La dela to tara sakerɛ ta’an pu’usa Yehowa. Ge Baabule la yeti ‘daɣɛ nɛra woo n tari sakerɛ.’ (2 Tes. 3:2) Tuuntuna Paul yuun tɔɣeri la ‘putɔpa la nɛresɛba n tuni be’em’ giisa en la yele, ti la nara ti Naayinɛ faaɛ en ba nu’usin basɛ. Ge eŋa n yuun tɔɣɛ sakerɛ yele se’em la dela nɛra woo tara dɛ. Nɛreba basɛba ka sakɛ ti Naaŋɔdaana boi dɛna Naayinɛ. (Arom 1:20) Nɛreba basɛba me ta’an ti’isa ti bamam n yeen sakɛ ti paŋadaana boi la pa’alɛ ti ba tari sakerɛ. Ge to kan ta’an dekɛ sakerɛ denɛ ma’a pu’usa Yehowa.

La nari ti to sakɛ to suuren ti Yehowa boi ge ti a me wan kã bo sɛba woo n tari sakerɛ a poan la. (Heb. 11:6) Sakerɛ laɣum pa’asɛ zilam vo’osum wɔla la poan mɛ. Nɛra ta’an zusɛ Yehowa nyɛ a zilam vo’osum la. (Lu. 11:​9, 10, 13) Sore deyima ti to wan ta’an nyɛ vo’osum la dela to kaalɛ Naayinɛ Yelesum la. To san kaalɛ ba’asɛ, to ti’isɛ taɣesɛ ge tiregɛ dekɛ ton zamesɛ sɛla la tum tuuma. To san ita bala, Yehowa vo’osum la wan soŋɛ tɔ ti to vɔna to vom ti la makɛ la eŋa n boti se’em.