1. Hon daa zamesɛ Baabule la, ho nyɛ la bem yelemɛŋɛrɛ?

 HO TƐ̃RI se’em ma’a ti ho daa pɔsɛ zamesa Baabule la? La daa ta’an eŋɛ ho pakerɛ la hon baŋɛ ti Naayinɛ tari yu’urɛ la. Daanse’ere ho suure daa sukɛ mɛ la hon daa baŋɛ ti Naayinɛ ka nyɔ̃’ɔri nɛreba tinmɔlega poan la. Daanse’ere ho puurɛ daa pee mɛ la hon baŋɛ ti ho wan le nyɛ ho nɛresɛba n ki la ti ya le naɛ taaba kɛ̃’ɛra paradiisi tinparɛ wa zuo la.

2. Hon daa zamesɛ Baabule yelemɛŋɛrɛ la, ho daa le eŋɛ la wani ta’an nyɛta nɛŋa tɔlega? (Epesus 5:1, 2)

² Hon daa kɔ’ɔn zamesa Naayinɛ yelesum la zɔ’ɔra la, bala daa basɛ ti ho tara la nɔŋerɛ zo’e zo’e bɔ’ɔra Yehowa. Nɔŋerɛ denɛ n soŋɛ hɔ ti ho tara sɛla ti ho zamesɛ la tuna tuuma. Baabule naresum yɛla la n soŋɛ hɔ ti ho ta’an kɔ’ɛ ho puti’irɛ soŋa. Ho nyaŋɛ tee ho itigɔ la ho sareŋɔ mɛ se’ere n sɔi la ho boti la Naayinɛ puurɛ pee. Wuu bia n tɔɣeseri a dɔɣereba se’em la, ho me daa tɔɣeseri la ho saazuo Sɔ la bala mea nɔɔ.​—Kaalɛ Epesus 5:1, 2.

3. Soke ani ti to wan ta’an soke tomea?

³ To ta’an soke tomea yeti: ‘Nɔŋerɛ se’ere ti mam tara bɔ’ɔra Yehowa nananawa la kpe’em gana mam yuun pɔsɛ dɛna Kristabia la? Kɔ’ɔn pɔsɛ mam ko’om musega daarɛ mam ti’isegɔ la n itigɔ kɔ’ɔn makɛ la Yehowa n boti sɛla la yele yele wuu lan nari ti n tara nɔŋerɛ se’em bɔ’ɔra to mabiisi la?’ Ho san bisɛ ti ‘hon daa nɔŋɛ en se’em yia la’ ma’ɛ mɛ da basɛ ti ho giila kɔ’ɔsɛ. La me yuun ani yuun kɔbesɛka n deŋɛ nɛŋa Kristakɔma la bala. Yezu yuun ka pisegɛ ba basɛ, a me kan pisegɛ tomam me basɛ. (Lil. 2:4, 7) A mi ti to wan ta’an le malum tara nɔŋerɛ se’ere ti to daa tara bɔ’ɔra en yia la.

4. To wan sɔsɛ la bem zaseŋɔ wa poan?

 ⁴ Zaseŋɔ wa poan to wan sɔsɛ baŋɛ to wan eŋɛ se’em kelum tara nɔŋerɛ bɔ’ɔra Yehowa la nɛreba. To wan zamesɛ baŋɛ ka’a sebo ti to wan nyɛ to san tara nɔŋerɛ zo’e zo’e bɔ’ɔra Yehowa la to mabiisi.

5-6. Bem yɛla n yuun paɛ tuuntuna Paul a na’am tuuma la poan ge bem n yuun soŋɛ en ti a kelum pu’usa Yehowa?

⁵ Tuuntuna Paul puurɛ yuun pee mɛ la eŋa n dekɛ a vom tum Yehowa tuuma la ge la yuun daɣɛ naana. Paul yuun le keŋɛ la zɛse’esi n zaaɛ ge sankaŋa la sore kenɛ yuun daɣɛ naana. Paul n yuun le bɔna sore zuo la, saŋa ase’a a ni ‘pɔ̃sɛ la a nyɔɔrɛ ko’om poan’ la ‘nayigesi nu’usin.’ (2 Ko. 11:23-27) Saŋa ase’a sɛba n yuun ni giisera en la yuun le ŋmɛ’ɛra en mɛ. Ge Krista mabiisi la yuun ka eŋɛ pa’alɛ ti ba puurɛ pee mɛ la Paul n mɔɔri se’em ti a soŋɛ ba la.​—2 Ko. 10:10; Flp. 4:15.

⁶ Bem n yuun soŋɛ Paul ti a yuun kelum pu’usa Yehowa? Paul mea zi’irego poan la gulesegɔ la poan ti a yuun zamesɛ baŋɛ Yehowa hala. Paul yuun mi soŋa soŋa ti Yehowa Naayinɛ nɔŋɛ en mɛ. (Arom 8:38, 39; Ep. 2:4, 5) Bala yuun basɛ ti a nɔŋɛ Yehowa paa. Paul yuun eŋɛ pa’alɛ ti a tari nɔŋerɛ bɔ’ɔra Yehowa la eŋa n yuun ‘kelum tuna bɔ’ɔra zilamdoma la.’​—Heb. 6:10.

7. Sore kuni poan ti to wan eŋɛ pa’alɛ ti to tari nɔŋerɛ zo’e zo’e bɔ’ɔra Yehowa?

⁷ To san mɔ’ɛ nini zamesa Naayinɛ Yelesum la to wan tara nɔŋerɛ zo’e zo’e bɔ’ɔra en. Ho san kaalɛ Baabule la ni tiregɛ bɔkɛ kaalegɔ zɛ’an la n pa’alɛ Yehowa yele se’em. Soke homea yeti: ‘Yeledena wa pa’alɛ ti Yehowa nɔŋɛ mam la wani? La tɔɣɛ la bem yɛla pa’alɛ ti la dela n nɔŋɛ Yehowa?’

8. Zusega wan soŋɛ to la wani ti to tara nɔŋerɛ zo’e zo’e bɔ’ɔra Naayinɛ?

⁸ Sore deyima poan ti to wan ta’an eŋɛ pa’alɛ ti to tari nɔŋerɛ zo’e zo’e bɔ’ɔra Yehowa dela to yese to suure za’a zusera en daarewoo. (Ym. 25:4, 5) Yehowa me wan lebese to zusega la. (1 Yon 3:21, 22) Khanh, n de mabipɔka ze’ele Asia yeti: “Yia la, mam n zamesɛ baŋɛ Yehowa yele se’em la n basɛ ti mam tara nɔŋerɛ bɔ’ɔra en. Ge mam n nyɛ eŋa n lebese mam zusega se’em la basɛ ti mam malum nɔŋɛ en gana la bala. Wana basɛ ti mam bɔta ti n ita la sɛla n wan pɛɛra a puurɛ.”  b

9. Timoti yuun eŋɛ la bem pa’alɛ ti a kɔ’ɔn nyɛta nɛŋa tɔlega mɛ nɔŋerɛ poan?

⁹ Timoti n yuun ta dɛna Kristabia la yuuma fii pooren ti Paul yuun seke bunbilipaalega wa. Timoti yuun nɔŋɛ la Yehowa la nɛreba. Paul yele Filipidoma la yeti ‘mam ka tari nɛra n wan bisɛ yelese’a n pakɛ ya la wuu eŋa la.’ (Flp. 2:20) Gulesegɔ la poan Paul yuun ka pa’alɛ Timoti n tã laɣesa nɛreba se’em bii mina yetɔɣum se’em ge Paul suure yuun sukɛ mɛ la Timoti n tari nɔŋerɛ se’em bɔ’ɔra mabiisi la. Nɔkpe’ene kai ti tansuga la yuun kɔ’ɔn bɔta ti Timoti wa’ana kaɛ ba bisɛ.​—1 Ko. 4:17.

10. Anna la a sira eŋɛ la bem pa’alɛ ti ba tari nɔŋerɛ bɔ’ɔra to mabiisi la?

¹⁰ Tomam me nari ti to bisɛ sarɔɔ seto ti to wan ta’an doose soŋɛ to mabiisi.  (Heb. 13:16) To bisɛ Anna zi’irego poan yele la ti to tɔɣɛ de yele zaseŋɔ seko n tole la. Kusebego katɛ n daa lobe ti eŋa la a sira daa kaɛ to mabia ayima yire ta nyɛ ti mabia la yire pilege mɛ. Bala daa basɛ ti ba lɔɣɔrɔ la za’a dɛɣɛ mɛ. Anna yeti: “To daa vaɛ ba lɔɣɔrɔ la kule ta pee mɛ, nɛɛm ba ge bɔɣelɛ ba tari ta bo ba. Tomam daa bisɛ ti la dela yelepika ti to eŋɛ ge la daa basɛ ti to nyaa kɔ’ɔn dɛna la zɔtɔ ta paɛ zina beere wa.” Anna la a sira n daa tari nɔŋerɛ bɔ’ɔra mabiisi la se’em la n daa basɛ ti ba soŋɛ ba bala la.​—1 Yon 3:17, 18.

11. (a) To san tiregɛ tara nɔŋerɛ bɔ’ɔra nɛreba la wan ana ba la wani? (b) Wuu Magaha 19:17 n pa’alɛ se’em la, Yehowa wan eŋɛ la bem to san tara nɔŋerɛ bɔ’ɔra nɛreba?

¹¹ To san tara nɔŋerɛ la itisoŋɔ bɔ’ɔra nɛreba ba ni baŋɛ ti to tiregeri tɔɣesa la Yehowa n ti’iseri ge ita yɛla se’em la. Ba puurɛ ni pee la to itisoŋɔ la. Khanh ti to puɣum tɔɣɛ a yele pɔsega la ni kɔ’ɔn tɛ̃ra sɛba n soŋɛ en la yele mɛ. A yeti: “Mam puurɛ pee la mabiisi sɛba woo n dekɛ mam keŋɛ na’am mɔɔlegɔ la. Ba ni wa’ana dekɛ mam ti to keŋɛ ta di ge tara mam lebe kule yire. Nananawa ti mam baŋɛ ti la daa dela tuunkãtɛ bo ba. Nɔŋerɛ n daa basɛ ti ba ita wana wa.” La boi bim ti, daɣɛ nɛra woo n wan pu’usɛ to la ton eŋɛ sɛla bo ba la. Khanh yele la wana la sɛba n soŋɛ en la: “Mam boti ni n lebese eŋɛ sɛla bo sɛba n eŋɛ itisoŋɔ bo mam la ge mam ka mi ba za’a n kɛ̃’ɛri zɛ’an. Ge Yehowa mi. Mam zuseri ti a wan lebese yɔ ba bo mam.” Khanh tɔɣɛ la yelemɛŋɛrɛ. Yehowa nyɛti ton iti yele piɣisi piɣisi soŋera nɛreba mɛ. A bisɛ ti la dela tuulum bo’olum ge ti la me dɛna sanɛ bɔ’ɔra en ti a lebe yɔ tɔ.​—Kaalɛ Magaha 19:17.

12. Mabiisi n de buraasi wan eŋɛ la bem pa’alɛ ti ba tari nɔŋerɛ bɔ’ɔra tansugere la? (Bisɛ fɔɔra la.)

 ¹² Ho san dɛna buraa ho wan eŋɛ la wani tara nɔŋerɛ bɔ’ɔra nɛreba ge me soŋera ba? Bunbilipaalega ayima yu’urɛ n de Jordan daa soke keema ayima eŋa n wan eŋɛ se’em ta’an soŋɛ tansugere la zo’e zo’e. Keema la daa pɛɣɛ en la eŋa n puɣum nyɛ nɛŋa tɔlega se’em la ge pa’alɛ en eŋa n wan eŋɛ se’em ta’an tum zo’e. Makerɛ, a daa pa’alɛ Jordan ti la nari ti a ni eŋɛ kalam paɛ Na’am Pu’usegɔ Deo la poan pu’usɛ mabiisi la, laɣum bɔ’ɔra lebesego zamesegɔ poan, naɛ la a gurup la mɔɔla saŋa woo ge bisɛ eŋa n wan eŋɛ se’em soŋera nɛreba. Jordan n daa dekɛ mabia la ka’aŋɔ tum tuuma la, a daa yeen ka zamesɛ la yɛla pa’asɛ ge nɔŋerɛ la ti a daa tara bɔ’ɔra to mabiisi la kelum zɔ’ɔra mɛ pa’asa. Jordan daa baŋɛ ti mabia san ta dɛna keendoma soŋerɛdaana, daɣɛ sankaŋa poan ti a wan pɔsɛ soŋera mabiisi la ge a wan kelum ita la eŋa n puɣum ita sɛla la ta’an soŋera ba.​—1 Tim. 3:8-10, 13.

13. Nɔŋerɛ basɛ ti Christian eŋɛ la wani ta’an le nyɛ yɔ’ɔ dɛna keema?

¹³ Ge ho san tabelɛ dɛna keema bii keendoma soŋerɛdaana? Yehowa tɛ̃ri tuunse’a ti ho puɣum deŋɛ tum kurum mɛ la hon tari nɔŋerɛ se’em la. (1 Ko. 15:58) A me kɔ’ɔn nyɛta hon kelum tara nɔŋerɛ se’em la. Mabia ayima yu’urɛ n de Christian suure yuun sa’am mɛ la ban yuun yese en ti a ka le dɛna keema la. Ge a yeti, “N de keema bii n daɣɛ keema woo mam wan dekɛ n suure za’a bisɛ mam wan eŋɛ se’em ta’an tara nɔŋerɛ bɔ’ɔra Yehowa.” Pooren, ba yuun le loe en mɛ ti a dɛna keema. Christian yeti, “Dabeem n yuun tari mam ti n le dɛna keema. Ge mam kɔ’ɛ n puti’irɛ ti Yehowa n tari  nimbɔ̃zore bɔ’ɔra mam ge bo mam yɔ’ɔ ti n le dɛna keema la zuo la mam wan sakɛ, sɛla n sɔi la mam tari la nɔŋerɛ bɔ’ɔra Yehowa la to mabiisi la.”

14. Hon zamesɛ la bem la mabipɔka n ze’ele Georgia la n yele sɛla la?

¹⁴ Yehowa yamesi kɔ’ɔn tara la nɔŋerɛ bɔ’ɔra nɛreba. (Mt. 22:37-39) Makerɛ, Elena n de mabipɔka ze’ele Georgia yeti, “Yelese’ere zuo ti mam mɔɔla yelesoma la bɔ’ɔra nɛreba dela mam tari nɔŋerɛ bɔ’ɔra Yehowa la. Ge mam n tari nɔŋerɛ zo’e zo’e bɔ’ɔra to saazuo Sɔ la zuo, bala basɛ ti mam me nɔŋɛ nɛreba mɛ. Mam ni tiregɛ ti n bisɛ yelese’a n paari mabiisi la ge ni bisɛ mam wan tɔɣɛ sɛla ti la kalum ba suure. Mam san ni ti’isa ba yele bala, mam ni bɔta la n soŋɛ ba.”​—Arom 10:13-15.

15-16. Wuu ton nyɛ itipa’alegɔ fɔɔra la poan se’em la, to san tara nɔŋerɛ bɔ’ɔra nɛreba bem kã’a ti to wan nyɛ?

¹⁵ To san tara nɔŋerɛ bɔ’ɔra to mabiisi daɣɛ bamam ma’a n nyɛti nyuurɔ. COVID-19 bā’a la n yuun pɔsɛ la, Mabia Paolo la a pɔɣa yuun soŋɛ mabipɔɣesi zo’e zo’e n yuun kuregɛ ti ba ta’an tara ba elektronik lɔɣɔrɔ dita sɛɛra. La yuun kpe’em mɛ bo mabipɔka ayima ti a dekɛ elektronik lɔɣɔrɔ dita sɛɛra. Ge a yuun nyaŋɛ mɛ. A yuun nyaŋɛ dekɛ elektronik lɔkɔ wa mɛ beem a suurɔ ti ba wa’an Yezu kum tiirɛ la na. A suurɔ la yuun dela pisiyoobe n kelese yetɔɣum la vidiyo conferencing poan. Mabipɔka wa la a suurɔ la yuun nyɛ nyuurɔ  mɛ la Paolo la a pɔɣa n yuun tiregɛ soŋɛ en la. Pooren, mabipɔka la gulesɛ bo Paolo yeti, “N pu’usɛ ya la hon pa’alɛ tomam sɛba n de bunkureba la. Mam kan malum tamɛ Yehowa n nɔŋɛ to yele se’em la hon me n tiregɛ soŋɛ to se’em la.”

¹⁶ Zi’irego poan yele wa basɛ ti Paolo baŋɛ la sɛla n de ninmɔ’ɔrɛ. La basɛ ti a baŋɛ ti nɔŋerɛ dela sɛla n pakɛ gana mi’ilum bii sɛla ti to ta’an ita. A yeti, “Mam yuun tabelɛ dɛna la gingilega kaara bisegadaana. Nananawa, mam mi ti na’am mɔɔlegɔdoma la ta’an tamɛ mam yetɔɣum la ti n daa bɔ’ɔra la ge ba kan tamɛ sɛla ti mam ni ita soŋera ba la.”

17. Bani n nyɛti nyuurɔ to san tara nɔŋerɛ bɔ’ɔra nɛreba?

¹⁷ To san tara nɔŋerɛ bɔ’ɔra nɛreba tomam mea me wan nyɛ nyuurɔ sansɛka ti to ka ti’isa de yele. Jonathan n ze’ele New Zealand basɛ ti to baŋɛ ti bala dela yelemɛŋɛrɛ. Asibidaarɛ wuntɛɛŋa ti a nyɛ sore ŋmɛ’adaana n tɔɣeri Naayinɛ yɛla bɔ’ɔra nɛreba sore zuo. Jonathan nyaa kɔ’ɛ a puti’irɛ ti a wan naɛ la sore ŋmɛ’adaana la ti ba mɔɔla Asibidaarɛ woo wuntɛɛŋa. Sankaŋa la, a mea daa ka mi eŋa n wan nyɛ nyuurɔ se’em a san tara itisoŋɔ bɔ’ɔra nɛreba. Jonathan yeti, “Sankaŋa la mam yuun ka nɔŋɛ n tɔɣera Naayinɛ yelesum bɔ’ɔra nɛreba ge mam n ni nyɛta sore ŋmɛ’adaana la n mi pa’alegɔ se’em la ge ti a na’am mɔɔlegɔ tuuma la me soŋera nɛreba se’em la n kalum mam suure ti mam me nɔŋɛ na’am mɔɔlegɔ tuuma la. Mam nyɛ la zɔsonkɔ n wan ta’an soŋɛ mam ti n bĩ vo’osum poan, nɔŋɛ na’am mɔɔlegɔ tuuma la ge me vurege du Yehowa.”

18. Yehowa boti to ita la bem?

¹⁸ Yehowa boti la to tara nɔŋerɛ bɔ’ɔra eŋa la nɛreba. Wuu ton zamesɛ sɛla la, to san kaala a Yelesum la ti’isa bu taɣesa ge zusa Yehowa daarewoo to wan tara nɔŋerɛ zo’e zo’e bɔ’ɔra en. To san soŋera to mabiisi la wan pa’alɛ ti to tari nɔŋerɛ zo’e zo’e bɔ’ɔra ba. To san tara nɔŋerɛ zo’e zo’e bala wan basɛ ti to ana du’a du’a la Yehowa la to mabiisi ti to zɔtɔ nyɔka la me wan bɔna la bala wuusa!