1-2. Wuu Yooma 25:14 n pa’alɛ se’em la, to san wan ta’an tara bɔnsoŋa la Yehowa la nari ti to eŋɛ la bem?

 HON ti’isi ti hala ani ti la nara ti ho tara ta’an tara bɔnsoŋa la nɛra? Ho ta’an yeti zɔsonɔ nari ti ba nɔŋɛ taaba ge me soŋera taaba. Ho ta’an ti’isa ni ti zoolum daɣɛ sɛla n de ninmɔ’ɔrɛ zɔtɔ nyɔka poan. Ge wuu to zamesegɔ la zuo la n pa’alɛ se’em la, sɛba n boti ba tara bɔnsoŋa la Yehowa la nari ti ba ‘zɔta en.’​—Kaalɛ Yooma 25:14.

² La ka pakɛ la ton pu’usɛ Yehowa yue se’em, to za’a waabi nari ti to tara zoolum bɔ’ɔra en. Ge to tara zoolum bɔ’ɔra Yehowa vuurɛ? To wan eŋɛ la wani ta’an tara zoolum bɔ’ɔra Yehowa? Birikina Obadia, Malema Nɛŋadaana Yehoiada la Naba Yehoas wan ta’an pa’alɛ to la bem la Naayinɛ zoolum?

3. Bem yɛla n wan ta’an basɛ ti to tara dabeem ge la wan soŋɛ to la wani?

³ To san ti’isa ti dɛŋa wan paɛ tɔ, dabeem ta’an tara to mɛ. Dabeem buna wa ani soŋa mɛ ge me wan ta’an basɛ ti to kɔ’ɛ to puti’irɛ soŋa. Ton mi ti to san bɛ̃ɣera zoore kinkɛleŋa to wan ta’an lui la zuo, to kan lɛna bim. Pɔɣeleŋɔ n wan ta’an paɛ to la zuo, to san ni nyɛ dɛŋa to ni zɔ mɛ. Ton ka boti tomam la nɛra zɔtɔ nyɔka sa’am la zuo, to kan yele bii eŋɛ sɛla ti la daam en.

4. Dabeem buni ti Sitaana bɔta ti nɛreba tara la Yehowa?

⁴ Sitaana boti la nɛreba tara dabeem la Yehowa. Sitaana  boti la to sakɛ ti Yehowa sunsɔa ka yaɣeseri ge nyiira ge ti a me wan ta’an dɔlegɛ to tuberɛ. To me kan ta’an basɛ ti a puurɛ pee. (Yob 4:18, 19) Sitaana boti la to tara dabeem la Yehowa ge da pu’usa en. Ge la ka nari ti to basɛ ti dabeem tara tɔ la Yehowa. Lan tuɣum nara ti to eŋɛ sɛla dela to bɔ’ɔra en gilema ge da eŋɛ sɛla n wan daam en.

5. To tara zoolum bɔ’ɔra Naayinɛ vuurɛ?

⁵ Nɛra san tara gilema bɔ’ɔra Naayinɛ, a wan nɔŋɛ en ge me kan bɔta ti a eŋɛ sɛla n wan sa’am eŋa la Naayinɛ bɔnsoŋa la. Yezu me yuun ‘nani Naayinɛ mɛ.’ (Heb. 5:7) A yuun ka tari dabeem la Yehowa. (Isa. 11:2, 3) A yuun tuɣum nɔŋɛ en mɛ ge bɔta ti a nana en. (Yon 14:21, 31) Wuu Yezu la, to bo’ori Yehowa gilema mɛ ge ti a me tara ɔmi’isa la tɔ se’ere n sɔi la, a tari la nɔŋerɛ, yɛm la paŋa ge me ita a sɛla woo tontɔɔ. To me mi ti Yehowa nɔŋɛ to mɛ paa. A me ni bɔta la a baŋɛ lan ani to se’em la a pa’alegɔ la. To san zaɣesɛ Yehowa a suure ni sa’am mɛ ge to san nana en a puurɛ ni pee mɛ.​—Ym. 78:41; Mag. 27:11.

6. Sore kani poan ti to wan ta’an tara zoolum bɔ’ɔra Naayinɛ? (Yooma 34:11)

⁶ Ba ka dɔɣɛ tɔ ti to kɔ’ɔn mina to wan zɔta Yehowa se’em ge la nari mɛ ti to zɔta en. (Kaalɛ Yooma 34:11.) Sarɔɔ ayima ti to wan ta’an eŋɛ bala dela to bisa a naaŋɔ lɔɣɔrɔ la. To san ni baŋɛ Yehowa ‘naaŋɔ lɔɣɔrɔ la’ n pa’alɛ to a yɛm, a paŋa la nɔŋerɛ se’ere taaba ti a tara bɔ’ɔra to la, to ni bɔ’ɔra en gilema mɛ ge me nɔŋɛ en. (Arom 1:20) Mabipɔka ayima yu’urɛ n de Adrienne yeti, “Mam san ni bisa Yehowa naaŋɔ lɔɣɔrɔ la ge me nyɛta eŋa n tari yɛm se’em la, mam ni baŋɛ ti a mi sɛla n ani soŋa bɔ’ɔra mam mɛ.” Eŋa n ti’isɛ yele wa la basɛ ti a nyaa yeti, “Beni n sɔi ti mam wan bɔta ti n eŋɛ sɛla n wan basɛ ti mam la Yehowa, Se’em n bo mam vom la bɔnsoŋa sa’am?” Bakwai woo poan, ni nyɛ saŋa zi’ire ti’isɛ Yehowa n naam lɔɣɔse’a la yele. Ho san ita bala, la wan basɛ ti ho tara nɔŋerɛ la gilema bɔ’ɔra Yehowa.​—Ym. 111:2, 3.

7. Zusega wan ta’an soŋɛ to la wani ti to tara zoolum bɔ’ɔra Yehowa?

⁷ Sore deyima ti to wan ta’an tara zoolum bɔ’ɔra Naayinɛ dela to zusera en saŋa woo. To san zusa Yehowa tabela to wan baŋɛ en soŋa soŋa. To san ni zusɛ Yehowa ti a bo to paŋa ti to ta’an ŋmibe to yele poan, to ni baŋɛ ti a tari paŋa. To san ni pu’usɛ en la eŋa n basɛ ti a Dayɔa wa’ana ki bo to la, la ni basɛ ti to baŋɛ ti Yehowa nɔŋɛ to mɛ. To me san belum en ti a soŋɛ tɔ ti to ta’an maalɛ to yele, to ni baŋɛ eŋa n tari yɛm se’em mɛ. Zusega ana taaba wa ni basɛ ti to malum bɔ’ɔra Yehowa gilema pa’asa mɛ. Bala ni kpemese to giila mɛ ti to kan bɔta ti to eŋɛ sɛla n wan sa’am tomam la Yehowa zɔtɔ nyɔka la.

8. To wan eŋɛ la wani ta’an kelum tara zoolum bɔ’ɔra Naayinɛ?

⁸ To wan ta’an kelum tara zoolum bɔ’ɔra Naayinɛ to san zamesa Baabule la. To san zamesa, to puti’irɛ dela to bisɛ to wan ta’an zamesɛ sɛla nɛresɛba n yuun eŋɛ makesonɛ la sɛba n yuun ka eŋɛ makesonɛ ti ba gulesɛ ba yele Baabule la poan la. Basɛ ya ti to sɔsɛ ya Naayinɛ yelemɛŋɛrɛ yamesi bayi yele. Obadia n yuun biseri Naba Ahab yire, la Malema Nɛŋadaana Yehoiada. To me wan bisɛ to wan ta’an zamesɛ sɛla Yuda Naba Yehoas  yele la poan. A yuun pu’useri Yehowa mɛ ge pooren a yuun basɛ en mɛ.

9. Yehowa zoolum yuun soŋɛ Obadia la wani? (1 Nadoma 18:3, 12)

⁹ Baabule la pɔsɛ tɔɣɛ Obadia b yele yeti: ‘Obadia dela se’em n zoti Yehowa.’ (Kaalɛ 1 Nadoma 18:3, 12.) Zoolum buna wa yuun soŋɛ Obadia la wani? La yuun basɛ ti a tara la yelemɛŋɛrɛ a sɛla woo poan. Bala n yuun basɛ ti naba la bo en yɔ’ɔ ti a bisa a yire lɔɣɔrɔ za’a. (Dekɛ makɛ Nehemia 7:2.) Obadia n yuun tari zoolum bɔ’ɔra Naayinɛ la zuo, a yuun tari la sukpe’ene. Halɛ dena me yuun soŋɛ en mɛ. A yuun boi la Naba Ahab n yuun de putɔya la na’am bisega saŋa. Ahab wa yuun ‘tum be’em Naayinɛ nɛŋa gana nadoma sɛba woo n deŋɛ a nɛŋa la.’ (1 Na. 16:30) Leyɛ’ɛsa, Ahab pɔɣa Yezebel me yuun kaaberi la baɣa. Yezebel n yuun yaɛ Yehowa la zuo, a yuun ka boti yelemɛŋɛrɛ pu’usegɔ puta ba tiŋa la poan. A yuun ku Naayinɛ nɔdɛ’ɛseba zo’e zo’e mɛ. (1 Na. 18:4) Nɔkpe’ene kai ti, Obadia yuun pu’useri Yehowa la biɣi biɣi saŋa poan.

10. Obadia yuun eŋɛ la bem pa’alɛ ti a tari la sukpe’ene?

¹⁰ Obadia yuun eŋɛ la bem pa’alɛ ti a tari la sukpe’ene. Yezebel n yuun eeri Naayinɛ nɔdɛ’ɛseba ti a ku ba la, Obadia yuun loe la ba poan kɔbega ‘pu ba pinuu pinuu suɣɛ ba tãsi yogoro poan ge bɔ’ɔra ba dia la ko’om.’ (1 Na. 18:13, 14) Ba yuun san baŋɛ ni yele wa, ba wan ku ni Obadian n tari sukpe’ene la mɛ. Yelemɛŋɛrɛ, Obadia yuun dela asaala ge ka bɔta ti a ki ge a yuun nɔŋɛ la Yehowa la sɛba n pu’useri en la gana amea vom.

11. Zina beere wa, Yehowa yamesi iti la bem pa’ala ti ba ani wuu Obadia? (Bisɛ foote la.)

¹¹ Zina beere wa, Yehowa yamesi zo’e zo’e boi la tinse’esi ti ba gu to tuuma la poan. Ba nani tiŋa la kpɛ’ɛndoma mɛ ge me bɔ’ɔra ba gilema. Ge wuu Obadia la, mabiisi wa kelum pu’usa Yehowa mɛ hali  la ban ka bo ba yɔ’ɔ ti ba ita bala la. (Mt. 22:21) Ba iti pa’ala ti ba wan nana Naayinɛ gana asaala. (Tm. 5:29) Ba kɔ’ɔn mɔɔla na’am yelesoma la mɛ ge me suɣera laɣesa taaba ita zamesegɔ. (Mt. 10:16, 28) Ba puti’irɛ dela ba bisɛ ban wan eŋɛ se’em ti ba mabiisi la kelum nyɛta vo’osum poan dia. Geele mabia Henri makesonɛ la yele bisɛ. A yuun boi la Africa tiŋa kayima ti ba yuun gu to tuuma la. Ban yuun gu to tuuma la, Henri yuun kɔ’ɔn yese la a suuren ti a wan tara vo’osum poan dia bɔ’ɔra a mabiisi la. A yuun yeti: “Mam yuun zoti la valum ge mam sakɛ ti mam yuun tari gilema bɔ’ɔra Yehowa la n soŋɛ mam ti mam ta’an tara sukpe’ene.” Ho wan ta’an tara sukpe’ene wuu Henri? Ho wan ta’an tara, ho san tara zoolum bɔ’ɔra Naayinɛ.

12. Malema Nɛŋadaana Yehoiada la a pɔɣa yuun eŋɛ la bem pa’alɛ ti ba tari la yelemɛŋɛrɛ bɔ’ɔra Yehowa?

¹² Malema Nɛŋadaana Yehoiada n yuun tari zoolum bɔ’ɔra Yehowa la zuo, a yuun tari la yelemɛŋɛrɛ bɔ’ɔra en ge me soŋɛ yelemɛŋɛrɛ pu’usegɔ. Yele wa yuun niɛ peelumi mɛ se’em ma’a ti Yezebel poyɔa Ataliah yuun soe Yuda na’am kuka la. Yɛm yuun boi bim ti nɛreba la zɔta Ataliah. A puurɛ yuun nyɔ̃ mɛ ge ti a me dɛna punya’andaana. A yuun tiregɛ mɛ ti a ku naditiba la za’a n yuun de amea yaasi la! (2 Yel. 22:10, 11) Yehoas n yuun de a yaasi wa ayima la yuun piɛ mɛ se’ere n sɔi la, Yehoiada pɔɣa Yehoseba n yuun faaɛ en basɛ. Eŋa la a sira yuun dekɛ bia wa suɣɛ mɛ ge bisa en. Yehoiada la Yehoseba n yuun eŋɛ wana wa la zuo, nadoma yuun kelum bɔna David dɔɣɛ tuusum la poan mɛ bisa. Yehoiada yuun kelum tara la yelemɛŋɛrɛ bɔ’ɔra Yehowa ge ka zɔta Ataliah.​—Mag. 29:25.

13. Yehoas n yuun de yuuma ayopɔi la, Yehoiada yuun eŋɛ la bem pa’alɛ ti a tari la yelemɛŋɛrɛ?

¹³ Yehoas n yuun ta dɛna yuuma ayopɔi la, Yehoiada yuun eŋɛ pa’alɛ ti a tari la yelemɛŋɛrɛ bɔ’ɔra Yehowa. A yuun maasum ti a eŋɛ la sɛla. Bala san tum, Yehoas wan dɛna naba David yizuo la poan. Ge la san ka tum, Yehoiada wan koŋe a vom. Yehowa yuun soŋɛ mɛ ti la yuun tum. Yizuto keendoma la malemadoma la yuun soŋɛ Yehoiada mɛ ti a bobe Yehoas na’am ge me ku Ataliah. (2 Yel. 23:1-5, 11, 12, 15; 24:1) Yehoiada yuun nyaa ‘biŋe nɔɔrɛ la Naayinɛ la naba la nɛreba la yeti ba dɛna Naayinɛ denɛ.’ (2 Na. 11:17) Yehoiada me yuun ‘basɛ ti sɛba n guri Naayinɛ yire yaŋa la gura de soŋa ti dɛɣerɔdaana da kɛ̃ bim.’​—2 Yel. 23:19.

14. Yehowa yuun na’asɛ Yehoiada la wani?

¹⁴ Yehowa yuun yeti: ‘Sɛba n na’aseri mam la ti n wan na’asɛ ba.’ Yelemɛŋɛrɛ, Yehowa yuun kã bo Yehoiada mɛ. (1 Sam. 2:30) Makerɛ, a yuun basɛ ti ba gulesɛ malema nɛŋadaana wa makesonɛ la eŋɛ Baabule la poan mɛ. (Arom. 15:4) Yehoiada n yuun ta ki la, ba yuun ‘laɛ en la naba David tiŋa la poan nadoma yɔɔrɔ poan la eŋa n tum soŋa bo Israel Naayinɛ, la A yire la’ ti la dɛna na’asegɔ bɔ’ɔra en.​—2 Yel. 24:15, 16.

15. To wan ta’an zamesɛ la bem Yehoiada yele la poan? (Bisɛ foote la.)

¹⁵ Yehoiada yele wa wan soŋɛ tɔ ti to tara zoolum bɔ’ɔra Naayinɛ. Keendoma wan ta’an tɔɣesa Yehoiada ge bisɛ ba wan eŋɛ se’em ta’an tɛ’ɛla Naayinɛ piisi  la. (Tm. 20:28) Bunkureba san tɔɣesa Yehoiada, zɔta Yehowa ge tara yelemɛŋɛrɛ bɔ’ɔra en, Yehowa wan ta’an dekɛ ba tum a puti’irɛ n boti sɛla. A kan malum zaɣesɛ ba. Bunbilipaalesi wan ta’an tɛ̃ra Yehowa n yuun na’asɛ Yehoiada se’em la ta’an tɔɣesa en bɔ’ɔra bunkureba gilema yele yele wuu sɛba n pu’usɛ Yehowa ti la yue la. (Mag. 16:31) To za’a waabi me wan ta’an tɔɣesa yizuto keendoma la malemadoma la n yuun soŋɛ Yehoiada la. Basɛ ya ti to tara yelemɛŋɛrɛ nana ‘sɛba n boi to nɛŋa la.’​—Heb. 13:17.

16. Bem n yuun pa’alɛ ti Naba Yehoas yuun ma’ɛ mɛ?

¹⁶ Yehoiada yuun soŋɛ Naba Yehoas mɛ ti a dɛna nɛresonkɔ. (2 Na. 12:2) Bala zuo la, naba wa n yuun de bia la, a yuun boti la a tum pee Yehowa puurɛ. Yehoiada n yuun ki la, Yehoas yuun kelese la Yuda kpɛ’ɛndoma la n zaɣesɛ Naayinɛ la. Bem n yuun nyaa paɛ en? Eŋa la a nɛreba la yuun ‘nyaa kaaberi la baɣa la tingama.’ (2 Yel. 24:4, 17, 18) La yuun daam Yehowa mɛ ti ‘A tum nɔdɛ’ɛseba a zɛ’an, ti ba tari a nɛreba wa lebe Naayinɛ zɛ’an na ge . . .  ba puɣum ka kelese en.’ Hali ba yuun ka kelese Yehoiada dayɔa Zekaria n yuun de Yehowa nɔdɛ’ɛsa, dɛna malemadaana ge me dɛna Yehoas suɔ la. La boi bim ti Zekaria deodoma n yuun faaɛ Naba Yehoas basɛ ge a yuun kelum ku Zekaria mɛ.​—2 Yel. 22:11; 24:19-22.

17. Bem n yuun paɛ Yehoas?

¹⁷ Yehoas yuun ka tari zoolum bɔ’ɔra Yehowa. Bala me yuun basɛ ti yɛla ka keŋɛ soŋa bo en. Yehowa yuun yeti: ‘Sɛba n zaɣesɛ mam, n wan basɛ ti la wuŋɛ ba.’ (1 Sam. 2:30) Siria soogɛpa fii n yuun nyaŋɛ Yehoas ‘soogɛpa zo’e zo’e’ ge ‘me pɔɣelɛ en paa.’ Siriadoma la n yuun keŋɛ ba’asɛ la, Yehoas mea yamesi n yuun ku en la eŋa n yuun ku Zekaria la zuo. Ba me yuun bisɛ ti naba wa n yuun tari putoo wa puɣum ka nara ti ba ‘laɛ en nadoma yɔɔ la poan.’​—2 Yel. 24:23-25; bisɛ Matu 23:35 “son of Barachiah” zaseŋɔ yele la.

18. Wuu Yeremia 17:7, 8 n pa’alɛ se’em la, to wan eŋɛ la wani kan tɔɣesa Yehoas?

¹⁸ To wan ta’an zamesɛ la bem Yehoas yele la poan? A yuun ani wuu tia n ka nyɛ̃ yɛɣerɛ soŋa ti ba dekɛ dɔɔ te’ele ku. Dɔɔ la dela Yehoiada. Yehoiada n yuun ta ki la, Yehoas yuun nyaa kelese la sɛba n zaɣesɛ Naayinɛ nɔɔrɛ ta zaɣesɛ Yehowa. Yele wa pa’alɛ ti, to ka nari ti to tara zoolum bɔ’ɔra Yehowa doose la to yire nɛreba bii tansugere la poan nɛreba n eŋɛ makesonɛ bo to la zuo. To san kɔ’ɔn zamesa, ti’isa taɣesa ge me zusera, to wan ana tapilapi la Yehowa ge me tara gilema la zoolum bɔ’ɔra en.​—Kaalɛ Yeremia 17:7, 8; Kol. 2:6, 7.

19. Yehowa boti to ita la bem?

¹⁹ Yehowa ka boti to eŋɛ sɛla n wan zɔɛ to paŋa. Eŋa n boti to eŋɛ sɛla la boi la Pa’ala 12:13 n yeti: ‘Zɔ ya yelemɛŋɛrɛ Naayinɛ la ge dɔla a nɔya la, asaala zugbere tuunɛ n wana.’ To san tara zoolum bɔ’ɔra Naayinɛ to wan ta’an ŋmibe. Wuu Obadia la Yehoiada la, to me wan tara yelemɛŋɛrɛ hali yeledaaŋɔ san paɛ tɔ beere sa’am. Sɛsɛla kan ta’an sa’am tomam la Yehowa zɔtɔ nyɔka la.