ZASEŊƆ 3
YUUNƐ 35 “Make Sure of the More Important Things” (“Tuna Ninmu’urɛ Tuuma La”)
Kɔ’ɛ Ho Puti’irɛ Ti Yehowa Puurɛ Pee
“Na’ayenɛ zɔɔlom n de yam pɔhega, ho se’em n mi fa’a Daana wa n tare potɛn’ɛrɛ.”—MAG. 9:10.
YELEKPINE
Mi’ilum, bɔkerɛ la hon wan ti’isa nyɔkera yɛla n wan soŋɛ ho se’em ti ho kɔ’ɛ ho puti’irɛ soŋa.
1. Bem yɛla n ni kpe’em bo to ti to eŋɛ?
LA NARI ti to kɔ’ɛ to puti’irɛ dabeserɛ woo poan. Yɛla ase’a ka kpe’em ti to kɔ’ɛ to puti’irɛ de poan, maɣesɛ wuu ton wan di sɛla bii ton wan gã’arɛ tɛmsebo. Yɛla ase’a kpe’em mɛ. Ton wan kɔ’ɛ to puti’irɛ se’em la ta’an basɛ ti to tara pupeelum la imma’asum, tomam la to yidoma bɔŋa ana soŋa bii to ta’an pu’usa Yehowa soŋa. To ni bɔta la to kɔ’ɛ to puti’irɛ ti la soŋɛ tomam la to yidoma. Sɛla n gani za’a dela, la ni basɛ ti Yehowa puurɛ pee mɛ.—Arom 12:1, 2.
2. Ho wan eŋɛ la wani ta’an kɔ’ɛ ho puti’irɛ soŋa?
2 Ho san wan ta’an kɔ’ɛ ho puti’irɛ soŋa, la nari ti ho (1) baŋɛ yɛla la za’a, (2) baŋɛ Yehowa n geele de se’em, la (3) ti’isɛ soŋa soŋa. To wan sɔsɛ yɛla atã wa ti la soŋɛ tɔ ti to ta’an ti’isa nyɔkera yɛla.—Mag. 2:11.
BAŊƐ YƐLA LA ZA’A
3. Bo makerɛ pa’alɛ sɛla n sɔi ti la nara ti ho baŋɛ yɛla la za’a ge nyaa kɔ’ɛ ho puti’irɛ.
3 Sɛla n deŋɛ nɛŋa n wan soŋɛ hɔ ti ho ta’an kɔ’ɛ ho puti’irɛ soŋa dela ho baŋɛ yɛla la za’a. Beni n sɔi ti la yele pakɛ ti ho eŋɛ bala? Ti’isɛ bisɛ ti bã’ara n keŋɛ asibitin. Dɔgeta la wan bo en tiim ge nan ka soke baŋɛ sɛla n daani en? A kan eŋɛ bala. Bala mea nɔɔ ti ho san wan ta’an kɔ’ɛ ho puti’irɛ soŋa, la nari ti ho viisɛ baŋɛ yɛla la za’a. Ho wan eŋɛ la wani ta’an eŋɛ bala?
4. Wuu Magaha 18:13 n pa’alɛ se’em la, ho wan eŋɛ la wani ta’an baŋɛ yɛla la za’a? (Bisɛ foote la.)
4 Sokere n de baŋerɛ. Makerɛ, ti’isɛ bisɛ ti nɛra n beem ho ti ho wa’an de’eŋo na. La nari ti ho keŋɛ? Ho san ka ba’ɛ mina nɛra la bii ho ka mi ban wan ta ita sɛla bim, la nari ti ho soke en yeti: “De’eŋo la wan bɔna la bɛ? La wan pɔsɛ la sankani? Nɛreba zo’e zo’e n wan wa’ana? Ani n wan bisa de’eŋo la? Nɛrebani n wan wa’ana? Ba wan ita la bem de’eŋo la poan? Dãkpe’eŋo wan bɔna bim?” Lebesego la wan soŋɛ hɔ ti ho ta’an kɔ’ɛ ho puti’irɛ soŋa.—Kaalɛ Magaha 18:13.
Sokere n de baŋerɛ (Bisɛ kaalegɔ zɛ’an 4) a
5. Ho san baŋɛ yɛla la za’a, la nari ti ho eŋɛ la bem?
5 Ho san baŋɛ yɛla la za’a ba’asɛ, ti’isɛ sɛla za’a n wan ta ita bim. Makerɛ, ho wan eŋɛ la wani ho san baŋɛ ti nɛresɛba n ka doli Baabule naresum yɛla n wan ta bɔna bim bii nɛreba wan nyuura dãkpe’eŋo bura bura? Hon ka ti’isɛ ti yelegaasa ma’a n wan ta ita de’eŋo wa poan? (1 Pe. 4:3) Leyɛ’ɛsa, ho wan eŋɛ la wani ho san baŋɛ ti de’eŋo la saŋa dela sansɛka mea nɔɔ ti ho kena zamesegɔ bii na’am mɔɔlegɔ? Ho san baŋɛ yɛla la za’a, ho nyaa wan ta’an kɔ’ɛ ho puti’irɛ soŋa. Ge la me nari ti ho eŋɛ sɛla pa’asɛ. Homea mi lan ani ho se’em ge soke homea yeti, ‘La wan ana Yehowa la wani?—Mag. 2:6.
BAŊƐ YEHOWA N GEELE DE SE’EM
6. Wuu Yames 1:5 n yele se’em la, beni n sɔi ti la nara ti to zusɛ Yehowa ti a soŋɛ tɔ?
6 Zusɛ Yehowa ti a soŋɛ hɔ ti ho baŋɛ eŋa n geele yɛla se’em. Yehowa yeti a wan bo to yɛm ti to ita yelese’a ti a bɔta. Eŋa “n bo’ore nɛra woo [yɛm] gee ka ganhera.”—Kaalɛ Yames 1:5.
7. Ho wan eŋɛ la wani ta’an baŋɛ Yehowa n geele yɛla se’em? Bo makerɛ.
7 Ho san zusɛ Yehowa ti a pa’alɛ hɔ hon wan eŋɛ sɛla, kelese eŋa n yele ho sɛla la. Makɛ bisɛ ti ho ye la zɛ’an ge bɔregɛ. Ho wan eŋɛ la wani? Ho wan soke la nɛra n mi zɛ’an la. Nɛra la san pɔsɛ pa’ala hɔ hon wan doose zɛ’an, ho wan bure poore basɛ en ge kena? Aayi. Ho wan ma’ɛ homea kelese en ti a pa’alɛ hɔ sore la. Bala mea nɔɔ ti ho san zusɛ Yehowa ti a pa’alɛ hɔ hon wan eŋɛ sɛla, ti’isɛ Baabule naresum yelese’a n wan basɛ ti ho bɔkɛ yele la soŋa. Makerɛ, ho san bɔta ti ho kɔ’ɛ ho puti’irɛ nyaa ho wan keŋɛ de’eŋo la bii ho kan keŋɛ, ho ta’an bisɛ Baabule la n tɔɣɛ de’enyooro, zɔtɔ be’ero, la ton wan dekɛ Naayinɛ Na’am la deŋɛ nɛŋa to vom poan se’em.—Mt. 6:33; Arom 13:13; 1 Ko. 15:33.
8. Ho san baŋɛ ti la nari ti ho ɛ soŋerɛ pa’asɛ, ho wan eŋɛ la wani? (Bisɛ foote la.)
8 Saŋa ase’a, la wan nara ti nɛra soŋɛ hɔ ti ho nyɛ hon boti ho baŋɛ sɛla la. Ho ta’an soke mabia n kumesɛ ti a soŋɛ hɔ. Ge la wan ana soŋa ti homea eŋɛ viisegɔ. Yɛla zo’e zo’e boi Yehowa Sɛɛradoma Viisegɔ Gɔŋɔ, la Scriptures for Christian Living gɔnɔ la poan n wan soŋɛ hɔ. Tɛ̃ra ti, ho boti la ho kɔ’ɛ ho puti’irɛ ti Yehowa puurɛ pee.
Geele bisɛ Yehowa puti’irɛ n de se’em yele la poan (Bisɛ kaalegɔ zɛ’an 8) b
9. To wan eŋɛ la wani kɔ’ɛ to puti’irɛ ti Yehowa puurɛ pee? (Epesus 5:17)
9 To wan eŋɛ la wani kɔ’ɛ to puti’irɛ ti Yehowa puurɛ pee? Yia, la nari ti to baŋɛ en soŋa. Baabule la yeti: “Ho se’em n mi fa’a Daana wa n tare potɛn’ɛrɛ [bii bɔkerɛ].” (Mag. 9:10) To san mina Yehowa hala, a puti’irɛ n de sɛla, la eŋa n nɔŋɛ ge yaɛ sɛla, la pa’alɛ ti to tari la bɔkerɛ. Soke homea yeti, ‘Mam n mi Yehowa se’em la wan basɛ ti n kɔ’ɛ n puti’irɛ la wani ti a puurɛ pee?’—Kaalɛ Epesus 5:17.
10. Beni n sɔi ti Baabule naresum yɛla yele pakɛ gana yaabedoma yɛla bii buuri malema?
10 Saŋa ase’a la nari ti to eŋɛ sɛla n wan daam to yidoma ta’an basɛ ti Yehowa puurɛ pee. Makerɛ, dɔɣereba basɛba ta’an pɛ̃regɛ ba bipugela ti a ele mabia n tari ligeri zo’e zo’e, la boi bim ti mabia la ka muuri Yehowa pu’usegɔ poan. La dela yelemɛŋɛrɛ ti ba boti la mabia la ta’an bisa ba bipugela la soŋa. Ge pugela la nari ti a soke amea yeti, ‘Ani n wan soŋɛ mam ti n nyɛta nɛŋa tɔlega vo’osum poan? Yehowa geele yele wa la wani? Lebesego la boi la Matu 6:33. Yezu yeti, Kristakɔma nari ti ba ‘kɔ’ɔn ɛɛra Naayinɛ Na’am la yia.’ La boi bim ti to bo’ori to dɔɣereba, la nɛresɛba n boi to gingilega la poan gilema ge sɛla yele n pakɛ to paa dela to basɛ ti Yehowa puurɛ pee.
TI’ISƐ SOŊA SOŊA
11. Halɛ deni n boi Filipi 1:9, 10 n wan soŋɛ hɔ ti ho ti’isɛ soŋa soŋa?
11 Ho san baŋɛ Baabule naresum yelese’a n wan soŋɛ hɔ ti ho kɔ’ɛ ho puit’irɛ, la nari ti ho nyaa ti’isɛ soŋa soŋa. (Kaalɛ Filipi 1:9, 10.) Ho san ti’isa nyɔkera yɛla, la wan soŋɛ hɔ ti ho baŋɛ yele woo n wan ta ba’asɛ se’em. Saŋa ase’a, la ta’an dɛna naana ti ho kɔ’ɛ ho puti’irɛ. La me ta’an kpe’em saŋa ase’a. Ho san ti’isa nyɔkera yɛla, ho wan ta’an kɔ’ɛ ho puti’irɛ soŋa yɛla n kpe’em poan.
12-13. Ho san ti’isɛ nyɔkɛ yɛla, la wan soŋɛ ho la wani ti ho loe tunsɛka n nari?
12 Geele makerɛ wa bisɛ. Ho eeri la tuunɛ n wan soŋɛ hɔ ti ho ta’an bisa ho deodoma. Ho nyɛ la tuuma bayi. Ho geele yɛla la za’a mɛ baŋɛ tuuma la n ani se’em, tuuma la saŋa, la hon wan eŋɛ se’em ta’an paɛ tuuma la zɛ’an. Tuuma bayi wa za’a ka giisɛ Baabule naresum yele. Daanse’ere ho loe la ba poan ayima se’ere n sɔi la, hon boti mina n bala bii ba yɔɔri zɔ’ɔra mɛ. Ge yɛla ase’a kelum bɔna ti la nara ti ho ti’isɛ de yele ge nyaa kɔ’ɛ ho puti’irɛ.
13 Makerɛ, tuunɛ la wan basɛ ti ho kan ta’an kena zamesegɔ? Tuunɛ la wan basɛ ti ho kan nyɛta nɛŋa bɔ’ɔra ho deodoma? Soke ana wa wan soŋɛ hɔ ti ho ‘tuna ninmu’urɛ tuuma la yia,’ n de ho pu’usa Yehowa ge me bisa ho deodoma soŋa gana hon wan ti’isa ligeri zo’e zo’e yele. Ho nyaa wan kɔ’ɛ ho puti’irɛ ti Yehowa me kã bo ho.
14. To san nɔŋɛ nɛreba ge ti’isa nyɔkera yɛla, la wan soŋɛ to la wani ti to kan eŋɛ sɛla n wan daam nɛreba?
14 Ton ka boti to ‘pita nɛreba basera’ la zuo, to san ti’isa nyɔkera yɛla, to wan bisɛ ton wan kɔ’ɛ to puti’irɛ se’em ti la kan daam nɛreba. (Flp. 1:10) Yele dena wa pakɛ mɛ to san bɔta ti to loe ton wan yɛɛra to lɔɣɔrɔ ge maala tomea se’em. Makerɛ, to ta’an bɔta ti to yɛ lɔkɔ kuyima. Ge la wan ana mabiisi, la sɛba n daɣɛ mabiisi la wani? Ton bo’ori nɛreba gilema la zuo, to wan ti’isa nyɔkera yɛla. Nɔŋerɛ wan soŋɛ tɔ ti to ‘ti’isa nɛreba yele’ ge me ita yɛla makera. (1 Ko. 10:23, 24, 32; 1 Tim. 2:9, 10) To nyaa wan kɔ’ɛ to puti’irɛ ti la pa’alɛ ti to nɔŋɛ nɛreba ge me bɔ’ɔra ba gilema.
15. La nari ti ho ti’isɛ la bem yele soŋa ge nyaa kɔ’ɛ ho puti’irɛ ninmu’urɛ yele poan?
15 Ho san yeti ho kɔ’ɛ ho puti’irɛ ninmu’urɛ yele poan, ti’isɛ bisɛ hon nari ti ho eŋɛ yelese’a ti ho puti’irɛ la ta’an tum. Yezu yuun yeti to “zin’ire tɛn’ɛhɛ behɛ nya [to] tare lɔgɔseto woo” n nari. (Lu. 14:28) Bala la, ti’isɛ bisɛ hon wan sa’am saŋa, lɔɣɔrɔ, la paŋa se’em ti ho puti’irɛ la ta’an tum. Saŋa ase’a, la wan nara ti ho sɔsɛ la ho deodoma baŋɛ bamam me n wan eŋɛ sɛla soŋɛ ti ho puti’irɛ la tum. Beni n sɔi ti la ana soŋa ti ho eŋɛ bala? Daanse’ere ho wan baŋɛ ti la nari ti ho malum demese ho puti’irɛ la bii ho tee dɛ. Hon la ho deodoma san sɔsɛ ti ho kelese bamam puti’irɛ n de se’em, ba wan soŋɛ hɔ ti ho ta’an tum hon kɔ’ɛ ho puti’irɛ ti ho eŋɛ sɛla la.—Mag. 15:22.
KƆ’Ɛ HO PUTI’IRƐ TI LA TA ANA HO SOŊA
16. Ho wan eŋɛ la wani ta’an kɔ’ɛ ho puti’irɛ soŋa? (Bisɛ daka la zuo n de “ Hon Wan Eŋɛ Se’em Kɔ’ɛ Ho Puti’irɛ Soŋa.”)
16 Ho san eŋɛ yelese’a ti to sɔsɛ ba yele zaseŋɔ wa poan la, ho wan ta’an kɔ’ɛ ho puti’irɛ soŋa. Ho baŋɛ yɛla la za’a mɛ, viisɛ nyɛ Baabule naresum yelese’a n wan soŋɛ hɔ ti ho kɔ’ɛ ho puti’irɛ ti Yehowa puurɛ pee. Ho nyaa ta’an zusɛ Yehowa ti a soŋɛ hɔ ti ho puti’irɛ la tum soŋa.
17. Bem wana mɔpi n wan soŋɛ hɔ ti ho kɔ’ɛ ho puti’irɛ soŋa?
17 Ho san puɣum tabelɛ kɔ’ɛ ho puti’irɛ ti la tum soŋa bo ho, tɛ̃ra ti la nari ti saŋa woo ho dekɛ homea delum Yehowa. Eŋa ma’a n wan bo ho mi’ilum la bɔkerɛ ti ho ta’an ti’isa nyɔkera yɛla ge me tara yɛm. (Mag. 2:1-5) Yehowa wan soŋɛ hɔ ti ho kɔ’ɛ ho puti’irɛ ti a puurɛ pee.—Ym. 23:2, 3.
YUUNƐ 28 Gaining Jehovah’s Friendship (Dɛna Yehowa Zɔ)
