1. Ho san ti’isa Yehowa yele, ho ni tiɛ la bem?

 HON tabelɛ ti’isɛ bisɛ ti ho baŋɛ Yehowa n ani se’em? Ho san zusɛ en beni n ni wa’an hon puti’irɛ na? La boi bim ti to ka nyɛti Yehowa ge Baabule la tɔɣɛ pa’alɛ a yɛla mɛ sarɔtɔ zo’e zo’e poan. Yehowa dela ‘wuntɛɛŋa, zaberɛ tɛ’ɛlega la bugum peelum.’ (Ym. 84:11; Heb. 12:29) Baabule la tɔɣɛ pa’alɛ ti Yehowa nyageri wuu kuge pũusegɔ, mu’ɛ wuu kurugo n boi bugum ge nyagera wuu gɔmatia tahɔ la. (Eze. 1:​26-28) Baabule la n tɔɣɛ Yehowa yele se’em la basɛ ti la tara la ɔmi’isa bɔ’ɔra tɔ.

2. Beni n sɔi ti la ta’an kpe’em bo to ti to ana du’a du’a la Yehowa?

² Ton ka nyɛti Yehowa la zuo, la ta’an kpe’em bo to ti to sakɛ ti a nɔŋɛ tɔ. Nɛreba basɛba ti’isɛ ti yelese’a n tabelɛ paɛ ba la zuo, Yehowa kan malum nɔŋɛ ba. Daanse’ere ba ka tabelɛ tara sɔ n nɔŋɛ ba. Yehowa bɔkɛ lan ani to se’em mɛ la yele ana wa. Baabule la poan, Yehowa basɛ ti to baŋɛ a hala la, ti la soŋɛ tɔ ti to baŋɛ ti a nɔŋɛ to mɛ.

3. Beni n sɔi ti la nara ti to zamesɛ Yehowa nɔŋerɛ la yele?

³ Nɔŋerɛ n sirum pa’alɛ Yehowa n ani se’em. (1 Yo. 4:8) Baabule la yeti Naayinɛ dela nɔŋerɛ. A iti sɛla woo la nɔŋerɛ poan. Naayinɛ nɔŋerɛ n ka tari makerɛ la zuo, a nɔŋɛ sɛba n ka nɔŋɛ en mɛ. (Mt. 5:​44, 45) Zaseŋɔ wa poan, to wan sɔsɛ baŋɛ Yehowa n tari nɔŋerɛ se’em. To san zamesa to Naayinɛ wa yɛla, to wan nɔŋɛ en malum pa’asɛ.

YEHOWA NƆŊƐ TO MƐ PAA

4. Yehowa n tari giile se’em la basɛ ti la ana hon la wani? (Bisɛ foote la.)

⁴ ‘Yehowa tari la giile.’ (Yam. 5:11) Baabule la poan, Yehowa dekɛ amea makɛ mɛ la ma n tari giile. (Isa. 66:​12,  13) Yeen ti’isɛ bisɛ ma n nɔŋɛ ge bisera a bia soŋa se’em. A ni dekɛ a bia la paɣelɛ la a nama zuo ge tɔɣera bãla bãla bɔ’ɔra en. Bia la san kaasa, a ni bisɛ la eŋa n wan eŋɛ se’em ta’an soŋɛ en. Yele me san paɛ tɔ ti la wuna tɔ, to tari puti’irɛ ti Yehowa nɔŋɛ to mɛ. Yoomadaana la yuun yeti: ‘Se’em ma’a ti putɛyiila ni gaŋɛ mam la, ho ni buɣelɛ mam suure ge basɛ ti la ana mam lama lama.’—Ym. 94:19.

5. Yehowa n tari yelemɛŋɛrɛ nɔŋerɛ bɔ’ɔra to se’em la basɛ ti la ana hon la wani?

⁵ Yehowa tari la yelemɛŋɛrɛ. (Ym. 103:8) A ni ka pisegɛ to basɛ to san ta tum be’em. Saŋa zo’e zo’e poan, Israeldoma la yuun ni basɛ ti Yehowa suure sa’am mɛ. Ge a yuun kelum tara yelemɛŋɛrɛ nɔŋerɛ bɔ’ɔra ba, ba san ni basɛ ba be’em la. A yeti: ‘Hon n tari tuulum mam nɛŋa la zuo, Mam na’asɛ ho mɛ ge me nɔŋɛ hɔ.’ (Isa. 43:​4, 5) Naayinɛ nɔŋerɛ la ka teere. A nɔŋɛ to la bala saŋa woo. Hali to san puɣum tue la se’em me, Yehowa kan malum tamɛ to yele. To san basɛ to be’em ge lebe Yehowa zɛ’an, to wan baŋɛ ti a kelum nɔŋɛ to la bala. A yeti ‘a wan di sugeri bo to ti la gaŋɛ.’ (Isa. 55:7) Baabule la tɔɣɛ pa’alɛ ti, ‘bala wan basɛ ti Yehowa mea basɛ ti la ana to buɣa buɣa.’—Tm. 3:19.

6. Zekaria 2:8 pa’alɛ tɔ Yehowa yele la wani?

⁶ Kaalɛ Zekaria 2:8. Yehowa n nɔŋɛ to la zuo, a bɔkɛ lan ani to se’em mɛ ge bɔta ti a soŋɛ tɔ. To suure san sa’am la ni daana en mɛ. Bala to ta’an zusɛ yeti: ‘Tara mam soŋa soŋa wuu nɛra n tari a niho soŋa se’em la.’ (Ym. 17:8) Niho dela tuulum lɔkɔ paa to inya la poan. Bala la, Yehowa san yeti to ani wuu a niho la, la ani wuu a yeti, ‘Se’em woo n daam yamam n de mam nɛreba wa daam la mam tuulum lɔkɔ.’

7. Bem zuo ti la nara ti to sakɛ ti Yehowa nɔŋɛ tɔ?

⁷ Yehowa boti la ho mina ho suuren ti a nɔŋɛ ho mɛ. Ge a mi ti yelese’a n tabelɛ paɛ ho la zuo ho ta’an tara puti’ira ayi ayi ti a ka nɔŋɛ hɔ. Bii yelese’a n paari to nananawa la ta’an basɛ ti la kpe’em bo to ti to sakɛ ti Yehowa nɔŋɛ tɔ. Bem n wan basɛ ti to sirum sakɛ ti Yehowa nɔŋɛ tɔ? La nari ti to zamesɛ baŋɛ Yehowa n eŋɛ  se’em pa’alɛ ti a nɔŋɛ Yezu, looredoma la, la to za’a.

YEHOWA N ITI SƐLA PA’ALA TI A NƆŊƐ TƆ

8. Beni n sɔi ti Yezu yuun mina soŋa soŋa ti a Sɔ la nɔŋɛ en mɛ?

⁸ Yuuma n ka tari kãlɛ ti Yehowa la a Dayɔa la ana du’a du’a ge eŋɛ pa’alɛ ti ba tari la nɔŋerɛ bɔ’ɔra taaba. Yuuma zo’e zo’e n wana ti eŋa la a Dayɔa la bɔna. Matu 17:5 poan, tɔɣɛ pa’alɛ Yehowa n nɔŋɛ Yezu se’em. Yehowa yuun ta’an yeti, ‘Se’em ti mam nam bo n wana.’ Ge a yuun boti to baŋɛ eŋa n nɔŋɛ Yezu se’em, bala la a yuun yeti, ‘mam Dayɔa n wana, se’em ti n nɔŋɛ.’ Yehowa zuo yuun zɛ̃kɛ mɛ la Yezu n yuun yeti a tum tuunsɛka la. (Ep. 1:7) Yezu me yuun ka tari puti’ira ayi ayi la a Sɔ la n nɔŋɛ en se’em la. A yuun kɔ’ɔn mina ti a Sɔ la sirum nɔŋɛ en mɛ. Yezu yuun tɔɣɛ taɣesɛ ti Sɔ la nɔŋɛ eŋa mɛ. —Yon 3:35; 10:17; 17:24.

9. Bem n pa’alɛ ti Yehowa nɔŋɛ looredoma la mɛ? Tɔɣɛ pa’alɛ. (Arom 5:5)

⁹ Yehowa le eŋɛ pa’alɛ ti a nɔŋɛ looredoma la mɛ. (Kaalɛ Arom 5:5.) Dãalɛ yelesum la n de ‘dekɛ bo to’ la. Viisegɔ gɔŋɔ ayima pa’alɛ ti ‘la ani wuu ko’om n suregeri la.’ Makerɛ wa pa’alɛ ti Yehowa sirum nɔŋɛ looredoma la mɛ. Looredoma la mi ti ‘Naayinɛ nɔŋɛ ba mɛ.’ (Yude 1) Tuuntuna Yon yuun tɔɣɛ pa’alɛ lan ani looredoma la se’em la eŋa n yuun gulesɛ yeti: ‘Bisɛ ya to Sɔ Naayinɛ la nɔŋerɛ la n zuni se’em ti a yi’ira tɔ a kɔma!’ (1 Yo. 3:1) Yehowa nɔŋɛ la looredoma la ma’a? Aayi. Yehowa eŋɛ pa’alɛ ti a nɔŋɛ to za’a mɛ.

10. Yeledeni n gani za’a ti Yehowa eŋɛ pa’alɛ ti a nɔŋɛ hɔ?

¹⁰ Yeledeni n gani za’a ti Yehowa eŋɛ pa’alɛ ti a nɔŋɛ hɔ? La dela lua bunɔ la. Yehowa eŋɛ wana ti la pa’alɛ ti a tari la nɔŋerɛ ti la ka tara makerɛ! (Yon 3:16; Arom 5:8) A yuun basɛ ti a Dayɔba’arɛ n ki bo asaaleba za’a ti to ta’an nyɛ to be’em sugeri dia ge me dɛna A zɔdoma. (1 Yo. 4:10) To san ti’isa taɣesa Yehowa la Yezu n eŋɛ sɛla bo to la, to wan sirum baŋɛ ban nɔŋɛ tomam ayima ayima se’em. (Ga. 2:20) Yehowa ka dekɛ lua bunɔ la bo to ti a yeen pa’alɛ ti eŋa n de tontɔɔ nɛra. Ge eŋa n nɔŋɛ to la zuo ti a eŋɛ bala. Yehowa n bo yɔ’ɔ ti a Dayɔa ti a nɔŋɛ en paa wa’ana ki bo to la pa’alɛ la eŋa n nɔŋɛ to se’em. Yehowa yuun bo la yɔ’ɔ ti a Dayɔa la namesɛ ta ki to zuo.

11. To zamesɛ la bem Yeremia 31:3 poan?

¹¹ Wuu ton baŋɛ se’em la, Yehowa ka yeen ti’isa ti eŋa nɔŋɛ tɔ ge a ni yele to mɛ ti a nɔŋɛ tɔ. (Kaalɛ Yeremia 31:3.) Yehowa basɛ ti to vurege lɛm en mɛ la eŋa n nɔŋɛ to la zuo. (Dekɛ makɛ Tɛɛnhegɔ 7:​7, 8.) Sɛla ka boi bii nɛra ka boi n wan ta’an gu ti Naayinɛ kan nɔŋɛ tɔ. (Arom 8:​38, 39) Eŋa n nɔŋɛ to se’em la basɛ ti la ana hon la wani? Kaalɛ Yooma 23 ge bisɛ Yehowa nɔŋerɛ la n yuun basɛ ti la ana David se’em, la lan wan basɛ ti la ana to za’a me se’em.

YEHOWA N NƆŊƐ TO SE’EM LA BASƐ TI LA ANA HON LA WANI?

12. Hon wan tɔɣɛ Yooma 23 yele gi’a gi’a la wani?

¹² Kaalɛ Yooma 23:​1-6. Yooma 23 basɛ ti to tara la puti’irɛ ti Yehowa nɔŋɛ to mɛ. David n de se’em n gulesɛ yooma wa la, yuun tɔɣɛ pa’alɛ eŋa la Yehowa bɔŋa la n kpe’em se’em ge yuun yeti Yehowa dela a Dunkeena. David yuun  bo la fai la eŋa n yuun basɛ ti Yehowa pa’ala en la ge me yuun kɔ’ɔn dekɛ amea delum en. David yuun mi ti Yehowa kɔ’ɔn nɔŋɛ en la bala ta paɛ ba’asegɔ. Beni n sɔi ti a yuun tara puti’irɛ bala?

13. Beni n sɔi ti David yuun mina soŋa soŋa ti Yehowa wan bisa en?

¹³ ‘Mam kan koŋe sɛsɛla.’ Yehowa n yuun ni bo David yelese’a woo n pakɛ en la zuo, David yuun baŋɛ ti Yehowa nɔŋɛ en mɛ. David yuun le mina ti Yehowa dela a zɔ ti a puurɛ pee la en. Bala n sɔi ti David yuun tara puti’irɛ ti la ka pakɛ la sɛla n wan paɛ en beere sa’am, Yehowa wan kelum bisa en ge bɔ’ɔra en yelese’a n pakɛ en. David n yuun baŋɛ ti Yehowa nɔŋɛ en ge wan bisa en la yuun soŋɛ en mɛ ti a ka ba’ɛ fabela ge tuɣum tara la pupeelum.—Ym. 16:11.

14. Yehowa ta’an eŋɛ pa’alɛ ti a nɔŋɛ tɔ ge bisa to la wani?

¹⁴ Yehowa nɔŋɛ to mɛ ge me bisa tɔ, yele yele wuu yele san paɛ tɔ. Claire a n tum Betel gaŋɛ yuun 20 n wana la, yuun ani la bura se’em ma’a ti yeledaaŋɔ yuun paɛ a yidoma taɣela taaba la. Stroke yuun nyɔkɛ la a sɔ, ba yuun yese a yibega tansugere la poan, ti a deodoma koosegɔ tuuma la ba yire yuun sa’am. Yehowa eŋɛ la bem pa’alɛ ti a nɔŋɛ ba mɛ ge me bisa ba? Claire yeti: Yehowa yuun basɛ ti mam deodoma nyɛta la yelese’a woo n pakɛ tɔ dabeserɛ woo poan. Saŋa woo Yehowa n ni bo to sɛla la, ni ganɛ mam n ti’iseri se’em la mɛ. Mam ni san ti’isa Yehowa n nɔŋɛ tɔ ge bisa to se’em la, la ni basɛ ti mam suure sukɛ mɛ. Yele  ana n soŋeri mam ti n ta’an ŋmibera yeledaaŋɔ woo poan.”

15. Bem zuo ti la yuun ana David mama? (Bisɛ foote la.)

¹⁵ ‘A basɛ ti mam vɔ’ɔsa mɛ.’ Saŋa ase’a, David suure yuun ni sa’am mɛ la yeledaaŋɔ se’a woo n yuun paari en la. (Ym. 18:​4-6) Ge Yehowa n yuun nɔŋɛ en ge bisa en la yuun basɛ ti la ana en la mama. Yehowa yuun tari a zɔ wa n taregɛ la keŋɛ la ‘yaama n ani soŋa’ la ‘ko’om n boi zɛ’an.’ Bala zuo, David yuun le nyɛ la paŋa ge kelum pu’usa Yehowa la pupeelum.—Ym. 18:​28-32.

16. Yehowa nɔŋerɛ la basɛ ti la ana hon la wani?

¹⁶ Zina beere wa me yeledaaŋɔ san paara tɔ ti la kpe’em bo to, ‘la dela Yehowa yelemɛŋɛrɛ nɔŋerɛ la n basɛ ti to tana ŋmibera.’ (Fab. 3:22; Kol. 1:11) Geele Rachel yele la bisɛ. COVID-19 bã’a la poan ti a sira yuun basɛ eŋa la Yehowa. Wana yuun basɛ ti a suure sa’am mɛ. Ge Yehowa yuun eŋɛ la bem bo en? A yeti: “Yehowa yuun basɛ ti mam baŋɛ ti a nɔŋɛ mam mɛ. A yuun basɛ ti mabiisi wa’ana kaɛ mam bisɛ mɛ, tari dia na bo mam ge me tɛɣesera mam. Ba me yuun ni kaalɛ la Baabule gulesegɔ bo mam, naɛ la mam sɔsera ti to la’ara ge me ni yɛta mam yeti Yehowa nɔŋɛ mam mɛ. Mam pu’usɛ Yehowa zo’e zo’e la eŋa n basɛ ti mam tara deodoma n nɔŋɛ mam wa.”

17. Bem zuo ti David yuun ‘ka zɔta dabeem’?

¹⁷ ‘Mam ka zoti dabeem ti sɛla wan daam mam, se’ere n sɔi la ho boi la mam mɛ.’ David vom yuun boi la dɛŋa poan sɛla n sɔi la a yuun tari la dindoma zo’e zo’e. Ge Yehowa yuun nɔŋɛ en mɛ ti a bɔna fai ge nyɛta te’elego. David yuun basɛ ti Yehowa kɔ’ɔn bɔna la en mɛ bɔŋa woo poan ti a suure ga’a maasumi. Bala n sɔi ti a yuun yeti: ‘Yehowa yese mam yelese’a woo n tari dabeem la poan.’ (Ym. 34:4) La boi bim ti dabeem n yuun tari David ge a yuun nyaŋɛ a dabeem la mɛ Yehowa n yuun nɔŋɛ en la zuo.

18. Dabeem san tara hɔ, Yehowa nɔŋerɛ la wan basɛ ti ho ta’an ŋmibe la wani?

¹⁸ To san mina ti Yehowa nɔŋɛ to mɛ, la wan basɛ ti to ta’an ŋmibe la wani yeledaaŋɔ san paɛ tɔ? Susi n de sore ŋmɛ’adaana  tɔɣɛ pa’alɛ lan yuun ani eŋa la a sira se’em ba bia n yuun ku amea la. A yeti: “Susa’aŋɔ yele san paɛ hɔ, la ni ana hon la bura ti ho ka mina hon wan eŋɛ se’em. Ge Yehowa n tari nɔŋerɛ la basɛ ti to bɔna la fai ge me tɛ’ɛla tɔ.” Rachel ti to puɣum tɔɣɛ a yele la yeti: “Daarɛ deyima yu’uŋɔ ti mam suure yuun sa’am ti dabeem yuun tara mam ti mam kaasɛ kpe’eŋo kpe’eŋo bo Yehowa. Bilam bilam ti a buɣelɛ mam suure ti la ana mam lama lama wuu ma n iti a bia se’em la, ti mam nyaa ta’an gise. Mam kan malum tamɛ de daarɛ.” Keema ayima yu’urɛ n de Tasos n yuun zaɣesɛ ti a kan tum lengima tuuma la zuo ba yuun paɣɛ en la yuuma anaasi. A yuun eŋɛ la wani baŋɛ ti Yehowa nɔŋɛ en mɛ ge bisa en? A yeti: “Yehowa yuun bo mam la yelese’a n pakɛ ti la gaŋɛ. Wana yuun basɛ ti mam tara la suure lua ti n wan ta’an dekɛ n mea delum en. Yehowa yuun le dekɛ a zilam vo’osum la soŋɛ mam mɛ ti n tara pupeelum la ka pakɛ la bɔŋa la n yuun ani se’em la. Wana yuun basɛ ti n baŋɛ ti n san dekɛ n mea delum Yehowa n wan nyɛ eŋa n sirum nɔŋɛ mam se’em. Bala la, mam n yuun boi sarega la ti mam yuun pɔsɛ tuna daarewoo sore ŋmɛa tuuma la.”

ANA DU’A DU’A LA HO NƆŊERƐ NAAYINƐ LA

19. (a) Ton mi ti Naayinɛ nɔŋɛ to la wan soŋɛ tɔ ti to ta’an zusa la wani? (b) Yehowa n pa’alɛ a nɔŋerɛ yele se’em la kalɛ hon suure la wani? (Bisɛ daka la zuo n de “ Yelese’a N Basɛ Ti To Baŋɛ Ti Yehowa Nɔŋɛ Tɔ”)

¹⁹ Zi’irego poan yɛla la za’a ti to sɔsɛ la sirum pa’alɛ ti Yehowa n de ‘nɔŋerɛ Naayinɛ la’ boi mɛ la tɔ! (2 Ko. 13:11) A fabeli tomam ayima ayima yele mɛ. To mi soŋa soŋa ti ‘A yelemɛŋɛrɛ nɔŋerɛ la n kaɛ to mum.’ (Ym. 32:10) To san ti’isa taɣesa eŋa n nɔŋɛ to se’em la, to wan baŋɛ en soŋa ge me mina ti a fabeli to yele mɛ. To san zusɛ en to wan ta’an yele en a nɔŋerɛ la n pakɛ to se’em. To wan ta’an yele en yelese’a woo n daani tɔ ge me tara puti’irɛ ti a mi lan ani to se’em mɛ ge bɔta ti a soŋɛ tɔ.—Ym. 145:​18, 19.

20. Yehowa nɔŋerɛ la basɛ ti to ana du’a du’a la en la wani?

²⁰ Wuu ɔɔrɔ n ni tara tɔ ti to ɔɔsa bugum se’em la, to me ani du’a du’a la Yehowa la a nɔŋerɛ la zuo. Yehowa tari la nɔŋerɛ ti la ka tara makerɛ ge me tara giile. Bala la, basɛ ti ho puurɛ pee la Yehowa n nɔŋɛ ho se’em la. Basɛ ya ti to za’a waabi eŋɛ pa’alɛ ti to boti a nɔŋerɛ la ge yeti: ‘Mam nɔŋɛ Yehowa mɛ’!—Ym. 116:1.