1-2. Ho san nan ka muse ko’om, beni n sɔi ti la ka nara ti ho basɛ ti ho giila kɔ’ɔsɛ? (Bisɛ gɔŋɔ la nɛŋa foote.)

 HO SAN bɔta ti ho muse ko’om, bala dela putɛsonɛ. Hon wan bɔta ti ho muse ko’om nananawa? Ho san bisɛ ti ho maasum ya, ti keendoma la me sakɛ, da gu’um, kɔ’ɔn eŋɛ kalam dekɛ yɔ’ɔ la muse ko’om. Ho san muse ko’om ho wan tara vom somɔ pu’usa Yehowa.

² Ge ba tabelɛ yele ho ti ho eŋɛ yɛla ase’a ge nyaa muse ko’om? Bii homea n baŋɛ ti la nari ti ho eŋɛ yɛla ase’a? La san dɛna bala, da basɛ ti ho giila kɔ’ɔsɛ. Ho de bia bii bunkutɛ woo, ho wan ta’an maasum homea soŋa ge nyaa ta muse ko’om.

3. Etiopia nayire kpɛ’ɛma la yuun soke Filip la bem ge bem sokere n nyaa pakɛ? (Tooma 8:36, 38)

³ Kaalɛ Tooma 8:36, 38. Etiopia nayire kpɛ’ɛma yuun soke na’am mɔɔlegɔdaana Filip yeti: ‘Bem n wan gu mam ti n kan ta’an muse ko’om?’ Etiopia buraa la yuun boti la a muse ko’om ge a yuun sirum maasum ya ti a muse ko’om?

4. Etiopia buraa la yuun eŋɛ la bem pa’alɛ ti a kɔ’ɔn bɔta la a zamesa?

⁴ Etiopia buraa la yuun ‘keŋɛ la Yerusalem ta pu’usɛ.’ (Tm. 8:27) Daanse’ere a yuun dela mina n sakɛ Yudadoma pu’usegɔ yɛla. Nɔkpe’ene kai ti a yuun zamesɛ la Hebru zilam Gulesegɔ la ta’an baŋɛ Yehowa. Ge a yuun kelum bɔta la a zamesɛ yɛla pa’asɛ. Yelemɛŋɛrɛ, Filip n yuun ta seke buraa wa sore zuo la a yuun nyɛ en ti a ita la bem? A yuun kaali la nɔdɛ’ɛsa Isaiah gulesegɔ la. (Tm. 8:28) A yuun zamesɛ la yelekãra. Nayire kpɛ’ɛma wa yuun ka  yeen bɔta la a zamesɛ Baabule yelepiɣesi ge a yuun boti la a zamesɛ pa’asɛ.

5. Etiopia buraa la yuun tari sɛla ti a zamesɛ la tuna tuuma la wani?

⁵ Buraa wa yuun dela kpɛ’ɛma tuna bɔ’ɔra Etiopia pɔɣenaba Kandis, eŋa n yuun ‘biseri a tuulum lɔɣɔrɔ la woo.’ (Tm. 8:27) Bala pa’alɛ ti a yuun tari la tuuma zo’e zo’e. Ge hali la bala za’a, a yuun nyɛti nɛŋa mɛ pu’usa Yehowa. A yuun ka yeen bɔta la a zamesɛ yelemɛŋɛrɛ la ge a yuun tari sɛla ti a zamesa la tuna la tuuma. Bala la, a yuun ze’ele la Etiopia keŋɛ sarɔɔ woko ta pu’usɛ Yehowa Yerusalem tiŋa poan. A yuun sa’am la ligeri la saŋa zo’e zo’e ta’an keŋɛ ge buraa wa yuun kɔ’ɔn bɔta la a pu’usa Yehowa la ka pakɛ la, la wan ana se’em.

6-7. Etiopia buraa la yuun tari nɔŋerɛ zo’e zo’e la wani bɔ’ɔra Yehowa?

⁶ Etiopia buraa la yuun zamesɛ la yɛla zo’e zo’e Filip zɛ’an. Ba poan ayima dela Yezu n yuun de Mɛzaaya la. (Tm. 8:34, 35) Nayire kpɛ’ɛma wa puurɛ yuun pee mɛ la eŋa n zamesɛ baŋɛ Yezu n eŋɛ sɛla bo en la. Eŋa n yuun baŋɛ wana wa la, a yuun nyaa eŋɛ la bem? A yuun ta’an kelum boi ni a bɔŋa la poan dɛna nɛra n sakɛ Yudadoma pu’usegɔ yɛla ge a yuun tari la nɔŋerɛ zo’e zo’e bɔ’ɔra Yehowa la a Dayɔa la. Bala yuun basɛ ti a tee la a vom yɛla ase’a ge nyaa muse ko’om dɛna Yezu Krista podɔla. Filip n yuun baŋɛ ti buraa la maasum mɛ la, a muse en la ko’om.

⁷ Ho san tɔɣesa Etiopia buraa wa makesonɛ la, ho me ta’an maasum muse ko’om. Ho me ta’an lu suure yeti, ‘Bem n wan ta’an gu mam ti n kan muse ko’om?’ Basɛ ya ti to bisɛ hon wan ta’an eŋɛ se’em tɔɣesa eŋa n yuun eŋɛ sɛla la: A yuun kɔ’ɔn zamesa mɛ, tara eŋa n zamesɛ sɛla la tuna tuuma ge me kɔ’ɔn tara nɔŋerɛ zo’e zo’e bɔ’ɔra Naayinɛ.

8. Ho wan ta’an dekɛ Yon 17:3 tum tuuma la wani?

⁸ Kaalɛ Yon 17:3. Yezu n yuun yele sɛla wa, soŋɛ hon ti ho me bɔta ti ho zamesɛ Baabule la? To zo’e zo’e tari la putɛdenɛ. Ge yele aŋa mea nɔɔ pa’alɛ to ti to kɔ’ɔn kelum zamesa? Ɛɛ. To kan ta’an yeti to ‘baŋɛ yelemɛŋɛrɛ Naayinɛ’ la yɛla ba’asɛ mɛ. (Pa. 3:11) To wan kelum zamesa a yɛla la bala wuusa. To san kelum zamesa, to wan ana du’a du’a la Yehowa.​—Ym. 73:28.

9. La nari ti to eŋɛ la bem to san ta zamesɛ baŋɛ Baabule yelepiɣesi la?

⁹ Pɔsega la, to ni zamesa la yelepiɣesi  nyaa ta’an baŋɛ Yehowa. Tuuntuna Paul n yuun gulesɛ gɔŋɔ bo Hebrudoma la, a yeti yelepiɣesi zamesegɔ dela ‘pi’ileŋo yɛla.’ A yuun ka zɛregeri ton ‘sakɛ bo yelese’a la.’ A yuun dekɛ dɛ makɛ la bilia n mɔɣerɛ bi’isum se’em la. (Heb. 5:12; 6:1). Ge a yuun yele Kristakɔma woo ti ba yeen da kɔ’ɔn tara yele ana wa ma’a ge ba zamesa Naayinɛ yelekãra la pa’asa. Hon boti ho zamesɛ Baabule yelekãra? Hon boti ho zamesɛ Yehowa, la a puti’irɛ n boti sɛla la pa’asɛ ti ho mi’ilum la zɔ’ɔra?

10. Beni n sɔi ti la kpe’em bo nɛreba basɛba ti ba zamesa?

¹⁰ La kpe’em bo to zo’e zo’e mɛ ti to zamesa. La me ani hon la bala? Hon yuun boi sukuu la, hon yuun ta’an kaala ge zamesa soŋa soŋa? Hon yuun kɔ’ɔn bɔta la ho zamesa ti ho puurɛ me pee la sɛla ti ho zamesa la? Bii la yuun ani ho wuu gɔŋɔ zamesegɔ dela sɛla n kpe’em bo ho? La san ana ho bala la daɣɛ hon ma’a, Yehowa wan soŋɛ hɔ. A ani la kasi ge ti a Pa’alegɔ me di mi’a.

11. Yehowa eŋɛ la bem pa’alɛ ti a dela ‘Pa’alekãtɛ Daana N Gaŋɛ Za’a’?

¹¹ Yehowa n de to ‘Pa’alekãtɛ Daana N Gaŋɛ Za’a.’ (Isa. 30:20, 21) A san pa’ala tɔ, a ni di’isa la suure ge bɔkera lan ani to se’em. A ni bisera la to tuunsoma la. (Ym. 130:3) A me ka boti to eŋɛ sɛla n wan zɔɛ to paŋa. Tɛ̃ra ti eŋa n naam ho zuputo la ti la dɛna bo’olum n boi de to’ore. (Ym. 139:14) A naam to me ti to bɔta ti to zamesa. To Naaŋɔdaana la boti la to tara pupeelum zamesa wuusa. Bala la, la ani soŋa mɛ ti to kɔ’ɔn nɔŋɛ Baabule yelemɛŋɛrɛ nananawa. (1 Pe. 2:2) Tiregɛ bisɛ yelese’a ti ho wan ta’an eŋɛ n de wuu ho kaala ge zamesa Baabule la daarewoo ge da vi’ira. (Yos. 1:8) Yehowa wan soŋɛ hɔ ti ho tara pupeelum ta’an zamesa pa’asa ge ti’isa a yele saŋa woo.

12. Beni n sɔi ti la ana soŋa ti to zamesa Yezu vom la a na’am mɔɔlegɔ tuuma la yele?

¹² Nyɛta nɛŋa ti’isa taɣesa Yezu vom la a na’am mɔɔlegɔ tuuma la yele. Sɛla n wan soŋɛ tɔ ti to ta’an pu’usa Yehowa soŋa soŋa yele yele wuu biɣi biɣi saŋa wa dela to dɔla Yezu nataka la nima nima. (1 Pe. 2:21) Yezu yuun yele a podɔleba la yelese’a n wan paɛ ba. (Lu. 14:27, 28) Ge a yuun tari puti’irɛ ti a podɔleba la me wan nyaŋɛ wuu eŋa n nyaŋɛ se’em la. (Yon 16:33) Zamesɛ baŋɛ Yezu vom yɛla nima nima ge bisɛ hon wan eŋɛ se’em ta’an tɔɣesa en.

13. La nari ti ho zusɛ Yehowa ɛɛra la bem ge beni n sɔi?

¹³ Mi’ilum ma’a ka seke. Se’ere n sɔi ti to ɛɛra mi’ilum dela, la soŋɛ tɔ ti to zamesɛ Yehowa yɛla ge me tara halisoma n de wuu nɔŋerɛ la sakerɛ. (1 Ko. 8:1-3) Ho san zamesa, zusɛ Yehowa ti a soŋɛ hɔ ti ho sakerɛ la malum kpe’em pa’asɛ. (Lu. 17:5) A lebeseri zusega ana taaba mɛ. Hon zameseri Naayinɛ yɛla la wan soŋɛ hɔ ti ho tara sakerɛ ta’an nyɛta nɛŋa tɔlega.​—Yam. 2:26.

14. Tuuntuna Peter pa’alɛ ti la yele pakɛ la wani ti to tara sɛla ti to zamesa la tuna tuuma? (Le bisɛ foote la.)

¹⁴ Tuuntuna Peter tɔɣɛ pa’alɛ la yele n pakɛ se’em ti Krista podɔleba tara yelese’a ti ba zamesa la tuna tuuma. A tɔɣɛ la Baabule poan nɛra Noah yele. Yehowa yuun yele Noah yeti a wan dekɛ kokemɔ sa’am nɛrebɛ’ɛsi la, a dabesa la poan. Noah la a deodoma yuun san yeen mina  ti a yeti a dekɛ la kokemɔ sa’am nɛrebɛ’ɛsi la, bala ma’a kan ta’an faaɛ ba basɛ. Tɛ̃ra ti Peter yuun tɔɣɛ la sansɛka ti Noah ‘yuun kpa’ara ɔɔreŋɔ la.’ (1 Pe. 3:20) Sira, Noah la a deodoma yuun dekɛ la sɛla ti ba zamesɛ Naayinɛ zɛ’an la tum tuuma ta’an kpa ɔɔreŋɔ kãtɛ! (Heb. 11:7) Peter nyaa dekɛ la Noah n yuun eŋɛ sɛla la makɛ la ko’om musega yeti ‘ko’om musega n kɔ’ɔn makɛ la dena wa, n me faari ya basera nananawa.’ (1 Pe. 3:21) Bala la, to ta’an dekɛ hon iti sɛla nananawa maasena ti ho muse ko’om la makɛ la Noah la a deodoma n yuun dekɛ yuuma zo’e zo’e kpa ɔɔreŋɔ la. Bem n nari ti ho eŋɛ ta’an maasum muse ko’om?

15. To wan eŋɛ la bem pa’alɛ ti to sirum basɛ to be’em?

¹⁵ Yelese’ere n deŋɛ nɛŋa ti la nara ti to eŋɛ dela to basɛ to be’em. (Tm. 2:37, 38) To san sirum basɛ to be’em to wan tee. Hon basɛ yɛla ase’a itigɔ n de wuu yalumtuuma, taba dia la yetɔɣepɔ̃’ɔsa n wan basɛ ti Naayinɛ suure sa’am? (1 Ko. 6:9, 10; 2 Ko. 7:1; Ep. 4:29) Ho san ka eŋɛ bala tiregɛ tee. Yele se’em n zameseri ho Baabule la bii ho tansugere keendoma ti ba soŋɛ hɔ. Ho san dɛna bunbilipaalega ge bɔna la ho dɔɣereba, yele ba ti ba soŋɛ hɔ ti ho ta’an basɛ halebe’ero wa n gu’uri ho ti ho kan ta’an muse ko’om la.

16. La nari ti to ita la bem saŋa woo to san bɔta ti to pu’usa Yehowa?

¹⁶ La me le dɛna la ninmɔ’ɔrɛ ti to zamesa Baabule la saŋa woo. Bala pa’alɛ ti to wan kena zamesegɔ ge me bɔ’ɔra lebesego. (Heb. 10:24, 25) Ba me san bo ho yɔ’ɔ ti ho pɔsɛ na’am mɔɔlegɔ, basɛ ti la dɛna saŋa woo tuunɛ bɔ’ɔra hɔ. Ho san mɔ’ɛ nini mɔɔla nyɔvore faarɛ yelesum wa, ho puurɛ me wan pee. (2 Tim. 4:5) Ho san dɛna bunbilipaalega ge naɛ la ho dɔɣereba bɔna, soke homea yeti, ‘Mam dɔɣereba n ni yele mam ti n keŋɛ zamesegɔ bii na’am mɔɔlegɔ? Bii mam mea n ni keŋɛ?’ Ho san ita bala la pa’alɛ ti ho tari la sakerɛ, ti la me pa’alɛ ti ho tari la nɔŋerɛ bɔ’ɔra Yehowa Naayinɛ. Ho san ita bala la dela pu’usegɔ n di mi’a ti ho tara bɔ’ɔra Yehowa. (2 Pe. 3:11; Heb. 13: 15) To san yese to suure poan dekɛ sɛla bo Naayinɛ, bala n peeri a puurɛ. (Dekɛ makɛ 2 Korint 9:7.) To puurɛ n pee la zuo ti to ni mɔ ge dekɛ bo’olum ana bo Yehowa.

17-18. Halɛ dini n wan soŋɛ hɔ ti ho ta’an nyɛ nɛŋa tɔlega ta muse ko’om ge la wan soŋɛ ho la wani? (Magaha 3:3-6)

¹⁷ Hon tiregeri ti ho muse ko’om la zuo, daaŋɔ ta’an paɛ hɔ. Nɛreba basɛba ta’an zɛregera hɔ la hon nyaa sakɛ bo yelese’a la; hali ba ta’an yaɛ hɔ bii giisa hɔ. (2 Tim. 3:12) Saŋa ase’a hon tiregeri ti ho basɛ halebe’ero la, ho ta’an ni ta le lu yele aŋa poan mɛ. Bii ho suure ta’an sa’am la hon ka ta’an eŋɛ sɛla ti ho bɔta la. Bem n wan soŋɛ hɔ ti ho ta’an ŋmibe? La dela hon nɔŋɛ Yehowa la.

¹⁸ Nɔŋerɛ se’ere ti ho tara bɔ’ɔra Yehowa la dela halisonɛ n gani za’a. (Kaalɛ Magaha 3:3-6.) Nɔŋerɛ se’ere ti ho tara bɔ’ɔra Naayinɛ la wan kɔ’ɔn bɔna la bala wuusa hali yeledaaŋɔ san puɣum paara hɔ. Yele me san paɛ hɔ, la kan basɛ ti ho pire lu bii ho giila kɔ’ɔsɛ. Saŋa zo’e zo’e poan, Baabule la ni yeti, Yehowa tari la yelemɛŋɛrɛ nɔŋerɛ bɔ’ɔra a yamesi. Yelemɛŋɛrɛ nɔŋerɛ vuurɛ dela a kan malum zaɣesɛ a yamesi bii a basɛ ba. (Ym. 100:5) Naayinɛ naam ho la a wɔ̃nɛ poan. (Pin. 1:26) Ho wan eŋɛ la bem pa’alɛ ti ho tari nɔŋerɛ kana wa?

19. Ho wan eŋɛ la bem pa’alɛ ti ho puurɛ pee ya la yelese’a woo ti Naayinɛ eŋɛ bo ho la? (Galatia 2:20)

¹⁹ Eŋɛ sɛla ti la pa’alɛ ti ho puurɛ pee mɛ. (1 Tes. 5:18) Dabeserɛ woo ni soke homea yeti, ‘Yehowa eŋɛ la bem pa’alɛ ti a tari nɔŋerɛ bɔ’ɔra mam.’ Ho san baŋɛ bala, doose zusega poan pu’usɛ Yehowa ge purɛ sɛla wana mɔpi ti a eŋɛ bo ho la. Dekɛ yelese’a ti a ita bɔ’ɔra asaala woo la ti la dɛna la a iti bɔ’ɔra la hon, wuu tuuntuna Paul n yuun nyaa ta baŋɛ Yehowa yele se’em la. (Kaalɛ Galatia 2:20.) Soke homea yeti, ‘Mam boti n me eŋɛ pa’alɛ ti mam me nɔŋɛ en?’ Hon tari nɔŋerɛ bɔ’ɔra Yehowa la wan soŋɛ hɔ ti ho ta’an zaɣesɛ be’em woo ge me ta’an ŋmibe wuŋerɛ se’a n paari ho la. La me wan soŋɛ hɔ ti ho ta’an zamesa Baabule la saŋa woo ge tara nɔŋerɛ bɔ’ɔra ho Sɔ la daarewoo.

20. Ho nari ti ho eŋɛ la bem ta’an kã homea bo Yehowa ge beni n sɔi ti la yele pakɛ ti ho eŋɛ bala?

 ²⁰ Pooren, nɔŋerɛ se’ere ti ho tara bɔ’ɔra Yehowa la wan basɛ ti ho yese ho suuren zusɛ en. Ho wan kã homea bo Naayinɛ. Tɛ̃ra ti ho me san kã homea bo Yehowa, ho tari la beere sa’am puti’irɛ la n de ho wan ta’an pu’usa en daarewoo la. Ho san kã homea bo Yehowa ho biŋe la nɔɔrɛ ti ho wan pu’usa Yehowa, hali la san puɣum ana se’em me. La daɣɛ ti ho le malum biŋe nɔɔrɛ leyɛ’ɛsa. Yelemɛŋɛrɛ, to san kã tomea bo Yehowa la dela ninmɔ’ɔrɛ yele. Geele yele dena wa bisɛ: Ho kɔ’ɛ la ho puti’irɛ tum tuuma zo’e zo’e ho vom poan. Ho tum basɛba soŋa mɛ. Ge hon kɔ’ɛ ho puti’irɛ kã homea bo Yehowa la n gani za’a. (Ym. 50:14) Sitaana kɔ’ɔn tiregera mɛ ti a sa’am nɔŋerɛ se’ere ti ho tara bɔ’ɔra ho Sɔ la, ti’isa ti ho kan tara yelemɛŋɛrɛ bɔ’ɔra en. Da bo Sitaana yɔ’ɔ ti a nyaŋɛ hɔ! (Yob 27:5) Hon tari nɔŋerɛ n kpe’em bɔ’ɔra Yehowa la wan soŋɛ hɔ ti ho ta’an pu’usa en ge me ana tapilapi la en daarewoo.

21. Beni n sɔi ti to yeti ko’om musega dela pɔsega n bala?

²¹ Ho san kã homea bo Yehowa ba’asɛ, yele keendoma la n boi ho tansugere la poan la ti ho boti la ho muse ko’om. Kɔ’ɔn tɛ̃ra ti ko’om musega dela pɔsega n bala. La wan basɛ ti ho vɔna daarewoo pu’usa Yehowa. Bala la, tara nɔŋerɛ n kpe’em bɔ’ɔra ho Sɔ la nananawa. Bisɛ yelese’a ti ho wan ita ti ho nɔŋerɛ la pa’asa dabeserɛ woo poan. Ho san ita bala, ho wan ta’an ta muse ko’om. Dadendaarɛ wan dɛna dabesonɛ bo ho. Ge tɛ̃ra ti la dela pɔsega n bala. Basɛ ti nɔŋerɛ la ti ho tara bɔ’ɔra Yehowa la a Dayɔa la kelum kɔ’ɔn pa’asa daarewoo!