1. Beni n sɔi ti la ana soŋa ti to kena Yezu Kum Tiirɛ la yuunɛ woo?

 NƆKPE’ENE kai ti lua bunɔ la dela bo’olum n boi de to’ore! (2 Ko. 9:15) Yezu n yuun wa’ana ki bo nɛresaaleba la zuo, ho wan ta’an tara bɔnsoŋa la Yehowa. Ho me tari puti’irɛ ti ho wan ta’an ta vɔna daarewoo. Bisɛ lan de yelesonɛ se’em ti to eŋɛ pa’alɛ to puurɛ n pee se’em la Yehowa n nɔŋɛ tɔ ge basɛ ti Yezu wa’ana ki bo to la! (Arom 5:8) Yezu yuun eŋɛ la a Kum Tiirɛ maaseŋɔ, lan wan eŋɛ se’em ti to kɔ’ɔn tɛ̃ra Yehowa, la Yezu n eŋɛ sɛla bo to la.—Lu. 22:​19, 20.

2. To wan sɔsɛ la bem zaseŋɔ wa poan?

² Yuunɛ wa, Yezu Kum Tiirɛ la wan dɛna la Asibidaarɛ, April 12, 2025. To za’a waabi kɔ’ɔn maasena mɛ ti to daan ta bɔna bim. To san ti’isa taɣesa a Yehowa, la Yezu n eŋɛ sɛla bo to Kum Tiirɛ la saŋa, to wan nyɛ nyuurɔ zo’e zo’e. Zaseŋɔ wa poan, to wan zamesɛ baŋɛ lua bunɔ la n pa’alɛ tɔ Yehowa la a Dayua la yele se’em. Zaseŋɔ seko n taɣelɛ la poan, to wan baŋɛ lua bunɔ la n soŋeri to se’em, la ton wan eŋɛ sɛla pa’alɛ ti to puurɛ pee ya.

 LUA BUNƆ LA N PA’ALƐ TƆ YEHOWA YELE SE’EM

3. La wan eŋɛ la wani ti nɛra ayina ma’a kum ta’an faaɛ nɛreba tusa tusa basɛ? (Bisɛ foote la.)

³ Lua bunɔ la pa’alɛ tɔ ti Yehowa iti a yɛla woo la tontɔɔ. (Tɛɛ. 32:4) Wani wani? Geele yele wa bisɛ: Adam n yuun zaɣesɛ Naayinɛ nɔɔrɛ la zuo ti be’em la kum bɔna. (Arom 5:12) Yehowa yuun basɛ ti Yezu wa’ana ki bo to mɛ ti a ta’an faaɛ tɔ be’em la kum poan. La wan eŋɛ la wani ti nɛra ayina ma’a kum ta’an faaɛ nɛreba tusa tusa basɛ? Tuntuna Paul yuun yeti: “Nɛra yene [Adam] n zagahɛ Yenɛ nɔɔrɛ la zuo te nɛreba dɛna be’emdoma, bala mea te Yenɛ yi nɛreba tontɔɔdoma yɛhera la nɛra yene Yesu Krista wa, n ka zagahɛ Yenɛ nɔɔrɛ la.” (Arom 5:19; 1 Tim. 2:6) Paul yuun boti a yeti nɛra ayina ma’a n ani kasi n zaɣesɛ Naayinɛ la zuo ti be’em la kum bɔna. Bala mea nɔɔ ti nɛra ayina ma’a n ani kasi n nam Naayinɛ la zuo ti to bɔna fai.

4. Beni n sɔi ti Yehowa yeen ka bo yɔ’ɔ ti Adam yaasi sɛba n nani en vɔna daarewoo?

⁴ La yuun nari ti Yehowa basɛ ti Yezu wa’ana ki faaɛ tɔ? La yuun kan ani ni soŋa ti Yehowa yeen bo yɔ’ɔ ti Adam yaasi sɛba n nani en vɔna daarewoo? To ta’an ti’isa ti bala n wan maalɛ ni yele la soŋa. Ge tɛ̃ra ti Yehowa iti a yɛla woo la tontɔɔ sore poan ti la di mi’a. Yehowa n iti a yɛla tontɔɔ la zuo, a kan ta’an kɔ’ɔn tamɛ be’em sebo ti Adam tum la ti la ana wuu Adam puɣum ka tum be’em me la.

5. Beni n sɔi ti to tara puti’irɛ ti Yehowa wan eŋɛ sɛla n ani soŋa?

⁵ Yehowa yuun san ka basɛ ni ti Yezu wa’ana ki bo to ge yeen bo Adam yaasi n ka di mi’a yɔ’ɔ ti ba vɔna daarewoo, la pa’alɛ ti Yehowa ka iti a yɛla tontɔɔ. Bala me ta’an basɛ ti nɛreba ti’isa ti Yehowa ka iti sɛla n de tontɔɔ saŋa woo, hali a kan tum eŋa n pu’ulum biŋe ti a ta eŋɛ sɛla beere sa’am la. Yelesonɛ la dela, bala yuun ka eŋɛ. Yehowa n yuun tum yɛla tontɔɔ hali basɛ ti a Dayɔba’arɛ namesɛ ta ki tomam zuo la pa’alɛ ti, saŋa woo a wan ita sɛla n de tontɔɔ.

6. Yehowa tari la halɛ deni n basɛ ti a tum a Dayua ti a wa’ana ki bo to? (1 Yon 4:​9, 10)

⁶ Yehowa tari la halɛ deyima me n basɛ ti a tum Yezu ti a wa’ana ki bo to. La dela nɔŋerɛ. (Yon 3:16; kaalɛ 1 Yon 4:​9, 10.) Yezu lua bunɔ la basɛ ti to baŋɛ ti Yehowa boti la to ta vɔna  daarewoo ge me pa’asɛ a yizuo la poan. Geele yele wa bisɛ: Adam n yuun tum be’em la, a yuun ka le pa’asɛ Yehowa yizuo la poan. Ban dɔɣɛ to be’em poan la zuo, tomam me ka pa’asɛ Yehowa yizuo la poan. Ge to san tara sakerɛ ge nana Yehowa, Yezu lua bunɔ la wan basɛ ti Yehowa di sugeri bo to ti to pa’asɛ a yizuo la poan. Hali nananawa, tomam la Yehowa la to mabiisi tari la bɔnsoŋa la taaba. Sira, Yehowa sirum nɔŋɛ to mɛ!—Arom 5:​10, 11.

7. Yezu n yuun namesɛ se’em la basɛ ti to baŋɛ Yehowa n nɔŋɛ to se’em la wani?

⁷ To san ti’isɛ bisɛ lan yuun wuŋɛ Yehowa se’em ti a nyɛta ti a Dayua namesɛ ta ki la, to wan baŋɛ eŋa n nɔŋɛ to se’em. Sitaana yuun yeti nɛra ka boi n wan ta’an tara yelemɛŋɛrɛ bɔ’ɔra Naayinɛ la san wuna en. Yehowa n yuun bo yɔ’ɔ ti Yezu namesɛ ta ki la pa’alɛ ti Sitaana dela pumpɔrema. (Yob 2:​1-5; 1 Pe. 2:21) Yehowa yuun nyɛ nɛreba n ɛ̃regeri Yezu, ti soogɛpa ŋmɛ̃’ɛra en ge nyaa kpa en dɔɔ zuo. Yehowa yuun boi la saazuo ge bisa ti a Dayɔba’arɛ wa yaɣa dɔɔ la zuo namesɛ bala ta ki. (Mt. 27:​28-31, 39) Yehowa yuun tari pansɛka n wan gu yele ana wa. Makerɛ, nɛreba n yuun ɛ̃regɛ Yezu ge yeti: “Bahɛ te Yenɛ la fan en nananawa” la, Yehowa yuun ta’an eŋɛ ni bala bilam bilam. (Mt. 27:​42, 43) Ge Naayinɛ yuun san eŋɛ ni bala, lua bunɔ kan bɔna. Tomam me kan tari ni beere sa’am puti’irɛ. Bala la, Yehowa yuun bo yɔ’ɔ mɛ ti a Dayua la namesɛ ta ki.

8. Beni n sɔi ti to wan ta’an yeti la yuun wuni Yehowa mɛ la eŋa n yuun nyɛ ti a Dayua la namesa la? (Bisɛ foote la.)

⁸ La ka nari ti to ti’isa ti Naayinɛ n de gaŋɛ za’adaana la zuo, yɛla ka daani en! A naam to mɛ ti to ta’an wuna dama. Eŋa n naam to bala la pa’alɛ ti eŋa mea ani la bala. Baabule la yeti saŋa ase’a a ‘suure ni sa’am’ mɛ. (Ym. 78:​40, 41) Geele Abraham la Isaak yele la bisɛ. Yehowa yuun yele Abraham ti a dekɛ a dayua ayina ma’a la kaabɛ. (Pin. 22:​9-12; Heb. 11:​17-19) Yeen ti’isɛ bisɛ lan yuun wan ana Abraham se’em la eŋa n yuun maaseni ti a dekɛ su’a la kɔregɛ Isaak la. Nyaa dekɛ bala makɛ la lan yuun ani Yehowa se’em ti a nyɛta ti nɛreba mɛlesa a Dayua la bala nyaa ta ku en la!—Bisɛ vidiyo la zuo n de Tɔɣesa Ba Sakerɛ—Abraham, Bɔberɛ 2 n boi jw.org.

9. Arom 8:​32, 38, 39 pa’alɛ hɔ Yehowa n nɔŋɛ hon la ho mabiisi se’em la wani?

 ⁹ Lua bunɔ la pa’alɛ tɔ ti nɛra ka boi n nɔŋɛ tɔ gana Yehowa. To yidoma bii to zɔdoma kan ta’an nɔŋɛ to bala. (Kaalɛ Arom 8:​32, 38, 39.) To tari suure lua ti Yehowa nɔŋɛ to mɛ hali gana tomam mea n nɔŋɛ tomea se’em la. Hon wan bɔta ti ho ta vɔna daarewoo? Yehowa puɣum bɔta la bala. Hon wan bɔta ti a di sugeri bo ho? Yehowa puɣum maasum mɛ ti a eŋɛ bala. Eŋa n yeen bɔta sɛla dela to tara sakerɛ ge nana en. Lua bunɔ la sirum pa’alɛ ti Naayinɛ nɔŋɛ to mɛ paa. Tinpaalega la poan, to wan zamesɛ Yehowa nɔŋerɛ la yɛla zo’e zo’e pa’asɛ.—Pa. 3:11.

LUA BUNƆ LA N PA’ALƐ TƆ YEZU YELE SE’EM

10. (a) Beni n sɔi ti la yuun daana Yezu la eŋa n yeti a ki la? (b) Yezu yuun eŋɛ la bem basɛ ti Yehowa yu’urɛ la ana fa’a? (Bisɛ daka la zuo n de “ Yezu Yuun Basɛ Ti Yehowa Yu’urɛ La Ana La Fa’a.”)

¹⁰ Yezu yuun kɔ’ɔn fabela la nɛreba n wan ti’isa a Sɔ la yele se’em. (Yon 14:31) Ba yuun wan ku Yezu wuu a dela tunfɛ̃’ɛsadaana la. Bala la Yezu yuun fabeli la nɛreba n wan ti’isa a Sɔ la yele se’em ti la daana en. Bala n sɔi ti a yuun zusɛ yeti: “N Sɔ la han wan ta’an eŋɛ, da bahɛ te n nyɛ namehe kona.” (Mt. 26:39) Yezu n yuun ŋmibe se’em ta paɛ a kum la basɛ ti Yehowa yu’urɛ la ana la fa’a.

11. Yezu yuun eŋɛ la bem pa’alɛ ti a nɔŋɛ nɛreba paa? (Yon 13:1)

¹¹ Lua bunɔ la le pa’alɛ tɔ ti Yezu nɔŋɛ nɛreba mɛ, yele yele wuu a podɔleba la. (Mag. 8:31; kaalɛ Yon 13:1.) Makerɛ, Yezu yuun mi ti yelese’a ti  a wan eŋɛ tingɔŋɔ wa zuo la basɛba kpe’em mɛ. Ayima dela eŋa n wan ki la. Ge hali la bala za’a, Yezu yuun ka iti yele ana ti Yehowa n tum en zuo. Eŋa n nɔŋɛ nɛreba la n sɔi ti a yuun eŋɛ yele ana za’a. A yuun mɔɔlɛ bo nɛreba mɛ, pa’alɛ ba ge me ita ba soŋa. Hali dabese’ere daarɛ ti a yeti a ki la, a yuun pee la a tuntuneba la nama, tɔɣɛ buɣelɛ ba suure ge me pa’alɛ ba yɛla ase’a pa’asɛ. (Yon 13:​12-15) Yezu n yuun yule dɔɔ la zuo ti la wuna en la, a yele nayiga la n lɛm n la ti a wan ta vɔna daarewoo paradiisi poan. A me yuun yele la Yon ti a bisa a ma Mary. (Lu. 23:​42, 43; Yon 19:​26, 27) La daɣɛ Yezu kum la ma’a n pa’alɛ ti a nɔŋɛ nɛreba ge eŋa n yuun eŋɛ yelese’a za’a tingɔŋɔ wa zuo la pa’alɛ ti a nɔŋɛ nɛreba mɛ paa.

12. Yezu iti la bem bɔ’ɔra to nananawa?

¹² La boi bim ti Krista ki la ‘buyina ma’a’ ge a kelum ita la yɛla zo’e zo’e bɔ’ɔra tɔ. (Arom 6:10) A iti la bem? A kɔ’ɔn tiregera ita la yelesoma se’a ti lua bunɔ la bo to yɔ’ɔ ti to ita la. A kɔ’ɔn mu’ɛ la nini tuna zina beere wa. A dela to Naba, Malema Nɛŋadaana, la tansugere la zuodaana. (1 Ko. 15:25; Ep. 5:23; Heb. 2:17) Eŋa n laɣeseri loore Kristakɔma la, la nɛrekuuŋɔ la. A wan ita la bala ta paɛ mɛlesekãtɛ la ba’asegɔ bɔba. b (Mt. 25:32; Mr. 13:27) Eŋa n basɛ ti sakerɛ la yɛm yameŋa la bɔ’ɔra to vo’osum poan dia ba’asegɔ dabesa wa poan. (Mt. 24:45) A Yuun Tuseri Na’am Bisega la poan, a wan kelum soŋera tɔ. Sira, Yehowa dekɛ a Dayua la bo la tomam!

KELUM ZAMESA YELEPAALA

13. Ho wan eŋɛ la wani ta’an zamesɛ baŋɛ Naayinɛ la Krista n nɔŋɛ to se’em?

¹³ Ho ta’an ti’isɛ taɣesɛ yelese’a ti Yehowa la Krista Yezu eŋɛ bo to la. Tiirɛ Dia saŋa la, tiregɛ kaalɛ Yelesoma gɔnɔ la. Da kɔ’ɔn bɔta ti ho kaalɛ kaalegɔ zɛ’ɛsi zo’e zo’e. Tuɣum ma’ɛ homea bisɛ sɛla n sɔi ti la nara ti to nɔŋɛ Yehowa la Yezu. Ho me ta’an tɔɣɛ hon zamesɛ sɛla la bo nɛreba.

14. Wuu Yooma 119:97 n pa’alɛ se’em la, to san eŋɛ viisegɔ la wan soŋɛ to la wani ti to kelum zamesa lua bunɔ la, la pa’alegɔ ase’a yele? (Bisɛ foote la.)

 ¹⁴ Saŋa zo’e zo’e to ni zamesa la Naayinɛ tontɔɔ gãkerɛ, a nɔŋerɛ, la lua bunɔ la yele. Ho san yue yelemɛŋɛrɛ la poan, ho ta’an ti’isa ti, ‘Mam wan le ta’an zamesɛ la bem yele ana poan?’ Yelemɛŋɛrɛ la dela, to wan ta’an kelum zamesɛ yɛla pa’asɛ. Bala la, ho wan eŋɛ la wani? Zamesɛ to gɔnɔ la soŋa soŋa. Ho san kaalɛ sɛla ge ka bɔkɛ, eŋɛ viisegɔ. Dabeserɛ la poan, ti’isɛ taɣesɛ hon zamesɛ sɛla, la bala n pa’alɛ ho Yehowa la a Dayua la n nɔŋɛ ho se’em.—Kaalɛ Yooma 119:97.

15. Beni n sɔi ti la yele pakɛ ti to zamesa yelepaala Baabule la poan?

¹⁵ Da basɛ ti ho giila kɔ’ɔsɛ ho san ka nyɛta yelepaala saŋa woo. Makɛ bisɛ ti ho eeri la salema. Sɛba n eeri salema ni dekɛ la saŋa zo’e zo’e ɛ. Ge ba ni ka basɛ se’ere n sɔi la, ba mi ti ba san puɣum nyɛ salema fii, la dela tuulum. Nyaa dekɛ bala makɛ la sɛla ti to zamesa Baabule la poan n tari tuulum se’em! (Ym. 119:127; Mag. 8:10) Bala la, kɔ’ɔn zamesa Baabule la ge me ita viisegɔ ta’an nyɛta yelepaala.—Ym. 1:2.

16. To wan eŋɛ la wani ta’an tɔɣesa Yehowa la Yezu?

¹⁶ Ho san zamesa, bisɛ hon wan eŋɛ se’em ta’an dekɛ de tum tuuma. Makerɛ, da gãsera nɛreba ti la pa’alɛ ti ho tɔɣeseri la Yehowa tontɔɔ gãkerɛ la. Soŋera ho mabiisi ti la pa’alɛ ti ho tɔɣeseri la Yezu n nɔŋɛ a Sɔ ge me soŋɛ nɛreba hali bɔnsɛka n kpe’em poan. Leyɛ’ɛsa, mɔɔla bɔ’ɔra nɛreba ti bamam me zamesɛ baŋɛ Yehowa n eŋɛ yelese’a bo to ge me tara sakerɛ lua bunɔ la poan.

17. To wan sɔsɛ la bem zaseŋɔ seko n taɣelɛ la poan?

¹⁷ To san kɔ’ɔn zamesa lua bunɔ la yɛla, to wan nɔŋɛ Yehowa la Yezu malum pa’asɛ. Ton nɔŋɛ ba la zuo, bamam me wan nɔŋɛ to gaŋɛ bala. (Yon 14:21; Yam. 4:8) Basɛ ti yelese’a za’a ti Yehowa eŋɛ bo ho la kpemese ho giila ti ho zamesa lua bunɔ la yele. Zaseŋɔ seko n taɣelɛ la wan pa’alɛ tɔ lua bunɔ la n soŋeri to se’em, la ton wan eŋɛ se’em pa’alɛ ti to puurɛ pee mɛ la Yehowa n nɔŋɛ to la.