1. Nɛreba zo’e zo’e ti’iseri la bem yɛla?

 DAANSE’ERE ho baŋɛ ti zina beere wa, nɛreba zo’e zo’e kɔ’ɔn ti’isa la bamea yele. Makerɛ, basɛba tari la social media pa’ala bamam n tã ita sɛla ge me paɣera. Nɛreba fii ma’a n pɛ̃ɣeri Yehowa. Zaseŋɔ wa poan, to wan zamesɛ baŋɛ ton wan pɛ̃ɣɛ Yehowa vuurɛ n de sɛla, la sɛla n sɔi ti la nara ti to ita bala. To wan le baŋɛ ton wan eŋɛ se’em bo Yehowa pɛ̃ka sɛka n nari en, la eŋa mea n wan ta pɛ̃ɣɛ a yu’urɛ la se’em beere sa’am.

TO PƐ̃ƔƐ YEHOWA VUURƐ?

2. Yehowa yuun eŋɛ la bem Sinai Zoore la zuo? (Bisɛ gɔŋɔ wa foote.)

² Bem n de pɛ̃ka? Baabule la poan, yelebire la n de “pɛ̃ka” la ta’an pa’alɛ sɛla n basɛ ti nɛra bɔna a to’ore. Yehowa n yuun faaɛ Israeldoma yamenɛ poan la, la yuun ka yue ti a eŋɛ sɛla pa’alɛ eŋa n tari paŋa se’em. Ti’isɛ yele wa bisɛ: Israeldoma zo’e zo’e n laɣesɛ Sinai Zoore la tilin ti ba kelese Yehowa n wan yele ba sɛla. Sagbanɛ n pĩ zoore la za’a. Bilam bilam ti tiŋa miina ge ti saa nyaɣera ge me tãsera ti zɛ’an woo taɛ voole. (Yɛh. 19:​16-18; 24:17; Ym. 68:8) Israeldoma la n yuun nyɛ yele ana wa la, nɔkpe’ene kai ti ba yuun baŋɛ Yehowa n tari paŋa se’em ti la ka tana ita.

3. To pɛ̃ɣɛ Yehowa vuurɛ?

³ Nɛresaaleba me wan ta’an pɛ̃ɣɛ Yehowa. Sore deyima poan ti to wan ta’an pɛ̃ɣɛ Yehowa dela to mɔɔlɛ a  tunkiresi, la a hala la bo nɛreba. To me san pu’usɛ Yehowa la eŋa n soŋɛ tɔ ti to ta’an eŋɛ yelese’a, la pa’alɛ ti to pɛ̃ɣeri en mɛ. (Isa. 26:12) Naba David yuun eŋɛ la makesonɛ la eŋa n pɛ̃ɣɛ Yehowa la. David n yuun ze Israeldoma la nɛŋan zusera Naayinɛ la, a yuun yeti: “Na’ayenɛ, ho paŋa ka tare makerɛ, ho soŋa nie mɛ saazuo la teŋa zan’an. Lan gan’arɛ zan’an teŋparɛ wa poan hon de naba.” David n yuun zusɛ Naayinɛ ba’asɛ la, “te nɛra woo pɛngɛ Na’ayenɛ.”—1 Yel. 29:​11, 20.

4. Yezu yuun pɛ̃ɣɛ Yehowa la wani?

⁴ Yezu n yuun boi tingɔŋɔ wa zuo la, a yuun tum la yelekiresi. A yuun yele nɛreba ti eŋa Sɔ n bo en paŋa ti a ta’an ita bala. Bala pa’alɛ ti a pɛ̃ɣɛ la Yehowa. (Mr. 5:​18-20) Yezu yetɔɣum la a itigɔ yuun pa’alɛ ti a pɛ̃ɣeri la a Sɔ. Daarɛ deyima, Yezu yuun boi la pu’usegɔ yire la poan pa’ala. Pɔka ayima n boi bim ti bonbe’a daana en yuun 18. Bonbe’a la daam en mɛ nyaa basɛ ti a nyure ka tana tiira tontɔɔ. Yezu yuun baŋɛ ti la ba’ɛ wuna pɔka wa mɛ ge nyaa bɔta ti a soŋɛ en. A yuun paɛ la a zɛ’an ge tɔɣɛ bãla bãla bo en yeti: “N ma, ho ban’an la bahɛ ya.” Yezu nyaa dekɛ la a nu’o paɣelɛ a zuo. Bilam bilam ti pɔka la tana tiira tontɔɔ ge “pɛngɛ Na’ayenɛ.” (Lu. 13:​10-13) La yuun sirum nari mɛ ti pɔka wa pɛ̃ɣɛ Yehowa. Tomam me nari ti to eŋɛ la bala.

BENI N SƆI TI TO PƐ̃ƔERA YEHOWA?

5. Beni n sɔi ti la nara ti to bɔ’ɔra Yehowa gilema?

⁵ Ton bo’ori Yehowa gilema la n sɔi ti to pɛ̃ɣera en. Yɛla zo’e zo’e n sɔi ti to bɔ’ɔra Yehowa gilema. Yehowa n de paŋa za’adaana; A tari paŋa n wan ta’an eŋɛ sɛla woo ti a bɔta. A me ka taregeri. (Ym. 96:​4-7) Lɔɣese’a ti a naam la pa’alɛ la eŋa n tari yɛm se’em. Yehowa n bo to vom, la sɛla woo n basɛ ti to vɔna. (Lil. 4:11) A dela yelemɛŋɛrɛdaana. (Lil. 15:4) Sɛla woo ti a ita dela ma’a, a me ni kɔ’ɔn basɛ ti a pu’ulumbiŋ’a tum tuuma mɛ. (Yos. 23:14) Bala n sɔi ti nɔdɛ’ɛsa Yeremia tɔɣɛ Yehowa yele yeti: “Na’ayenɛ, se’em ka boe ana wo hom Na’ayenɛ. . . . Yamdoma wa woo n boe ba teŋhe la ba sɔ’ɔlom wa poan wa, se’em ka boe ana wo hom”! (Yer. 10:​6, 7) Yelemɛŋɛrɛ, yɛla zo’e zo’e n sɔi ti la nara ti to bɔ’ɔra to saazuo Sɔ la gilema. Yehowa sirum nari la pɛ̃ka. To ka yeen pɛ̃ɣera en mɛ ge to me nɔŋɛ en mɛ.

6. Beni n sɔi ti to nɔŋɛ Yehowa?

⁶ Ton nɔŋɛ Yehowa la n sɔi ti to pɛ̃ɣera en. To nɔŋɛ Yehowa mɛ se’ere n sɔi la a tari la halesoma zo’e zo’e. Yehowa zoti nɛreba nimbu’ɔ mɛ ge me tara giile. (Ym. 103:13; Isa. 49:15) A suure ni sa’am mɛ sɛla san daana tɔ. (Zek. 2:8) A soŋɛ to mɛ ti to baŋɛ en ge me dɛna a zɔdoma. (Ym. 25:14; Tm. 17:27) A sirege la amea; “Ane n ane wo Yenɛ se’ere n zin a na’am gɔŋɔ zuo zuin zuin ha, ge suuta behera saazuo la teŋparɛ wa na wa?” (Ym. 113:​6, 7) Yele ana wa za’a n sɔi ti la nara ti to pɛ̃ɣera en.—Ym. 86:12.

7. Bem yɔ’ɔ ti to tara?

⁷ Ton boti nɛreba baŋɛ Yehowa la n sɔi ti to pɛ̃ɣera en. Nɛreba zo’e zo’e ka mi Yehowa soŋa soŋa. Beni n sɔi? Se’ere n  sɔi la Sitaana parum la yɛla bo Naayinɛ ti nɛreba zo’e zo’e me sakɛ dɛ. (2 Ko. 4:4) Sitaana pã’asɛ nɛreba ti Yehowa ka diti sugeri, a ka fabela to yele ge me basɛ ti namesegɔ zo’e zo’e paara tɔ. Ge to mi yelemɛŋɛrɛ la mɛ! To tari la yɔ’ɔ ti to pa’alɛ nɛreba Naayinɛ n de nɛresɛka taaba ge soŋɛ ba ti bamam me pɛ̃ɣera en. (Isa. 43:10) Yooma 96 tɔɣeri la Yehowa pɛ̃ka yele. To wan zamesɛ yooma gɔŋɔ wa baŋɛ lan nari ti to pɛ̃ɣera Yehowa se’em.

TO WAN EŊƐ LA WANI BO YEHOWA PƐ̃KA SƐKA N NARI EN?

8. Sarɔkuni poan ti to wan ta’an pɛ̃ɣɛ Yehowa? (Yooma 96:​1-3)

⁸ Kaalɛ Yooma 96:​1-3. Ton tɔɣeri a yele se’em la n wan pa’alɛ ti to pɛ̃ɣeri en. Kaalegɔ zɛ’ɛsi wa beem Yehowa nɛreba ti “yoon ya bo Na’ayenɛ” ge “pɛngera a yu’urɛ la.” “Mɔɔlɛ ya a faanrɛ la yele beere n yelegere woo” ge me “mɔɔlɛ ya a soŋa la bo teŋhe woo.” Yele ana wa za’a dela sarɔtɔ ase’a ti to wan ta’an doose pɛ̃ɣera to saazuo Sɔ la. Diimi sa la, Yehowa nɛreba inya yuun kɔ’ɔn kita mɛ ti ba pa’alɛ nɛreba Yehowa n ani se’em. (Da. 3:​16-18; Tm. 4:29) Tomam me wan eŋɛ la wani ta’an eŋɛ bala?

9-10. Hon zamesɛ la bem Angelena yele la poan? (Bisɛ foote la.)

⁹ To geele ya mabipɔka n ze’ele United States ti a yu’urɛ dɛna Angelena yele la bisɛ. a A yuun kɔ’ɔn dekɛ la sukpe’ene tɔɣɛ po’e Yehowa, a tuuma zɛ’an. Angelena yuun dela saana tuuma la poan. Bala la, ba yuun yi la meeting ge yele eŋa la saama la za’a ti ba yi ba yu’ura ge pa’alɛ bamam n ze’ele zɛ’an. Angelena yuun maasum la fɔɔra ti a wan dekɛ pa’alɛ ba. Fɔɔra wa pa’alɛ la eŋa n tari pupeelum se’em la eŋa n de Yehowa Sɛɛradaana la. Eŋa n boi bim ti a tɔɣɛ la ti buraa ayima pɔsɛ tɔɣera. A yuun yeti eŋa dɔɣereba dela Yehowa Sɛɛradoma ge nyaa pɔsɛ zɛregera ton sakɛ bo yelese’a. Angelena yeti: “Mam paleŋa n yuun ɛ̃kɛ. Ge mam yuun yele n mea yeti: ‘Mam kan sina ti a parena yɛla bɔ’ɔra Yehowa. La nari ti n tɔɣɛ po’e Yehowa.’”

 ¹⁰ Buraa la n yuun tɔɣɛ ba’asɛ la, bilam bilam ti Angelena zusɛ Yehowa. A yuun nyaa tɔɣɛ la mama bo en yeti: “Mam bɔŋa me ani wuu ho denɛ wa. Mam me dɔɣereba dela Yehowa Sɛɛradoma ge mam kelum pu’usa Yehowa mɛ ta paɛ zina.” La yuun kpe’em mɛ ge Angelena yuun ma’ɛ la amea. A yuun dekɛ fɔɔra la pa’alɛ a tuumadoma la mɛ. Fɔɔra wa pa’alɛ la eŋa la a zɔdoma n tari pupeelum se’em pu’usa Yehowa. A yuun le doose la gilema sore poan pa’alɛ ba eŋa n sakɛ bo yelese’a. (1 Pe. 3:15) A yuun nyɛ la bem nyuurɔ? Angelena n yuun tɔɣɛ ba’asɛ la, buraa la yuun nyaa ani la baalam. A me yuun pa’alɛ eŋɛ n yuun de Yehowa Sɛɛradaana ti a puurɛ pee se’em. Angelena yeti: “La nari ti to tɔɣɛ po’e Yehowa. La me dela yɔ’ɔ ti to tɔɣɛ a yele bo nɛreba.” Tomam me tari la yɔ’ɔ ti to pɛ̃ɣera Yehowa ge me na’asa en hali nɛreba san zɛregera en.

11. Kristakɔma dekɛ yelese’a n boi Yooma 96:8 tum tuuma la wani?

¹¹ Kaalɛ Yooma 96:8. To wan ta’an dekɛ to nutatum pɛ̃ɣɛ Yehowa. Yehowa nɛreba na’aseri en mɛ sarɔkuna wa poan. (Mag. 3:9) Makerɛ, Israeldoma la yuun laɣum dekɛ la ligeri soŋɛ ti ba mɛ ge me maala pu’usegɔ yire la. (2 Na. 12:​4, 5; 1 Yel. 29:​3-9) Yezu podɔleba yuun soŋɛ Yezu la a tuntuneba la mɛ ti ba tara “sɛla te ba nara te ba tara.” (Lu. 8:​1-3) Yuun kɔbesɛka n deŋɛ nɛŋa Kristakɔma la yuun laɣesɛ la lɔɣɔrɔ soŋɛ ba mabiisi. (Tm. 11:​27-29) Zina beere wa, tomam me san yese to suuren bɔ’ɔra bo’olum, to pɛ̃ɣeri la Yehowa.

12. To san bɔ’ɔra bo’olum, la pɛ̃ɣeri Yehowa la wani? (Bisɛ foote la.)

¹² Geele yele wa n pa’alɛ to bo’olum la n pɛ̃ɣeri Yehowa se’em. Yuun 2020 poan, warɛ n yuun sige Zimbabwe ti la ka tana ita. Nɛreba tusa tusa n yuun viberi. Mabipɔka ayima yu’urɛ n de Prisca me yuun boi la bɔnkana nɔɔ poan. La boi bim ti la yuun kpe’em bo Prisca mɛ ge hali kua saŋa, a yuun kelum kena la na’am mɔɔlegɔ Alarebadaarɛ la Azumadaarɛ. A gingilega la poan nɛreba yuun yele en yeti a san ka basɛ na’am  mɔɔlegɔ tuuma la ge kɔ, “kom wan ku en.” Prisca yuun ni yele ba yeti, “Yehowa kɔ’ɔn tɛ̃ra a yamesi yele mɛ.” La yuun ka yue ti tigere la tari dia la lɔɣɔrɔ ta bo en. To bo’olum la n yuun soŋɛ tigere la ti ba ta’an dekɛ dia la lɔɣɔrɔ ta bo mabiisi la. La yuun eŋɛ Prisca gingilega la poan nɛreba la pakerɛ ti ba yeti, “Sira, ho Naayinɛ la ka tamɛ ho yele. Tomam me boti la to zamesɛ a yɛla.” Nɛreba bayopɔi n yuun pɔsɛ kena zamesegɔ.

13. To hala wan ta’an pɛ̃ɣɛ Yehowa la wani? (Yooma 96:9)

¹³ Kaalɛ Yooma 96:9. To hala wan ta’an pɛ̃ɣɛ Yehowa. Malemadoma la n yuun boi Yehowa pu’usegɔ yire la poan tuna la yuun nari ti ba ana filam. (Yɛh. 40:​30-32) Tomam me san zaɣesɛ Yehowa n yaɛ yelese’a, to ani la filam. (Ym. 24:​3, 4; 1 Pe. 1:​15, 16) La nari ti to tiregɛ zaɣesɛ dɛ̃ɣerɔ tuuma ge tuɣum tɔɣesa Yehowa ita yelese’a ti a bɔta. (Kol. 3:​9, 10) Yehowa wan ta’an soŋɛ nɛresɛba n yuun iti yelegaasa la ti ba tee nyaa tara halesoma.

14. Hon zamesɛ la bem Jack yele la poan? (Bisɛ foote la.)

¹⁴ Geele Jack yele wa bisɛ. Jack yuun dela nɛrewurebere ti nɛreba zo’e zo’e mina en ti a dela “Kolekpabɛ’a.” Ba yuun paɣɛ en mɛ ge nyaa gãkɛ en ti ba ku en. Jack n yuun boi sarega gura ti ba ku en la, a yuun sakɛ ti mabia ayima zamesɛ en Baabule la. Jack yuun tee mɛ ge nyaa ta muse ko’om. Lan yuun paɛ ti ba ku en la, nɛresɛba ti eŋa la bamam bɔna sarega la yuun keli mɛ se’ere n sɔi la, ba nyɛ ti Jack tee mɛ. Puliŋa ayima n yuun tuni sarega la poan yeti: “Jack n yuun wa’ana la, a tadaandoma la yuun zoti en mɛ. Nananawa, eŋa ti nɛra woo nɔŋɛ.” Ban yuun ku Jack ba’asɛ la, mabiisi la yuun lebe la sarega la poan ti ba ta eŋɛ zamesegɔ. Buraa ayima ti ba paɣɛ en yuun wa’an zamesegɔ la me na. Beni n sɔi ti a wa’ana? A suure yuun sukɛ mɛ la Jack n tee se’em la ge me bɔta ti a baŋɛ eŋa n wan eŋɛ se’em ta’an pu’usa Yehowa. Yelemɛŋɛrɛ, to hala wan ta’an pɛ̃ɣɛ to saazuo Sɔ la!—1 Pe. 2:12.

 YEHOWA WAN EŊƐ LA BEM BEERE SA’AM TI NƐRA WOO BAŊƐ TI LA NARI TI BA PU’USA LA EŊA MA’A?

15. Yehowa wan eŋɛ la bem beere sa’am ti nɛra woo baŋɛ ti la nari ti ba pu’usa la eŋa ma’a? (Yooma 96:​10-13)

¹⁵ Kaalɛ Yooma 96:​10-13. Yelese’a n boi Yooma 96 ba’asegɔ bɔba la pa’alɛ ti Yehowa dela Naba n gãkeri a yɛla tontɔɔ. Yehowa wan eŋɛ la bem beere sa’am ti nɛra woo baŋɛ ti la nari ti ba pu’usa la eŋa ma’a? A wan gãkɛ nɛreba. La kan yue, Yehowa wan sa’am Babilon Kãtɛ La se’ere n sɔi la, ba parum la yɛla bo Yehowa. (Lil. 17:​5, 16; 19:​1, 2) Daanse’ere nɛresɛba n wan ta nyɛ ban sa’ani Babilon Kãtɛ La se’em la wan ta naɛ la tɔ pu’usa Yehowa. Armagedon poan, Yehowa wan sa’am Sitaana tingɔŋɔ be’o wa, la nɛresɛba n iti kpenkpasi ge sa’ana Naayinɛ yu’urɛ la. A wan faaɛ nɛresɛba n nɔŋɛ en, nana en ge me bɔta ti ba pɛ̃ɣera en la. (Mr. 8:38; 2 Tes. 1:​6-10) Krista Yuun Tusere Na’am Bisega la san ba’asɛ, ki’i gurebisɛ la wan pɔsɛ. Bala pooren, Yehowa wan basɛ ti nɛra woo baŋɛ ti la nari ti ba pu’usa la eŋa ma’a. (Lil. 20:​7-10) Sankaŋa la, “teŋa wa yeti ka perɛ mɛ la Na’ayenɛ soŋa, la a yam wo ko’om n perɛ kolega se’em la.”—Hab. 2:14.

16. Hon lu ho suure ti ho eŋɛ la bem? (Bisɛ foote la.)

¹⁶ Bisɛ to puurɛ n wan ta pee se’em nɛra woo san pɛ̃ɣera Yehowa la a yu’urɛ la! Ge sankaŋa n nan ka paɛ la, to tiregɛ basɛ ti to itigɔ la to hala pɛ̃ɣera Naayinɛ saŋa woo. La yele n pakɛ ti to ita bala la n sɔi ti Tigere Zuo Bisegadoma la loe Yooma 96:8 ti la dɛna to yuun 2025 yetɔɣum zuo. La yeti: ‘Bo ya Yehowa pɛ̃ka sɛka n nari a yu’urɛ la.’