1. Beni n sɔi ti Yehowa basɛ ti pɔɣedire bɔna?

 YEHOWA dela “Yenɛ n tare popeelom.” A me boti la to tara pupeelum. (1 Tim. 1:11) A bo to la yɛla zo’e zo’e n wan basɛ ti to vom ana soŋa. (Yam. 1:17) Ayima dela pɔɣedire. Buraa la pɔka san di taaba, ba ni biŋe la nɔɔrɛ ti ba wan nɔŋɛ taaba ge me bɔ’ɔra taaba gilema. Ba san ana tapilapi la taaba, ba wan tara pupeelum.—Mag. 5:18.

2. Pɔɣedire zo’e zo’e ani la wani zina beere wa?

² Susa’aŋɔ la dela, zina beere wa, sireba la pɔɣeba zo’e zo’e tamɛ ban yuun biŋe nɔɔrɛ se’em ba pɔɣedire daarɛ la mɛ. Bala zuo la, ba ka tari pupeelum. World Health Organization n de welese’ere n biseri imma’asum yɛla yeti sireba zo’e zo’e ŋmɛ’ɛri la ba pɔɣeba, tuura ba ge me vɛ̃ɣena ba. Sira ta’an na’asa a pɔɣa nɛreba nɛŋai ge vɛ̃ɣena en yire. Sireba zo’e zo’e me n biseri yalumfɔɔra la basɛ ti ba pɔɣedire sa’am mɛ.

3. Bem yɛla n wan ta’an basɛ ti sira daana a pɔɣa?

³ Bem yɛla n wan ta’an basɛ ti sira daana a pɔɣa? Daanse’ere a sɔ yuun ani la bala ti eŋa me ti’isa ti la daɣɛ be’em ti a daana a pɔɣa. Basɛba me tɔɣeseri la yelese’a n iti ba tiŋa la poan. Ba ta’an yele en yeti, ho san wan dɛna “buraa” la nari ti ho pɛ̃regɛ ho pɔɣa ti a baŋɛ ti hon de kpɛ’ɛma. Buraasi basɛba me ka tã nyɔkera bamea. Ba sunsɔa ka yaɣeseri nyiire. Buraasi basɛba me n biseri yalumfɔɔra la zuo, ba ka bisɛ nam pɔɣesi ge naɛ la ba gã’a ban boti se’em. Leyɛ’ɛsa, lasebaarɛ ase’a  pa’alɛ ti COVID-19 bã’a la n yuun wi’iri se’em la me basɛ ti yele wa gaam la be’ero. Ge yele ana wa ka bo sira yɔ’ɔ ti a ita a pɔɣa eŋa n boti se’em.

4. Sireba n pu’useri Yehowa nari ti ba bisɛ bamea soŋa la bem poan ge beni n sɔi?

⁴ Sireba n pu’useri Yehowa nari ti ba bisɛ bamea soŋa ti nɛreba n tari putɛbe’ero la pɔɣesi la da taɛ ba. a Beni n sɔi? Nɛra n ti’iseri yelese’a la n wan basɛ ti a eŋɛ sɛla. Tuntuna Paul yuun kaɣɛ loore Kristakɔma n boi Rome ti, “da dekɛ ya ya mɛhe eta yelese’a te teŋa wa zuo woo eta la.” (Arom 12:​1, 2) Paul n yuun gulesɛ yele wa bo ba la, mabiisi la n boi tansugere la poan la yuun puɣum dɛna la Kristakɔma ti la yue. Ge Paul n yele sɛla la pa’alɛ ti mabiisi la basɛba yuun kelum ita la yelese’a ti tiŋa la nɛreba ita ti la ka nara. Bala n sɔi ti a yuun yele ba ti ba tee ba puti’irɛ, la ba hala. Sireba n pu’useri Yehowa zina beere wa me nari ti ba kelese kaka wa. Susa’aŋɔ la dela, sireba basɛba basɛ ti nɛreba n iti se’em burum la ba puti’irɛ ti ba daana ba pɔɣeba. b Yehowa boti sira ita a pɔɣa la wani? Lebesego la boi la zaseŋɔ wa zuo gulesegɔ la poan.

5. Wuu 1 Peter 3:7 n pa’alɛ se’em la, sira nari ti a ita a pɔɣa la wani?

⁵ Kaalɛ 1 Peter 3:7. Yehowa yele sireba ti ba na’asa ba pɔɣeba. Ho san na’asa nɛra, ho wan ita yelese’a n pa’alɛ ti ho bo’ori en gilema. Sira n na’aseri a pɔɣa nɔŋɛ en mɛ ge me ita en soŋa. Zaseŋɔ wa poan, to wan sɔsɛ sira n wan ta’an na’asera a pɔɣa se’em. Yia la, basɛ ya ti to sɔsɛ ya yelese’a ti sira wan ita ti la pa’alɛ ti a ka na’aseri a pɔɣa.

DA ITA YELESE’A N WAN PA’ALƐ TI HO KA NA’ASERI HO PƆƔA

6. La ani Yehowa la wani la buraasi sɛba n ŋmɛ̃’ɛri ba pɔɣeba la? (Kolose 3:19)

⁶ Sira ka nari ti a ŋmɛ̃’ɛra a pɔɣa. Yehowa yaɛ se’em woo n nɔŋɛ gbiregere mɛ, yele yele wuu sireba sɛba n ŋmɛ̃’ɛri ba pɔɣeba. (Ym. 11:5; Ma. 2:16; kaalɛ Kolose 3:19.) Yia Peter 3:7 yeti, sira san ka ita a pɔɣa soŋa, eŋa la Naayinɛ bɔnsoŋa la wan sa’am. Daanse’ere Yehowa puɣum kan kelese a zusega.

7. Wuu Epesus 4:​31, 32 n yele se’em la, yetɔɣum ani ti sireba ka nara ti ba tɔɣera? (Le bisɛ “Yelesum Vuurɛ.”)

⁷ Sira ka nari ti a tuura a pɔɣa. Sireba basɛba sunsɔa ni nyie mɛ ti ba tuura ge nyabera ba pɔɣeba. Ge Yehowa yaɛ ‘sunsɔa, sunsɔkiilega, nyabega, la yetɔɣepɔ̃’ɔsa’ mɛ. c (Kaalɛ Epesus 4:​31, 32.) A wuni sɛla woo mɛ. Sireba n tɔɣeri se’em bɔ’ɔra ba pɔɣeba, hali ba san puɣum bɔna yire, yele pakɛ Yehowa mɛ. Sira n tɔɣeri yetɔɣepɔ̃’ɔsa ka sa’ani la a pɔɣedire la ma’a ge eŋa la Yehowa bɔnsoŋa la me wan sa’am.—Yam. 1:26.

8. La ni ana Yehowa la wani sira san bisera yalumfɔɔra ge beni n sɔi?

⁸ Sira ka nari ti a bisera yalumfɔɔra. La ni ana Yehowa la wani nɛra san bisera yalumfɔɔra? A yaɛ ku mɛ. Sira san  bisera yalumfɔɔra, eŋa la Yehowa bɔnsoŋa la wan sa’am. La me pa’alɛ ti a ka bo’ori a pɔɣa gilema. d Yehowa boti la sira tara yelemɛŋɛrɛ bɔ’ɔra a pɔɣa. A kan tum yalumtuuma. A me puɣum ka ti’isa de yele. Yezu yuun yeti buraa san kɔ’ɔn kpa bisa pɔka nyaa ta tara kunkoma’asum la ka, a puɣum tum la yalumtuuma ‘a suuren.’ e—Mt. 5:​28, 29.

9. Beni n sɔi ti Yehowa ka bɔta ti buraa pɛ̃regɛ a pɔɣa gã’arɛ la en, eŋa n boti se’em?

⁹ Sira ka nari ti a pɛ̃regɛ a pɔɣa gã’arɛ la en, eŋa n boti se’em. Sireba basɛba ni pɛ̃regɛ ba pɔɣeba mɛ gã’arɛ la ba sarɔsɛka n ka nari. Bala ta’an daam pɔka la putɛkeeŋa. Yehowa yaɛ itigɔ ana mɛ. A boti la sira nɔŋɛ a pɔɣa, ita en soŋa ge me ti’isa lan ani a pɔɣa la se’em. (Ep. 5:​28, 29) Sira n pu’useri Yehowa san puɣum bisa yalumfɔɔra bii a iti a pɔɣa la sɛla n ka nari, a wan eŋɛ la wani tee?

SIREBA N WAN EŊƐ SE’EM BASƐ HALEBE’ERO

10. Yezu makesonɛ la wan ta’an soŋɛ sireba la wani?

¹⁰ Bem n wan soŋɛ sira ti a basɛ halebe’ero? La nari ti a tiregɛ tɔɣesa Yezu. La boi bim ti Yezu yuun ka di pɔɣa ge eŋa n yuun iti a podɔleba la se’em la dela makesonɛ pa’ala sira n nari ti a ita a pɔɣa se’em. (Ep. 5:25) Makerɛ, bisɛ sireba n wan ta’an tɔɣesa Yezu n yuun iti ge me tɔɣera bɔ’ɔra a tuntuneba la se’em.

11. Yezu yuun iti a tuntuneba la wani?

¹¹ Yezu yuun iti a tuntuneba la soŋa ge me bɔ’ɔra ba gilema. A yuun ka tãseri bii vɛ̃ɣena ba. La boi bim ti a yuun tari kpe’eŋo gana ba ge a yuun ka basɛ ti dabeem tara ba la en. A yuun tuɣum siregera la amea. (Yon 13:​12-17) A yuun yele a podɔleba la yeti: “Zamehe ya sɛla n zen’en. Se’ere n sɔe la mam dela nɛremama ana baanlam ge sigehe n mɛŋa n suunre poan. Ya han wa’an n zen’en na, ya wan nyɛ vo’ohogo.” (Mt. 11:​28-30) Tɛ̃ra ti Yezu dela nɛremama. Nɛra n ani mama ka pa’alɛ ti a ka tari paŋa. A tuɣum tara la pansɛka n wan ta’an nyɔkera amea. A sunsɔa san nyie, a ni ana la baalam.

12. Yezu yuun tɔɣeri la wani bɔ’ɔra nɛreba?

¹² Yezu yuun tɔɣeri kpɛmesa la nɛreba giila ge me buɣela ba suure. A yuun ka tãseri a podɔleba la. (Lu. 8:​47, 48) Hali sɛba n yuun yaɛ en la san tuura en, a yuun “ka lebehe toora ba.” (1 Pe. 2:​21-23) Saŋa ase’a, Yezu yuun ni sina mɛ. (Mt. 27:​12-14) Yele wa dela makesonɛ bɔ’ɔra sireba n pu’useri Yehowa!

13. Wuu Matu 19:​4-6 n yele se’em la, buraa wan eŋɛ la bem pa’alɛ ti a “dekɛ ka mɛŋa naɛ boyena la ka pɔga”? (Bisɛ foote la.)

¹³ Yezu yuun yele sireba ti ba tara yelemɛŋɛrɛ bɔ’ɔra ba pɔɣeba. A yuun tɔɣɛ la a Sɔ n yele sɛla la nɔɔ ti sira wan “dekɛ ka mɛŋa naɛ boyena la ka pɔga.” (Kaalɛ Matu 19:​4-6.) Greek itigɔ yelebire la n de “naɛ boyena” la pa’alɛ la “hon dekɛ sɛla labelɛ taaba.” Bala la, sira la a pɔɣa nari ti ba nɔŋɛ taaba ti la ana wuu ba dekɛ ba labelɛ la taaba. Ayima san eŋɛ sɛla n ka nari, la wan daam la bamam bayi la za’a. Sira san nɔŋɛ a  pɔɣa bala, a kan bisa yalumfɔɔra bii yelese’a n ani bala. A wan eŋɛ kalam yese a “nini yeleyooro behega poan.” (Ym. 119:37) Wuu Yob la, a lu a suure ti a kan bisa pɔka n daɣɛ a pɔɣa nyaa ta tara konkuma’asum la en.—Yob 31:1.

14. Sira n tari halebe’ero wan eŋɛ la bem ti eŋa la Yehowa, la a pɔɣa bɔŋa le ana soŋa?

¹⁴ Sira n tuuri bii ŋmɛ̃’ɛra a pɔɣa nari ti a tiregɛ tee, ti eŋa la Yehowa, la a pɔɣa bɔŋa le ana soŋa. A nari ti a eŋɛ la bem? Yia, a sakɛ ti a tari daaŋɔ. Yehowa nyɛti sɛla woo mɛ. (Ym. 44:21; Pa. 12:14; Heb. 4:13) N yi’i, a da le ŋmɛ̃’ɛra a pɔɣa ge basɛ a halebe’ero la. (Mag. 28:13) N tã’a, a yele a pɔɣa ti a tue ya ge me belum Yehowa ti a di sugeri bo en. (Tm. 3:19) A zusɛ Yehowa ti a soŋɛ en ti a ta’an tee ge me nyɔkera amea, a yetɔɣum la a itigɔ poan. (Ym. 51:​10-12; 2 Ko. 10:5; Flp. 2:13) N naasi, a tum doose a zusega la ge tiregɛ zaɣesɛ yetɔɣeyooro la gbiregere yɛla. (Ym. 97:10) N nuu, a yele keendoma la ti ba soŋɛ en. (Yam. 5:​14-16) N yoobe, a eŋɛ yelese’a n wan soŋɛ en ti a kan le tara halebe’ero beere sa’am. Sira n biseri yalumfɔɔra me nari ti a doose pa’alegɔ wa. Yehowa wan kã bo en la eŋa n tiregeri ti a tee la. (Ym. 37:5) Sira ka yeen nara ti a basɛ la yelese’a n wan daam a pɔɣa ma’a. A me nari ti a na’asa a pɔɣa. A wan eŋɛ la wani ta’an ita bala?

HON WAN EŊƐ SE’EM NA’ASA HO PƆƔA

15. Sira wan eŋɛ la bem pa’alɛ ti a nɔŋɛ a pɔɣa?

¹⁵ Tara nɔŋerɛ. Mabiisi basɛba n tari pupeelum ba pɔɣedire poan ni tiregɛ mɛ eŋɛ sɛla dabeserɛ woo poan pa’alɛ ban nɔŋɛ ba pɔɣeba se’em. (1 Yo. 3:18) Sira ta’an eŋɛ yelepiɣesi pa’alɛ eŋa n nɔŋɛ a pɔɣa se’em, maɣesɛ wuu a gurɛ a nu’o bii kɔkɛ en. A me ta’an tɛɣesɛ en yeti “I miss you” bii a soke yeti “Tuuma  zɛ’an ani wani?” Saŋa ase’a me, a ta’an gulesɛ gɔŋɔ bo a pɔɣa pa’alɛ eŋa n nɔŋɛ en se’em. Sira san ita bala, a na’aseri la a pɔɣa. Ba pɔɣedire la me wan ana soŋa.

16. Beni n sɔi ti la nara ti sira pɛ̃ɣera a pɔɣa?

¹⁶ Yele ho pɔɣa ho puurɛ n pee la en se’em. Sira n na’aseri a pɔɣa kpemeseri la a giila ge me basɛ ti la ana en soŋa. Sore deyima ti a wan eŋɛ bala dela a pɛ̃ɣɛ a pɔɣa la eŋa n soŋeri en se’em la. (Kol. 3:15) Sira san yese a suuren pɛ̃ɣɛ a pɔɣa, pɔka la suure ni sukɛ mɛ ti a mina ti a sira la nɔŋɛ en mɛ ge me na’asa en.—Mag. 31:28.

17. Sira wan eŋɛ la bem pa’alɛ ti a bo’ori a pɔɣa gilema?

¹⁷ Ita ho pɔɣa soŋa ge me bɔ’ɔra en gilema. Sira n nɔŋɛ a pɔɣa puurɛ ni pee mɛ la en. A ni bisɛ ti a pɔɣa la dela tuulum bo’olum ti Yehowa dekɛ bo en. (Mag. 18:22; 31:10) Bala zuo la, a wan ita en soŋa ge me bɔ’ɔra en gilema, hali la ba gã’aregɔ yɛla poan. A kan pɛ̃regɛ naɛ la en gã’arɛ sarɔsɛka poan ti a pɔɣa la ka bɔta bii eŋɛ sɛla n wan daam a pɔɣa la putɛkeeŋa. f Sira la me wan tiregɛ ti a tara putɛkeeŋa n ani fa’a, a san naɛ la a pɔɣa gã’arɛ.—Tm. 24:16.

18. Sireba nari ti ba lu ba suure ti ba eŋɛ la bem? (Bisɛ daka la zuo n de “ Yɛla Anaasi N Wan Pa’alɛ Ti Sira Bo’ori A Pɔɣa Gilema.”)

¹⁸ Sireba, Yehowa nyɛti yan muuri se’em ti ya na’asa ya pɔɣeba dabeserɛ woo la. A puurɛ pee me la ya. Tiregɛ zaɣesɛ halebe’ero. Nɔŋɛ ho pɔɣa, bɔ’ɔra en gilema ge me ita en soŋa. Ho san ita bala, ho pɔɣa wan baŋɛ ti ho nɔŋɛ en ge ti ho puurɛ me pee la en. Na’asa ho pɔɣa ge bala wan basɛ ti hon la Yehowa bɔŋa la ana soŋa.—Ym. 25:14.