1. Bem n soŋeri Yehowa yamesi ti ba kalum pu’usa en la ka pakɛ la yeledaaŋɔ la za’a?

 BAABULE la yeti, to kɔ’ɔn bɔna la ‘biɣi biɣi saŋa’ poan. (2 Tim. 3:1) Yeledaaŋɔ se’a n paari nɛreba Sitaana tingɔŋɔ wa poan la me paari Yehowa yamesi mɛ. Ba me kɔ’ɔn yaɛ to mɛ se’ere n sɔi la, to pu’useri la Yehowa. Bem n soŋeri tɔ ti to kelum pu’usa Yehowa la ka pakɛ la yeledaaŋɔ ana wa za’a? Yele deyima dela, Yehowa tabelɛ soŋɛ to mɛ. To me mi ti ‘a boi mɛ.’—Yer. 10:10; 2 Tim. 1:12.

2. Ton mi ti Yehowa boi mɛ la wan soŋɛ to la wani?

² Yehowa nyɛti yelese’a woo n paari to mɛ ge me ni kɔ’ɔn bɔta ti a soŋɛ tɔ. (2 Yel. 16:9; Ym. 23:4) To san tɛ̃ra ti Naayinɛ fabeli to yele ge me ni kɔ’ɔn bɔta ti a soŋɛ tɔ, la wan bo to paŋa ti to ta’an ŋmibera yeledaaŋɔ poan. To bisɛ bala n yuun soŋɛ Naba David se’em.

3. David n yuun yeti ‘Yehowa boi mɛ’ la vuurɛ?

³ David yuun mi Yehowa mɛ ge dekɛ amea delum En. Naba Saul la nɛreba basɛba n yuun boti ba ku David la, a yuun zusɛ la Yehowa ti a soŋɛ en. (Ym. 18:6) Yehowa n yuun kelese David zusega ge faaɛ en basɛ la, a yuun yeti: ‘Yehowa boi mɛ!’ (Ym. 18:46) David n yuun yele bala la vuurɛ? A yuun basɛ ti la niɛ peelumi ti Yehowa n de yelemɛŋɛrɛ Naayinɛ la ge me ‘ni kɔ’ɔn bɔta ti a soŋɛ a yamesi.’ David yuun baŋɛ ti Yehowa mi yelese’a n paari en mɛ ge me kɔ’ɔn maasum ti a soŋɛ en. Bala n  yuun kpemese David giila ti a kɔ’ɔn bɔta ti a pɛ̃ɣera en la.—Ym. 18:​28, 29, 49.

4. To san baŋɛ ti Yehowa boi, la wan soŋɛ to la wani?

⁴ Ton tari suure lua ti Yehowa boi mɛ la wan soŋɛ tɔ ti to kɔ’ɔn mu’ɛ nini pu’usa en. To wan tara paŋa ŋmibera yeledaaŋɔ poan ge me kɔ’ɔn pu’usa en wuusa. To me wan lu to suure ti to kelum ana du’a du’a la Yehowa.

NAAYINƐ WAN BO HO PAŊA

5. Yeledaaŋɔ san paɛ tɔ, bem n wan basɛ ti to tara sukpe’ene? (Filipi 4:13)

⁵ To san baŋɛ ti Yehowa boi mɛ ge me wan ta’an soŋɛ tɔ, la wan basɛ ti to ta’an ŋmibera yeledaaŋɔ woo poan. A wan ta’an soŋɛ tɔ yeledaaŋɔ poan se’ere n sɔi la sɛsɛla ka kpe’em bo en. A dela Paŋa Za’adaana, a wan bo to paŋa ti to ta’an ŋmibe. (Kaalɛ Filipi 4:13.) Bala basɛ ti to tara la sukpe’ene to daaŋɔ woo poan. Yehowa san tabelɛ soŋɛ tɔ yeledaaŋɔ poan, to ni tara la suure lua ti a wan le soŋɛ tɔ yeledaaŋɔ ase’a me poan.

6. Bem yɛla n yuun paɛ David a bunbilimen ti la basɛ ti a tara suure lua Yehowa poan?

⁶ Basɛ ya ti to geele yɛla ayi David vom poan n yuun basɛ ti a kɔ’ɔn dekɛ amea delum Yehowa saŋa woo. David n yuun de bia la, saseŋa la gbeɣenɛ n yuun tiregɛ ti ba nyɔkɛ a piisi. David yuun dekɛ la sukpe’ene tabegɛ ba ta faaɛ a piisi la basɛ. David yuun ka ti’isɛ ti eŋa mea paŋa ti a yuun dekɛ tum tuunɛ wa. A yuun baŋɛ ti la dela Yehowa n yuun soŋɛ en. (1 Sa. 17:​34-37) David yuun ka makɛ tamɛ yele wa. Eŋa n yuun ti’isa taɣesa yele ana wa la, yuun basɛ ti a tara suure lua ti Yehowa wan bo en paŋa beere sa’am.

7. David puti’irɛ yuun boi la bɛ ge bala yuun soŋɛ en la wani ti a zabɛ nyaŋɛ Goliat?

⁷ David n yuun de bunbilipaalega la, a yuun keŋɛ la zɛ’an ti Israeldoma la yuun tiisum ti ba zabɛ la Filistidoma. Eŋa n yuun paɛ bim la, a yuun baŋɛ ti dabeem n tari Israel sogɛpa la, se’ere n sɔi la Filisti buraa Goliat n yuun yese na yɛta ti eŋa ‘ka bisɛ nyɛ Israel pɛɛntɛɛreba la.’ (1 Sa. 17:​10, 11) Sɛla n sɔi ti dabeem yuun tara Israel sogɛpa la dela, ban nyɛ Goliat n yuun karegɛ, daɣelum ge me tɔɣera yelese’a la. (1 Sa. 17:​24, 25) Ge David yuun ka basɛ ti a puti’irɛ bɔna bilam. David yuun bisɛ ti la yuun daɣɛ Israeldoma la ti Goliat ɛ̃regera ge la dela ‘Naayinɛ vua la.’ (1 Sa. 17:26) David yuun kɔ’ɔn ti’isa la Yehowa yele. A yuun tari sakerɛ ti Naayinɛ n yuun soŋɛ en se’em ma’a ti a dɛna dunkeena la, a me wan soŋɛ en zaberɛ wa poan. David n yuun mi ti Naayinɛ wan soŋɛ en la, a yuun zabɛ mɛ la Goliat nyaŋɛ en!—1 Sa. 17:​45-51.

8. Bem n wan basɛ ti to tara sakerɛ ti Yehowa wan soŋɛ tɔ? (Bisɛ foote la.)

⁸ To san tɛ̃ra ti Naayinɛ kɔ’ɔn maasum mɛ ti a soŋɛ tɔ, la wan basɛ ti to ta’an ŋmibe daaŋɔ poan. (Ym. 118:6) To san ti’isa taɣesa Naayinɛ n tabelɛ eŋɛ sɛla bo to, bala wan basɛ ti to tara suure lua a poan. Kaalɛ yelese’a n yuun eŋɛ Baabule poan n pa’alɛ Yehowa n yuun soŋɛ a yamesi se’em. (Isa. 37:​17, 33-37) Ge me bisɛ yelese’a n boi jw.org baŋɛ Yehowa n soŋɛ mabiisi se’em. Leyɛ’ɛsa, ni tɛ̃ra sansɛka woo ti Yehowa eŋɛ sɛla  soŋɛ hɔ. Daanse’ere ho ta’an ti’isɛ ti yelekãtɛ ka tabelɛ paɛ hɔ wuu Yehowa n yuun faaɛ David saseŋa la gbeɣenɛ nu’usin se’em la. Ge yelemɛŋɛrɛ la dela, Yehowa tabelɛ eŋɛ yɛla zo’e zo’e bo ho mɛ! A basɛ ti ho dɛna la a zɔ. (Yon 6:44) Nananawa, a kelum soŋera ho mɛ ti ho bɔna yelemɛŋɛrɛ la poan. Zusɛ Yehowa ti a soŋɛ hɔ ti ho tɛ̃ra sansɛka ti a ni kelese ho zusega, bo ho yelese’a n pakɛ hɔ ge me ni soŋɛ hɔ yele poan la. Ho san ti’isa yele ana wa, la wan soŋɛ hɔ ti ho sakerɛ kpe’em ti Yehowa wan kelum soŋera hɔ.

9. Daaŋɔ san paɛ tɔ, la nari ti to tɛ̃ra la bem? (Magaha 27:11)

⁹ To san bisa nyɛta Yehowa ti a sirum boi mɛ, la wan soŋɛ tɔ ti dabeem kan tara tɔ. Wani wani? La wan basɛ ti to baŋɛ ti, ton boti to tara yelemɛŋɛrɛ bɔ’ɔra Yehowa la zuo ti Sitaana daana tɔ. Bala la, yele la dela Yehowa me yele. Sitaana yeti yeledaaŋɔ san paɛ tɔ to wan pisegɛ Yehowa basɛ. (Yob 1:​10, 11; kaalɛ Magaha 27:11.) Bala la, to san ka nyaŋɛ ŋmibe daaŋɔ poan, la wan daam Yehowa. Ge to san nyaŋɛ ŋmibe, la pa’alɛ ti to nɔŋɛ en mɛ. La wan basɛ ti Sitaana n yele sɛla la dɛna pumpɔreŋɔ. La dela gɔmɛt n giiseri hɔ, bii nɔŋɔ pɛɛlega n kɛ̃ hɔ bii nɛreba n ka kelese Na’am la yelesoma la bii yeledaaŋɔ ase’a n paari hɔ? La san dɛna bala, basɛ ti la dɛna yɔ’ɔ bo ho ti ho basɛ ti Yehowa puurɛ pee. Le tɛ̃ra ti, Naayinɛ kan basɛ ti Sitaana pã’asɛ hɔ ta paɛ sansɛka ti homea kan ta’an sɛ ze’ele. (1 Ko. 10:13) A wan bo ho paŋa ti ho ta’an ŋmibe.

NAAYINƐ WAN KÃ BO HO

10. Naayinɛ wan eŋɛ la bem bo sɛba n pu’useri en la?

¹⁰ Yehowa kã’ari bɔ’ɔra sɛba woo n pu’useri en la mɛ. (Heb. 11:6) A ni bo to la suma’asum ge soŋɛ tɔ ti to basɛ ti sɛla ti to tara seke to. A me wan bo to  daarewoo nyɔvore beere sa’am. To tari suure lua ti Yehowa boti la a kã bo to ge me tara paŋa n wan eŋɛ bala. Bala zuo ti to kɔ’ɔn mu’ɛ nini pu’usa en wuu diimi Kristakɔma la. Timoti yuun eŋɛ la bala yuun kɔbesɛka n deŋɛ la poan.—Heb. 6:​10-12.

11. Beni n sɔi ti Timoti yuun tuna kpe’eŋo kpe’eŋo tansugere la poan? (1 Timoti 4:10)

¹¹ Kaalɛ 1 Timoti 4:10. Timoti yuun tari sakerɛ ti Naayinɛ wan kã bo en. Bala la, a yuun kɔ’ɔn mu’ɛ la nini tuna bɔ’ɔra Naayinɛ la nɛreba. A yuun eŋɛ la bem? Tuuntuna Paul yuun kpemese a giila ti a ta’an pa’ala soŋa soŋa tansugere, la na’am mɔɔlegɔ poan. Tuuntuna Paul yuun yele Timoti ti a dɛna makɛsonɛ bɔ’ɔra bunbibisi la bunkureba za’a. A yuun bo en la tuunɛ n kpe’em ti a ka’ana mabiisi la nɔŋerɛ sore poan. (1 Tim. 4:​11-16; 2 Tim. 4:​1-5) La boi bim ti nɛreba la puurɛ ni ka pee la Timoti n tuni tuunse’a la ge a yuun tari suure lua ti Yehowa wan kã bo en.—Arom 2:​6, 7.

12. Beni n sɔi ti keedoma kɔ’ɔn mu’ɛ nini tuna tansugere la poan? (Bisɛ foote la.)

¹² Zina beere wa, keendoma me tari suure lua ti Yehowa nyɛti ba tuunsoma la, ti a nini me tiɣɛ la a. Keendoma biseri la Yehowa piisi, pa’ala ba ge me mɔɔla Na’am yelesoma la. Basɛba soŋeri la mɛa tuuma la yeledi’ire yɛla, ti basɛba me pa’asɛ Imma’asum Yɛla Bisegadoma poan. Keendoma wa mi ti tansugere la dela Yehowa denɛ, daɣɛ nɛresaala denɛ. Ban mi bala la zuo, ba kɔ’ɔn yese la ba suuren tuna tansugere la poan ge mina ti Yehowa wan yɔ ba.—Kol. 3:​23, 24.

13. La ni ana Yehowa la wani la hon iti sɛla bɔ’ɔra en la?

¹³ Daɣɛ nɛra woo n wan ta’an dɛna keema. Ge to za’a wan ta’an eŋɛ sɛla bo  Yehowa. Yehowa puurɛ ni pee mɛ la ton tiregeri pu’usa en la. A nyɛti ton ni yese to suuren tara ligeri soŋera tingole wa za’a na’am mɔɔlegɔ tuuma la mɛ. To san puɣum ka ta’an bo zo’e, a puurɛ ni pee mɛ. Valum san puɣum tara tɔ ge ti to tiregɛ zɛ̃kɛ nu’o bo lebesego zamesegɔ poan bii di sugeri bo nɛresɛba n tue to la, a puurɛ ni pee mɛ. Hali la san ana wuu hon tum sɛla bo Yehowa la pɔ’ɛ mɛ, tara suure lua ti a nini tiɣɛ mɛ. A nɔŋɛ ho mɛ, a me wan kã bo ho.—Lu. 21:​1-4.

KƆ’ƆN ANA DU’A DU’A LA NAAYINƐ

14. To san tara bɔnsoŋa la Yehowa, la wan soŋɛ to la wani ti to tara sakerɛ? (Bisɛ foote la.)

¹⁴ To san tara bɔnsoŋa la Yehowa, la wan dɛna naana ti to tara sakerɛ bɔ’ɔra en. Yosef yuun eŋɛ la bala. Eŋa n yuun tari bɔnsoŋa la Naayinɛ la zuo, a yuun ka boti a eŋɛ sɛla n wan sa’am A suure. (Pin. 39:9) To san wan ta’an tara bɔnsoŋa la Yehowa, la nari ti to zusa en ge kaala Baabule la. Bala wan basɛ ti to zɔtɔ nyɔka la tara paŋa wuu Yosef la. To san tara bɔnsoŋa la Yehowa, to kan eŋɛ sɛla n wan sa’am A suure.—Yam. 4:8.

15. To wan ta’an zamesɛ la bem la sɛla n yuun paɛ Israeldoma la pɔɣetia la poan la? (Heb. 3:12)

¹⁵ Nɛresɛba n zaɣesɛ ti Yehowa boi mɛ la kan ta’an tara yelemɛŋɛrɛ bɔ’ɔra en. To geele Israeldoma la n yuun boi goo la poan la yele la bisɛ. Ba yuun mi ti Yehowa boi mɛ ge ba yuun tari la puti’ira ayi ayi ti A kan bo ba yelese’a n pakɛ ba. Hali ba yuun soke ti: ‘Yehowa mea tuɣum bɔna la to me yoi?’ (Yɛh. 17:​2, 7) Pooren, ba yuun zaɣesɛ la Naayinɛ. Yelemɛŋɛrɛ, to kan bɔta ti to tɔɣesɛ ba halebe’o wa.—Kaalɛ Hebru 3:12.

16. Bem n wan ta’an basɛ ti la kpe’em bo to ti to tara sakerɛ?

¹⁶ Tingɔŋɔ la basɛ ti la kpe’em bo to mɛ ti to ana du’a du’a la Yehowa. Nɛreba  zo’e zo’e ka sakɛ ti Naayinɛ boi. Saŋa zo’e zo’e la, nɛresɛba n ni zaɣesɛ Naayinɛ pa’alegɔ la ni ana wuu ba tari la vom somɔ la. To san ni nyɛta yele ana, la ni basɛ ti to sakerɛ n miina. La boi bim ti to tari sakerɛ ti Naayinɛ boi ge to ta’an ni ti’isa buyi buyi ti a ta’an kan soŋɛ tɔ. Mina n gulesɛ Yooma 73 me yuun tabelɛ ti’isɛ la bala. A yuun bisɛ ti sɛba n zaɣesɛ Naayinɛ pa’alegɔ la kelum tara la pupeelum ba vom poan. Bala yuun basɛ ti a pɔsɛ ti’isa ti la yele ka pakɛ ti a pu’usa Yehowa.—Ym. 73:​11-13.

17. Bem n wan soŋɛ tɔ ti to kɔ’ɔn ana du’a du’a la Yehowa?

¹⁷ Bem n yuun soŋɛ yuumadaana la ti a tee a puti’irɛ? A yuun ti’isɛ taɣesɛ la sɛla n wan paɛ sɛba n zaɣesɛ Yehowa la. (Ym. 73:​18, 19, 27) A me le malum ti’isɛ la nyuurɔ seto ti a wan nyɛ a san pu’usa Yehowa. (Ym. 73:24) Tomam me nari ti to ti’isɛ bisɛ ton wan nyɛ kã’a se’em to san pu’usa Yehowa. Dekɛ bala makɛ to vom n wan ana se’em to san ka pu’usa Yehowa. To san ita bala, la wan soŋɛ tɔ ti to tara sakerɛ wuu yuumadaana la n yeti: ‘San dɛna mam, Naayinɛ ti mam wan lɛm la n de sɛla n ani soŋa bɔ’ɔra mam.’—Ym. 73:28.

18. Beni n sɔi ti to ka tara dabeem la sɛla n wan eŋɛ beere sa’am?

¹⁸ To san kɔ’ɔn tuna bɔ’ɔra ‘yelemɛŋɛrɛ Naayinɛ wa n vɔi la,’ to wan ta’an nyaŋɛ daaŋɔ se’a woo n wan paɛ tɔ ba’asegɔ dabesa wa poan la. (1 Tes. 1:9) To Naayinɛ la fabeli to yele mɛ, a me wan soŋɛ tɔ. A yuun boi la diimi Kristakɔma la mɛ, a me wan bɔna la tomam zina beere wa. La kan yue, mɛlesekãtɛ la wan pɔsɛ. Ge to kan bɔna to ma’a, Yehowa wan soŋɛ tɔ. (Isa. 41:10) Basɛ ya ti to za’a ‘dekɛ sukpe’ene yeti: Yehowa n de mam soŋera, mam kan zɔta dabeem.’—Heb. 13:​5, 6.