NƐREBA zo’e zo’e ti’isɛ ti la nari ti ba ita bamam soŋa bii bɔ’ɔra ba gilema gana basɛba. Hali ba san puɣum bɔ’ɔra ba ban eeri sɛla, ba bisɛ ti la nari ti ba eŋɛ gaŋɛ bala. Sɛba n tari putɛ̃-ana wa kɔ’ɔn ti’isa la bamea ma’a yele ge ti ba puurɛ puɣum ka pee la ban tari sɛla. Baabule la yeti nɛreba wan ana la bala ba’asegɔ dabesa wa poan.—2 Tim. 3:2.

Yelemɛŋɛrɛ, nɛreba kɔ’ɔn ti’isa la ba ma’a yele. Makerɛ, Adam la Hawa yuun boti la bamea loe sɛla n de som la sɛla n de be’em. Bala n ta’asɛ ti wuŋerɛ paara to za’a la. Makerɛ ayima me dela Yuda Naba Uzia. A yuun ti’isɛ ti a wan nyaŋɛ nyɔ̃ ko’ɛnka pu’usegɔ yire la poan ge a yuun ka tari yɔ’ɔ ti a eŋɛ bala. (2 Yel. 26:​18, 19) Bala mea nɔɔ ti Fariseedoma, la Saduseedoma yuun ti’isa ti Naayinɛ nari ti a ita bamam soŋa gana nɛra woo se’ere n sɔi la bamam dela Abraham yaasi.—Mt. 3:9.

To naɛ la nɛresɛba n ti’iseri ba ma’a yele bɔna. Ba halebe’o la ta’an taɛ tɔ. (Ga. 5:26) Tomam me ta’an pɔsɛ ti’isa ti la nari ti ba ita to soŋa bii bɔ’ɔra to yɔ’ɔ ase’a gana basɛba. To wan eŋɛ la wani kan tara putɛ̃-ana wa? Yia, la nari ti to gɛɛla yɛla wuu Yehowa n geele a se’em la. To bisɛ ya Baabule naresum yɛla ayi n wan ta’an soŋɛ tɔ.

Yehowa n mi sɛla n ani soŋa bɔ’ɔra tɔ. Basɛ ya ti to bisɛ makerɛ wa.

• Yehowa boti la pɔɣeba bɔ’ɔra ba sireba gilema ge ti sireba me nɔŋɛ ba pɔɣeba. (Ep. 5:33) Nɛra la a pɔɣa nari ti ba ita yelese’a n pa’alɛ ti ba tari nɔŋerɛ bɔ’ɔra taaba. Ge la ka nari ti ba sarena la se’em n  daɣɛ ba pɔɣa bii ba sira. (2 Ko. 12:3) Kɔma nari ti ba nana ba dɔɣereba, ti dɔɣereba me nɔŋɛ ba kɔma ge bisera ba soŋa.—2 Ko. 12:14; Ep. 6:2.

• Yehowa yeti to nari ti to bɔ’ɔra keendoma n boi tansugere la poan gilema la ba tunkpe’eŋo la. (1 Tes. 5:12) Bala mea nɔɔ ti keendoma ka nara ti ba pɛ̃regera mabiisi ti ba eŋɛ sɛla.—1 Pe. 5:​2, 3.

• Naayinɛ bo asaala gɔmɛt yɔ’ɔ ti ba tɔ’ɔsa lampo ge ti nɛreba la me bɔ’ɔra gɔmɛt la gilema.—Arom 13:​1, 6, 7.

Yehowa bo’ori to gana sɛla n nari tɔ. Ton ka di mi’a la zuo, to nari la kum. (Arom 6:23) Ge Yehowa n nɔŋɛ to la zuo, a kã’ari bɔ’ɔra to mɛ. (Ym. 103:​10, 11) La daɣɛ la to nari mɛ ti a bɔ’ɔra to yele ana wa za’a ge eŋa n nɔŋɛ tɔ ge ti a itisoŋɔ ka tara makerɛ la zuo ti a bɔ’ɔra tɔ.—Arom 12:​6-8; Ep. 2:8.

Bisɛ homea soŋa la nɛreba n ti’iseri se’em zina beere wa la. To ta’an pɔsɛ ti’isa ti tomam nari ti ba ita to soŋa gana basɛba ge ka mina. Yezu yuun bo la makerɛ n pa’alɛ tɔ ti la wan ta’an dɛna naana ti to ti’isa bala. A yuun yeti tuntuneba la sakɛ ti ba wan tum dabeserɛ la za’a ge to’e dabeserɛ yinɛ yɔɔrɛ. Pooren ti va’amdaana la ɛ tuntuneba basɛba wa’ana pa’asɛ. Yinɛ n ta lu la, a yɔ ba za’a la buyina, hali la sɛba n wa’an zaanɔɔrɛ la. Ge sɛba n wa’an bulika la ti’isɛ ti la nari ti ba yɔ bamam gaŋɛ sɛba n wa’an zaanɔɔrɛ la se’ere n sɔi la ba kɔ’ɔn tum mɛ dabeserɛ la za’a. (Mt. 20:​1-16) Yezu makerɛ la pa’alɛ a podɔleba la ti ba basɛ ti ba puurɛ pee la sɛla ti Yehowa ita bɔ’ɔra ba la.

Basɛ ti ho puurɛ pee la hon tari sɛla ge da kɔ’ɔn bɔta ti nɛreba bɔ’ɔra hɔ. (1 Tes. 5:18) Tɔɣesa tuntuna Paul. La boi bim ti la yuun nari ti mabiisi la n boi Korint la soŋɛ en ge a yuun kɔ’ɔn ka ɛɛra inaanɛ poan lɔɣɔrɔ ba zɛ’an. (1 Ko. 9:​11-14) La nari ti to puurɛ pee la sɛla woo ti ba bɔ’ɔra to la ge da ɛɛra sɛla n gani bala.

Siregera homea. Nɛra san ba’ɛ ti’isa amea ma’a yele, a nyaa ni pɔsɛ ti’isa ti la  nari ti a tara gana eŋa n puɣum tara se’em la. Sirege n mea wan soŋɛ tɔ ti to kan tara putɛ̃-ana wa.

Nɔdɛ’ɛsa Daniel sirege n mea la dela makesonɛ bo to. Daniel ze’ele la yise’ere n tari yu’urɛ poan. A yuun som mɛ, tara mi’ilum ge me tana ita yɛla zo’e zo’e. Bala, a yuun ta’an ti’isa ti eŋa kɔ’ɔn nara mɛ ti ba bɔ’ɔra en gilema. (Da. 1:​3, 4, 19, 20) Daniel yuun kɔ’ɔn siregera la amea, bala n yuun basɛ ti a dɛna tuulum bɔ’ɔra Yehowa.—Da. 2:30; 10:​11, 12.

Basɛ ya ti to zaɣesɛ tingɔŋɔ wa halɛ la n de to ti’isa to ma’a yele la. To basɛ ti to puurɛ pee la yelese’a ti Yehowa ita bɔ’ɔra to la.