Baabule la ka pa’alɛ sɛla n sɔi. Ge la pa’alɛ tɔ yelese’a n yuun ta’an basɛ ni ti ba kɔ’ɛ ba puti’irɛ bala.

Maleka n yuun yele Mary ti a wan nyɔkɛ puurɛ dɔɣɛ bia. Se’em ma’a ti maleka la yuun yele en bala la, Mary la Yosef yuun kɛ̃’ɛri la Nazaret, n de Yosef tiŋa n boi Galilee. (Lu. 1:26-31; 2:4) Pooren, ba yuun ze’ele la Egypt lebe Nazaret. Ba yuun uge Yezu la bilam ti a dɛna Nazaret tiŋa nɛra. (Mt. 2:19-23) Bala n sɔi ti to san tɔɣera Yezu, Yosef la Mary yele, to ni kɔ’ɔn ti’isa la Nazaret yele.

Mary suɔ Elizabet me yuun kɛ̃’ɛri la Yuda tiŋa. Elizabet yuun dela malemadaana Zekaria pɔɣa ge nyaa ta dɛna Yon Ko’om Musegadaana la ma. (Lu. 1:5, 9, 13, 36) Mary yuun ta kaɛ Elizabet bisɛ mɛ Yuda tiŋa ge bɔna bilam paɛ ŋmaresi sitã. Bala pooren ti Mary nyaa lebe Nazaret. (Lu. 1:39, 40, 56) Bala n sɔi ti Mary yuun mina Yuda tiŋa la soŋa soŋa la.

Pooren, Yosef yuun ze’ele la Nazaret keŋɛ Betlehem se’ere n sɔi la, Arom gɔmena la yuun bo la nɔɔrɛ ti ‘nɛra woo keŋɛ amea tiŋa’ ta ‘gulesɛ a yu’urɛ.’ Betlehem me yuun dela tinsɛka ti ba tɔɣɛ biŋe ti ba wan dɔɣɛ Mɛzaaya la bim. (Lu. 2:3, 4; 1 Sa. 17:15; 20:6; Mik. 5:2) Mary n yuun dɔɣɛ Yezu la, Yosef yuun kan ta’an basɛ ti Mary dekɛ bilia wa keŋɛ sarɔwoko lebe Nazaret. Ba yuun yee la Betlehem, n yuun de wuu miila 6 (bii 9 km) yɛ’ɛsa Yerusalem. La wan ana soŋa ti ba tuɣum dekɛ bilia wa keŋɛ pu’usegɔ deo la poan ta bo bo’olum wuu lɔɔ la n pa’alɛ se’em la.​—Mal. 12:2, 6-8; Lu. 2:22-24.

Naayinɛ maleka la yuun puɣum yele Mary ti Naayinɛ wan dekɛ ‘David na’am kuka la’ bo a bia la ti a ‘dɛna Naba bisera.’ Daanse’ere Yosef la Mary yuun ti’iseri ti la wan dɛna yelesonɛ ti ba dɔɣɛ Yezu David tiŋa poan. (Lu. 1:32, 33; 2:11, 17) Ba me yuun ta’an ti’isa ti la wan ana soŋa ti ba gu’use fii ge bisɛ Naayinɛ n wan le yele ba ti ba eŋɛ sɛla.

To ka mi ban yuun boi Betlehem yue se’em, se’em ma’a ti sɛba n biseri ŋmarebɛa la paɛ bim la. Ge sankaŋa la, nɛra la a pɔɣa wa yuun kɛ̃’ɛri la ba yire ge ti ba dayɔa la me yuun dɛna ‘bia’ daɣɛ bilia. (Mt. 2:11) La ta’an dɛna ti ba yuun ka boti ba lebe Nazaret ge ba tuɣum bɔta la ba bɔna Betlehem yuuma fii ta’an baŋɛ tiŋa la soŋa.

Herod yuun bo la nɔɔrɛ ti ba ‘keŋɛ Betlehem ta ku budibito seto n ka gaŋɛ yuuma ayi.’ (Mt. 2:16) Maleka yuun kaɣɛ Yosef mɛ yele wa poan. Bala la, Yosef la Mary yuun dekɛ Yezu zɔ keŋɛ la Egypt ta bɔna bim ta paɛ se’em ma’a ti Herod yuun ki. Bala pooren Yosef la a deodoma yuun keŋɛ la Nazaret. Beni n sɔi ti ba yuun ka lebe Betlehem? Se’ere n sɔi la, Herod dayɔa Arkelaus n yuun biseri Yudea tiŋa ge me dɛna putɔa. Bala la, maleka la yuun kaɣɛ Yosef ti a da lebe tiŋa wa poan. Nazaret yuun dela zɛsoŋa ti Yosef wan ta’an uge Yezu bim ti a pu’usa Naayinɛ.​—Mt. 2:19-22; 13:55; Lu. 2:39, 52.

Yezu kum la yuun bo nɛreba la yɔ’ɔ ti ba keŋɛ saazuo. Ge Yosef n yuun ki ge ti Yezu nyaa ki la zuo, ba wan ta isige en ti a bɔna la tingɔŋɔ wa zuo. Nɛreba zo’e zo’e wan nyɛ Yosef ge soke en baŋɛ sɛla n sɔi ti Mary n yuun dɔɣɛ Yezu la, eŋa la Mary yuun yee Betlehem.