ZASEŊƆ 5
YUUNƐ 108 God’s Loyal Love (Naayinɛ Yelemɛŋɛrɛ Nɔŋerɛ)
Yehowa Nɔŋerɛ La N Soŋeri To Se’em
“Krista Yesu daa wa’an teŋa wa zuo na te a fan la nɛresɛba n ton be’em bahɛ.”—1 TIM. 1:15.
YELEKPINE
To wan zamesɛ baŋɛ lua bunɔ la n soŋeri to se’em, la ton wan eŋɛ se’em ti Yehowa baŋɛ ti to puurɛ pee mɛ la dɛ.
1. To wan eŋɛ la bem ti Yehowa puurɛ pee?
MAKƐ bisɛ ti ho dekɛ la sɛla bo ho zɔ ge mina ti la wan soŋɛ en paa. Ho suure wan sa’am ho san ta baŋɛ ti ho zɔ la dekɛ ku biŋe la zɛ’an ti a puti’irɛ puɣum ka lɛbera bim! Ge ho san ta baŋɛ ti a puurɛ pee mɛ la ku ge tara ku tuna soŋa, hon me puurɛ wan pee. Makerɛ wa vuurɛ? Yehowa basɛ ti a Dayua la wa’ana ki bo la tomam. Yehowa suure wan sukɛ paa a san baŋɛ ti to puurɛ pee mɛ la eŋa n doose nɔŋerɛ sore poan bo to lua bunɔ la!—Yon 3:16; Arom 5:7, 8.
2. To wan sɔsɛ la bem zaseŋɔ wa poan?
2 Saŋa ase’a, to ta’an ni ti’isa ti lua bunɔ la yele ka le pakɛ. To puurɛ san ka le pee la lua bunɔ la, la wan ana wuu to dekɛ Naayinɛ bo’olum la biŋe la zɛ’an ti to puti’irɛ puɣum ka le lɛbera bim. Ton wan eŋɛ se’em ti bala kan eŋɛ dela, saŋa woo to ti’isa Naayinɛ la Krista n eŋɛ sɛla bo to la yele. Zaseŋɔ wa wan soŋɛ tɔ ti to ta’an eŋɛ bala. To wan zamesɛ baŋɛ lua bunɔ la n soŋeri to se’em nananawa, la lan wan soŋɛ to se’em beere sa’am. To wan le baŋɛ ton wan eŋɛ sɛla Tiirɛ Dia saŋa wa ti la pa’alɛ ti to puurɛ mɛ la Yehowa n nɔŋɛ to se’em la.
LAN SOŊERI TO SE’EM NANANAWA
3. Lua bunɔ la soŋeri to la wani nananawa?
3 Krista lua bunɔ la puɣum soŋera to mɛ. Makerɛ, lua bunɔ la n basɛ ti Yehowa dita sugeri bɔ’ɔra tɔ. La daɣɛ pɛ̃regerɛ ti a di sugeri bo to. Eŋa mea n boti ti a ita bala. Yuumadaana la yuum yeti: “[O Yehowa], hom dela sugurom dita, ge tara som.”—Ym. 86:5; 103:3, 10-13.
4. Yehowa dekɛ lua bunɔ la bo la bani? (Luke 5:32; 1 Timoti 1:15)
4 Nɛreba basɛba ta’an ti’isa ti Yehowa ka nari ti a di sugeri bo bamam. Yelemɛŋɛrɛ la dela, to za’a puɣum ka nara. Tuntuna Paul yuun baŋɛ ti eŋa “pon ka nare ne te [a] de’a Yesu tontoneba la ayema.” Ge a yuun yeti: “Na’ayenɛ n ete som la zuo te n ta’an eta bala.” (1 Ko. 15:9, 10) To san basɛ to be’em, Yehowa wan di sugeri bo to. Beni n sɔi? La daɣɛ ti to nari mɛ ge eŋa n nɔŋɛ to la zuo ti a ita bala. Ho san ti’isa ti ho ka nari, tɛ̃ra ti Yehowa dekɛ lua bunɔ la bo la sɛba n basɛ ba be’em.—Kaalɛ Luke 5:32; 1 Timoti 1:15.
5. La dela pɛ̃regerɛ ti Yehowa di sugeri bo to? Tɔɣɛ pa’alɛ.
5 La nɔɔ boi bim ti Yehowa tɛ̃ri tunse’a za’a ti to tum bo en la mɛ. Ge la ka nari ti to ti’isa ti ton pu’usɛ Yehowa ti la yue la zuo, la dela pɛ̃regerɛ ti a di sugeri bo to. (Heb. 6:10) La daɣɛ ti to eŋɛ la sɛla bo Yehowa ti a dekɛ lua bunɔ la yɔ tɔ. Amea n yese a suuren basɛ ti Yezu wa’ana ki bo to. To san ti’isa ti la kɔ’ɔn nara mɛ ti Yehowa di sugeri bo to bii a yɔ tɔ la ton tum tunse’a la, la wan ana wuu Krista kum la ka tari nyuurɔ me la.—Dekɛ makɛ Galatia 2:21.
6. Beni n sɔi ti Paul yuun kɔ’ɔn tulegera tuna Yehowa tuuma?
6 Paul yuun mi ti eŋa san puɣum tum zo’e la se’em me bo Yehowa, la daɣɛ pɛ̃regerɛ ti Yehowa di sugeri bo en. Ge beni n sɔi ti a yuun tulegera tuna Yehowa tuuma? A yuun eŋɛ bala ti la pa’alɛ ti a puurɛ pee mɛ la Yehowa n zu’use en se’em la. (Ep. 3:7) Wuu Paul la, tomam me kɔ’ɔn tiregera mɛ pu’usa Yehowa ti la pa’alɛ ti to puurɛ pee mɛ la lua bunɔ la ge daɣɛ ti to pɛ̃regeri la Yehowa ti a di sugeri bo to.
7. Lua bunɔ la le soŋera to la wani nananawa? (Arom 5:1; Yames 2:23)
7 Lua bunɔ la n le soŋera to se’em nananawa dela, la basɛ ti to tara la bɔnsoŋa la Yehowa. a Wuu ton puɣum zamesɛ sɛla zaseŋɔ seko n tole la poan la, ban yuun dɔɣɛ to la, to yuun ka tari bɔnsoŋa la Yehowa. Ge lua bunɔ la basɛ ti to tara la “sunma’ahom la Yenɛ,” nyaa ta’an ana du’a du’a la en.—Kaalɛ Arom 5:1; Yames 2:23.
8. Beni n sɔi ti to puurɛ pee la ton tari yɔ’ɔ ti to zusa Yehowa la?
8 Ton tari bɔnsoŋa la Yehowa la zuo, to tari la yɔ’ɔ ti to zusa en. Daɣɛ ton ni laɣesɛ taaba zamesegɔ poan zusa la ma’a ti Yehowa kɛlesa tɔ. Ge a keleseri tomam ayima ayima woo zusega mɛ. To san zusɛ Yehowa, la ni ana to la mama. Ge la daɣɛ bala ma’a. La ni basɛ ti tomam la Naayinɛ zɔtɔ nyɔka la kpe’em mɛ. (Ym. 65:2; Yam. 4:8; 1 Yo. 5:14) Yezu n yuun boi tingɔŋɔ wa zuo la, a yuun kɔ’ɔn zusera mɛ saŋa woo se’ere n sɔi la, a yuun mi ti Yehowa keleseri mɛ. Bala n yuun basɛ ti eŋa la a Sɔ la tara bɔnsoŋa. (Lu. 5:16) Bisɛ to puurɛ n pee se’em la Yezu lua bunɔ la n basɛ ti to ta’an dɛna Yehowa zɔdoma ge me ta’an zusa En la!
LUA BUNƆ LA N BASƐ TI TO TARA BEERE SA’AM PUTI’IRƐ SE’EM
9. Lua bunɔ la wan soŋɛ Yehowa nɛreba la wani beere sa’am?
9 Lua bunɔ la wan soŋɛ Yehowa nɛreba la wani beere sa’am? Ba wan ta vɔna daarewoo. Nɛreba zo’e zo’e ti’isɛ ti ba kan ta’an ta vɔna daarewoo, se’ere n sɔi la nɛresaaleba kɔ’ɔn kiira mɛ. Ge Yehowa yuun naam nɛresaaleba ti ba vɔna la daarewoo. Adam la Hawa yuun san ka zaɣesɛ ni Yehowa, nɛnɛra kan ti’isa ti to kan ta’an ta vɔna daarewoo. Nɛra woo wan vɔi ni la daarewoo. La boi bim ti to kan ta’an ti’isɛ bisɛ ton wan ta vɔna daarewoo se’em ge to tari sakerɛ ti la wan tum. Yehowa n yuun basɛ ti a Dayua la wa’ana ki bo to la n sɔi ti to sakɛ ti yele wa wan sirum tum.—Arom 8:32.
10. Loore Kristakɔma la, la pisena la tari la bem beere sa’am puti’irɛ?
10 La boi bim ti beere sa’am ti to wan ta vɔna daarewoo ge Yehowa boti la to ti’isa de yele nananawa. Loore Kristakɔma la tari puti’irɛ ti ba wan ta naɛ la Krista bɔna saazuo bisa tingɔŋɔ wa. (Lil. 20:6) Pisena la me wan ta bɔna paradiisi tingɔŋɔ wa poan ti namesegɔ kan le bɔna. (Lil. 21:3, 4) Hon laɣum pa’asɛ la pisena la poan tara puti’irɛ ti ho wan ta vɔna daarewoo? Da ti’isa ti sɛba n wan ta bɔna saazuo la nyani hɔ! Yehowa naam nɛresaaleba ti ba vɔna la daarewoo. Bala la, to san ta vɔna daarewoo tingɔŋɔ wa zuo, la wan dɛna la pupeelum ma’a.
11-12. Bem yɛla ti to wan ta nyɛ Paradiisi poan ti la dɛna pupeelum? (Bisɛ fɔɔra la.)
11 Ti’isɛ bisɛ ho vom n wan ta ana se’em Paradiisi tingɔŋɔ wa poan. To kan le fabela bã’asi la kum yele. (Isa. 25:8; 33:24) Yehowa wan ta bo to yelese’a woo ti to bɔta. Hon wan ta bɔta ti ho zamesɛ la bem? Hon wan bɔta ti ho ta zamesɛ la dusi yɛla, ban ŋmɛ̃’ɛri yuuma se’em, bii ban dɔreŋeri se’em? Paradiisi poan, to wan ɛɛra la nɛresɛba n tã dɔreŋera ge mɛta yɛa. To me wan ta ɛɛra kaareba, sɛba n wan duɣera dia, sɛba n wan maala lɔɣɔrɔ, la sɛba n wan bisa tinparɛ la ti la ana soŋa. (Isa. 35:1; 65:21) Ho san ta vɔna daarewoo, ho wan ta ta’an ita yele ana wa za’a.
12 To puurɛ me wan ta pee ti to nyɛ to nɛresɛba n ki la! (Tm. 24:15) Yeen ti’isɛ bisɛ ho suure n wan suke se’em ti ho ta zamesɛ Yehowa naaŋɔ lɔɣɔrɔ la yɛla pa’asɛ. (Ym. 104:24; Isa. 11:9) Sɛla n gani za’a dela, ho wan pu’usa Yehowa ge kan ti’isa ti daanse’ere ho wan tue en ti la nara ti a di sugeri bo ho! Hon wan bɔta ti ho di ‘nyɛlum Sitaana tingɔŋɔ’ wa poan ge ti Paradiisi la ta piɛ ho nu’usin? (Heb. 11:25) Ho kan sakɛ eŋɛ bala! Ton wan ta nyɛ kã’a se’a beere sa’am la gani ton nyɛti sɛla nananawa. Tɛ̃ra ti, la kan yue to kan le ti’isa Paradiisi yele ti la wan wa’an la beere sa’am. To wan kɔ’ɔn bɔna la bim dabeserɛ woo. La san daɣɛ ni Yehowa n nɔŋɛ tɔ ge basɛ ti a Dayua wa’ana ki bo to la zuo, to kan nyɛ ni yele ana wa!
Hon wan bɔta ti ho ta nyɛ la bem Paradiisi poan? (Bisɛ kaalegɔ zɛ’ɛsi 11-12)
EŊƐ PA’ALƐ TI HO PUURƐ PEE YA LA YEHOWA N NƆŊƐ HO SE’EM LA
13. To wan eŋɛ la bem pa’alɛ ti to puurɛ pee ya la Yehowa n nɔŋɛ to se’em la? (2 Korint 6:1)
13 To wan eŋɛ la bem pa’alɛ ti to puurɛ pee ya la Yehowa n bo to lua bunɔ la? La nari ti to basɛ ti Yehowa pu’usegɔ dɛna ninmu’urɛ to vom poan. (Mt. 6:33) Se’ere n sɔi la, Yezu ki mɛ “te nɛresɛba n diŋɛ vɔna la da eta sɛla te bama mɛhe bɔta. Ge ba bɔna bo enŋa Krista . . . n de se’em n daa ki ge te Na’ayenɛ daa vo’e en bama zuo.” (2 Ko. 5:15) Yehowa iti to la soŋa ge me dita sugeri bɔ’ɔra tɔ. To san tiregɛ pu’usa en, la pa’alɛ ti to puurɛ pee mɛ la eŋa n zu’usɛ to se’em la.—Kaalɛ 2 Korint 6:1.
14. To wan eŋɛ la wani ta’an dekɛ tomea delum Yehowa ge dɔla a pa’alegɔ?
14 To san dekɛ tomea delum Yehowa ge dɔla a pa’alegɔ, la pa’alɛ ti to puurɛ pee mɛ la eŋa n nɔŋɛ to se’em la. Wani wani? To san yeti to kɔ’ɛ to puti’irɛ tuuma bii sukuu yɛla poan, la nari ti to ti’isɛ baŋɛ Yehowa n boti to eŋɛ sɛla. (1 Ko. 10:31; 2 Ko. 5:7) To san tara sakerɛ, tomam la Yehowa zɔtɔ nyɔka la wan kpe’em. Bala wan basɛ ti to sirum sakɛ ti to wan ta’an ta vɔna daarewoo.—Arom 5:3-5; Yam. 2:21, 22.
15. Tiirɛ Dia saŋa la, to wan eŋɛ la bem pa’alɛ ti to puurɛ pee ya la lua bunɔ la?
15 To wan ta’an le eŋɛ sɛla pa’alɛ ti to puurɛ pee mɛ la Yehowa n nɔŋɛ to se’em la. Basɛ ti Tiirɛ Dia saŋa la dɛna sansɛka ti ho wan eŋɛ pa’alɛ ho puurɛ n pee se’em la lua bunɔ la. Tiirɛ Dia daarɛ la, tiregɛ bɔna bim. Leyɛ’ɛsa, ho ta’an beem nɛreba ti bamam me wa’ana. (1 Tim. 2:4) Pa’alɛ ba ton wan ta ita sɛla Tiirɛ Dia la poan. La wan ana soŋa ti ho pa’alɛ ba Beni N Sɔi Ti Yezu Yuun Ki? la Tɛ̃ra Yezu Kum La vidiyodoma la. Keendoma nari ti ba tiregɛ keŋɛ ta beem sɛba n ma’ɛ la. Bisɛ Yehowa, Yezu, malesi la, la to za’a puurɛ n wan pee se’em sɛba n basɛ Yehowa la san lebe na pu’usa en! (Lu. 15:4-7) Tiirɛ Dia daarɛ la, to tiregɛ bo to mabiisi, la sɛba woo ti to beem la zaarɛ. To boti la to basɛ ti ba baŋɛ ti to puurɛ pee mɛ la ban nyaŋɛ wa’ana la!—Arom 12:13.
16. Tiirɛ Dia saŋa la, beni n sɔi ti la nara ti to yalegɛ to na’am mɔɔlegɔ tuuma la?
16 Tiirɛ Dia saŋa la, ho wan ta’an tum zo’e zo’e bo Yehowa? Bala wan pa’alɛ ti ho puurɛ pee mɛ la Naayinɛ la Krista n eŋɛ sɛla bo to la. To san tiregɛ tuna zo’e zo’e bɔ’ɔra Yehowa, a me wan soŋɛ tɔ. Bala me wan basɛ ti to sakerɛ malum kpe’em. (1 Ko. 3:9) Leyɛ’ɛsa, tiregɛ kaalɛ Tiirɛ Dia Baabule kaalegɔ maaseŋɔ la n boi Examining the Scriptures Daily bii Vom La Na’am Tuuma Zamesegɔ Gɔŋɔ la poan la. Ho ta’an dekɛ Baabule kaalegɔ zɛ’ɛsi wa me eŋɛ homea zamesegɔ.
17. Bem n basɛ ti Yehowa puurɛ pɛɛra? (Bisɛ daka la zuo n de “ Ton Wan Eŋɛ Se’em Pa’alɛ Ti To Puurɛ Pee Mɛ La Yehowa N Nɔŋɛ To Se’em La.”)
17 Daanse’ere ho bɔŋa la kan bo ho yɔ’ɔ ti ho eŋɛ yelese’a za’a ti to sɔsɛ ba yele zaseŋɔ wa poan la. Ge tɛ̃ra ti, Yehowa ka tari ton tã ita sɛla makera la basɛba n tã ita sɛla. A mi sɛla n boi to suuren mɛ. A suure ni sukɛ mɛ a san nyɛ ti ho kɔ’ɔn ita pa’ala ti ho puurɛ pee mɛ la lua bunɔ la.—1 Sa. 16:7; Mr. 12:41-44.
18. Bem n basɛ ti to puurɛ pee la Yehowa, la Yezu Krista?
18 Lua bunɔ la n basɛ ti Yehowa dita sugeri bɔ’ɔra tɔ, ti to ta’an tara bɔnsoŋa la en ge me tara puti’irɛ ti to wan ta vɔna daarewoo. Basɛ ya ti to kɔ’ɔn ita pa’ala to puurɛ n pee se’em la Yehowa nɔŋerɛ la n basɛ ti to nyɛta kã’a se’a la. (1 Yo. 4:19) Leyɛ’ɛsa, to eŋɛ pa’alɛ ti to puurɛ pee mɛ la Yezu n nɔŋɛ tɔ ge wa’ana ki faɛ nɛresaaleba la!—Yon 15:13.
YUUNƐ 154 Unfailing Love (Nɔŋerɛ Kɔ’ɔn Bɔna Mɛ)
