1-2. Bem yeledaaŋɔ n paari Yehowa yamesi zina beere wa?

 YELETOORO ta’an paɛ tɔ ti to vom kɔ’ɔn tee bilam bilam. Makerɛ, ba yuun viisɛ mabia ayima yu’urɛ n de Luis a baŋɛ ti a tari la ɔberega bã’a. Dɔgeta la yuun yele en yeti a wan vɔna la ŋmaresi wana fii poan. Monika la a sira yuun kɔ’ɔn mɔ’ɛ nini tuna la Yehowa tuuma. Daarɛ deyima ti Monika baŋɛ ti a sira n de keema la dela nigum nigum nɛra. Olivia n de nɛreyone la yuun nari ti a zɔ yese a yire, se’ere n sɔi la kusebekãtɛ n yuun keni na. Eŋa n yuun lebe la ti kusebekãtɛ la sa’am yire la za’a mɛ. Saŋa wana fii poan ti nɛrebana wa vom yuun kɔ’ɔn tee wana kalam. Yele ana taaba tabelɛ paɛ hɔ ti ho vom kɔ’ɔn tee wana kalam?

² Tomam n de Yehowa yamesi la, yeletooro la bã’asi paari to mɛ wuu lan paari nɛra woo se’em la. Leyɛ’ɛsa, la wan nara ti to ŋmibera la nɛresɛba n giiseri tɔ ge yaɛ tɔ la. La boi bim ti Yehowa ka gu’uri ti yele aŋa da paara tɔ ge a pu’ulum biŋe ti a wan soŋɛ tɔ. (Isa. 41:10) A wan soŋɛ tɔ ti to kelum tara to pupeelum la, kɔ’ɛ to puti’irɛ soŋa ge kelum tara yelemɛŋɛrɛ bɔ’ɔra en hali la biɣi biɣi saŋa poan. Zaseŋɔ wa poan, to wan bisɛ yɛla anaasi ti Yehowa ita soŋera tɔ biɣi biɣi saŋa poan. To me wan le bisɛ ton wan eŋɛ se’em ta’an nyɛ nyuurɔ la eŋa n soŋeri to se’em la.

 YEHOWA WAN TE’ELE HO

3. Yeletoo san paɛ tɔ, la ta’an kpe’em bo to ti to eŋɛ la bem?

³ Yeledaaŋɔ la. Yeletoo san paɛ tɔ, la ta’an kpe’em bo to ti to ti’isɛ bɔkɛ yele la ta’an kɔ’ɛ to puti’irɛ soŋa. Beni n sɔi? Se’ere n sɔi la, la ta’an basɛ ti to suure sa’am ti putɛyiila tara tɔ. La ta’an ana to wuu zu’usi n gulegeri, pi zɛ’an woo ti to ka nyɛta sore soŋa la. Bisɛ lan yuun ani mabipɔɣesi bayi la ti to puɣum tɔɣɛ ba yele la se’em ba yeledaaŋɔ la poan. Olivia yeti, “Kusebekãtɛ la n daa sa’am mam yire la, mam daa ani la bura ka mina mam n wan eŋɛ se’em.” Monika tɔɣɛ a sira n kaɛ a poore la yele yeti: “Mam suure n yuun sa’am ti la wuna mam ti la ana mam wuu sɛla n vɛɣeseni mam suure la. La yuun kpe’em bo mam ti n ta’an eŋɛ sɛla dabeserɛ woo poan. Mam yuun ka makɛ ti’isɛ ti yele ana wa wan eŋɛ.” Yehowa yeti a wan soŋɛ to la wani to suure san sa’am?

4. Wuu Filipi 4:​6, 7 n pa’alɛ se’em la, Yehowa pu’ulum biŋe ti a eŋɛ la bem bo to?

⁴ Yehowa n iti sɛla. A pu’ulum biŋe Baabule la poan ti a wan bo to ‘Naayinɛ suma’asum la.’ (Kaalɛ Filipi 4:​6, 7.) Suma’asum wa dela lan ni ana to mama se’em to san ana du’a du’a la en. Suma’asum wa ‘gani asaala woo bɔkerɛ,’ ti la pa’alɛ ti la gani ton ti’iseri sɛla mɛ. Hon tabelɛ zusɛ Yehowa ti la ana ho mama ti la eŋɛ ho pakerɛ? Bɔnkaŋa dela ‘Naayinɛ suma’asum la.’

5. Naayinɛ suma’asum la wan ta’an gu to sunya la to puti’irɛ la wani?

⁵ Gulesegɔ kaŋa mea nɔɔ yeti Naayinɛ suma’asum la ‘wan gu’ bii te’ele ‘ya sunya la ya puti’irɛ.’ Yelebire la ti ba yeti ‘gu’ la pa’alɛ la soogɛpa n yuun ni gu’ura tiŋa ti ku bɔna fai la. Nɛresɛba n yuun kɛ̃’ɛri tinsɛka ti ba gu’ura ka yuun boi la fai, se’ere n sɔi la ba yuun mi ti soogɛpa n gu’uri ba. Bala mea, Naayinɛ suma’asum la san gu’ura to sunya la to puti’ira, la ni ana to la mama se’ere n sɔi la to mi ti to boi la fai. (Ym. 4:8) Wuu Hannah la, to bɔŋa la san puɣum ka tee kalam, to wan kelum tara suma’asum. (1 Sa. 1:​16-18) La me san ana to mama la kan kpe’em bo to ti to ti’isɛ bɔkɛ yɛla ge nyaa kɔ’ɛ to puti’irɛ soŋa.

6. To wan eŋɛ la bem ta’an tara Naayinɛ suma’asum la? (Bisɛ foote la.)

⁶ Ton nari ti to eŋɛ sɛla. Yele san paɛ hɔ, yele ‘gu’ura’ la ti a soŋɛ hɔ. Wani wani? Kɔ’ɔn zusa nyaa ta baŋɛ ti Naayinɛ suma’asum la boi mɛ la hɔ. (Lu. 11:9; 1 Tes. 5:17) Luis ti to puɣum tɔɣɛ a  yele la tɔɣɛ pa’alɛ sɛla n yuun soŋɛ eŋa la a pɔɣa Ana ti ba ta’an ŋmibe se’em ma’a ti a ta baŋɛ ti la gee la ŋmaresi fii la a ki la. A yeti: “Bɔnkana taaba poan la, la ni kpe’em mɛ ti ho ta’an kɔ’ɛ ho puti’irɛ imma’asum yɛla la yɛla ase’a poan. Ge zusega n basɛ ti to tara suma’asum to bɔŋa la poan.” Luis la a pɔɣa yeti bamam yuun ni kɔ’ɔn zusa tabela mɛ paa yɛta Yehowa yeti a bo ba suma’asum ti la ana ba mama ge me bo ba yɛm ti ba ta’an kɔ’ɛ ba puti’irɛ soŋa. Yehowa me yuun soŋɛ ba mɛ. Yeletooro san paara hɔ, ŋmibera zusera ge Naayinɛ suma’asum la wan gu ho suure la ho puti’irɛ.—Arom 12:12.

YEHOWA WAN BASƐ TI HO ZE’A KANKAŊI

7. Yeletooro san paara tɔ, la ta’an ni ana to la wani?

⁷ Yeledaaŋɔ la. Yeletooro san paara tɔ to itigɔ la to ti’isegɔ ni tee mɛ. La ta’an basɛ ti la ana to wuu komi’isi n ni tara ɔɔreŋɔ yɛɣelena se’em la. Ana ti to puɣum tɔɣɛ a yele la yeti, Luis n yuun ki la yɛla zo’e zo’e n yuun daani en ti a suure sa’am. A yeti: “Saŋa ase’a mam suure n ni sa’am ti mam fabela bɔ’ɔra n mea. Mam sunsɔa n yuun ni nyie la eŋa n ka le bɔna la.” Leyɛ’ɛsa, la yuun daam Ana mɛ paa la eŋa n yuun nari ti a kɔ’ɛ puti’irɛ tum tuunse’a ti Luis yuun tuna la. Saŋa ase’a, la yuun ani en wuu komi’isi n tari ɔɔreŋɔ yɛɣelena se’em la. Yehowa soŋeri to la wani yɛla n gaŋɛ nu’usi san paara tɔ?

8. Wuu Isaiah 33:6 n pa’alɛ se’em la, Yehowa basɛ ti to tara la suure lua la bem poan?

⁸ Yehowa n iti sɛla. A yele to yeti a wan basɛ ti to ze’a kankaŋi. (Kaalɛ Isaiah 33:6.) Komi’isi san ŋmɛ’ɛra ɔɔreŋɔ, ɔɔreŋɔ la ni yɛɣelena mɛ ti la dɛna dɛŋa. Ɔɔreŋɔ san wan ta’an ze’a kankaŋi kan yɛɣelena, ba ni dekɛ la sɛla n ani wuu vuga basɛ ko’om la poan. Vuga wa ni basɛ ti ɔɔreŋɔ la ka yɛɣelena ti sɛba me n boi bim la ni bɔna la fai. Ge vuga wa san wan basɛ ti ɔɔreŋɔ ze’a kankaŋi kan yɛɣelena, la dela ɔɔreŋɔ la kelum kena. Bala mea nɔɔ, to san kelum pu’usa Yehowa to daaŋɔ la poan, a wan basɛ ti to ze’a kankaŋi.

9. To viisegɔ lɔɣɔrɔ la wan ta’an soŋɛ to la wani ti to ita yɛla ma’a ma’a? (Bisɛ foote la.)

⁹ Ton nari ti to eŋɛ sɛla. Yeledaaŋɔ san basɛ ti ho suure sa’am, kpeŋe homea ge kelum zusa, kena zamesegɔ la na’am mɔɔlegɔ. Yelemɛŋɛrɛ la dela, daanse’ere ho kan ta’an tum wuu hon yuun tuni  se’em la ge tɛ̃ra ti Yehowa mi lan ani ho se’em mɛ. (Dekɛ makɛ Luke 21:​1-4.) Leyɛ’ɛsa, nyɛta saŋa ita homea zamesegɔ ge me ti’isa taɣesa. Bem zuo? Yehowa ni doose la a tigere la poan pa’alɛ tɔ Baabule yelese’a n wan soŋɛ tɔ ti to ita yɛla ma’a ma’a. Ho san bɔta ti ho baŋɛ yelese’a n wan soŋɛ hɔ, ho ta’an dekɛ JW Library^®, Watch Tower Publications Index, la Yehowa Sɛɛradoma Viisegɔ Gɔŋɔ n boi ho yetɔɣum poan la eŋɛ viisegɔ. Monika ti to puɣum tɔɣɛ a yele la yeti, eŋa suure san ni sa’am ti la ana en bura, a ni dekɛ la viisegɔ lɔɣɔrɔ wa tum tuuma. Makerɛ, a yuun ɛ la yelebire la n de “sunsɔa” la vuurɛ. Saŋa ase’a, a yuun ni ɛ la “yelemɛŋɛrɛ” la “nɛra n kaɛ ho poore” vuurɛ. A ni kɔ’ɔn kaala eŋa n viisɛ nyɛ sɛla la bala, ti a suure ni ana mama. A yeti: “Mam n yuun pɔsɛ ita viisegɔ la, mam suure n yuun sa’am. Ge mam n yuun kaali yelese’a ti mam viisɛ nyɛ la, la yuun ani mam wuu Yehowa n kɔkɛ mam la. Mam yuun baŋɛ ti Yehowa mi lan ani mam se’em mɛ ge me soŋera mam.” Yehowa n soŋeri to se’em la wan ta’an basɛ ti to ita yɛla ma’a ma’a ge ta basɛ ti la ana to mama.—Ym. 119:​143, 144.

YEHOWA WAN SOŊƐ HƆ

10. Yeletoo san paɛ tɔ la ta’an ni ana to la wani?

¹⁰ Yeledaaŋɔ la. To san ni bɔna yeletooro poan, saŋa ase’a tɔregɔ n ni paɛ tɔ ti to suure me sa’am. La ta’an ana wuu nɛra n mi zɔa paa, nyaa pɔɣelum ge ka ta’an zɔta soŋa. La ta’an ni kpe’em bo to ti to ita yelese’a ti to puɣum ni ita la, bii to inya ni ka kpeŋe ti to ita yelese’a n yuun ni basɛ ti to tara pupeelum la. Wuu Eliya la, la ta’an ana to wuu to ba’ɛ taregɛ mɛ kan ta’an le isige eŋɛ sɛla. (1 Na. 19:​5-7) Yehowa wan eŋɛ la bem bo to tɔregɔ san paɛ tɔ?

11. Yehowa le soŋera tɔ la wani? (Yooma 94:18)

¹¹ Yehowa n iti sɛla. A yeti a wan soŋɛ tɔ. (Kaalɛ Yooma 94:18.) Wuu nɛra n mi zɔa paa n ni pɔɣelum ti la nara ti ba soŋɛ en se’em la, la me wan nara ti ba soŋɛ tɔ ti to ta’an kelum pu’usa Yehowa. Sankaŋa poan la, Yehowa basɛ ti to tara suure lua ti: ‘Mam Yehowa ho Naayinɛ n gurɛ ho zuɔ nu’o, Se’emdaana n yeti ho yeti, ‘Da zɔta dabeem. N wan soŋɛ hɔ.’ (Isa. 41:13) A yuun soŋɛ Naba David mɛ. Se’em ma’a ti yeledaaŋɔ yuun paɛ David ti a dindoma me bɔta ti ba ku en la, a  yuun yele Yehowa yeti: ‘Ho zuɔ nu’o la n soŋeri mam.’ (Ym. 18:35) Ge Yehowa iti la wani soŋera tɔ?

12. Bani ti Yehowa wan ta’an doose ba poan soŋɛ tɔ tɔregɔ san paɛ tɔ?

¹² Yehowa ni kpemese la nɛreba giila ti ba soŋɛ tɔ. Makerɛ, tɔregɔ n yuun paɛ David la, a zɔ Yonatan yuun keŋɛ mɛ ta buɣelɛ a suure ge kpemese a giila. (1 Sa. 23:​16, 17) Bala mea nɔɔ ti Yehowa yuun loe Elisa ti a soŋera Eliya. (1 Na. 19:​16, 21; 2 Na. 2:2) Zina beere wa me, Yehowa ta’an basɛ ti to deodoma, to zɔdoma bii keendoma la soŋɛ tɔ. Ge to suure san sa’am, to ta’an kan bɔta ti to lɛna nɛreba. To ni kɔ’ɔn bɔta la to bɔna to ma’a. To tari buurɔ. To wan eŋɛ la bem ti Yehowa soŋɛ tɔ?

13. To san bɔta ti Yehowa soŋɛ tɔ, la nari ti to eŋɛ la bem? (Bisɛ foote la.)

¹³ Ton nari ti to eŋɛ sɛla. Tiregɛ la ho da yɛlegera homea. To san yɛlegera tomea bɔna to ma’a to nyaa ni kɔ’ɔn ti’isa la to yeledaaŋɔ la yele. Wana wa ta’an basɛ ti to kan tara putɛsonɛ ta’an kɔ’ɛ puti’irɛ. (Mag. 18:1) La boi bim ti saŋa ase’a la ni nara ti to bɔna to ma’a, yele yele wuu yeletooro san paɛ tɔ. Ge to san yɛlegera tomea saŋa woo, la wan ana wuu to zaɣesɛ la Yehowa n boti a doose nɛresɛba poan soŋɛ to se’em la. Bala la, la san puɣum kpe’em bo ho la se’em me yeletooro poan, basɛ ti ho zɔdoma, ho deodoma la keendoma la soŋɛ hɔ. Tɛ̃ra ti Yehowa dole la bamam poan soŋera hɔ.—Mag. 17:17; Isa. 32:​1, 2.

YEHOWA WAN BUƔELƐ HO SUURE

14. Bem yɛla n wan ta’an basɛ ti dabeem tara tɔ?

¹⁴ Yeledaaŋɔ la. Yɛla ase’a san paɛ tɔ, dabeem n ni tara tɔ. Baabule la poan, Naayinɛ yamesi tɔɣɛ pa’alɛ ba suure n yuun sa’am ti dabeem tara ba se’em ba dindoma n yuun boti ba daam ba la. (Ym. 18:4; 55:​1, 5) Bala mea nɔɔ ti nɛreba ta’an giisa tɔ sukuu poan la tuuma zɛ’an. To deodoma la kpɛ’ɛndoma ta’an giisa tɔ. Dabeem me ta’an tara tɔ ti to wan ki bã’a zuo. Saŋa ase’a la ta’an ana to wuu bia n ka mi eŋa n wan eŋɛ sɛla la. Yehowa soŋeri to la wani sankana wa poan?

15. Yooma 94:19 basɛ ti to tara suure lua la bem poan?

¹⁵ Yehowa n iti sɛla. Eŋa n ni buɣelɛ to suure ti la ana to mama. (Kaalɛ Yooma  94:19.) Gulesegɔ wa basɛ ti to ti’isa la dabeem n tari bia ti a ka ta’an gisa, se’em ma’a ti saa tãsera vɔɔla la. To ta’an ti’isɛ bisɛ a sɔ n paɛ a zɛ’an, nyɔkɛ en zãla, nyaa pã’asa en ti a gisa. La boi bim ti saa la kelum tãsera vɔɔla mɛ ge a sɔ la n nyɔkɛ en paɣelɛ a bɔkɔ zuo pã’asera en la basɛ ti a puti’irɛ ga’a la bɔbeyinɛ. Yeletooro san basɛ ti dabeem tara tɔ, to ta’an bɔta ti to saazuo sɔ la gurɛ to nu’o ti la ana to mama. To wan eŋɛ la bem ti Yehowa ta’an buɣelɛ to suure?

16. To wan eŋɛ la wani ti Yehowa ta’an buɣelɛ to suure? (Bisɛ foote la.)

¹⁶ Ton nari ti to eŋɛ sɛla. Nyɛta nɛŋa zusa Yehowa ge me kaala Baabule la saŋa woo. (Ym. 77:​1, 12-14) Ho san ita bala, yele san paɛ hɔ ti ho suure sa’am, ho wan yele ho saazuo Sɔ la ti a soŋɛ hɔ. Yele Yehowa lan ani ho se’em. Basɛ ti a doose Baabule la poan buɣelɛ ho suure. (Ym. 119:28) Ho nyaa wan baŋɛ ti Baabule kaalegɔ zɛ’ɛsi boi mɛ n wan ta’an buɣelɛ ho suure dabeem san tara hɔ. Makerɛ, Yob, Yooma la Magaha gɔnɔ la, la Yezu yetɔɣum la n boi Matu a zuo 6 la tari la subuɣelegɔ yɛla n wan soŋɛ hɔ. Ho san zusa Yehowa ge kaala Baabule la ho wan sirum baŋɛ ti a sirum buɣeli ho suure.

17. To tari puti’irɛ la bem poan?

¹⁷ To ta’an tara puti’irɛ ti Yehowa wan bɔna la tɔ yeledaaŋɔ san paɛ tɔ. To kan makɛ bɔna to ma’a. (Ym. 23:4; 94:14) Yehowa yeti a wan gu’ura tɔ, basɛ ti to ze’a kankaŋi, soŋera tɔ ge me buɣela to suure. Isaiah 26:3 tɔɣɛ Yehowa yele yeti: ‘Ho wan gu’ura sɛba woo n kɔ’ɔn dekɛ bamea delum ho la; ho wan bɔ’ɔra ba suma’asum saŋa woo, se’ere n sɔi la ba dekɛ bamea delum la hon.’ Bala la, dekɛ homea delum Yehowa ge basɛ ti a soŋɛ hɔ sarɔtɔ woo poan. Ho san ita bala, ho wan kɔ’ɔn ze’a kankaŋi biɣi biɣi saŋa poan.