1. Bem n nari ti to eŋɛ ta’an nyɛ faarɛ Yehowa dabeserɛ la poan?

 BAABULE la san yeti ‘Yehowa dabeserɛ,’ la pa’alɛ la dabese’ere daarɛ ti Yehowa wan sa’am a dindoma ge faaɛ a nɛreba basɛ. Diimi sa la, Yehowa yuun sa’am tisi basɛba mɛ. (Isa. 13:1, 6; Eze. 13:5; Zep. 1:8) Tomam dabesa wa poan me, ‘Yehowa dabeserɛ’ la wan pɔsɛ la sansɛka ti nalɛɣerɛ nɛŋadoma wan sa’am Babilon Kãtɛ La ti la ta ba’asɛ Armagedon zaberɛ la poan. To san bɔta ti to nyɛ faarɛ, la nari ti to maasum nananawa. Yezu yuun pa’alɛ ti la ka nari ti to yeen gura ‘mɛlesekãtɛ’ la ge la nari ti to ‘kɔ’ɔn maasum gura.’​—Mt. 24:21; Lu. 12:40.

2. Yia Tesalonika gɔŋɔ la wan ta’an soŋɛ to la wani?

² Tuuntuna Paul n yuun gulesɛ gɔnseko n deŋɛ nɛŋa bo Tesalonika mabiisi la, a yuun bo ba la maɣesa n wan soŋɛ Kristakɔma la ti ba kɔ’ɔn maasum gura Yehowa gãkerɛ daarɛ la. Paul yuun mi ti Yehowa dabeserɛ la kan wa’an sankaŋa. (2 Tes. 2:1-3:1-3) Ge a yuun kpemese mabiisi la giila ti ba maasum gura de daarɛ ti la ana wuu la keni la beere na. Tomam me wan ta’an dekɛ a ka’aŋɔ la tum tuuma. Basɛ ya ti to bisɛ eŋa n pa’alɛ yɛla wa vuurɛ se’em: (1) Yehowa dabeserɛ la n wan wa’an se’em, (2) sɛba n kan nyɛ faarɛ de daarɛ, la (3) to wan eŋɛ se’em ta’an maasum nyɛ faarɛ.

3. Sodeni poan ti Yehowa dabeserɛ la wan wa’ana wuu nayiga n ni wa’an se’em yu’uŋɔ la? (Bisɛ foote la.)

³ ‘Wuu nayiga n ni wa’an se’em yu’uŋɔ la.’ (1 Tes. 5:2)  Makerɛ dena n deŋɛ nɛŋa maɣesa atã la poan n pa’alɛ Yehowa dabeserɛ la n wan wa’an se’em. Nayiga ni li’isɛ mɛ wa’an yu’uŋɔ na zu nɛra kalam ge ti a ka mina. Yehowa dabeserɛ la me yeti la di’e me na ti nɛreba zo’e zo’e puɣum kan mina. Hali la wan eŋɛ yelemɛŋɛrɛ Kristakɔma pakerɛ la yɛla n yeti la eŋɛ kalam kalam se’em la. Ge sɛla n ani soŋa dela tomam kan nyɛ sa’aŋɔ wuu putɔpa la.

4. Sodeni poan ti Yehowa dabeserɛ la ana wuu pɔɣepuadaana n ni yeti a dɔɣɛ ti la wuna en se’em la?

⁴ ‘Wuu pɔɣepuadaana n ni yeti a dɔɣɛ ti la wuna en se’em la.’ (1 Tes. 5:3) Pɔɣepuadaana kan ta’an pa’alɛ a viregeri daarɛ. Ge a ni kɔ’ɔn mina ti a wan ba’asum dɔɣɛ. La ni di’e en me na ti a dɔɣɛ ge ti la me ni wuna en ka gɔ’ɔra. Bala mea nɔɔ ti to ka mina dabese’ere la sansɛka ti Yehowa dabeserɛ la wan pɔsɛ ge to tari sakerɛ ti la wan ba’asum wa’ana. Yehowa gãkerɛ la me wan di’e putɔpa la ti ba kan ta’an piɛ.

5. Sodeni poan ti mɛlesekãtɛ la ana wuu beere n yilegeri?

⁵ La ani wuu beere n yilegeri. Paul makerɛ se’ere n pa’asɛ butã la pa’alɛ la nayiga n zuuri yu’uŋɔ se’em. Ge nananawa Paul dekɛ la Yehowa dabeserɛ la makɛ la beere n yilegeri. (1 Tes. 5:4) Nayigeba n zuuri yu’uŋɔ ta’an tamɛ mɛ ka bisɛ tɛm. Beere ta’an ni yilegɛ ba mɛ ti ba kan ta’an le suɣɛ. Bala mea nɔɔ ti mɛlesekãtɛ la wan di’e sɛba n ani wuu nayigeba la, kɔ’ɔn bɔna lika poan tuna sɛla ti Naayinɛ ka bɔta la. Tomam boi la to to’ore to san maasum kɔ’ɔn zaɣesɛ halese’a woo ti Yehowa ka bɔta ge tuna dɔla ‘yelese’ere woo n ani soŋa ge dɛna tontɔɔ’ la. (Ep. 5:8-12) Paul le dekɛ la maɣesa ayi pa’alɛ sɛba n kan nyɛ faarɛ la yele.

6. Sodeni poan ti la ana wuu nɛreba zo’e zo’e giseri mɛ? (1 Tesalonika 5:6, 7)

⁶ ‘Nɛresɛba n giseri.’ (Kaalɛ 1 Tesalonika 5:6, 7.) Paul yuun dekɛ sɛba n kan nyɛ faarɛ Yehowa dabeserɛ la poan makɛ me la sɛba n giseri. Ba puɣum ka mina sɛla n iti bii saŋa la n paɛ se’em. Bala zuo la, ba ka mi ninmɔ’ɔrɛ yelese’a n iti bii ba baŋɛ ban nari ti ba eŋɛ sɛla. Nɛreba zo’e zo’e zina beere wa me ani wuu sɛba n gã gisa. (Arom 11:8) Ba puɣum ka mina yelese’a n iti pa’ala ti to boi la ‘ba’asegɔ dabesa la’ poan ge ti la kan yue mɛlesekãtɛ la wan wa’ana. Tingɔŋɔ wa yɛla n teere se’em la zuo, la ta’an basɛ ti basɛba bɔta Naayinɛ Na’am yelesoma la. La bala za’a, lan tuɣum dɛna ti ba pigera la, ba zo’e zo’e kelum gã gisera mɛ. Hali sɛba n sakɛ ti gãkerɛ daarɛ boi me la ti’isɛ ti la wan yue mɛ ge wa’ana. (2 Pe. 3:3, 4) Ge tomam mi ti dabeserɛ woo poan la yele pakɛ mɛ ti to kɔ’ɔn pigera.

7. Sodeni poan ti nɛresɛba ti Naayinɛ wan sa’am ba la ana wuu dãbugereba?

⁷ ‘Dãbugereba.’ Tuuntuna Paul le dekɛ la sɛba ti Naayinɛ wan sa’am ba la makɛ la dãbugereba. Dãbugereba ka iti yɛla kalam kalam ge me ni ka kɔ’ɛ ba puti’irɛ soŋa yɛla poan. Bala mea nɔɔ ti nɛrebɛ’ɛsi la ka kɛlesa Naayinɛ kaka. Ba ni loe la sose’a n ye sa’aŋɔ poan. Ge ba kã’am Kristakɔma ti ba basɛ ti ba puti’irɛ la tuna soŋa. (1 Tes. 5:6) Baabule gɔnmi’ila ayima yeti “nɛra puti’irɛ n tuni soŋa dela se’em paleŋa n ka ɛ̃ɣeri ge ti a puti’irɛ bɔkera yɛla soŋa. A ta’an ti’isa soŋa soŋa mɛ ge me ta’an kɔ’ɛ a puti’irɛ soŋa yɛla poan.” Bem zuo ti la nara ti to basɛ ti to puti’irɛ tuna soŋa ge me mina sɛla n iti? La wan eŋɛ se’em ti to kan ta tue dekɛ tomea pa’asɛ nalɛɣɛrɛ yɛla poan. Ba ta’an ta pɛ̃regera to mɛ ti to dekɛ tomea pa’asɛ nalɛɣerɛ yɛla poan yele yele wuu Yehowa dabeserɛ la n kɔ’ɔn pɔ̃ra la. Ge la ka nari ti to basɛ ti to paleŋa ɛ̃ɣera la to wan eŋɛ se’em. Naayinɛ zilam vo’osum la wan soŋɛ tɔ ti to ta’an tara to puti’irɛ tuna soŋa ge baŋɛ ton wan dekɛ yɛm tum tuuma se’em.​—Lu. 12:11, 12.

8. Sɛla n boi 1 Tesalonika 5:8 la soŋɛ to la wani ti to baŋɛ halese’a n wan soŋɛ tɔ ti to pigera ge ta’an dekɛ to puti’irɛ tum soŋa? (Bisɛ foote la.)

⁸ ‘Dekɛ nyu’ɔ tɛ’ɛlega la yɛ . . . ge vuge zuwanɛ la.’ Paul dekɛ Kristakɔma makɛ me la soogɛpa n yɛ ba lɔɣɔrɔ se’em ye’a zaberɛ. (Kaalɛ 1 Tesalonika 5:8.) Soogɛa tuuma n ani se’em la zuo, la dela a maasum saŋa woo wuu a ye la zaberɛ. Tomam me n nari ti to ana se’em n bala. Tomam me kɔ’ɔn maasum mɛ yɛ nyu’ɔ tɛ’ɛlega n de to sakerɛ la to nɔŋerɛ ge me vuge zuwanɛ la n de to beere sa’am puti’irɛ la gura Yehowa dabeserɛ la. Hala ana taaba n wan ta’an soŋɛ tɔ.

9. To sakerɛ la soŋeri to la wani?

⁹ Nyu’ɔ tɛ’ɛlega la ni te’ele la soogɛa la suure. Sakerɛ la nɔŋerɛ me ni te’ele to vo’osum poan suure la mɛ. La wan soŋɛ tɔ ti to ta’an dɔla Yezu tuna bɔ’ɔra Naayinɛ. Sakerɛ wan soŋɛ tɔ ti to baŋɛ ti Yehowa wan kã bo to la ton doli en la to suure za’a la. (Heb. 11:6) La wan soŋɛ tɔ ti to dɔla to Nɛŋadaana Yezu, la san puɣum kpe’em bo to. To san bisɛ yɔɔma beere wa Kristakɔma n nyaŋɛ ŋmibe ge tara ba birikinte, mɛlesegɔ la bɔŋa n  kpe’em poan se’em la, la wan soŋɛ tɔ ti to sakerɛ kpe’em yeledaaŋɔ san paara tɔ. To san tɔɣesa sɛba n basɛ ti ba vom ana naana ge dekɛ Naayinɛ Na’am la deŋɛ nɛŋa, to wan ta’an gu tomea ligebɔrɛ poan. b

10. Ton nɔŋɛ Naayinɛ la to tadaandoma la soŋeri to la wani ti to ta’an ŋmibera?

¹⁰ Nɔŋerɛ dela halesɛka n wan soŋɛ tɔ ti to pigera ge ti to puti’irɛ la tuna soŋa. (Mt. 22:37-39) Ton nɔŋɛ Naayinɛ la dela sɛla n soŋeri tɔ ti to ŋmibera, ta’an mɔɔla yelesoma la, la ka pakɛ la yeledaaŋɔ se’a n paari tɔ. (2 Tim. 1:7, 8) Ton nɔŋɛ sɛba n ka pu’useri Yehowa la zuo, to kɔ’ɔn mɔɔla yelesoma la bɔ’ɔra ba mɛ to bɔŋa woo poan, hali dita sɛɛra bɔ’ɔra ba telefon poan ge me gulesa gɔnɔ bɔ’ɔra ba. To kɔ’ɔn tara sakerɛ mɛ ti sɛba ti to mɔɔla bɔ’ɔra ba la, dabeserɛ keni na ba wan tee ge tuna sɛla n ani soŋa.​—Eze. 18:27, 28.

11. To san nɔŋɛ to mabiisi la, la wan soŋɛ to la wani? (1 Tesalonika 5:11)

¹¹ To me nɔŋɛ to mabiisi mɛ. To tari nɔŋerɛ bɔ’ɔra to mabiisi mɛ doose la ton ‘kpemese taaba giila ge soŋera taaba la.’ (Kaalɛ 1 Tesalonika 5:11.) Ton naɛ taaba tuna wuu soogɛpa la, to kpemeseri la taaba giila. Yelemɛŋɛrɛ, soogɛa ayima ta’an pɔɣelum a tadaana zaberɛ poan. A ta’an kan mina ge eŋɛ bala. Bala mea nɔɔ ti to kan mina fii ge eŋɛ sɛla n wan daam to mabiisi suure bii lerege sanɛ ba san tue to. (1 Tes. 5:13, 15) To wan eŋɛ pa’alɛ ti to tari nɔŋerɛ to san tara gilema bɔ’ɔra to tansugere keendoma la. (1 Tes. 5:12) Tesalonika tansugere wa yuun nan ka paɛ yuunɛ se’em ma’a ti Paul yuun gulesɛ gɔŋɔ bo ba la. Keendoma wa ti ba yuun loe ba la yuun nan ka mi yɛla soŋa ge me ka di mi’a. Ge bala za’a, la yuun nari ti ba bɔ’ɔra keendoma la gilema. Wuu mɛlesekãtɛ la n pɔ̃ri la, la yele wan ta pakɛ ti tansugere keendoma bo to pa’alegɔ zo’e zo’e gaŋɛ ban iti  se’em zina wa la. La ta’an ta kpe’em mɛ ti to nyɛ ka’aŋɔ tigere zuo la tigere yile bisegadoma la zɛ’an; bala la, la dela ninmɔ’ɔrɛ ti to kɔ’ɔn tiregɛ nana keendoma la nananawa. Lan yeen dɛna se’em, basɛ ya ti to tara putɛsonɛ, kan bisera ban ka di mi’a la ge tuɣum bisera Yehowa n doli Yezu poan tara ba tuna tuuma se’em.

12. Sodeni poan ti to beere sa’am puti’irɛ la gu’ura ton ti’iseri se’em?

¹² Wuu zuwanɛ n ni gu soogɛa zuo se’em la, bala mea nɔɔ ti ton tari beere sa’am puti’irɛ ti to wan nyɛ faarɛ la me gu’ura ton ti’iseri se’em. To beere sa’am puti’irɛ la san kpe’em, to ni baŋɛ ti yelese’a n boi tingɔŋɔ wa zuo la dela yoo. (Flp. 3:8) To beere sa’am puti’irɛ la soŋeri to mɛ ti to nyɔkera tomea yɛla poan. La yuun ani Wallace la Laurinda n ze’ele Africa tiŋa la bala. Bakwai atã poan ti ba dɔɣereba ki. COVID-19 bã’a la n yuun wi’iri la zuo, ba yuun ka ta’an lebe ba yidoma zɛ’an. Wallace yeti: “Nɛreba n wan ta isige beere sa’am la basɛ ti n ti’isera la ba bɔŋa n wa ta ana se’em tinpaalega la poan ge daɣɛ ban yuun ani se’em ge nyaa ki la. Wana soŋeri mam mɛ ti n ta’an ŋmibera, mam suure san sa’am bii nɛra san ki.”

13. To wan eŋɛ la wani ta’an nyɛ zilam vo’osum la?

¹³ ‘Da basɛ ti vo’osum la bugum n diti se’em la kiŋe.’ (1 Tes. 5:19) Paul yuun dekɛ la zilam vo’osum la makɛ wuu bugum n diti to poan. To san tara Naayinɛ vo’osum, to ni kɔ’ɔn tuulegera mɛ ge tuna sɛla n de tontɔɔ ge me ni pee puurɛ tuna bɔ’ɔra Yehowa. (Arom 12:11) To wan eŋɛ la wani ta’an nyɛ zilam vo’osum la? To wan nyɛ dɛ; to san zusɛ, zamesa Baabule la ge me naɛ la a tigere la bɔna. Bala wan soŋɛ tɔ ti to tara ‘vo’osum la wɔla la.’​—Ga. 5:22, 23.

14. La nari ti to zaɣesɛ la bem to san bɔta ti to nyɛta Naayinɛ vo’osum la? (Bisɛ foote la.)

¹⁴ Naayinɛ san bo to a zilam vo’osum la ba’asɛ, la nari ti to bisɛ soŋa ti to ‘da basɛ  ti vo’osum la bugum n diti se’em la kiŋe.’ Naayinɛ tari a zilam vo’osum la bɔ’ɔra la sɛba ma’a n tari putɛsonɛ la halesoma. A kan kelum bɔ’ɔra tɔ a vo’osum la to san tara putɛbe’o ge tuna sɛla n ka ani soŋa. (1 Tes. 4:7, 8) To san wan kelum nyɛta zilam vo’osum la, la ka nari ti to ‘zaɣesɛ yetɔɣebiŋ’a la’. (1 Tes. 5:20) ‘Yetɔɣebiŋ’a la pa’alɛ la Naayinɛ vo’osum la n bo’ori to yelese’a, maɣesɛ wuu Yehowa dabeserɛ la yɛla la lan de atɔtɔ yele se’em. To kan tamɛ de daarɛ la ge ti’isa ti Armagedon kan wa’an tomam saŋa wa poan. Ge to kɔ’ɔn basɛ ti la bɔna to suuren doose ton wan mu’ɛ nini la Naayinɛ tuuma ge me tara halesoma daarewoo.​—2 Pe. 3:11, 12.

15. To wan eŋɛ la wani kan basɛ ti kolekpabɛ’ɛsi la pumpɔreŋɔ yɛla pã’asɛ tɔ? (1 Tesalonika 5:21)

¹⁵ La kan yue, sɛba n giiseri Naayinɛ la wan pɔsɛ tɔɣera ti: “Suma’asum la fai boi mɛ!” (1 Tes. 5:3) Kolekpabɛ’ɛsi la wan basɛ ti pumpɔreŋɔ yɛla pirɛ tingɔŋɔ wa zuo ge me pã’asɛ nɛreba zo’e zo’e. (Lil. 16:13, 14) Ge tomam me? Ba kan ta’an pã’asɛ tɔ to san ‘maɣesɛ yelese’ere woo bisɛ.’ (Kaalɛ 1 Tesalonika 5:21) Greek yelebire la ti ba pa’alɛ de vuurɛ ‘maɣesɛ’ la ta’an dɛna sose’ere poan ti nɛreba ni maɣesɛ salema la salenpɛɛlega ti ba bisɛ nyaa la ani soŋa. Bala la, la nari ti to maɣesɛ bisɛ sɛla ti to kɛlesa bii wuna la ani soŋa. Yele dena yuun pakɛ Tesalonikadoma la mɛ. La yele me wan pakɛ to paa yele yele wuu mɛlesekatɛ la n pɔ̃ri la. Ton wan yeen sakɛ bo nɛreba n yeti sɛla la, la nari ti to tuɣum dekɛ ton kaalɛ ge wuna sɛla la makɛ la Baabule la, la tigere la n pa’alɛ sɛla la bisɛ. To san ita bala, kolekpabɛ’ɛsi la pumpɔreŋɔ yɛla la kan ta’an pã’asɛ tɔ.​—Mag. 14:15; 1 Tim. 4:1.

16. To tari la bem beere sa’am puti’irɛ ge to maasum ti to eŋɛ la bem?

¹⁶ To mi ti Yehowa nɛreba wan nyɛ faarɛ mɛlesekatɛ la poan. Ge to woo ka mi sɛla n wan eŋɛ beere sa’am. (Yam. 4:14) To san tara yelemɛŋɛrɛ ge san puɣum ki ge ti mɛlesekatɛ la wa’ana, to wan nyɛ daarewoo nyɔvore. Looredoma la wan ta naɛ la Yezu bɔna saazuo. Piisi sise’esi la me wan ta bɔna Paradiisi tingɔŋɔ wa zuo. Basɛ ya ti to za’a waabi puti’irɛ kɔ’ɔn bɔna beere sa’am puti’irɛ la poan ge maasum gura Yehowa dabeserɛ la!