1-2. Wuu Lot la, bem yeledaaŋɔ n paari Kristakɔma zina beere wa?

 TO SAN ni nyɛ halebe’ero se’a ti nɛreba tara zina la, la ni ana to wuu lan yuun ani Lot se’em la. ‘Ba yalumtuuma la yuun daam en mɛ’ se’ere n sɔi la, a yuun mi ti to saazuo Sɔ la yaɛ halebe’ero mɛ. (2 Pe. 2:7, 8) Lot n yuun nɔŋɛ Naayinɛ ge nana en la zuo, a yuun yaɛ halebe’ero se’a ti nɛreba la yuun tara la mɛ. Nɛresɛba n ka nani Yehowa sareŋɔ pa’alegɔ kɔ’ɔn kaɛ to mum mɛ. Ge to san kɔ’ɔn nɔŋɛ Naayinɛ ge nana en to wan ta’an tara halesoma.​—Mag. 14:2.

² Yehowa doli la Magaha gɔŋɔ la poan kpɛmesa to giila. Kristakɔma za’a n de buraasi la pɔɣesi, bunbilipaalesi la bunkureba wan ta’an nyɛ nyuurɔ ba san gɛɛla ka’aŋɔ la n boi Magaha gɔŋɔ la poan la.

3. Wuu Magaha 17:3 n pa’alɛ se’em la, beni n sɔi ti la nara ti gu to suure? (Bisɛ foote la.)

³ Sɛla n sɔi ti la nara ti to gu to suure dela Yehowa mi sɛla n boi to suuren mɛ. Wana pa’alɛ ti a biseri nyɛta gana nɛreba n ni nyɛta se’em la mɛ ge me mina sɛla n sirum boi to suuren. (Kaalɛ Magaha 17:3.) To san ti’isa a kã’aŋɔ la n wan basɛ ti to ta vɔna daarewoo la yele, a wan nɔŋɛ tɔ. (Yon 4:14) Bala la, to kan malum basɛ ti Sitaana la nɛrebɛ’ɛsi la n boi tingɔŋɔ wa zuo la dekɛ ba sarenbe’ero la pã’asɛ tɔ. (1 Yon 5:18, 19) To san ana du’a  du’a la Yehowa ge nana en, la wan basɛ ti nɔŋerɛ se’ere ti to tara bɔ’ɔra en la zo’e. Ton ka boti to Sɔ la suure sa’am la zuo, to ka ti’iseri yelese’a n wan basɛ ti to tum be’em. La san ana to wuu to tum sɛla n ka nari, to ta’an soke tomea yeti, ‘Beni n sɔi ti la ka nara ti n sa’am Se’em n naam mam wa suure?’​—1 Yon 4:9, 10.

4. Yehowa zoolum yuun te’ele mabipɔka ayima la wani ti a ka tum be’em?

⁴ Mabipɔka Martha n boi Croatia tiŋa ti la yuun gee fii ti a tum yalumtuuma yeti: “La yuun kpe’em bo mam mɛ ti n ti’isa soŋa soŋa ge zaɣesɛ ti n kan tum be’em. Ge Yehowa zoolum yuun te’ele mam mɛ.” b Naayinɛ zoolum te’ele en la wani? Martha yeti, a yuun ti’isɛ taɣesɛ la yeledaaŋɔ seto n wan paɛ en a san tum be’em la. Tomam me ta’an eŋɛ bala. Sɛla n gani bala dela, to wan sa’am Yehowa suure ge kan ta’an le pu’usa en daarewoo.​—Pin. 6:5, 6.

5. Ho wan ta’an zamesɛ la bem Leo zi’irego poan yele la poan?

⁵ To san zɔta Yehowa to kan nyɔɣɛ sɛba n tari halebe’ero zɔtɔ. Leo n ze’ele Congo tiŋa yuun zamesɛ yɛm yele wa poan mɛ. Eŋa n yuun muse ko’om yuuma anaasi pooren, a yuun nyɔɣɛ la nɛresɛba halɛ n ka ani soŋa zɔtɔ. A yuun bisɛ ti eŋa n ka tuni tuunbe’ero wuu a zɔdoma la, bala pa’alɛ ti la daɣɛ be’em n giiseri Yehowa. La ka yue ti a zɔdoma la n tari halebe’ero wa pã’asɛ en ti a nyu daam buge ta tum yalumtuuma. A yuun nyaa pɔsɛ ti’isa la a dɔɣereba n de Kristakɔma la n yuun pa’alɛ en sɛla, la pupeelum sebo ti a yuun tara eŋa n yuun pu’useri  Yehowa la. Bem n yuun nyaa eŋɛ? A yuun nyɔɣɛ yɛm mɛ. Keendoma la yuun soŋɛ en ti a lebe Yehowa zɛ’an na. Zina, a dela tansugere keema ge tuna tɛm woo na’am tuuma n boi de to’ore ge me tara pupeelum.

6. Pɔɣesi siyi bani makerɛ ti to wan sɔsɛ de yele nananawa?

⁶ Basɛ ya ti to geele ya Magaha a zuo 9 n tɔɣɛ pɔɣesi siyi yele. Ayima tari la yɛm ge ti ayima tuna gberum tuuma. (Dekɛ makɛ Arom 5:14; Galatia 4:24.) To san gɛɛla pɔɣesi wa yele, kɔ’ɔn tɛ̃ra ti Sitaana tingɔŋɔ wa kɔ’ɔn nɔŋɛ la yalumtuuma la yalumfɔɔra bisega. (Ep. 4:19) Bala, la dela ninmɔ’ɔrɛ ti to kelum tara zoolum bɔ’ɔra Naayinɛ ge yese tomea be’em poan. (Mag. 16:6) To za’a waabi wan ta’an nyɛ nyuurɔ la yelese’a n boi zuo wa poan la. Ba pa’alɛ pɔɣesi siyi wa yele ti ba beem la sɛba n de yɛmpɔ’ɔrɛdoma​—sɛba ‘n ka tari yɛm.’ La ani wuu ba za’a yeti, ‘Wa’an n yire na di.’ (Mag. 9:1, 5, 6, 13, 16, 17) Ge sɛla n wan paɛ sɛba n sakɛ to’e ba beeŋo la boi la to’ore to’ore.

7. Wuu Magaha 9:13-18 n pa’alɛ se’em la, bem n wan paɛ sɛba n sakɛ pɔɣesɛka n de gerego la beeŋo la? (Bisɛ foote la.)

⁷ Geele ‘pɔɣesɛka n de gberego la’ beeŋo la bisɛ. (Kaalɛ Magaha 9:13-18.) A kɔ’ɔn yi la sɛba n ka tari yɛm la ti, ‘Wa’an ya kalam na’ di ya. Bem n wan paɛ ba? ‘Sɛba n ye kɛ̃’ɛra a zɛ’an la wan ki.’ Ho ta’an ti’isɛ makerɛ ayima ti to puɣum nyɛ Magaha gɔŋɔ la a pɔsega bɔba. Ba kaɣɛ tɔ ‘pɔɣeyaleŋa wa’ yele. Bilam yeti: ‘Ho san dɔla ka yire sarɔɔ ho ye la kum poan.’ (Mag. 2:11-19) Magaha 5:3-10 ka’am tɔ la pɔɣeyaleŋa ayima me ‘nama n ye kum poan’ yele.

8. La nari ti to loe la bem loore?

⁸ Sɛba n kelese ‘pɔɣesɛka n de gerego la’ tari la loore ti ba loe: Ba sakɛ a beeŋo la bii ba zaɣesɛ? To me ta’an nara ti to loe loore kaŋa taaba. To san nyɛ yalumtuuma bii yalumfɔɔra TV bii intanɛt poan, to wan eŋɛ la bem?

9-10. Bem ninmɔ’ɔrɛ yɛla zuo ti la nara ti to zaɣesɛ yalesi yɛla?

⁹ Ninmɔ’ɔrɛ yɛla zuo ti la nara ti to zaɣesɛ yalesi yɛla. Ba pa’alɛ pɔɣesɛka n de gerego la yele ti a yeti: ‘Kozuurumo za’asum mɛ.’ Bem n de ‘kozuurumo’? Baabule la dekɛ nɛra la a pɔɣa gã’aregɔ makɛ  la ko’om n ani soŋa. (Mag. 5:15-18) Buraa la a pɔɣa tari yɔ’ɔ mɛ ti ba gã’arɛ la taaba. Wana wa boi de to’ore mɛ la ‘kozuurumo.’ Bala dela yalumtuuma. Saŋa zo’e zo’e ba ni ita de suɣera mɛ wuu nayiga n ni zu ge ti’isa ti nɛnɛra kan nyɛ en la. ‘Kozuurumo’ la ni za’asum mɛ ba san ti’isa ti nɛnɛra kan nyɛ ban eŋɛ sɛla la. Ba pã’aseri la bamesi se’ere n sɔi la Yehowa nyɛti sɛla woo mɛ. Yehowa san zaɣesɛ tɔ la dela sɛla n tɔi la nyanɛ bɔ’ɔra tɔ. Bala la kan ta’an dɛna sɛla n ‘za’asum.’ (1 Ko. 6:9, 10) Ge daɣɛ bala ma’a.

¹⁰ Yalumtuuma ta’an basɛ ti vi kɛ̃ hɔ ti ho ka tara vuurɛ. Ho ta’an nyɔkɛ puurɛ ti ho ka bɔta bii la tari yelesego wa’an ho deodoma poan. La niɛ peelumi ti yɛm boi bim mɛ ti to zaɣesɛ pɔɣesɛka n de gerego la beeŋo. To ta’an nyɛ bã’a mɛ n wan ta’an basɛ ti to ki kalam. Sɛla n gani bala dela tomam la Yehowa bɔŋa la wan sa’am. (Mag. 7:23, 26) Magaha a zuo 9 kaalegɔ zɛ’an 18 ba’asɛ yeti: ‘Sɛba yire puɣum bɔna la Yɔɔn.’ Beni n yi sɔi ti nɛreba zo’e zo’e sakɛ a beeŋo la n de sa’aŋɔ la?​— Mag. 9:13-18.

11. Beni n sɔi ti yalumfɔɔra bisega dɛna daaŋɔ paa?

¹¹ Nananawa bɛ̃regɔ ayima n boi dela yalumfɔɔra bisega. Nɛreba basɛba ti’isi ti yalumfɔɔra bisega daɣɛ be’em. Yalumfɔɔra bisega daani nɛreba mɛ. La dela zufaɣasum ge ti la kpe’em ti ho basɛ de bisega. Yalumfɔɔra yuuri ho puti’irɛ poan mɛ. La ni kpe’em mɛ ti ho ta’an tam de yele. Yalumfɔɔra bisega ka kuuri kunkoma’asum ge la tuɣum basɛ ti kunkoma’asum la tara la paŋa. (Kol. 3:5; Yam. 1:14, 15) Nɛreba zo’e zo’e n biseri yalumfɔɔra tuni la yalumtuuma.

12. To wan eŋɛ la wani pa’alɛ ti to gu’uri la tomea fɔɔra ase’a n wan ta’an basɛ ti to tara yalumtuuma konkoma’asum poan?

¹² Tomam Kristakɔma nari ti to eŋɛ la bem to san nyɛ yalumfɔɔra to elektronik lɔkɔ poan? La nari ti to yese to nɛŋa de poan kalam. La kan kpe’em bo to ti to eŋɛ bala to san tɛ̃ra ti tomam la Yehowa bɔŋa la dela tuulum paa bɔ’ɔra tɔ gana sɛla woo. Fɔɔra ase’a daɣɛ yalumfɔɔra ge la ta’an kelum basɛ ti to tara yalumtuuma konkoma’asum. Bem zuo ti la nara ti to zaɣesɛ dɛ? Se’ere n sɔi la to puɣum ka bɔta ti to ti’isa yalumtuuma yele to suuren. (Mt. 5:28, 29) David dela keema n boi Thailand tiŋa. A yeti: “Mam ni soke n mea yeti: ‘La boi bim ti fɔɔra wa daɣɛ yalumfɔɔra ge n san bisɛ ba, la wan basɛ ti Yehowa puure pee?’ Soke aŋa wa ni soŋera mam mɛ ti n ta’an loe loosonɛ.”

13. Bem n soŋeri tɔ ti to ita sɛla ti yɛm bɔna bim?

¹³ Ton ka boti to eŋɛ sɛla sa’am Yehowa suure la soŋeri to mɛ ti to ita sɛla ti yɛm bɔna bim. Naayinɛ zoolum n de yɛm ‘pɔsega.’ (Mag. 9:10) Magaha a zuo 9 pɔsega la tɔɣɛ pɔka ayima yele yeti a tari la ‘yɛm.’

14. Beeŋo la n boi Magaha 9:1-6 la boi de toore la wani?

¹⁴ Kaalɛ Magaha 9:1-6. Kalam wa to kaalɛ la beeŋo n ze’ele Yɛm Za’adaana Yehowa zɛ’an na yele. (Mag. 2:6; Arom 16:27) To kaali la yikãtɛ n tari deto toyopɔi yele. Wana pa’alɛ ti Yehowa pikɛ la a nu’o bɔ’ɔra se’em woo n boti a tara a yɛm tuna tuuma a vom poan.

15. Naayinɛ beem to ti to eŋɛ la bem?

¹⁵ Yehowa dela mina n bo’ori yɛri yɛri.  Pɔɣesɛka n tari ‘yɛm’ ti Magaha a zuo 9 tɔɣɛ a yele la makerɛ la soŋɛ to mɛ ti to baŋɛ ti Yehowa bo’ori la yɛri ge ita som zo’e zo’e bɔ’ɔra tɔ. Kaalegɔ zɛ’an wa pa’alɛ ti pɔka wa beem la nɛreba a yire na ti ba di ge obe nɛnɔ ge nyu daam sebo ti a maalɛ la. (Mag. 9:2) Leyɛ’ɛsa, kaalegɔ zɛ’an 4 la 5 yeti: ‘A [ti la ze’ele bo yɛm] yele sɛba n ka tari yɛm la yeti: Ŋmɛregɛ ya kalam na di ya.’ Beni n sɔi ti la nara ti to sakɛ pɔka wa beeŋo la? Yehowa boti la a kɔma tara yɛm ge bɔna fai. A ka boti la wuŋɛ tɔ ge ti to nyaa zamesɛ yɛm. A ka boti to eŋɛ sɛla n wan daam tɔ. Bala n sɔi ti ‘a dekɛ yɛm biŋe sɛba n de tontɔɔdoma la.’ (Mag. 2:7) To san tara zoolum bɔ’ɔra Yehowa to wan bɔta ti to eŋɛ sɛla n wan pee a puurɛ. To ni kɛlesa a ka’aŋɔ la mɛ ge tara de tuna tuuma.​—Yam. 1:25.

16. Naayinɛ zoolum yuun soŋɛ Alain la wani ti a ta’an loe loosonɛ ge a nyɛ nyuurɔ la wani?

¹⁶ Bisɛ Alain n tari zoolum bɔ’ɔra Naayinɛ n soŋɛ en ti a ta’an kɔ’ɛ a puti’irɛ yɛm sore poan se’em. Alain dela tansugere keema la tikiya. A yeti: “Mam tikiya tadaandoma ti’isɛ ti yalumfɔɔra basɛ ti ho mina la buraa la pɔka n nari ti ba gã taaba se’em.” Ge Alain yuun mi ti bala daɣɛ yelemɛŋɛrɛ. A yeti: “Mam n nɔŋɛ Yehowa ge nana en la zuo, mam ni kɔ’ɔn zaɣesɛ fɔɔra n ani bala bisega mɛ. Mam yuun le pa’alɛ ba sɛla n sɔi ti mam kan bisa ba.” A yuun tari la ‘yɛm’ ka’aŋɔ la n de ‘to kena la bɔkerɛ la’ tuna tuuma. (Mag. 9:6) Alain n yuun eŋɛ sɛla wa soŋɛ a tikiya tadaandoma basɛba mɛ ti ba pɔsɛ zamesa Baabule la ge kena tansugere zamesegɔ.

17-18. Nɛresɛba n sakɛ ‘yɛm’ beeŋo la nyɛti la bem kã’a ge bem ti ba wan ta’an le nyɛ? (Bisɛ foote la.)

¹⁷ Yehowa dekɛ la pɔɣesi bayi makerɛ pa’alɛ tɔ ton wan eŋɛ se’em ta’an tara pupeelum. Sɛba n sakɛ ‘pɔɣesɛka n de gberego’ la beeŋo la boti la ba tara ‘pupeelum’ yalumtuuma poan ge ba ka mi ti ban iti sɛla la ta’an sa’am ba beere sa’am vom. Yelemɛŋɛrɛ, ban iti sɛla la tari ba ye’a la ‘Yɔɔ poan.’​—Mag. 9:13, 17, 18.

¹⁸ Bisɛ sɛba n sakɛ pɔɣesɛka n tari ‘yɛm ka’aŋɔ’ la n wan nyɛ sɛla n boi de to’ore se’em! Ba tari pupeelum mɛ sɛla n sɔi la, ba tari sɛla woo n wan soŋɛ ba ti ba ana du’a du’a la Yehowa mɛ. (Isa. 65:13) Yehowa yuun doose nɔdɛ’ɛsa Isaiah poan yeti: ‘Kelese ya mam soŋa soŋa ge  bala ti ya wan di disɛka n ani soŋa la tiɣɛ la pupeelum.’ (Isa. 55:1, 2) To tiregeri mɛ ti to nɔŋɛ sɛla ti Yehowa nɔŋɛ ge yaɛ sɛla ti a yaɛ. (Ym. 97:10) La basɛ ti to tara la pupeelum ti to beem nɛreba ti ba wa’ana nyɛ ‘yɛm.’ To ani wuu pɔsɔɔrɔ la n ‘zom tiŋa la kunkune zuo yi’ira yeti: ‘Yamam sɛba n de gbeto wa, ŋmɛregɛ ya kalam na.’ Nyuurɔ sɛka ti tomam la sɛba n sakɛ yi’a la wan nyɛ la daɣɛ zina wa ma’a. La kɔ’ɔn bɔna la wuusa ge wan basɛ ti to ta vɔna daarewoo to san ‘kena la bɔkerɛ.’​— Mag. 9:3, 4, 6.

19. Wuu Pa’ala 12:13, 14 n pa’alɛ se’em la, la nari ti to lu to suure ti to eŋɛ la bem? (Bisɛ daka la zuo n de “ Naayinɛ Zoolum Soŋeri To Mɛ.”)

¹⁹ Kaalɛ Pa’ala 12:13, 14. Ton tari zoolum bɔ’ɔra Naayinɛ wan gu to ge soŋɛ tɔ ti to tara sarum soŋɔ ge ana du’a du’a la Yehowa ba’asegɔ dabesa wa poan. Zoolum wa wan kpemese to giila ti to beem nɛreba ti ba nyɛ ‘yɛm’ ge nyɛ nyuurɔ de poan soŋa.