1-2. Bem n wan ta’an soŋɛ tɔ ti to bɔkɛ lan yuun ani Yehowa se’em ban yuun sa’am a yu’urɛ la?

 GEELE makerɛ wa bisɛ: Nɛra ti ho nɔŋɛ en ti a wike yele dɔɣelɛ ho zuo. Ho mi ti yele la daɣɛ yelemɛŋɛrɛ ge nɛreba basɛba sakɛ mɛ. Hali sɛla ti ba eŋɛ ti la gaŋɛ nu’usi dela, ba me tɔɣeri bɔ’ɔra la nɛreba ti bamam me sakɛ bala. La wan ana hon la wani? Ho san nɔŋɛ nɛreba ge me bɔta ti ho tara yusonɛ, pumpɔreŋɔ yele la wan basɛ ti ho suure sa’am, daɣɛ bala?—Mag. 22:1.

² Makerɛ wa basɛ ti to bɔkɛ la lan yuun ani Yehowa se’em ban yuun sa’am a yu’urɛ la. A malesi la ayima yuun parum a yele bo la yia pɔka, Hawa. Hawa me yuun sakɛ pumpɔreŋɔ yele la mɛ. Pumpɔreŋɔ yele la zuo ti Adam la Hawa yuun eŋɛ kpenkpasi la Yehowa. Bala zuo ti be’em la kum taɛ asaala woo. (Pin. 3:​1-6; Arom 5:12) Sitaana n yuun parum Eden gaadin la poan la zuo ti yeledaaŋɔ la za’a n boi tinparɛ wa zuo n de wuu kum, zaberɛ la namesegɔ paara tɔ. Pumpɔreŋɔ yele wa n ta’asɛ yelese’a la daani Yehowa mɛ? Nɔkpe’ene kai ti la daani en mɛ. Yehowa ka tɔi laɣɛ laɣɛ bii a ugera yɛla ge a tuɣum dɛna la ‘pupeelum Naayinɛ.’—1 Tim. 1:11.

3. To tari yɔ’ɔ ti to eŋɛ la bem?

³ To wan ta’an laɣum soŋɛ ge eŋɛ pa’alɛ ti sɛla ti Sitaana parum bo Yehowa la daɣɛ yelemɛŋɛrɛ. To wan ta’an  eŋɛ bala to san nana nɔɔrɛ wa: ‘Pɛɣɛ ya Yehowa yu’urɛ la.’ (Ym. 113:1) To san tɔɣera Yehowa n eŋɛ yelesoma se’a za’a bɔ’ɔra nɛreba, la pa’alɛ ti to pɛɣeri la a yu’urɛ la. Hon wan eŋɛ bala pɛɣɛ Yehowa yu’urɛ la? Basɛ ya ti to geele ya yɛla atã n wan soŋɛ tɔ ti to ta’an pɛɣɛ to Naayinɛ la yu’urɛ, la to suure za’a.

TO SAN PƐƔERA YEHOWA YU’URƐ LA, A PUURƐ NI PEE MƐ

4. Beni n sɔi ti Yehowa puurɛ ni pee to san pɛɣera en? Bo makerɛ. (Bisɛ foote la.)

⁴ To san pɛɣera to saazuo Sɔ la yu’urɛ la, a puurɛ ni pee mɛ. (Ym. 119:108) Ge bala pa’alɛ ti Gaŋɛ Za’a Naayinɛ la ani me wuu asaala n ka di mi’a kɔ’ɔn bɔta ti ba pɛɣera ba, bamam n eeri giilekpeŋere la zuo? Aayi. Geele makerɛ wa bisɛ. Bia n kɔkɛ a sɔ ge yele en yeti, “Sɔ ka boi n ani wuu hon!” A sɔ la puurɛ pee mɛ ti a la mɔsi. Beni n sɔi? La daɣɛ ti sɔ la eeri la a bia la pɛɣɛ en ti la kpemese a giila. Ge lan tuɣum dɛna se’em dela, sɔ la puurɛ pee mɛ la a bia la n eŋɛ pa’alɛ ti a nɔŋɛ en mɛ la. Sɔ la mi ti a bia la san ita wana, a wan tara pupeelum a vom poan. Bala mea nɔɔ ti Yehowa, n de to za’a Sɔ la puurɛ ni pee to san pɛɣera en.

5. Sorekuni poan ti to san pɛɣera Yehowa yu’urɛ la, la pa’alɛ ti Sitaana dela pumpɔrema?

⁵ To san pɛɣera to saazuo Sɔ la, to iti pa’ala ti Sitaana n yuun yele sɛla la dela pumpɔreŋɔ. Sitaana yuun parum ti asaala kan ta’an tara yelemɛŋɛrɛ bɔ’ɔra Naayinɛ. A pa’alɛ ti to se’em sa’am kan ta’an dɛna birikina. A le yeti to san ka nyɛta nyuurɔ la ton pu’useri Naayinɛ la, to wan pisegɛ basɛ. (Yob 1:​9-11; 2:4) Ge Yob yuun kelum tara la yelemɛŋɛrɛ bɔ’ɔra Naayinɛ ti la pa’alɛ ti Sitaana dela pumpɔrema. Hon me wan kelum tara yelemɛŋɛrɛ bɔ’ɔra Naayinɛ? Tomam ayima ayima woo san tara yelemɛŋɛrɛ bɔ’ɔra to saazuo Sɔ la, to wan tɔɣɛ po’e a yu’urɛ la ti a puurɛ pee la tɔ. (Mag. 27:11) Bisɛ lan de yɔ’ɔkatɛ se’em ti to ita bala.

6. To wan ta’an tɔɣesa Naba David la Levidoma la, la wani? (Nehemia 9:5)

⁶ Sɛba n nɔŋɛ Yehowa la boti la ba yese ba suure za’a pɛɣera a yu’urɛ la. Naba David yuun yeti: ‘Mam suure wa, pɛɣɛ Yehowa. Mam wan pɛɣɛ a fa’a yu’urɛ la.‘ (Ym. 103:1) David yuun bɔkɛ ti a san pɛɣera Yehowa yu’urɛ la, a pɛɣeri la Yehowa mea. Yehowa yu’urɛ la ni basɛ ti to baŋɛ la eŋa n de nɛresɛka taaba. Bala ni basɛ ti to baŋɛ la eŋa n tari halesoma  se’em la a yelekiresi la. David yuun boti la a pɛɣɛ a saazuo Sɔ la yu’urɛ la ge basɛ ti la ana fa’a. A yuun boti la a yese a ‘suure za’a’ eŋɛ bala. Bala mea nɔɔ ti Levidoma la yuun pɛɣera Yehowa yu’urɛ la. Ba yuun sirege bamea sakɛ ti ba kan ta’an pɛɣera Yehowa zilam yu’urɛ la wuu lan nari se’em. (Kaalɛ Nehemia 9:5.) Nɔkpe’ene kai ti, Yehowa puurɛ yuun pee mɛ la ban yuun sakɛ bala ge kɔ’ɔn pɛɣera en la.

7. To wan eŋɛ la wani pɛɣera Yehowa to na’am mɔɔlegɔ tuuma, la to vom poan?

⁷ Zina beere wa, to san nɔŋɛ Yehowa ge ita pa’ala ti to puurɛ pee mɛ la en, a puurɛ ni pee mɛ. To san bɔna na’am mɔɔlegɔ poan, to puti’irɛ dela to soŋɛ nɛreba ti ba baŋɛ Yehowa ge pu’usa en wuu tomam n iti se’em la. (Yam. 4:8) To puurɛ ni pee mɛ ti to dekɛ Baabule la pa’alɛ nɛreba Yehowa n tari nɔŋerɛ, tontɔɔ gãkerɛ, yɛm, paŋa la hala ase’a se’em. To me san tiregɛ tɔɣesa Yehowa, to pɛɣeri la a yu’urɛ la ti a puurɛ pɛɛra. (Ep. 5:1) To san ita bala, to boi la to to’ore la tingɔŋɔ wa nɛreba. Nɛreba wan nyɛ ti to boi la to to’ore ge ɛɛra ba baŋɛ sɛla n sɔi. (Mt. 5:​14-16) Tomam la bamam san sɔsera, to ta’an pa’alɛ ba sɛla n sɔi ti to bɔna to to’ore. Wana me wan basɛ ti nɛreba bɔta ti ba vurege lɛm Naayinɛ. To san pɛɣera Yehowa wana, a puurɛ ni pee mɛ.—1 Tim. 2:​3, 4.

YEZU PUURƐ NI PEE MƐ TO SAN PƐƔERA YEHOWA YU’URƐ LA

8. Sorekuni poan ti Yezu deŋɛ nɛŋa pɛɣɛ Yehowa yu’urɛ la?

⁸ Nɛra ka boi saazuo bii tinparɛ wa zuo n mi Yehowa gana Yezu. (Mt. 11:27) Yezu nɔŋɛ a Sɔ la mɛ ge me dɛna se’em n deŋɛ nɛŋa pɛɣɛ Yehowa yu’urɛ la. (Yon 14:31) Yu’unseko ti Yezu yeti a ki la, a yuun zusɛ a Sɔ la mɛ tɔɣɛ pa’alɛ eŋa n ta’an tum sɛla a na’am mɔɔlegɔ tuuma la poan. A yeti: ‘Mam basɛ ti ba baŋɛ ho yu’urɛ la mɛ.’ (Yon 17:26) A yuun boti a pa’alɛ la bem?

9. Yezu yuun dekɛ makerɛ tɔɣɛ pa’alɛ a Sɔ yele la wani?

⁹ Yezu yuun ka yeen yele nɛreba ti Naayinɛ yu’urɛ dela Yehowa. Yudadoma ti Yezu yuun pa’ala ba la yuun puɣum mina Naayinɛ yu’urɛ mɛ. Ge la dela Yezu n de ‘mina n yuun basɛ ti ba baŋɛ Yehowa n ani se’em.’ (Yon 1:​17, 18) Makerɛ, Hebru Gulesegɔ la pa’alɛ ti Yehowa tari la nimbɔ̃zore la giile. (Yɛh. 34:​5-7) Yezu yuun basɛ ti yele wa niɛ peelumi mɛ eŋa n yuun bo biyaalega la n lebe a sɔ zɛ’an makerɛ la. Sɔ la n nyɛ a bia ti ‘a bɔna sore zuo kena na’ la, a yuun zɔ tu’usɛ en mɛ, kɔkɛ en ge yese a suure poan di sugeri bo en. Bala basɛ ti to baŋɛ Yehowa n tari nimbɔ̃zore la giile se’em mɛ. (Lu. 15:​11-32) Yezu yuun soŋɛ nɛreba ti ba baŋɛ a Sɔ la n sirum ani se’em.

10. (a) To eŋɛ la wani baŋɛ ti Yezu yuun yi’iri a Sɔ yu’urɛ la mɛ ge bɔta ti nɛreba me ita bala? (Mark 5:19) (Bisɛ foote la.) (b) Yezu boti to ita la bem zina beere wa?

¹⁰ Yezu yuun boti la nɛreba yi’ira a Sɔ la yu’urɛ yoi? Ɛɛ. Pu’usegɔ nɛŋadoma basɛba yuun ti’isɛ ti Yehowa yu’urɛ la ba’ɛ ana la zilam ti la ka nara ti nɛreba yi’ira ku. Ge Yezu yuun ka basɛ ti ba puti’irɛ la n ka makɛ la gulesegɔ la gu en ti a kan na’asa a Sɔ yu’urɛ la. Geele bisɛ se’em ma’a ti Yezu yuun tibɛ burasɛka ti kolekpabɛ’ɛsi yuun daana en Gerasa tiŋa la. Dabeem n yuun tari nɛreba la ti ba belum Yezu ti a yese tiŋa la poan, bala a me  yuun yese tiŋa la poan mɛ. (Mr. 5:​16, 17) Ge Yezu yuun kelum bɔta ti nɛreba la baŋɛ Yehowa yu’urɛ la mɛ. Bala la, a yuun yele buraa la ti a tibɛ en la ti a yele nɛreba la Yehowa n eŋɛ sɛla bo en ge daɣɛ eŋa Yezu n eŋɛ sɛla bo en. (Kaalɛ Mark 5:19.) a Zina beere wa me, a kelum bɔta la nɛreba baŋɛ a Sɔ yu’urɛ tingɔŋɔ wa za’a poan! (Mt. 24:14; 28:​19, 20) To san ita bala, to Naba Yezu puurɛ wan pee.

11. Yezu yuun pa’alɛ a podɔleba ti ba zusa ɛɛra la bem ge bem zuo ti la yele yuun pakɛ? (Ezekiel 36:23)

¹¹ Yezu yuun mi ti Yehowa puti’irɛ n de se’em dela a basɛ ti a yu’urɛ la ana zilam ge ka tara dɛɣerɔ. Bala n sɔi ti to Daana la yuun pa’alɛ a podɔleba la ti ba zusa yeti: ‘To Sɔ n boi saazuo sa, basɛ ti ho yu’urɛ la ana zilam.’ (Matt. 6:9) Yezu yuun bɔkɛ ti yeledena wa n pakɛ bunvɔa woo. (Kaalɛ Ezekiel 36:23.) Maleka bii nɛresaala ka boi n tabelɛ eŋɛ sɛla ti la gana Yezu n basɛ ti Yehowa yu’urɛ la ana zilam se’em la. Ge Yezu dindoma la n yuun nyɔkɛ en la, ba yuun parum ti a ka tari gilema bɔ’ɔra a Sɔ la. Yezu yuun mi ti a san zɛregɛ bii sa’am a Sɔ yu’urɛ la, bala dela be’em n gani za’a. A suure yuun sa’am mɛ ti ba wan gãkɛ en ti a tum la be’em. La yuun ta’an dɛna ti, bala n yuun basɛ ti ‘la wuna’ Yezu lan yuun ta gee fii la ba nyɔkɛ en la.—Lu. 22:​41-44.

12. Sodeni poan ti Yezu yuun na’asɛ a Sɔ yu’urɛ la ti la ka tara makerɛ?

¹² Yezu n yuun boti a na’asɛ a Sɔ la yu’urɛ la n sɔi ti a yuun ŋmibe mɛlesegɔ, tuurɛ la pumpɔreŋɔ yɛla woo poan. A yuun mi ti a nani a Sɔ la mɛ sɛla woo poan, bala la valum yuun ka tari en. (Heb. 12:2) A me yuun mi ti Sitaana n ta’asɛ yele aŋa za’a. (Lu. 22:​2-4; 23:​33, 34) Sitaana yuun ka boti Yezu tara a birikinte la. Ge la bala za’a Sitaana yuun ka nyaŋɛ. Yezu yuun eŋɛ wana wa pa’alɛ ti Sitaana sirum dela pumpɔrema ge basɛ ti a baŋɛ ti Yehowa tari yamesi n tari yelemɛŋɛrɛ bɔ’ɔra en mɛ hali la biɣi biɣi saŋa poan.

13. Ho wan eŋɛ la bem ta’an pee ho saazuo Naba la puurɛ?

 ¹³ Hon boti ho ita sɛla n wan basɛ ti ho saazuo Naba la puurɛ pee? Kɔ’ɔn pɛɣera Yehowa yu’urɛ la ge soŋɛ nɛreba ti ba baŋɛ to Naayinɛ la n de mina. Ho san ita bala ho tɔɣeseri la Yezu. (1 Pe. 2:21) Wuu Yezu la, to wan basɛ ti Yehowa puurɛ pee ge basɛ ti nyanɛ di Sitaana n de pumpɔrema la.

TO SAN PƐƔERA YEHOWA YU’URƐ LA, TO WAN BASƐ TI NƐREBA NYƐ FAARƐ

14-15. To san pa’ala nɛreba Yehowa yɛla, la wan soŋɛ ba la wani?

¹⁴ Sodeni poan ti to san pɛɣera Yehowa yu’urɛ la, nɛreba wan nyɛ faarɛ? Yele la dela, Sitaana n ‘pĩ sɛba n ka tari sakerɛ la puti’ira.’ (2 Ko. 4:4) Bala la, ba sakɛ Sitaana pumpɔreŋɔ la n de wuu Naayinɛ ka boi, Naayinɛ zaaɛ mɛ la tɔ ge me ka fabela nɛreba yele, Naayinɛ dela putɔa ge me mɛlesa nɛreba daarewoo. A yuun parum yele ana wa za’a ti a sa’am la Yehowa yu’urɛ la ge gu nɛreba ti ba da ana du’a du’a la en. Ge to san kelum mɔɔla Yehowa yɛla, to wan gu Sitaana ti a kan ta’an eŋɛ eŋa n boti a eŋɛ sɛla la. To san pa’ala nɛreba Yehowa yɛla ge pɛɣera a yu’urɛ la, to wan nyɛ la bem nyuurɔ?

¹⁵ Yelemɛŋɛrɛ la n boi Naayinɛ Yelesum la poan la tari la paŋa. Tomam n pa’ali nɛreba Yehowa yele la basɛ ti to sirum baŋɛ eŋa n ani se’em. Sitaana pumpɔreŋɔ yɛla la ka le pĩ nɛreba puti’ira. Bala n basɛ ti ba mina to Sɔ la hala la wuu tomam n mi a se’em la. La dela ɔmi’isa bɔ’ɔra ba la eŋa n tari paŋa ti la ka tara makerɛ la. (Isa. 40:26) Eŋa n iti a yɛla woo tontɔɔ la zuo ba dekɛ bamea delum en mɛ. (Tɛɛ. 32:4) Ba zamesɛ baŋɛ la eŋa n tari yɛm ti la ka tara makerɛ se’em. (Isa. 55:9; Arom 11:33) La dela subuɣelegɔ bɔ’ɔra ba la ban baŋɛ ti Naayinɛ n de nɔŋerɛ la. (1 Yo. 4:8) Ban ani du’a du’a la Yehowa la zuo, ba tari puti’irɛ ti ba wan vɔna daarewoo. Bisɛ lan de yɔ’ɔkãtɛ se’em ti to soŋɛ nɛreba ti ba ana du’a du’a la to Sɔ la! To san ita  bala, Yehowa wan geele to ti to dela a ‘tuuntuneba tadaandoma.’—1 Ko. 3:​5, 9.

16. Nɛreba basɛba suure ni sukɛ la wani ba san zamesɛ baŋɛ Naayinɛ yu’urɛ la? Bo makerɛ.

¹⁶ Yia la, to ta’an pa’alɛ nɛreba ti Naayinɛ yu’urɛ dela Yehowa. Bala ma’a ta’an kɛ̃ sɛba n tari putɛsonɛ la suure. Makerɛ, pɔka ayima yu’urɛ n de Aaliyah b yuun daɣɛ Kristabia. A pu’usegɔ la yuun ka basɛ ti a ana du’a du’a la Naayinɛ. Eŋa n yuun pɔsɛ zamesa la Sɛɛradoma la, a yuun nyaa baŋɛ ti Naayinɛ dela a Zɔ. La yuun eŋɛ en la pakerɛ la eŋa n yuun zamesɛ baŋɛ ti ba yese Naayinɛ yu’urɛ Baabula zo’e zo’e poan mɛ ge tee gulesɛ na’asegɔ yu’urɛ n de wuu Daana eŋɛ bim la. Eŋa n yuun zamesɛ baŋɛ Yehowa yu’urɛ la yuun basɛ ti a vom tee mɛ. A yeti: “Mam Zɔsonkɔ la tari yu’urɛ mɛ!” La soŋɛ en la wani? A yeti: “Nananawa, mam nyaa tari la suma’asum. Mam zuo zɛ̃kɛ mɛ la mam n baŋɛ wana wa la.” Buraa ayima ti a yu’urɛ dɛna Steve dela Yuda nɛra ge le dɛna yuunyuuna. A yuun yese amea mɛ pu’usegɔ yɛla poan, ba nigum nigum tuuma la zuo. Ge a ma n yuun ki la, a yuun sakɛ ti a wan basɛ ti Yehowa Sɛɛradaana zamesɛ en Baabule la. A suure yuun sukɛ mɛ la eŋa n yuun zamesɛ baŋɛ Naayinɛ yu’urɛ la. A yeti: “Mam ka makɛ mina Naayinɛ yu’urɛ.” A le yeti: “Mam yuun nyaa bɔkɛ ti Naayinɛ sirum boi mɛ. Mam yuun baŋɛ ti a dela Se’em n boi. Mam yuun nyaa mi ti n nyɛ la Zɔ.”

17. Bem zuo ti hon lu ho suure ti ho wan kɔ’ɔn pɛɣera Yehowa yu’urɛ la? (Bisɛ foote la.)

¹⁷ Ho na’am mɔɔlegɔ tuuma la poan, hon ni pa’alɛ nɛreba Yehowa yu’urɛ la? Hon ni soŋɛ ba ti ba baŋɛ Naayinɛ n sirum de nɛresɛka? Ho san ita bala ho pɛɣeri la Naayinɛ yu’urɛ la. Kɔ’ɔn pɛɣera Yehowa zilam yu’urɛ la ge soŋɛ nɛreba ti ba baŋɛ eŋa n de nɛresɛka. Ho san ita bala, ho wan basɛ ti nɛreba nyɛ nyɔvore. Bala me wan pa’alɛ ti ho tɔɣeseri la to Naba Krista Yezu. Sɛla n gani bala dela, ho wan basɛ ti to nɔŋerɛ Sɔ la puurɛ pee. Bala la, ‘kɔ’ɔn pɛɣera a yu’urɛ la daarewoo’!—Ym. 145:2.