2 Na. 2:7) Bala la, buraasi n yuun tari sakerɛ yuun boi mɛ n wan ta’an soŋɛ Naayinɛ nɛreba. Yehowa yuun kɔ’ɔn basɛ ti a puti’irɛ n boti sɛla tum mɛ ge me yuun bisa a yamesi.

13. Hebru 13:5b basɛ ti to tara suure lua la bem poan? (Bisɛ foote la.)

¹³ Ton nyaa baŋɛ yele ana za’a la, hon ti’isɛ ti bem n wan eŋɛ looredoma la za’a san ta keŋɛ saazuo? La daɣɛ to ti’isa buyi buyi. Baabule la basɛ ti to tara  suure lua ti: Yehowa kan malum zaɣesɛ a nɛreba n boi tinparɛ wa zuo. (Kaalɛ Hebru 13:5b.) Wuu Moses la Eliya la, loore Kristakɔma fii n boi to nɛŋa zina beere wa la bisɛ ti la yele pakɛ mɛ ti ba kumesɛ nɛreba basɛba. Yuuma zo’e zo’e n wana ti Tigere Zuo Bisegadoma la kumesa buraasi n pa’asɛ piisi sise’esi la poan ti ba bɔna nɛŋa bisera. Makerɛ, ba eŋɛ la maaseŋɔ kumesa keendoma, gingilega kaarɛ bisegadoma, Tigere Yile Bisegadoma, Betel bisegadoma la satiŋa na’am yetɔɣum yalegerɛdoma. Tigere Zuo Bisegadoma la mea me kumesɛ la soŋereba ti ba bɔna ba committee la poan soŋera. Soŋereba wa tari la tuunkãra zo’e zo’e tuna. Ba kɔ’ɔn maasum mɛ ti ba kelum bisera Krista piisi la, looredoma la san ta keŋɛ saazuo.

14. Yelekpina la dela bem to sɔsega wa poan?

¹⁴ To sɔsega la yelekpina n wana: Ba san tari loore Kristakɔma sɛba n gee la keŋɛ saazuo mɛlesekatɛ la ba’asegɔ bɔba, yelemɛŋɛrɛ pu’usegɔ wan kelum bɔna tingɔŋɔ wa zuo. Yezu Krista n de nɛŋadaana la zuo, Yehowa yamesi kan malum basɛ a pu’usegɔ. To mi ti sankaŋa la, tisi n naɛ taaba ti Baabule la yi’ira ba ti Gog n boi Magog la wan isige zabɛ la Naayinɛ nɛreba. (Eze. 38:​18-20) Ge zabekaŋa kan ta’an eŋɛ sɛsɛla; la kan ta’an gu Naayinɛ nɛreba ti ba kan pu’usa En. Yehowa wan faaɛ ba basɛ! Liligere poan, tuuntuna Yon yuun nyɛ la ‘nɛrekuuŋɔ’ n de Krista piisi sise’esi la. Ba yuun yele Yon ti ‘nɛrekuuŋɔ’ wa ze’ele la ‘mɛlesekãtɛ la poan yese na.’ (Lil. 7:​9, 14) Yelemɛŋɛrɛ, ba wan kɔ’ɔn bɔna fai!

15-16. Wuu Liligere 17:14 n pa’alɛ se’em la, Krista looredoma la wan ta eŋɛ la bem Armagedon zaberɛ la poan ge beni n sɔi ti bala dɛna giilekpeŋere bɔ’ɔra tɔ?

¹⁵ Nɛreba basɛba ta’an kelum ti’isa ti: ‘Looredoma la wan ta eŋɛ la bem ba san keŋɛ saazuo? Baabule la basɛ ti to baŋɛ lebesego la. La pa’alɛ ti tingɔŋɔ wa nalɛɣereba wan ‘zabɛ la Pebila la.’ Yelemɛŋɛrɛ la dela, ba kan zabɛ nyaŋɛ. Baabule la yeti: ‘Pebila la wan zabɛ nyaŋɛ  ba.’ Bani n wan soŋɛ en? La tɔkɛ yeti, sɛba ti ba ‘loe’ ti ba tara ‘yelemɛŋɛrɛ’ la. (Kaalɛ Liligere 17:14.) Ba dela bani? Ba dela looredoma la n wan keŋɛ saazuo la! Bala la, looredoma sɛba n gee la san ta keŋɛ saazuo mɛlesekatɛ la ba’asegɔ bɔba, tuunsɛka n deŋɛ nɛŋa ti ba wan tum dela ba zabɛ. Bisɛ lan de tuunkãtɛ se’em! Loore Kristakɔma la basɛba yuun mi zaberɛ mɛ ge nyaa ta dɛna Yehowa Sɛɛradoma. Basɛba yuun dela soogɛpa. Ge pooren, ba yuun zamesɛ baŋɛ ti la nari ti ba tara suma’asum la nɛreba ge nyaa ta dɛna Kristakɔma. (Ga. 5:22; 2 Tes. 3:16) Ba ka le dekɛ bamea pa’asɛ zaberɛ poan. Ge ba san isige ba ti ba keŋɛ saazuo, bamam la Krista, la malesi la, wan naɛ taaba zabɛ Naayinɛ dindoma ba’asegɔ zaberɛ la poan.

¹⁶ Ti’isɛ yele wa bisɛ! Loore Kristakɔma la basɛba n boi tinparɛ wan zuo kuregɛ mɛ ti ba inya ka bara. Ge ba san ta isige ba ti ba keŋɛ saazuo, ba wan tara paŋa ge kan malum ki. Ba wan naɛ la Yezu Krista n de Zabezabera Naba la zabɛ. Ba san ta zabɛ Armagedon zaberɛ la ba’asɛ, ba wan naɛ la Yezu tum soŋɛ nɛresaaleba ti ba ana kasi. Nɔkpe’ene kai ti, ba san bɔna saazuo, ba wan soŋɛ ba mabiisi n boi tinparɛ wa zuo la soŋa gana ban yuun ka di mi’a bɔna tingɔŋɔ wa zuo la!

17. To eŋɛ la wani baŋɛ ti Naayinɛ nɛreba wan bɔna fai Armagedon zaberɛ la poan?

¹⁷ Hon pa’asɛ la piisi sise’esi la poan? San dɛna bala, bem n nari ti ho eŋɛ Armagedon zaberɛ la san ta pɔsɛ? Lan wana: Dekɛ homea delum Yehowa ge dɔla a pa’alegɔ. Bala pa’alɛ la bem? Baabule la buɣelɛ to suure ti: ‘Kɛ̃ ya saraa poan, yu yamea basɛ sa. Suɣɛ yamea fii gura ti Naayinɛ sunsɔa nyiisum la ta ba’asɛ.’ (Isa. 26:20) Sankaŋa la, Naayinɛ yamesi n boi saazuo la tinparɛ wa zuo wan ta bɔna fai. Wuu tuuntuna Paul la, to mi soŋa soŋa ti ‘gɔmɛtdoma bii yelese’a n iti zina wa bii sɛla n wan wa’an pooren na ka boi n wan ta’an basɛ ti Naayinɛ kan nɔŋɛ tɔ.’ (Arom 8:​38, 39) Kɔ’ɔn tɛ̃ra ti: Yehowa nɔŋɛ ho mɛ, a me kan malum zaɣesɛ hɔ!