1. Beni n sɔi ti yɛm bɔna bim ti ho maasum gura yeledi’ima?

 TO SAN maasum la wan faaɛ to basɛ. Yeledi’ire san sige, nɛresɛba n maasum la wan ta’an faaɛ bamea ge soŋɛ basɛba me. Tigere ayima n boi Europe tiregera soŋera nɛreba yeti: “Ho san maasum soŋa la wan faaɛ ho basɛ.”

 2. Beni n sɔi ti la nara ti to maasum gura mɛlesekãtɛ la? (Matu 24:44)

² ‘Mɛlesekãtɛ’ la, kɔ’ɔn yeti la di’e mɛ na. (Mt. 24:21) Mɛlesekãtɛ la boi la de to’ore la yeledi’ima, sɛla n sɔi la to mi ti la wan wa’ana. La gaŋɛ yuun 2,000 n tole ti Yezu yuun ka’am a podɔleba ti ba maasum gura dabeserɛ la. (Kaalɛ Matu 24:44.) To san maasum, la wan dɛna naana bɔ’ɔra tɔ ti to ta’an ŋmibe sankaŋa ge soŋɛ nɛreba ti ba me ta’an ŋmibe.​—Lu. 21:36.

 3. Ŋmibega, giile la nɔŋerɛ wan soŋɛ to la wani ti to ta’an maasum gura mɛlesekãtɛ la?

³ La dela to tiregɛ tara hala atã wa ti la soŋɛ tɔ ti to ta’an maasum gura mɛlesekãtɛ la. To wan eŋɛ la wani ba san yeti to mɔɔlɛ gãkerɛ yele n tɔi bo nɛresɛba n giiseri to la? (Lil. 16:21) La nari ti to ŋmibera ge nana Yehowa. To wan eŋɛ la wani to mabiisi san koŋe ba nutatum bii ba lɔɣɔrɔ toseto? (Hab. 3:17, 18) Ton tari giile bɔ’ɔra ba la zuo bala wan basɛ ti to bo ba sɛla n pakɛ ba. To wan eŋɛ la wani la san dɛna ti tisi n naɛ taaba isige giisa tɔ, ti la dɛna ti to naɛ la to mabiisi bɔna saŋa wana fii poan? (Eze. 38:10-12) La dela to tara nɔŋerɛ zo’e zo’e bɔ’ɔra ba, ta’an ŋmibe bɔnkaŋa poan.

 4. Baabule la yeti bem ti la pa’alɛ ti la nari ti to ŋmibera, tara giile la nɔŋerɛ?

⁴ Naayinɛ Yelesum la kpemesi to giila ti to tara ŋmibega, giile la nɔŋerɛ. Luke 21:19 yeti: ‘Ya san ŋmibera ya wan faaɛ yamesi basɛ.’ Kolose 3:12 yeti: ‘Dekɛ ya giile fuo  . .yɛ.’ 1 Tesalonika 4:9, 10 me yeti: ‘Naayinɛ mea puɣum  pa’alɛ ya ti ya tara nɔŋerɛ bɔ’ɔra taaba. . . . Dene poan n suurɔ, n sohore ya mɛ ti ya malum eŋɛ sɛla n gani bala.’ Podɔleba la yuun puɣum ŋmibera mɛ, tara giile la nɔŋerɛ. Ge ba yuun kelum gulesɛ la yele ana wa bo ba ti ba kelum tara hala ana wa. Tomam me nari ti to ana la bala. To wan sɔsɛ diimi Kristakɔma n yuun eŋɛ se’em pa’alɛ ti ba tari hala ana wa ti la soŋɛ tɔ ti tomam me ta’an ana bala. To me wan bisɛ to wan eŋɛ se’em ta’an tɔɣesa podɔleba la, la wan eŋɛ se’em ti tomam me ta’an maasum tomea gura mɛlesekãtɛ la.

 5. Diimi Kristakɔma yuun ni eŋɛ la wani ta’an ŋmibera yeledaaŋɔ poan?

⁵ Diimi Kristakɔma la yuun nari la ba ŋmibera. (Heb. 10:36) Yeledaaŋɔ seto n yuun paari nɛreba la yuun laɣum paara ba mɛ. Ge bamam n de Kristakɔma la zuo, yeledaaŋɔ la yuun gaŋɛ la bala. Yuda pu’usegɔ nɛŋadoma la Arom kpɛ’ɛndoma la bamea yidoma yuun mɛleseri ba mɛ. (Mt. 10:21) La me yuun nari ti ba tiregɛ, lan wan eŋɛ se’em ti a welege n meadoma la n boti ba sa’am tansugere la da nyaŋɛ pã’asɛ ba. (Tm. 20:29, 30) Ge Kristakɔma wa yuun kelum nyaŋɛ ŋmibe mɛ. (Lil. 2:3) Wani wani? Ba yuun ni ti’isa taɣesa la Yob yele la n boi Baabule la poan la ta’an ŋmibera. (Yam. 5:10, 11) Ba yuun ni zusera mɛ nyɛta paŋa. (Tm. 4:29-31) Ba yuun ni kɔ’ɔn basɛ ti ba puti’irɛ bɔna la ban wan nyɛ nyuurɔ seto ŋmibega poan.​—Tm. 5:41.

 6. Merita n yuun eŋɛ se’em ta’an ŋmibe giisegɔ poan la soŋɛ hon la wani?

⁶ Tomam me san zamesa nɛresɛba ti ba gulesɛ ba yele Baabule la poan bii to gɔnɔ la poan la, to wan ta’an ŋmibera. Mabipɔka ayima n ze’ele Albania ti a yu’urɛ dɛna Merita, yuun eŋɛ la bala se’em ma’a ti a deodoma yuun mɛlesa en la. A yeti: “Yob yele la n boi Baabule poan la, soŋɛ mam mɛ paa. A yuun namesɛ mɛ ge puɣum ka mina sɛla n ta’asɛ bala ge a yuun kelum yeti: ‘Mam kan malum basɛ n birikinte la ta paɛ n kum!’ (Yob 27:5) Mam yuun baŋɛ ti yelese’a n paari mam la ka seke sɛsɛla la sɛla n yuun paɛ Yob la. Yob yuun ka mi sɛla n ta’asɛ ti yeledaaŋɔ la paara en ge mam mi sɛla n ta’asɛ ti yeledaaŋɔ la paara mam.”

 7. Hali yeledaaŋɔ san puɣum ka paara tɔ nananawa, la nari ti to kelum ita la bem?

⁷ To wan ta’an ŋmibera to san yese to suure za’a yele Yehowa sɛla n daani tɔ. (Flp. 4:6; 1 Tes. 5:17) Daanse’ere yeletoo nan ka paɛ hɔ. Ge hali la bala za’a, ho sunsɔa san ni nyie ti la ana ho bura ti ho ka mina hon wan eŋɛ se’em, hon ni belum Yehowa ti a soŋɛ hɔ? Ho san ni kɔ’ɔn zusa Naayinɛ ti a soŋɛ ti ho ta’an maala ho yɛla dabeserɛ woo poan, ho kan gu’um ti ho yele en yelese’a n wan daam hɔ beere sa’am. Ho wan tara puti’irɛ ti a mi eŋa n wan eŋɛ se’em ta’an soŋɛ hɔ sansɛka n nari poan.​—Ym. 27:1, 3.

 8. Mira makesonɛ la basɛ ti to baŋɛ ti to san ŋmibera zina beere wa la wan soŋɛ tɔ la wani ti to ta’an ta ŋmibe beere sa’am? (Yames 1:2-4) (Bisɛ foote la)

⁸ Yɛla san paara tɔ ti to ta’an ŋmibera zina beere wa, la pa’alɛ ti to wan ta’an ta ŋmibe beere sa’am mɛlesekãtɛ la poan. (Arom 5:3) Beni n sɔi ti to wan ta’an yele bala? Mabiisi zo’e zo’e baŋɛ ti yelese’ere woo n paari ba ti ba ta’an ŋmibera la, wan soŋɛ ba ti ba ta’an ta ŋmibe yelese’a n wan paɛ ba. Ŋmibega kumeseri ba mɛ  ti ba tara sakerɛ n kpe’em ge mina ti Yehowa kɔ’ɔn maasum mɛ ti a soŋɛ ba. Sakerɛ me wan soŋɛ ba ti ba ta’an ŋmibe yelese’ere n wan paɛ ba. (Kaalɛ Yames 1:2-4.) Mira n de sore ŋmɛ’adaana n boi Albania tiŋa yeti, eŋa n nyaŋɛ ŋmibe yelese’a n tabelɛ paɛ en la soŋɛ en mɛ ti a ta’an ŋmibera zina beere wa. Saŋa ase’a a ni ti’isɛ ti eŋa ma’a ti yɛla zo’e zo’e kɔ’ɔn paara en. Ge a ni tiɛ la yelese’a ti Yehowa eŋɛ bo en yuun 20 n tole la nyaa ni nyɛta a mea yeti: ‘Kɔ’ɔn tara sakerɛ. Da basɛ ti yuun aŋa za’a ti Yehowa soŋɛ hɔ ti ho zabɛ nyaŋɛ la basɛ yoo.’ Ho me ta’an ti’isɛ taɣesɛ Yehowa n puɣum soŋɛ hɔ se’em ti ho ta’an ŋmibe la. Tara suure lua ti a nyɛti wuŋerɛ woo n paari hɔ ti ho ŋmibera se’em mɛ ge me wan soŋɛ hɔ. (Mt. 5:10-12) Bala la, mɛlesekãtɛ la san ta pɔsɛ ho wan mina hon wan eŋɛ se’em kɔ’ɔn lu suure ŋmibera.

 9. Antiok tansugere la n yuun boi Siria la yuun tari giile la wani?

⁹ Geele bisɛ kom n yuun sige Yuda tiŋa ti la yuun ana Kristakɔma la se’em. Antiok tansugere la n boi Siria n yuun ta wum kom wa yele la, nɔkpe’ene kai ti ba yuun tari la giile bɔ’ɔra mabiisi la n boi Yuda tiŋa la. Ge ban yuun tari giile la basɛ ti ba eŋɛ la sɛla. Ba yuun ‘tɔɣɛ ku nɔɔrɛ ti la dɛna la, nɛra woo bo sɛla ti ba dekɛ soŋɛ mabiisi la n boi Yuda’ tiŋa la. (Tm. 11:27-30) La boi bim ti mabiisi la ti kom yuun paɛ ba la yuun boi la zɛ’an n zãaɛ ge Antiok Kristakɔma la yuun kɔ’ɔn kɔ’ɛ la ba puti’irɛ ti ba soŋɛ ba.​—1 Yon 3:17, 18.

10. To wan eŋɛ la wani pa’alɛ ti to tari giile bɔ’ɔra to mabiisi yeledi’ire san paɛ ba? (Bisɛ foote la)

¹⁰ Tomam me ta’an eŋɛ pa’alɛ ti to tari giile zina beere wa to san wum ti to mabiisi basɛba n boi zɛ’an sa ti yeledi’ire paɛ ba. Tomam me wan eŋɛ kalam yele keendoma la ta’an laɣum tum tuunɛ la, dekɛ bo’olum bo tingɔŋɔ wa za’a waabi na’am tuuma la ge me zusera bɔ’ɔra sɛba ti yeledi’ire la paɛ ba la. b (Mag. 17:17) Makerɛ, yuun 2020 poan, Yeledi’ire Soŋerɛ Bisegadoma n gaŋɛ 950 ti ba loe ba tingɔŋɔ wa za’a waabi poan ti ba bisera sɛba ti COVID-19 bã’a la nyɔkɛ ba la. Sɛba woo n tum yeledi’ire soŋerɛ tuuma wa la, nari ti to pɛɣɛ ba. Ban tari giile bɔ’ɔra ba mabiisi la zuo, ti ba dekɛ lɔɣɔrɔ tɔ̃rɛ, soŋera ba vo’osum poan, hali saŋa ase’a ba ni malum maalɛ bii malum mɛ yɛa la pu’usegɔ zɛ’ɛsi.​—Dekɛ makɛ 2 Korint 8:1-4.

11. To san tara giile bɔ’ɔra nɛreba la wan basɛ ti to saazuo Sɔ la nyɛta na’asegɔ la wani?

¹¹ To san ita pa’ala ti to tari giile bɔ’ɔra to mabiisi ti yeledi’ire paɛ ba, nɛreba wan nyɛ ton ãregeri tomea tara nɔŋerɛ se’em. Makerɛ, yuun 2019 poan, Kubesekãtɛ ti ba yi’ira ti Dorian n sa’am Na’am Pu’usegɔ Deo n boi Bahamas tiŋa. Ban yuun boi bim le mɛta pu’usegɔ deo wa la, ba yuun yele la contractor n daɣɛ mabia ti a pa’alɛ eŋa n wan kɛɛ se’em ge tum tuunɛ la. Contractor la yele ba yeti: “Mam wan bɔta ti n dekɛ . . . lose’a ti to wan dekɛ tum, la mɛa lɔɣɔrɔ, la ton wan tum sɛla la bo zaŋa. . . . mam yeen bɔta la n eŋɛ bo ya tigere la. La kalum mam suure mɛ la yan ti’iseri ya zɔdoma yele se’em la.” Nɛreba zo’e zo’e n boi tingɔŋɔ wa zuo ka mi Yehowa. Ge ba zo’e zo’e nyɛti Yehowa Sɛɛradoma n iti sɛla soŋera nɛreba mɛ. To puurɛ pee mɛ  la ton baŋɛ ti to san tara giile bɔ’ɔra nɛreba la wan ta’an basɛ ti nɛreba bɔta ti ba ana du’a du’a la Mina n ‘tari ninbɔ̃zore la’!​—Ep. 2:4.

12. To san tara giile bɔ’ɔra nɛreba zina beere wa la maaseni to la wani gura mɛlesekãtɛ la? (Liligere 13:16, 17)

¹² Beni n sɔi ti la nara ti to tara giile mɛlesekãtɛ la saŋa? Baabule la basɛ ti to baŋɛ ti sɛba n ka soŋeri nalɛɣerɛdoma la, daaŋɔ wan paɛ ba nananawa la mɛlesekãtɛ la poan. (Kaalɛ Liligere 13:16, 17.) Sankaŋa la, to mabiisi wan ɛɛra la yelese’a n pakɛ ba. To Naba Krista Yezu san ta wa’ana ti a gãkɛ nɛreba ge nyɛ ti to tari giile bɔ’ɔra nɛreba, a wan yele to yeti to ‘kɛ̃ Na’am la poan.’​—Mt. 25:34-40.

13. Wuu Arom 15:7 n pa’alɛ se’em la, diimi Kristakɔma la yuun eŋɛ la wani basɛ ti ba nɔŋerɛ la kpe’em?

¹³ Nɛra woo yuun mi ti diimi Kristakɔma la yuun tari la nɔŋerɛ. Ge la yuun dela naana ti ba tara nɔŋerɛ bɔ’ɔra taaba? Geele bisɛ nɛreba to’ore to’ore n yuun boi Arom tansugere la poan se’em. Basɛba yuun dela Yudadoma ti ba pa’alɛ ba Moses Lɔɔ la ti ba nana ge basɛba me yuun ze’ele la satisi sise’esi poan tara malema to’ore to’ore. Daanse’ere Kristakɔma basɛba yuun dela yamesi, ti basɛba me bɔna fai, hali basɛba yuun tari la yamesi ti ba tuna bɔ’ɔra ba. Kristakɔma wa yuun eŋɛ la wani kelum tara nɔŋerɛ bɔ’ɔra taaba hali la ba bɔŋa la n boi tɔka tɔka la? Tuuntuna Paul yuun yele ba ti ‘ba tɔ’ɔsa taaba soŋa soŋa.’ (Kaalɛ Arom 15:7.) Bala vuurɛ? Yelebire la ti ba lerege yeti ‘tɔ’ɔsa’ la vuurɛ dela hon doose itisoŋɔ bii saaŋɔ poan to’e nɛra ho yire poan bii pa’asɛ ho zɔdoma poan. Makerɛ, Paul yuun yele Filemon ti a to’e a yameŋa Onesimus n zɔ ge basɛ en la ‘soŋa soŋa.’ (Flm. 17) Priscilla la Aquila me yuun to’e Apollos mɛ, mina n yuun ka mi Naayinɛ yɛla soŋa la, nyaa ‘tari en kule ba yire.’ (Tm. 18:26) Ge Kristakɔma wa yuun ka basɛ ti ban boi tɔka tɔka la yelege ba ge ba yuun tuɣum tɔ’ɔsa taaba mɛ soŋa soŋa.

14. Anna la a sira yuun eŋɛ la bem pa’alɛ ti ba tari nɔŋerɛ?

¹⁴ La me nari ti to tara nɔŋerɛ bɔ’ɔra to mabiisi, tɔ’ɔsa ba soŋa ti ba dɛna to zɔdoma. Bala wan basɛ ti bamam me tara nɔŋerɛ bɔ’ɔra tɔ. (2 Ko. 6:11-13) To geele Anna la a sira yele bisɛ. Ban yuun keŋɛ tiŋa ayima n boi West Africa ti ba ta pɔsɛ satiŋa na’am yetɔɣum yalegerɛ tuuma la, la yuun ka yue ti COVID-19 bã’a la pɔsɛ. Ban yuun paɛ nan dɛna saama la, ba yuun ka ta’an kena tansugere zamesegɔ, bala yuun kpe’em bo ba mɛ ti ba ta’an baŋɛ mabiisi la soŋa. Nɛra la a pɔɣa wa wan eŋɛ la wani ta’an tara nɔŋerɛ bɔ’ɔra ba? Ba yuun ni sɔsera la mabiisi la videoconferencing poan ge ni yɛta ba yeti bamam boti ba baŋɛ ba mɛ soŋa soŋa. Mabiisi la suure yuun sukɛ mɛ ti ba ni yi’ira ge tɛɣesera ba. Beni n sɔi ti nɛra la a pɔɣa wa yuun tiregɛ bɔta ti ba baŋɛ mabiisi la n boi tansugere la poan la? Anna yeti: “Mam ka malum tamɛ mabiisi la n tari nɔŋerɛ se’em bɔ’ɔra mam la n deodoma sansɛka n ani soŋa la biɣi biɣi saŋa poan la. Ba itisoŋɔ la kpemese mam giila mɛ ti mam me tara nɔŋerɛ bɔ’ɔra nɛreba.”

15. Bem ti hon zamesɛ Vanessa yele la poan ti la nara ti to tara nɔŋerɛ bɔ’ɔra to mabiisi woo? (Bisɛ foote la)

¹⁵ To zo’e zo’e boi la tansuga ase’a poan ti mabiisi n ze’ele buuri to’ore to’ore ge tara hala to’ore to’ore bɔna bim. To san  basɛ ti to puti’irɛ bɔna ba halisoma la poan to wan tara nɔŋerɛ bɔ’ɔra ba. Mabipɔka ayima yu’urɛ n de Vanessa, n yuun tuni na’am tuuma New Zealand la, yuun bisɛ ti la kpe’em mɛ ti a naɛ la mabiisi basɛba sɔsera tansugere la poan. La wan tuɣum deni a lɔɣesa mabisɛba n tari halise’a ti la daana en la, a yuun tuɣum nyɛta la nɛŋa sɔsera la ba. Eŋa n yuun iti bala la, n soŋɛ en ti a baŋɛ ti Yehowa nɔŋɛ ba mɛ. A yeti: “Mam sira n yuun nyaa ta dɛna kaarɛ bisegadaana la, to yuun naɛ la mabiisi zo’e zo’e n tari hala to’ore to’ore sɔsera ti la nyaa dɛna naana bɔ’ɔra mam ti n naɛ la ba sɔsera. Mam nyaa nɔŋɛ mabiisi wa n boi to’ore to’ore la mɛ. La niɛ peelumi ti Yehowa nɔŋɛ ba mɛ bala n sɔi ti a basɛ ti nɛreba n boi to’ore to’ore pu’usa en la.” To san bisera nyɛta nɛreba wuu Yehowa n nyɛti ba se’em la, to wan eŋɛ pa’alɛ ti to nɔŋɛ ba.​—2 Ko. 8:24.

16. Beni n sɔi ti nɔŋerɛ yele wan pakɛ tɔ mɛlesekãtɛ la poan? (Bisɛ foote la)

¹⁶ La yele wan ta pakɛ ti to tara nɔŋerɛ bɔ’ɔra to mabiisi mɛlesekãtɛ la poan. Mɛlesekãtɛ la san ta pɔsɛ to wan nyɛ te’elego la bɛ? Geele bisɛ Yehowa n yuun yele a nɛreba ti ba eŋɛ se’em diimi Babilon ti ba yuun isige zabera la en la: ‘N nɛreba wa, kɛ̃ ya bɔ’ɔrɔ poan, yu yamea basɛ sa, suɣɛ yamea fii gura ti Naayinɛ sunsua nyiisum la ta ba’asɛ.’ (Isa. 26:20) La ani wuu ba tɔɣeri yetɔɣum buna wa me bɔ’ɔra la tomam ti to dekɛ tum tuuma mɛlesekãtɛ la poan. ‘Bɔ’ɔrɔ poan’ ta’an dɛna to tansuga la poan. Yehowa pu’ulumbiŋe ti a wan te’ele to mɛlesekãtɛ la poan to san laɣum naɛ la to mabiisi pu’usera en. Bala la, la dela to mɔ ge tara nɔŋerɛ bɔ’ɔra to mabiisi la ge daɣɛ to yeen bɔna la ba. To san ita bala to wan ta’an nyɛ nyɔvore!

17. To san maasum nananawa, to wan ta’an eŋɛ la bem mɛlesekãtɛ la poan?

¹⁷ ‘Yehowa dabeserɛ katɛ’ la wan basɛ ti wuŋerɛ paɛ asaala woo. (Zep. 1:14, 15) Wuŋerɛ la me wan paɛ Yehowa nɛreba mɛ. Ge to san maasum nananawa, to wan ta’an ta ana baalam ge soŋɛ nɛreba me. Bala wan basɛ ti to ta’an ŋmibe yelese’ere woo n wan paɛ tɔ. To san nyɛ ti to mabiisi namesa, to wan tara giile bɔ’ɔra ba ge soŋɛ ba ti ba nyɛ sɛla n pakɛ ba. To me san tara nɔŋerɛ bɔ’ɔra to mabiisi la, to wan ana tapilapi la ba. Bala ti Yehowa wan kã bo ti to tara daarewoo nyɔvore tingɔŋɔ wa poan ti yeledi’ima la mɛlesegɔ kan le bɔna.​—Isa. 65:17.