ZASEŊƆ 7
YUUNƐ 15 Praise Jehovah’s Firstborn! (Pɛ̃ɣɛ Yehowa Dayɔdiiŋa La!)
To Nyɛti Nyuurɔ La Wani La Yehowa N Diti Sugeri Se’em La
‘Hon sirum diti sugeri.’—YM. 130:4.
YELEKPINE
To wan geele maɣesa n boi Baabule la poan n pa’alɛ Yehowa n diti sugeri ti la bɔna de to’ore se’em. Zaseŋɔ wa wan soŋɛ tɔ ti to puurɛ pee la Yehowa sugeri dia la.
1. Nɛra san yeti a di sugeri bo ho mɛ, la ta’an pa’alɛ la bem?
HO SAN wum ti nɛra yele ho ti, “Mam di sugeri bo ho mɛ,” ho puurɛ ni pee mɛ ti la ana ho mama yele yele wuu ho san tue nɛra la ti a yele ho bala. Ge la ta’an kelum kpe’em bo ho ti ho bɔkɛ “mam di sugeri bo ho mɛ” n sirum pa’alɛ sɛla. La ta’an dɛna ti a boti a yeti ya kelum dɛna la zɔta. Bii a boti a yeti ya zɔtɔ nyɔka la kan le ana wuu lan daa ani se’em la. Bala la, nɛra san yeti a di sugeri bo ho mɛ, la ta’an pa’alɛ yɛla zo’e zo’e.
2. Gulesegɔ la tɔɣɛ Yehowa sugeri dia yele la wani? (Bisɛ tiŋanɔɔrɛ yelesum la.)
2 Yehowa n diti sugeri bɔ’ɔra nɛresaaleba n ka di mi’a se’em la boi la de to’ore la tomam n diti sugeri bɔ’ɔra taaba se’em la. Nɛra ka boi n wan ta’an di sugeri wuu Yehowa la. Yuumadaana la tɔɣɛ Yehowa yele ti, ‘Hon sirum diti sugeri, bala zuo ti ho zoolum bɔna la.’ a (Ym. 130:4) Yehowa sugeri dia la n ‘sirum de sugeri dia.’ Yehowa n pa’ali tɔ sugeri dia n de sɛla. Hebru gulesegɔ la poan, yelebire sɛka ti ba dekɛ tɔɣɛ pa’alɛ Yehowa sugeri dia la, ba ka makɛ dekɛ de tɔɣɛ pa’alɛ nɛresaala sugeri dia.
3. Sodeni poan ti Yehowa n diti sugeri se’em la bɔna de to’ore la nɛresaaleba n diti sugeri se’em la? (Isaiah 55:6, 7)
3 Yehowa san di sugeri bo nɛra, a ni kɔ’ɔn saalum be’em la basɛ mɛ. To wan le ta’an tara bɔnsoŋa la en. To puurɛ pee mɛ la Yehowa n kɔ’ɔn dita sugeri bɔ’ɔra to se’em la.—Kaalɛ Isaiah 55:6, 7.
4. Sodeni poan ti Yehowa soŋɛ tɔ ti to baŋɛ eŋa n diti sugeri se’em?
4 Nɛresaaleba la Yehowa sugeri dia la san bɔna to’ore to’ore, to wan eŋɛ la wani ta’an bɔkɛ sugeri dia n sirum de sɛla? Yehowa dekɛ la maɣesa pa’alɛ tɔ ti la soŋɛ tɔ ti to mina eŋa n diti sugeri bɔ’ɔra to se’em. To wan sɔsɛ basɛba zaseŋɔ wa poan. La wan basɛ ti to baŋɛ ti to san basɛ to be’em, Yehowa ni di sugeri bo to mɛ ti to le dɛna a zɔdoma. To san geele maɣesa ana wa, la wan soŋɛ tɔ ti to nɔŋɛ Yehowa ge me basɛ ti to puurɛ pee la Yehowa n zoti to nimbũ’ɔ la.
YEHOWA NI ZƐ TO BE’EM LA BO TO MƐ
5. Yehowa san di sugeri bo to, a ni eŋɛ la bem?
5 Baabule la poan, ba dekɛ be’em makɛ mɛ la zeero n tibegɛ. Naba David tɔɣɛ a be’em la yele ti, ‘Mam zɛ n tuure la mɛ n zuin ti la vilegera mam sigera tiŋa.’ (Ym. 38:4) Yehowa diti sugeri bɔ’ɔra la sɛba n basɛ ba be’em. (Ym. 25:18; 32:5) Hebru yelebire la n de “di sugeri” la vuurɛ dela “to’e to” bii “to’e zɛ.” Yehowa san di sugeri bo to, a ni to’e to zeero la mɛ to bii zɛ. To be’em la ani wuu to zɛ bii to la zeero n tibegɛ ti Yehowa to’e.
‘Basɛ ba be’em’ (Ym. 32:5)
6. Yehowa ni dekɛ to be’em la lobe zaaɛ la wani?
6 Baabule la le dekɛ la makerɛ pa’alɛ ti Yehowa san di sugeri bo to, a ni lobe to be’em la ti la zaaɛ mɛ. Yooma 103:12 yeti, ‘A dekɛ tomam be’em la lobe zaaɛ mɛ wuu dapɔya n zaaɛ la zaanyɔrɛ se’em la.’ Dapɔya zaaɛ mɛ la zaanyɔrɛ. Ba kan malum lɛm taaba. Bala pa’alɛ ti Yehowa ni dekɛ to be’em la lobe zaaɛ mɛ. Wana basɛ ti to baŋɛ ti Yehowa ni sirum di sugeri bo to mɛ.
‘Wuu dapɔya n zaaɛ la zaanyɔrɛ se’em la’ (Ym. 103:12)
7. Baabule la tɔɣɛ pa’alɛ ti Yehowa ni eŋɛ to be’em la, la wani? (Mikah 7:18, 19)
7 Yehowa san ni dekɛ to be’em la lobe basɛ, a ni lebe ta dekɛ mɛ? Aayi. Naba Hezekia tɔɣɛ Yehowa yele ti, ‘Ho ni dekɛ mam be’em la lobe basɛ la pooren bɔba sa.’ (Isa. 38:9, 17.) Bala pa’alɛ ti Yehowa san di sugeri bo sɛba n basɛ ba be’em la, a ni ka le tɛ̃ra ba be’em la yele. Gulesegɔ ayima me yeti, ‘Ho ni basɛ mam be’em la ti la ana wuu n ka eŋɛ la sɛsɛla.’ Baabule la le dekɛ la makerɛ tum tuuma ti yele wa niɛ peelumi. La boi la Mikah 7:18, 19. (Kaalɛ.) Bilam pa’alɛ ti, Yehowa ni dekɛ to be’em la lobe basɛ la ateko poan. Diimi sa la, sɛla san lu ateko poan ho kan le makɛ nyɛ ku.
‘Ho ni dekɛ mam be’em la lobe basɛ la pooren bɔba sa’ (Isa. 38:17)
‘Vaɛ to tuure za’a lobe basɛ ateko poan’ (Mik. 7:19)
8. Ta paɛ kalam wa, to zamesɛ la bem?
8 Baabule la basɛ ti la niɛ peelumi ti Yehowa san di sugeri bo to, a ni kɔ’ɔn saalum de basɛ mɛ. Bala la, la ka nari ti to basɛ ti to be’em la daana tɔ. David yuun yeti, ‘pupeelum boi mɛ la sɛba ti Naayinɛ basɛ ba be’em bo ba, la sɛba ti ba pĩ ba be’em la. Pupeelum boi mɛ la sɛba ti Naayinɛ basɛ ba tubekireka be’em woo bo ba la.’ (Arom 4:7, 8) Wana n sirum de sugeri dia!
YEHOWA SAALUM TO BE’EM LA BASƐ MƐ
9. Sodeni poan ti Baabule la soŋɛ tɔ ti to baŋɛ ti Yehowa san di sugeri bo to, a ni kɔ’ɔn saalum de basɛ mɛ?
9 Yehowa doose la lua bunɔ la poan di sugeri bo sɛba n basɛ ba be’em. To geele ya Baabule la n pa’alɛ Yehowa n ni di sugeri bo to se’em. Baabule la basɛ ti to baŋɛ ti Yehowa ni pee to be’em la mɛ ti la ana filam. (Ym. 51:7; Isa. 4:4; Yer. 33:8) Yehowa le yeti, ‘Ya be’em la mu’ɛ la ziŋelin ge ba wan pelege wuu sakuga la. Hali ba san mu’ɛ wuu fuo n mu’ɛ sobege la, ba wan pelege wuu gunguŋo pɛɛlega.’ (Isa. 1:18) Fuo san mu’ɛ sobege la ni kpe’em mɛ ti ho pee ti la yese. Yehowa dekɛ la makerɛ wa pa’alɛ ti a san pee to be’em la, la ni ana la filam.
‘Ya be’em la mu’ɛ la ziŋelin ge ba wan pelege wuu sakuga la’ (Isa. 1:18)
10. Sodeni poan ti Yehowa eŋɛ pa’alɛ ti a tari la itisoŋɔ la eŋa n ni di sugeri bo to la?
10 Zaseŋɔ seko n tole la poan, to zamesɛ baŋɛ ti be’em ani wuu sanɛ. (Mt. 6:12; Lu. 11:4) Bala la, to san tuna be’em, to sanɛ la me kɔ’ɔn zɔ’ɔra mɛ. To tari la sanɛ kãtɛ Yehowa zɛ’an. Ge Yehowa san di sugeri bo to, a ni basɛ to sanɛ la bo to mɛ. Yehowa san di sugeri bo to, a ka le viira to be’em la sanɛ. Nɛra san basɛ to sanɛ bo to, to puurɛ ni pee mɛ. Bala mea nɔɔ ti Yehowa ni san di sugeri bo to, to puurɛ ni pee.
‘Di sugeri bo to’ (Mt. 6:12)
11. Baabule la n yeti Yehowa saalum to be’em la basɛ mɛ la, pa’alɛ la bem? (Tooma 3:19)
11 Yehowa ni ka yeen di la sugeri bo to ge a ni kɔ’ɔn saalum de basɛ mɛ. (Kaalɛ Tooma 3:19.) Makerɛ, ti’isɛ bisɛ ti ho tari la nɛra sanɛ ti a dekɛ pen cancel basɛ. La boi bim ti a cancel de basɛ mɛ ge nɛreba wan kelum nyɛ gulesegɔ la n boi bim la. Ge ba san saalum sɛla basɛ, la boi la de to’ore. Diimi ti ba yuun tara ink sɛka gulesa la, ho wan ta’an dekɛ ko’om pee de basɛ. Nɛra wan ta’an dekɛ soosoo eŋɛ ko’om poan pee gulesegɔ la basɛ. Bala la, nɛra san ‘saalum to sanɛ,’ la ni kɔ’ɔn ba’asɛ mɛ. Nɛra kan le nyɛ sɛla ti ba gulesɛ bim la. La ni ana wuu ho puɣum ka tabelɛ di la sanɛ la. To puurɛ ni pee mɛ la ton baŋɛ ti Yehowa san di sugeri bo to la ni ana wuu to puɣum ka tabelɛ tum la be’em la.—Ym. 51:9.
‘La wan eŋɛ se’em ti ba duusi ya be’em la basɛ’ (Tm. 3:19)
12. To zamesɛ la bem makerɛ la poan?
12 Baabule la le dekɛ la makerɛ pa’alɛ Yehowa n ni di sugeri bo to se’em. A yeti, ‘N wan pĩ ya be’em la za’a wuu saa sagbana la.’ (Isa. 44:22) Bala la, Yehowa san di sugeri bo to la ni ana wuu a dekɛ la sagbana pĩ to be’em la ti to kan le nyɛ dɛ.
‘Pee ho be’em za’a basɛ ti bo tole wuu saa sagbanɛ la’ (Isa. 44:22)
13. Yehowa san di sugeri bo to, la ni ana to la wani?
13 To zamesɛ la bem maɣesa wa poan? Yehowa san di sugeri bo to, la ka nari ti to le ti’isa to be’em la yele ti la daana tɔ to vom dabesa za’a. Lua bunɔ la dela sɛla n kɔ’ɔn saalum to be’em la za’a za’a. Yehowa san di sugeri bo to, la ni ana wuu to ka tabelɛ tum la be’em. Yehowa n ni di sugeri bo to se’em n bala.
YEHOWA NI BASƐ TI TO LE TARA LA BƆNSOŊA LA EN
To saazuo Sɔ la n diti sugeri bɔ’ɔra to n basɛ ti to tara bɔnsoŋa la en (Bisɛ kaalegɔ zɛ’an 14)
14. Beni n sɔi ti to tara suure lua ti Yehowa wan sirum di sugeri bo to? (Bisɛ fɔɔra la.)
14 Yehowa san di sugeri bo to, to wan le ta’an tara bɔnsoŋa la en. Bala la, Yehowa san ni di sugeri bo to la ka nari ti to le ti’isa to be’em la yele ti la daana tɔ. La ka nari ti to zɔta dabeem ti Yehowa sunsɔa wan kelum nyie la tɔ ge ti a bɔta ti a dɔlegɛ to tuberɛ. Yehowa kan makɛ eŋɛ bala. Yehowa san yeti a wan di sugeri bo to, to tari sakerɛ ti a wan sirum eŋɛ bala. Yehowa yuun yele nɔdɛ’ɛsa Yeremia ti, ‘N wan basɛ ba putotuuma la woo bo ba ge me kan le tɛ̃ra ba be’em la buyina me.’ (Yer. 31:34) Tuntuna Paul yuun gulesɛ ti, Yehowa yeti, ‘N kan le tɛ̃ra ba be’em la buyina me.’ (Heb. 8:12) Bala vuurɛ?
‘N kan le tɛ̃ra ba be’em la buyina me’ (Yer. 31:34)
15. Yehowa san yeti a kan le tɛ̃ra to be’em la, la vuurɛ?
15 Baabule la poan, yelebire la n de ‘tɛ̃ra’ la ka pa’alɛ la nɛra n tɛ̃ri yelese’ere n eŋɛ tole ma’a ge la me ta’an pa’alɛ nɛra n iti sɛla. Nayiga la ti ba yuun kpa en lɛm Yezu la yuun yeti, ‘Yezu, ho san ta wa’an ho Na’am la poan na, tɛ̃ra n yele.’ (Lu. 23:42, 43) A yuun boti la Yezu eŋɛ sɛla bo en. Yezu yuun yele buraa wa ti, a wan ta isige en kum poan. Yehowa n yeti eŋa kan le tɛ̃ra to be’em la pa’alɛ ti a di sugeri bo to mɛ. A me kan le dɔlegɛ to tuberɛ, to be’em la zuo.
16. Baabule la dekɛ to makɛ mɛ la bem?
16 Baabule la le dekɛ la makerɛ soŋɛ tɔ ti to baŋɛ ti Yehowa san di sugeri bo to, to ni bɔna la fai. La yeti ton ka di mi’a la zuo to dela ‘be’em yamesi.’ Yehowa san di sugeri bo to, a ni ‘faaɛ to la be’em nu’usin’ basɛ. (Arom 6:17, 18; Lil. 1:5) To san baŋɛ ti Yehowa di sugeri bo to, to puurɛ ni pee mɛ ti la ana wuu yameŋa ti ba ni faaɛ en basɛ ti a puurɛ pee se’em la.
‘A faaɛ to la be’em nu’usin basɛ’ (Arom 6:18)
17. Sodeni poan ti Yehowa san di sugeri bo to, la ni ana wuu a tibɛ to mɛ? (Isaiah 53:5)
17 Kaalɛ Isaiah 53:5. Baabule la yeti ton de be’emdoma la zuo, la ani wuu to tari la bã’a n wan ta’an ku tɔ. Yehowa n basɛ ti a Dayua la wa’ana ki bo to la ani wuu a tibɛ la to bã’a la. (1 Pe. 2:24) To san tum be’em, la ni sa’am tomam la Yehowa bɔŋa la mɛ ge lua bunɔ la zuo, Yehowa ni di sugeri bo to mɛ ge basɛ ti to tara bɔnsoŋa la en. Wuu ban ni tibɛ nɛra ti a puurɛ pee se’em la, tomam me puurɛ ni pee mɛ Yehowa san di sugeri bo to ge ti to le tara bɔnsoŋa la en.
‘A pɔɣeleŋɔ la poan ti tomam nyɛ tibegɔ’ (Isa. 53:5)
YEHOWA SUGERI DIA LA N SOŊERI TO SE’EM
18. To zamesɛ la bem la maɣesa la n pa’alɛ tɔ Yehowa n diti sugeri se’em la? (Bisɛ daka la zuo n de “Yehowa N Diti Sugeri Bɔ’ɔra To Se’em.”)
18 To zamesɛ la bem la maɣesa la n pa’alɛ tɔ Yehowa n diti sugeri se’em la? Yehowa san ni di sugeri bo to, la ani wuu to puɣum ka tabelɛ tum la be’em la ge ti a me kan dɔlegɛ to tuberɛ beere sa’am. Wana wa basɛ ti to ta’an tara la bɔnsoŋa la to saazuo Sɔ la. La me basɛ ti to baŋɛ ti Yehowa sugeri dia la dela bo’olum ti a dekɛ bo to. Eŋa n nɔŋɛ to la zuo ti a eŋɛ bala ge daɣɛ ti to nari mɛ.—Arom 3:24.
19. (a) La nari ti to puurɛ pee la bem? (Arom 4:8) (b) To wan sɔsɛ la bem zaseŋɔ seko n taɣelɛ la poan?
19 Kaalɛ Arom 4:8. To puurɛ pee mɛ la Yehowa n diti sugeri bɔ’ɔra to la. (Ym. 130:4) To san bɔta ti Yehowa di sugeri bo to, la nari ti to eŋɛ sɛla. Yezu yuun yeti, ‘Ya san ka dita sugeri bɔ’ɔra nɛreba, ya saazuo Sɔ la me kan di sugeri bo ya.’ (Mt. 6:14, 15) Bala la, la nari ti to tɔɣesa Yehowa ge me dita sugeri bɔ’ɔra taaba. Zaseŋɔ seko n taɣelɛ la wan pa’alɛ tɔ ton wan eŋɛ se’em ta’an eŋɛ bala.
YUUNƐ 46 We Thank You, Jehovah (Yehowa, To Pu’usɛ Ya)
a Hebru gulesegɔ la dekɛ la yelesum la n de ‘sugeri dia wa’ tum tuuma ti la pa’alɛ ti sugeri dia kaŋa boi la de to’ore. Baabula zo’e zo’e ka basɛ ti ninmu’urɛ yele wa niɛ peelumi Yooma 130:4 poan.
