Mary la a sira John a kɛ̃’ɛri la zɛ’an ti ba wan ta’an mɔɔlɛ yelesoma la bo saama n tuni Philippines tiŋa. COVID-19 bã’a la n yuun wi’iri la, Mary yuun pɔsɛ ita la Baabule zamesegɔ. La daɣɛ la zɛ’an ti a ki’ira la ma’a ge zɛ’an woo. Mary yuun eŋɛ la wani eŋɛ bala?

Mary ni soke la a Baabule zamesegɔdaana la ti, “Hon mi nɛra ti a bɔta ti a zamesɛ Baabule la?” A san yeti ɛ̃ɛ, Mary nyaa ni yele a Baabule zamesegɔdaana la ti a dekɛ ba pa’alɛ en. Beni n sɔi ti soke ana yele pakɛ? Sɛla n sɔi la, nɛresɛba n nɔŋɛ Naayinɛ yelesum la ni bɔta la ba tɔɣera a yɛla bɔ’ɔra ba yidoma la ba zɔdoma. A nyɛ nyuurɔ la wani soke ana wa poan?

Mary Baabule zameseŋɔdaana Jasmin pa’alɛ en la nɛreba banaasi n boti ba zamesɛ Baabule la. Ayima dela Kristine. A puurɛ n pee la eŋa n zamesɛ sɛla la. Bala la, a yuun yele Mary ti a zamesa en sugumnɔɔrɛ buyi bakwai poan. Mary soke en ti a mi nɛra n boti a zamesɛ Baabule la, ti Kristine yeti, “Ɛ̃ɛ, mam wan deke n zɔ pa’alɛ hɔ.” Bakwai fii pooren, Kristine le dekɛ la a zɔdoma banaasi n boti ba zamesɛ Baabule la pa’alɛ Mary. Pooren ti a zɔdoma la me dekɛ en pa’alɛ nɛreba basɛba n boti ba zamesɛ Baabule la.

Kristine me boti la a yidoma n boi Philippines tiŋa zamesɛ Baabule la. A tɔɣɛ bo la a bipugela Andrea. Yia la, Andrea ti’isi ti, ‘Yehowa Sɛɛradoma dela kolekpatuuma tigere, ba ka sakɛ bo Yezu, ba me tari la Old Testament la ma’a tuna tuuma.’ Ge a yuun baŋɛ ti eŋa n ti’iseri Yehowa Sɛɛradoma yele se’em la daɣɛ yelemɛŋɛrɛ. A san ni zamesɛ yelepaalɛ Baabule la poan, a ni yeti “Lan boi Baabule la poan la zuo, yelemɛŋɛrɛ la n bala!”

Pooren ti Andrea le dekɛ a zɔdoma bayi, la a tuuma tadaana pa’alɛ en ti ba pɔsɛ zamesa Baabule la. Andrea yuun tari la puɣera ayima ti a yu’urɛ dɛna Angela. A yuun dela fua ge ni kɔ’ɔn kɛlesa se’em ma’a ti Mary zamesa la Andrea la ge Mary yuun ka mi. Daarɛ deyima ti Angela yele Andrea ti a dekɛ en pa’alɛ Mary ti a wa’ana zamesa en Baabule la. Angela yuun nɔŋɛ eŋa n zameseri sɛla la mɛ. Ŋmarega ma’a ti a puɣum kɔ’ɔn tɛ̃ra Baabule gulesegɔ la zo’e zo’e ge bɔta ti a zamesɛ sugumnɔɔrɛ bunaasi bakwai la poan! Andrea yuun soŋɛ en mɛ ti a ta’an kɔnɛktera zamesegɔ saŋa woo videoconferencing poan.

 Mary n yuun baŋɛ ti Kristine sira Joshua yuun ni zĩ’a mɛ ge kɛlesa se’em ma’a ti a ni zamesa la Kristine la, a yuun soke en ti a wan bɔta ti a zamesɛ Baabule la. Joshua yeti, “Mam yeen bɔta la n kɛlesa ge da soke mam sɛla; ho san soke mam sɛla, mam wan isige.” Mita anuu poan ti Joshua kɔ’ɔn pɔsɛ sɔkera yɛla ge me bɔta ti a zamesɛ Baabule la.

Mary sokere wa basɛ ti nɛreba zo’e zo’e pɔsɛ zamesa la Baabule. A yuun eŋɛ la maaseŋɔ ti mabiisi basɛba naɛ la ba zamesa. Mary n soke sokere wa la zuo, nɛreba 28 n boi tisi to’ore to’ore n pɔsɛ zamesa Baabule la.

Jasmin n de se’em ti Mary pɔsɛ zamesɛ la en Baabule la yuun muse ko’om la April 2021. Kristine me muse ko’om la May 2022. Eŋa la a deodoma nyaa boi la Philippines tiŋa. Pɔɣesi bayi la ti Kristine dekɛ ba pa’alɛ Mary ti ba me zamesɛ Baabule la nyaa muse la ko’om. La ka yue ti Angela me yuun muse ko’om ge pɔsɛ daarewoo sore ŋmɛ’a tuuma. Kristine sira Joshua, la ba bipugela Andrea, la nɛreba bayopɔi n kɔ’ɔn nyɛta nɛŋa tɔlega.

Yuun kɔbesɛka n deŋɛ nɛŋa la, nɛreba zo’e zo’e yuun ni yele la ba yidoma la ba zɔdoma bamam n zamesɛ sɛla Yezu zɛ’an. (Yon 1:​41, 42a; Tm. 10:​24, 27, 48; 16:​25-33) Ho me ta’an soke ho Baabule zamesegɔdoma, la sɛba n boti ba zamesɛ Baabule la ti, “Hon mi nɛra n boti a zamesɛ Baabule la?” Ho san soke nɛreba sokese’ere n de naana wa, ho wan ta’an nyɛ nɛreba n boti ba zamesɛ Baabule la.